ཧིབ་རུ་ལེའུ་ 3 - རྫོང་ཁ་

མོ་སཱེས་ལས་ཡེ་ཤུ་དྲག་ཤོས་ཨིན་པའི་སྐོར།

¹ དེ་འབདཝ་ལས་བརྟེན་ཏེ་ ཁྱེད་ཆ་ཁྱབ་ དཀོན་མཆོག་གིས་ཞིང་ཁམས་ལུ་འབོ་མི་གྲངས་སུ་ བཅའ་མར་གཏོགས་མི་དམ་པའི་སྤུན་ཆ་ཚུ་གིས་ སྐུ་ཚབ་དང་མཁན་ཆེན་ཨིན་མི་ ང་བཅས་ཀྱིས་འཛོམ་དཔང་འབད་མིའི་ཡེ་ཤུ་དེ་གི་སྐོར་ལས་ མནོ་བསམ་གཏང་དགོ།

² དཀོན་མཆོག་གི་བཟའ་ཚན་ནང་ལུ་དམ་ཚིག་བསྟེན་ཏེ་སྡོད་མིའི་ མོ་སཱེས་བཟུམ་སྦེ་ ཡེ་ཤུ་ཡང་ ཁོ་ལུ་འགན་ཁུར་བཀལ་གནང་མི་དཀོན་མཆོག་ལུ་དམ་ཚིག་བསྟེན་ནུག

³ མ་གཞི་ ཁྱིམ་དེ་ལས་ཡང་ ཁྱིམ་བཟོ་མི་དེ་གིས་ གུས་ཞབས་ཐོབ་དོཝ་བཟུམ་སྦེ་ ཡེ་ཤུ་གིས་ མོ་སཱེས་ལས་ལྷགཔ་སྦེ་ གུས་ཞབས་ཐོབ་ནིའི་འོས་འབབ་ཡོད།

⁴ ག་ཅི་རང་འབད་རུང་ ཁྱིམ་རེ་རེ་རྐྱབ་མི་ མི་རེ་རེ་འོང་ དེ་འབདཝ་ད་ བྱུང་བ་ཚུ་ག་ར་མཛད་གནང་མི་དེ་ དཀོན་མཆོག་ཁོ་རང་ཨིན།

⁵ དཀོན་མཆོག་གིས་མ་འོང་པའི་དུས་ལུ་ ཕྱི་ཁར་བཏོན་གནང་ནིའི་ལོ་རྒྱུས་ཀྱི་ འཛོམ་དཔང་འབད་ནི་གི་དོན་ལུ་ མོ་སཱེས་དཀོན་མཆོག་གི་བཟའ་ཚན་ནང་ལུ་ དམ་ཚིག་ཅན་གྱི་ཕྱག་གཡོག་སྦེ་སྡོད་ནུག

⁶ དེ་འབདཝ་ད་ཁིརཱིས་དེ་ དཀོན་མཆོག་གི་བཟའ་ཚན་ནང་ལུ་ སྲས་གཅིག་སྦེ་བཞུགས་ཏེ་ཡོད་ ང་བཅས་ཀྱིས་ རེ་བ་བསྐྱེད་དེ་སྡོད་མི་དེ་ མ་འགྲུབ་ཚུན་ཚོད་ སྙིང་སྟོབས་ཅན་དང་དམ་ཚིག་ཅན་སྦེ་སྡོད་ཚུགས་པ་ཅིན་ ང་བཅས་ཡང་དཀོན་མཆོག་གི་བཟའ་ཚན་ཨིན།།

དད་པ་མ་བསྐྱེད་པ་ཅིན་ངལ་འཚོ་སར་འཛུལ་ནི་མི་ཐོབ་ནི་ཨིན་མིའི་སྐོར།

⁷ དེ་གིས་འབད་ དམ་པའི་ཐུགས་ཉིད་ཀྱིས། ད་རེས་ཁྱེད་ཀྱིས་ཁོ་གི་གསུང་སྐད་རྣ་བ་གོ་བ་ཅིན།

⁸ རི་སྟོང་ནང་ལུ་བར་ཆད་ནང་ཚུད་དེ་ ངོ་རྒོལ་འབད་བའི་ཉིནམ་ལུ་བཟུམ་སྦེ་ ཁྱེད་ཀྱི་སེམས་དེ་སྲ་ཀྲག་མ་བཟོ།

⁹ ང་གིས་ལོ་བཞི་བཅུ་ཚུན་ཚོད་འབད་མིའི་ལཱ་དེ་ ཁྱེད་ཀྱི་ཕ་བརྒྱུད་ཚུ་གིས་མཐོང་རུང་ འདི་ཁར་ ཁོང་གིས་ང་ལུ་ཚོད་བལྟ་སྟེ་ཙིགཔ་ཟ་བཅུག་ཅི།

¹⁰ དེ་འབདཝ་ལས་ ཨ་ནི་མི་རབས་དེ་ཚུ་ལུ་བལྟ་སྟེ་ ང་ཙིགཔ་ཟ་ཡི་ དེ་ལས་ ང་གིས་ཁོང་གི་སྐོར་ལས་ ཁོང་ཨ་རྟག་རང་ དམ་ཚིག་མ་སྲུང་པར་སྡོདཔ་ཨིན་མས་ ཁོང་གིས་ངེ་གི་ཐར་ལམ་དེ་ཡང་ ཧ་མི་གོ་བས་ཟེར་སླབ་ཅི།

¹¹ འདི་གིས་འབད་ ཁོང་ནམ་ཡང་ངེ་གི་ངལ་འཚོ་སར་ འཛུལ་མི་ཚུགས་ཟེར་ ཙིགཔ་ཟ་སྟེ་མནའ་འབོ་ཅི་ཟེར་ གསུངས་ནུག

¹² དེ་འབདཝ་ལས་ངེ་གི་སྤུན་ཆ་ཚུ་ དྲནམ་བཏོན་ཏེ་སྡོད་ ཁྱེད་ཀྱི་གྲལ་ལས་ ག་ཡང་ངན་པ་དང་དད་པ་མེད་པའི་སེམས་ཀྱིས་ གསོན་པོའི་དཀོན་མཆོག་ལས་ཁ་འབྱལ་ཏེ་འགྱོ་མ་བཅུག

¹³ དེ་འབདཝ་ད་ ཁྱེད་ཀྱི་གྲལ་ཁ་ལས་ག་ཡང་ སྡིག་པའི་མགུ་བསྐོར་ནང་ཚུད་དེ་ སེམས་སྲ་ཀྲག་མ་འགྱུར་བའི་དོན་ལུ་ ད་རེས་ཀྱི་དུས་ཚོད་ཡོད་པའི་བསྒང་རང་ ཁྱེད་གཅིག་གིས་གཅིག་ལུ་ཉིནམ་རེ་རེ་བཞིན་དུ་ དྲན་བསྐུལ་འབད།

¹⁴ ང་བཅས་ཀྱིས་འགོ་དང་པ་ལས་ བློ་གཏད་དེ་སྡོད་མི་དེ་ནང་ལུ་ མཐའན་མཇུག་ཚུན་ཚོད་ སྒྲིང་སྒྲིང་སྦེ་སྡོད་ཚུགས་པ་ཅིན་ དོན་ལས་རང་ ང་བཅས་ཁིརཱིས་ཀྱི་མཉམ་རོགས་འབད་ནི་ཐོབ།

¹⁵ འདི་བཟུམ་སྦེ་རང་གསུང་རབ་ནང་ལུ། ད་རེས་ ཁྱེད་ཀྱིས་ཁོ་གི་གསུང་སྐད་རྣ་བ་གོ་བ་ཅིན་ ངོ་རྒོལ་འབད་བའི་ཉིནམ་འདི་ལུ་བཟུམ་སྦེ་ ཁྱེད་ཀྱི་སེམས་དེ་སྲ་ཀྲག་མ་བཟོ།

¹⁶ ཧེ་མ་ཁོ་གི་གསུང་སྐད་གོ་སྟེ་འབད་རུང་ ངོ་རྒོལ་འབད་མི་ཆ་ཁྱབ་ག་སྨོ་ཟེར་བ་ཅིན་ མོ་སཱེས་ཀྱིས་ ཨི་ཇིབ་རྒྱལ་ཁབ་ནང་ལས་བཏོན་འཁྱིད་འོངས་མིའི་ མི་དེ་ཚུ་ཨིན་མེན་ན།

¹⁷ ལོ་བཞི་བཅུ་ཚུན་ཚོད་ དཀོན་མཆོག་གིས་ག་དང་གཅིག་ཁར་དགོངསམ་ཁྲེལ་ནུག་ཟེར་བ་ཅིན་ རི་སྟོང་ནང་ལུ་ཤི་མི་སྡིག་ཅན་ཚུ་དང་གཅིག་ཁར་ཨིན་མེན་ན།

¹⁸ དཀོན་མཆོག་གིས་ ཁྱེད་ངེ་གི་ངལ་འཚོ་སར་འཛུལ་ནི་མི་ཐོབ་ཟེར་ ག་དང་གཅིག་ཁར་ཁས་བླངས་བཞེས་ནུག་ཟེར་བ་ཅིན་ ཁོ་གི་བཀའ་ལུ་མ་ཉན་མི་ཚུ་ཨིན་མེན་ན།

¹⁹ དེ་འབདཝ་ལས་ ཁོང་གིས་དད་པ་མ་བསྐྱེདཔ་ལས་བརྟེན་ཏེ་ ངལ་འཚོ་སར་འཛུལ་ནི་མ་ཐོབ་ཨིནམ་ ང་བཅས་ཀྱིས་མཐོང་ཚུགསཔ་ཨིན།།