ཧིབ་རུ་ལེའུ་ 5 - རྫོང་ཁ་

¹ མཁན་ཆེན་ག་ར་འབད་རུང་ མིའི་གྲལ་ཁ་ལས་རང་བཙག་འཐུ་འབད་དེ་ མི་དེ་ཚུ་གི་ཁ་ཐུག་ལས་ དཀོན་མཆོག་གི་སྐུ་མདུན་ བར་མི་སྦེ་ ཕུལ་ཆ་དང་སྡིག་པའི་དོན་ལུ་མཆོདཔ་ཕུལ་མི་སྦེ་ འགན་ཁུར་བཀལཝ་ཨིན།

² དེ་གིས་འབད་ ཁོ་ཡང་མི་འབད་དེ་ སྡིག་པ་ནང་འཐུས་ཤོར་འགྱེལ་ནིའི་ཉམས་མྱོང་ཡོད་ནི་འདི་གིས་ མི་མ་ཤེས་མི་དང་ལམ་འཛོལ་འགྱོ་མི་ཚུ་ལུ་ སྤྱོད་ལམ་ཞི་དུལ་ལྡན་པའི་ཐོག་ལས་ བསླབ་བྱ་ལེགས་ཤོམ་བྱིན་ཚུགས།

³ རྒྱུ་མཚན་འདི་ལུ་བརྟེན་ཏེ་ ཁོ་གིས་རང་གི་དོན་ལུ་དང་ མི་ཚུ་གི་དོན་ལུ་སྡིག་པའི་མཆོདཔ་ཕུལ་དགོཔ་ཨིན།

⁴ མཁན་ཆེན་གྱི་འགན་ཁུར་དེ་ མི་ག་གིས་ཡང་ རང་གིས་འབད་ ལེན་ཐག་མ་ཆོདཔ་ཨིན་མས་ ཧེ་མ་ ཨ་རཱོན་ལུ་ དཀོན་མཆོག་གིས་ མཁན་ཆེན་གྱི་འགན་ཁུར་གནང་དོཝ་བཟུམ་སྦེ་ ཁོང་ལུ་དཀོན་མཆོག་གིས་རང་ བཙག་འཐུ་མཛད་གནངམ་ཨིན།

⁵ འདི་བཟུམ་སྦེ་ ཁིརཱིས་ཀྱིས་ཡང་ ཁོ་རང་ལུ་ཡར་བཞེངས་ནི་སྦེ་ མཁན་ཆེན་གྱི་འགན་ཁུར་འདི་ ཁོ་རང་གིས་མ་བཞེས་པས་ དེ་འབདཝ་ད་ འགན་ཁུར་གནང་མིའི་ དཀོན་མཆོག་གིས་ ཁོ་ལུ་དེ་སྦེ། ཁྱོད་ངེ་གི་བུ་ཨིན་ ད་རེས་ང་ ཁྱོད་ཀྱི་ཨ་པ་སྦེ་ བྱུངམ་ཨིན་ཟེར་ གསུངས་ནུག

⁶ འདི་གི་སྐོར་ལས་ ད་རུང་གསུང་རབ་ནང་ལུ། ཁྱོད་ མཱེལ་ཀི་ཟེ་དེག་གི་རིམ་བརྒྱུད་ནང་ དུས་རྒྱུན་གྱི་བླམ་ཨིན་ཟེར་ དཀོན་མཆོག་གིས་གསུངས་ནུག

⁷ ཡེ་ཤུ་མིའི་ལུས་ནང་བཞུགས་པའི་སྐབས་ལུ་ ཁོ་གི་ཐུགས་ སྡུག་བསྔལ་གྱིས་གང་སྟེ་ གསུང་སྐད་ཤུགས་སྦེ་རྐྱབ་ གནམ་མེད་ས་མེད་བཤུམས་ཏེ་ ཁོ་ལུ་འཆི་བ་ལས་སྐྱབས་མཛད་ཚུགས་མི་འདི་ལུ་ སྨོན་ལམ་ཞུ་སྟེ་ གསོལཝ་བཏབ་ཕུལ་ནུག་ ཁོ་གིས་དཀོན་མཆོག་གིས་གསུངས་མི་བཀའ་ ཕྱག་ཞུ་ནི་འདི་གིས་ ཁོ་གི་སྨོན་ལམ་དང་ཞུ་ཚིག་ཚུ་ དཀོན་མཆོག་གིས་ སྙན་གསན་གནང་ནུག

⁸ མ་གཞི་ ཁོ་དཀོན་མཆོག་གི་སྲས་ཨིན་ཏེ་འབད་རུང་ ཁོ་གིས་ཉམས་མྱོང་ཡོད་མིའི་སྡུག་བསྔལ་གྱི་ཐོག་ལས་སྦེ་ དཀོན་མཆོག་གི་བཀའ་ལུ་ཉན་ནི་དེ་ ལྷབ་ནུག

⁹ དེ་ལས་ཁོ་ལུ་ཡང་དག་པ་མཛད་དེ་ དཀོན་མཆོག་གི་བཀའ་ལུ་ཉན་མི་ཚུ་གི་དོན་ལུ་ ཁོ་མཐའ་མེད་པའི་ཐར་པ་གི་ཐོན་ཁུངས་གཅིག་ལུ་འགྱུར་ནུག

¹⁰ དེ་ལས་མཁན་ཆེན་ མཱེལ་ཀི་ཟེ་དེག་གི་ རིམ་བརྒྱུད་དང་བསྟུན་ཏེ་ དཀོན་མཆོག་གིས་ཡེ་ཤུ་ལུ་ མཁན་ཆེན་གྱི་འགན་ཁུར་བཀལ་གནང་ནུག།

མི་ལོ་ན་ཁུག་མི་གི་སྐོར།

¹¹ འདི་ཚུ་གི་སྐོར་ལས་སླབ་ནི་ལེ་ཤ་ཡོད་རུང་ ཁྱེད་ལུ་གསལ་ཏོག་ཏོ་སླབ་ནི་ལཱ་ཁག་འདུག་ ག་ཅི་སྨོ་ཟེར་བ་ཅིན་ ཁྱེད་ཆ་ཁྱབ་ཀྱིས་དེ་འཕྲོ་ལས་ཧ་གོ་མི་ཚུགས་པས།

¹² ད་ཁྱེད་ཀྱིས་མི་གཞན་ལུ་ སྟོན་ཚུགསཔ་སྦེ་དགོ་སྟེ་འབད་རུང་ ད་ལྟོ་ཡང་ ཁྱེད་ཆ་ཁྱབ་ལུ་དཀོན་མཆོག་གི་གཏམ་བཟང་དེ་ ད་རུང་ལོག་ འགོ་དང་པ་ལས་སྟོན་བྱིན་མི་སློབ་དཔོན་དགོ་པས་ ཁྱེད་ཆ་ཁྱབ་བཞེས་སྒོ་ཟ་མི་མེན་པར་ ཨོམ་འཐུང་མིའི་ཨ་ལོ་བཟུམ་སྦེ་ཨིན་མས།

¹³ ཨོམ་རྐྱངམ་གཅིག་འཐུང་སྡོད་མི་དེ་ ད་ལྟོ་ཡང་ཨ་ལོ་རང་ཨིན་ ཁོང་ དཀོན་མཆོག་གི་ཐུགས་དང་ལྡན་པའི་ཕྲངམ་གི་སྐོར་ལས་རྒྱུས་མེད་པར་སྡོད་འོང་།

¹⁴ དེ་འབདཝ་ད་ བཞེས་སྒོ་དེ་ མི་ལོ་ན་ཁུག་མི་ཚུ་གི་དོན་ལུ་ཨིན་ ཁོང་ ལེགསཔ་དང་ཟོགཔོ་གི་དབྱེ་བ་ཕྱེ་ནིའི་སྦྱོང་བརྡར་དེ་གི་ཐོག་ལས་སྦེ་ ཨ་རྟག་རང་ རིག་པ་གསལ་ཏོག་ཏོ་སྦེ་ཐོབ་མི་ཚུ་ཨིན།།