ཧིབ་རུ་ལེའུ་ 2 - རྫོང་ཁ་

དྲནམ་བཏོན་ཏེ་སྡོད་དགོ་པའི་སྐོར།

¹ དེ་འབདཝ་ལས་ ང་བཅས་ཀྱིས་གོ་མི་དེ་ལུ་ ཧེ་མ་ལས་ཡང་ལྷགཔ་སྦེ་དྲནམ་བཏོན་ཏེ་སྡོད་དགོ་ འདི་མེན་པ་ཅིན་ ང་བཅས་བདེན་པ་འདི་ལས་ལམ་འཛོལ་ཏེ་འགྱོ་འོང་།

² ག་ཅི་སྨོ་ཟེར་བ་ཅིན་ ཧེ་མ་ཕོ་ཉ་ཚུ་གིས་སླབ་མིའི་གསུང་དེ་ ངོ་མ་སྦེ་སྟོན་ཡོདཔ་ལས་ ཉེས་པ་འབད་མི་དང་ བཀའ་ལུ་མ་ཉན་མི་ག་ར་ལུ་ ཁྲིམས་ཕོག་ནི་ཨིན།

³ དེ་འབདཝ་ལས་ང་བཅས་ཀྱིས་ཡང་ འདི་བཟུམ་གྱི་ཐར་ལམ་སྦོམ་དེ་ལུ་སྣང་མེད་སྦེ་བཞག་པ་ཅིན་ དོན་ལས་རང་ཁྲིམས་མི་ཕོག་ག་ ཨ་ནི་ཐར་པ་འདི་གི་སྐོར་ལས་ འགོ་དང་པ་རང་ གཙོ་བོ་ཁོ་རང་ལས་སྦེ་གསུངསམ་ད་ ཁོ་གི་གསུང་གོ་མི་ཆ་ཁྱབ་ཀྱིས་ ང་བཅས་ལུ་བདེན་ཁུངས་བཀལ་ཡོདཔ་མ་ཚད།

⁴ དཀོན་མཆོག་གིས་ རྟགས་མཚན་དང་ ཧ་ལས་པའི་ཕྱག་ལཱ་ རྫུ་འཕྲུལ་མ་འདྲཝ་དེ་ཚུ་ དེ་ལས་གཞན་ཡང་ ཁོ་གི་ཐུགས་དགོངས་བཞིན་དུ་བགོ་བཤའ་རྐྱབ་གནང་མི་ དམ་པའི་ཐུགས་ཉིད་ཀྱི་གསོལ་རས་ལས་རྒྱུད་དེ་ བདེན་ཁུངས་སྟོན་གནང་ནུག།

ཡེ་ཤུ་སྙིང་རྗེ་ཅན་དང་དམ་ཚིག་ཅན་གྱི་མཁན་ཆེན་ལུ་འགྱུརཝ་ཨིན་པའི་སྐོར།

⁵ ད་ལྟོ་ང་བཅས་ཀྱིས་སླབ་མི་ དཀོན་མཆོག་གི་རྒྱལ་སྲིད་འོང་ནི་འབད་མི་དེ་ ཕོ་ཉ་ཚུ་གི་དབང་གི་འོག་ལུ་དཀོན་མཆོག་གིས་བཙུག་མ་གནང་པས།

⁶ དེ་འབདཝ་ད་ གསུང་རབ་ནང་ལུ་དེ་སྦེ་བྲིས་ཏེ་འདུག མི་འདི་ ནཱ་གིས་རྟག་བུ་རང་ ཐུགས་ཁར་དྲན་ཏེ་བཞུགས་ཡོདཔ་ལས་ ཁོ་ག་དེམ་ཅིག་ཧ་ལས་སི་སི་ཨིནམ་སྨོ་ ད་རུང་ མི་གི་བུ་དེ་ལུ་ ནཱ་གིས་ག་དེམ་ཅིག་བརྩེ་གདུང་སྐྱེདཔ་སྨོ།

⁷ དུས་ཡུན་ཐུང་ཀུ་གཅིག་གི་དོན་ལུ་ ནཱ་གིས་ཁོ་ལུ་ཕོ་ཉ་ཚུ་ལས་ ཨ་ཙི་དམའ་སོཝ་ཅིག་སྦེ་མཛད་གནང་སྟེ་ ཁོ་ལུ་གཟི་བརྗིད་དང་གུས་ཞབས་ཀྱིས་བཀང་གནང་ནུག

⁸ ནཱ་གིས་ག་ར་ཁོ་གི་ཞབས་ཀྱི་རྩ་བར་བཞག་གནང་ཡོདཔ་ཨིན། དཀོན་མཆོག་གིས་ག་ར་ཁོ་གི་དབང་གི་འོག་ལུ་བཙུག་གནངམ་ད་ ཁོ་གི་འོག་ལུ་མེད་མི་ གཞན་ག་ནི་ཡང་མ་མཛད་པས་ ཨིན་ཏེ་འབད་རུང་ ད་རེས་ནངས་པ་གི་དུས་ལུ་ ག་ར་ཁོ་གི་དབང་གི་འོག་ལུ་ཡོདཔ་བཟུམ་ ང་བཅས་ཀྱིས་མི་མཐོང་པས།

⁹ ཨིན་རུང་ཡེ་ཤུ་ ཕོ་ཉ་ཚུ་ལས་ཨ་ཙི་དམའ་སོཝ་ཅིག་སྦེ་མཛད་དེ་ ཁོ་གིས་ སྐུ་གཟུགས་ལུ་སྡུག་བསྔལ་བཞེས་ཏེ་ གཤགས་པའི་ཐོག་ལས་སྦེ་ ད་ལྟོ་ཁོ་ལུ་གཟི་བརྗིད་དང་གུས་ཞབས་ཀྱིས་གང་མི་འདི་ ང་བཅས་ཀྱིས་མཐོང་ཡོདཔ་ཨིན་ ག་ཅི་སྨོ་ཟེར་བ་ཅིན་ དཀོན་མཆོག་གི་ཐུགས་རྗེ་ལས་སྦེ་ མི་ག་ར་གི་དོན་ལུ་ ཁོ་གིས་འཆི་བ་གི་ཉམས་མྱོང་བཞེས་ནུག

¹⁰ ཁོ་རའི་དོན་ལུ་ བྱུང་བ་ཚུ་ག་ར་མཛད་གནང་མིའི་དཀོན་མཆོག་གིས་ ཁོ་རའི་གཟི་བརྗིད་ནང་ལུ་ སྲས་སྲསམོ་ལེ་ཤ་འཁྱིད་འོང་ནི་གི་དོན་ལུ་ ཡེ་ཤུ་གི་སྐུ་གཟུགས་ལུ་སྡུག་བསྔལ་མྱོང་བཅུག་པའི་ཐོག་ལས་སྦེ་ ཡེ་ཤུ་ཡང་དག་པ་འཐོན་ཏེ་ ཐར་པ་ཁོ་གི་ཐོག་ལས་གནང་ནི་ འགོ་བཙུགས་པའི་དོན་དག་ཀྲིག་ཀྲི་སྦེ་འགྲུབ་ནུག

¹¹ ག་ཅི་སྨོ་ཟེར་བ་ཅིན་ གཙངམ་མཛད་མིའི་ཡེ་ཤུ་དང་ གཙངམ་འགྱུར་སོང་མི་ཚུ་ག་ར་ ཡབ་གཅིག་ལས་བྱུང་ནུག་ དེ་འབདཝ་ལས་ཁོང་ལུ་ ངེའི་སྤུན་ཆ་ཚུ་ཟེར་གསུང་ནི་ལུ་ ཡེ་ཤུ་གིས་ཞལ་མི་སྐྱེངས།

¹² ཁོ་གིས་དཀོན་མཆོག་ལུ་དེ་སྦེ་ཞུ་ནུག ངེ་གི་སྤུན་ཆ་ཚུ་ལུ་ ནཱ་གི་མཚན་འདི་ཁྱབ་སྒྲགས་གཏང་ནི་ཨིན་ ཚོགས་འཛོམས་ནང་ལུ་ ང་གིས་ནཱ་ལུ་བསྟོད་པའི་གླུ་དབྱངས་ཕུལ་ནི་ཨིན།

¹³ ད་རུང་། ངེ་གི་བློ་ ཁོ་ལུ་གཏད་སྡོད་ནི་ཨིན། ད་རུང་ཚར་གཅིག ང་ནཱ་ དཀོན་མཆོག་གིས་ང་ལུ་གནང་མིའི་སྲས་དང་སྲསམོ་ཚུ་དང་གཅིག་ཁར་ཡོད་ཟེར་ གསུངས་ནུག

¹⁴ མི་འདི་ ཨ་ལོ་གི་ཤ་ལུས་དང་ཁྲག་ལས་སྦེ་སྐྱེ་ནི་འདི་གིས་ ཡེ་ཤུ་ཡང་མི་འདི་བཟུམ་སྦེ་ མིའི་རང་བཞིན་ ཤ་དང་ཁྲག་ལུ་བཅའ་མར་གཏོགས་ཏེ་འཁྲུངས་ནུག་ དོན་དག་དེ་ ག་དེ་སྦེ་སྨོ་ཟེར་བ་ཅིན་ ཁོ་དེ་སྦེ་འཁྲུངས་ཏེ་ གཤགས་པའི་ཐོག་ལས་ འཆི་བ་གི་བདགཔོ་བདུད་དེ་ལུ་ ཁོ་གིས་རྩ་མེད་མཛད་དེ།

¹⁵ ཁོང་ཤི་ནི་ལུ་འདྲོག་སྡོད་མི་ཚུ་གི་མི་ཚེ་གཅིགཔ་བསྡམ་བཞག་མི་ནང་ལས་ ཐར་བཅུག་ནི་སྦེ་ཨིན་མས།

¹⁶ ག་ཅི་སྨོ་ཟེར་བ་ཅིན་ ཁོ་གིས་དོན་ལས་རང་ཕོ་ཉ་ཚུ་ལུ་མེན་པར་ ཨབ་ར་ཧམ་གྱི་བུ་བརྒྱུད་ཚུ་ལུ་ གྲོགས་རམ་མཛད་པ་བྱོནམ་ཨིན་མས།

¹⁷ དེ་འབདཝ་ལས་བརྟེན་ཏེ་ ག་ཅི་ནང་རང་འབད་རུང་ ཁོ་རང་གི་སྤུན་ཆ་ཚུ་བཟུམ་སྦེ་ འགྱུར་དགོཔ་ཐལ་ནུག་ དེ་ལས་ མི་དམངས་ཀྱི་སྡིག་པའི་མཆོདཔ་སྦེ་ཕུལ་བའི་དོན་ལུ་ ཁོ་ དཀོན་མཆོག་ལུ་ཞབས་ཏོག་ཞུ་མི་སྦེ་ སྙིང་རྗེ་ཅན་དང་དམ་ཚིག་ཅན་གྱི་མཁན་ཆེན་གཅིག་ལུ་འགྱུར་ནུག

¹⁸ ག་ཅི་སྨོ་ཟེར་བ་ཅིན་ ཁོ་རང་ཡང་སྡུག་བསྔལ་དང་བར་ཆད་ནང་ཚུད་པའི་ཉམས་མྱོང་ཡོདཔ་ལས་ བར་ཆད་ནང་ཚུད་ཡོད་མི་ཚུ་ ཁོ་གིས་སྐྱབས་མཛད་ཚུགསཔ་ཨིན།།