ཧིབ་རུ་ལེའུ་ 6 - རྫོང་ཁ་

དད་པ་ལོག་པའི་སྐོར།

^1-2 དེ་འབདཝ་ལས་ ང་བཅས་ཡེ་ཤུ་ཁིརཱིས་ཀྱི་སྐོར་ལས་ གཞི་རིམ་སློབ་སྟོན་ཚུ་ ཧ་གོ་ནི་བཞག་ཞིནམ་ད་ ན་ཁུག་བཅུག་མི་ཆོས་ལུ་ཉན་ཏེ་ ཡར་རྒྱས་འཐོན་འགྱོ་གེ་ གཞི་རིམ་སློབ་སྟོན་ཚུ་ འཆི་བ་ནང་འཁྱིད་མི་ལཱ་ངན་པ་ཚུ་ནང་ལས་སེམས་འགྱུར་ནི་དང་ དཀོན་མཆོག་ལུ་དད་པ་བསྐྱེད་ནི་ ཁྲུས་གསོལ་ཞུ་ནི་ མི་གཞན་གྱི་གུ་ ལགཔ་བཀལ་ཏེ་སྨོན་ལམ་བཏབ་ནི་ ཤི་སོང་མི་ཚུ་གསོན་པོ་ལོང་ནི་ དེ་ལས་མཐའ་མེད་པའི་ཆདཔ་ འདི་ཚུ་གི་སྐོར་ལས་ ད་རུང་ལོག་སྟོན་མི་དགོ་འོང་།

³ ག་དེམ་ཅིག་སྦེ་ དཀོན་མཆོག་གིས་ཐུགས་བཞེས་ཡོད་པ་ཅིན་ ཡོན་ཏན་ དེ་ལས་ཡང་ལྷགཔ་སྦེ་ ང་བཅས་ཀྱི་ཡར་རྒྱས་འཐོན་འགྱོ་ནི་ཨིན།

⁴ མི་ལ་ལུ་ཅིག་ དཀོན་མཆོག་གི་བདེན་པ་གི་སྐོར་ལས་ ལེགས་ཤོམ་སྦེ་ཧ་གོ་ཚུགསཔ་འགྱོ་མི་ ཞིང་ཁམས་ཀྱི་གསོལ་རས་ཀྱི་ཉམས་མྱོང་ཐོབ་མི་ དམ་པའི་ཐུགས་ཉིད་དང་གཅིག་ཁར་བསྡོམས་མི།

⁵ དཀོན་མཆོག་གི་གསུང་དེ་ ག་དེམ་ཅིག་ལེགས་ཤོམ་ཡོདཔ་ཨིན་ན་ཤེས་མི་དང་ མ་འོང་པའི་དུས་ཀྱི་དབང་གི་ཉམས་མྱོང་ཡོད་མི་ཨིན་ཏེ་འབད་རུང་།

⁶ ཤུལ་ལས་ཁོང་དད་པ་ཉམས་འགྱོ་བ་ཅིན་ ཁོང་ ད་རུང་ལོག་འགྱོད་བཤགས་བསྐྱེད་བཅུག་སྟེ་ དད་པ་ནང་ལོག་འོང་བཅུག་ནི་འདི་ ལཱ་ཁག་དྲགས་ཡོད་ ག་ཅི་སྨོ་ཟེར་བ་ཅིན་ མི་དེ་ཚུ་གིས་ ཁོང་རང་གི་དོན་ལུ་ དཀོན་མཆོག་གི་སྲས་འདི་ ད་རུང་ལོག་སྟེ་ ཁྲམ་ཤིང་གུ་བརྐྱངས་ཏེ་བློ་བཙོངམ་ཨིན།

⁷ ཆར་ཆུ་ཐོབ་མི་ས་ཞིང་གིས་ སོ་ནམ་པ་གི་དོན་ལུ་ ལོ་ཐོག་ལེགས་ཤོམ་སྐྱེཝ་ཨིནམ་མ་ཚད་ ས་ཞིང་འདི་གིས་ཡང་ དཀོན་མཆོག་གི་བྱིན་རླབས་ཐོབ་ཨིན།

⁸ དེ་འབདཝ་ད་ ཆར་ཆུ་ཐོབ་མི་ས་ཞིང་འདི་ནང་ལུ་ རྩང་དང་ཟྭོ་ཆག་དེ་ཚུ་སྐྱེ་བ་ཅིན་ ཁུངས་ག་ནི་ཡང་མེདཔ་ཨིན་ འདི་མ་ཚད་ འདི་གུ་དཀོན་མཆོག་གི་ཆདཔ་ཕོག་ནི་གི་ཉེན་ཁ་ཡང་ཡོད་ ལྷག་པར་དུ་ མཐའན་མཇུག་ལུ་འདི་ཚུ་ མེ་སྤར་གཏང་འོང་།

⁹ དབའེ་བྱམས་པའི་སྤུན་ཆ་ཚུ་ ང་བཅས་ཀྱིས་དེ་སྦེ་སླབ་སྟེ་འབད་རུང་ ཁྱེད་ལུ་བལྟཝ་ད་ ཐར་པ་གི་འབྲས་བུ་ལེགས་ཤོམ་ཚུ་ ག་དེ་དྲག་དྲག་ ཁྱེད་ཀྱི་མི་ཚེ་ནང་བཏགས་དོཝ་འོང་ཟེར་ ང་བཅས་རེ་བ་བསྐྱེདཔ་ཨིན།

¹⁰ དཀོན་མཆོག་འདི་ ཕྲང་སྟེ་མཛད་མི་གཅིག་ཨིན་ ཁྱེད་ཀྱིས་ དཀོན་མཆོག་ཁོ་རའི་མི་ཚུ་ལུ་ ཧེ་མ་དང་ད་ལྟོ་ཡང་ ཕན་ཐོགས་བྱིན་ཡོད་མི་གི་ཐོག་ལས་ ཁོ་ལུ་བྱམས་སེམས་བསྐྱེད་ཡོད་མི་དེ་ དཀོན་མཆོག་གི་ཐུགས་ཁ་ལས་མི་ཡལ།

¹¹ འདི་གིས་འབད་ ཁྱེད་རེ་རེ་གིས་ ཁྱེད་ཀྱི་དཀའཝ་སྤྱད་མིའི་ལཱ་དེ་ཚུ་ ཚེ་མ་ཤི་ཚུན་ཚོད་འབད་དེ་ ཁྱེད་ཀྱིས་རེ་བ་བསྐྱེད་དེ་སྒུག་སྡོད་མི་དེ་མ་ཐོབ་ཚུན་ཚོད་ འཕྲོ་མཐུད་དེ་རང་འབད་སྡོད་འོང་ཟེར་ ང་བཅས་ཀྱིས་རེ་ཆ་སྐྱེདཔ་ཨིན།

¹² དེ་ལས་ཁྱེད་ཆ་ཁྱབ་སྒྱིད་ངན་མ་འབད་བར་ དད་པ་བསྐྱེད་དེ་ བཟོད་པ་སྒོམ་པའི་ཐོག་ལས་ དཀོན་མཆོག་གིས་ཁས་བླངས་བཞེས་ཡོད་མི་ ཐོབ་ནི་ཨིན་ཟེར་ སྡོད་མི་ཚུ་གི་དཔེ་བལྟ་སྟེ་སྡོད་འོང་།།

དཀོན་མཆོག་གིས་ཁས་བླངས་བཞེས་ཡོད་མི་དེ་ཏན་ཏན་ཨིན་པའི་སྐོར།

¹³ དཀོན་མཆོག་གིས་ ཨབ་ར་ཧམ་དང་གཅིག་ཁར་ ཁས་བླངས་བཞེས་གནངམ་ད་ ཁོ་ལས་མཐོ་ཤོས་དཀོན་མཆོག་གཞན་ག་ཡང་མེདཔ་ལས་ ཁོ་རང་གིས་ ཨབ་ར་ཧམ་ལུ།

¹⁴ ང་གིས་ཁྱོད་ལུ་ དོན་ལས་རང་ བྱིན་རླབས་བྱིན་ཏེ་ བུ་བརྒྱུད་ལེ་ཤ་འཕྱལ་གཏང་ནི་ཟེར་ དབུ་མནའ་བཞེས་ནུག

¹⁵ དེ་ལས་ ཨབ་ར་ཧམ་གྱིས་ བཟོད་པ་བསྒོམས་ཏེ་རང་ སྒུག་སྡོདཔ་ལས་བརྟེན་ཏེ་ དཀོན་མཆོག་གིས་ཁོ་དང་གཅིག་ཁར་ཁས་བླངས་བཞེས་མི་དེ་ ཁོ་གིས་ཐོབ་ནུག

¹⁶ མི་དེ་ཚུ་གིས་མནའ་འབོཔ་ད་ རྟག་བུ་རང་ རང་ལས་མཐོ་མི་གཅིག་གི་མིང་ནང་མནའ་འབོཔ་ཨིན་ མནའ་འདི་གིས་འབད་ ད་མི་དེ་གིས་བློ་ཕྲང་སླབ་ཨིན་མས་ཟེར་ ཁུངས་བཀལཝ་ཨིན་ དེ་ལས་རྩོད་གཞི་འདི་དེམ་ཅིག་སྦེ་མཇུག་སྡུཝ་ཨིན།

¹⁷ དཀོན་མཆོག་གིས་ ཁོ་རའི་ཁས་བླངས་ཐོབ་མི་ཚུ་ལུ་ ཁོ་གིས་ཁས་བླངས་བཞེས་མི་དེ་ འགྱུར་ནི་མེདཔ་ཨིན་ཟེར་ ཧིང་སང་ས་སྦེ་སྟོན་གནང་ནི་གི་ཐུགས་བསམ་བཞེས་ཏེ་ ཁོ་གིས་དབུ་མནའ་བཞེས་ནུག

¹⁸ དཀོན་མཆོག་གིས་རྫུན་མ་རྩ་ལས་ར་མི་གསུངསམ་ལས་བརྟེན་ ཁོ་གིས་བཞེས་མི་ཁས་བླངས་དང་དབུ་མནའ་གཉིས་ཀུ་ ནམ་ཡང་འགྱུར་བ་མེདཔ་ཨིན་ འདི་གིས་འབད་ ང་བཅས་ཀྱི་གདོང་ལས་ཡོད་མི་རེ་བ་དེ་ལུ་ དད་པ་སྒྲིང་སྒྲིང་སྦེ་བསྐྱེད་དེ་ ང་བཅས་དཀོན་མཆོག་ལུ་སྐྱབས་འཚོལ་ཏེ་འོང་མི་ཆ་ཁྱབ་ཀྱིས་ སེམས་གསོ་དང་སྟོབས་ཤུགས་ཐོབ་ཨིན།

¹⁹ ང་བཅས་སྲོག་གི་དོན་ལུ་ཨ་ནི་རེ་བ་དེ་ གྲུ་གཟིངས་ཀྱི་ཀོ་མ་བཟུམ་སྦེ་ བློ་གཏད་ས་བརྟན་ཏོག་ཏོ་དང་སྒྲིང་སྒྲིང་སྦེ་ཡོདཔ་མ་ཚད་ དཀོན་མཆོག་དང་མིའི་བར་ན་ བཞག་མིའི་ཡོལ་ལི་དེ་ཕྱེ་སྟེ་ དཀོན་མཆོག་གི་སྐུ་མདུན་ལུ་ཡོད་པའི་ས་གནས་རྩ་ཆེ་ཤོས་ནང་ འཁྱིད་འགྱོཝ་ཨིན།

²⁰ འདི་ནང་ལུ་ ཡེ་ཤུ་ང་བཅས་ཀྱི་ཧེ་མ་ལས་བྱོན་ཏེ་ མཱེལ་ཀི་ཟེ་དེག་གི་རིམ་བརྒྱུད་དང་བསྟུན་ཏེ་ དུས་རྟག་བུ་གི་དོན་ལུ་ མཁན་ཆེན་ལུ་འགྱུར་ནུག།