ཧིབ་རུ་ལེའུ་ 13 - རྫོང་ཁ་

སྤྱོད་ལམ་བཟང་པོ་གི་སྐོར།

¹ གཅིག་གིས་གཅིག་ལུ་སྤུན་ཆ་བཟུམ་སྦེ་ དུས་རྟག་བུ་རང་བྱམས་སེམས་བསྐྱེད་དེ་སྡོད།

² མི་གསརཔ་ལུ་གདོང་ལེན་འབད་ནི་མ་བརྗེད་ ག་ཅི་སྨོ་ཟེར་བ་ཅིན་ ཨ་ནི་བཟུམ་འབདཝ་ད་ མི་ལ་ལུ་ཅིག་གིས་ མ་ཤེས་པར་ ཕོ་ཉ་ཚུ་ལུ་ཡང་གདོང་ལེན་འབད་ནུག

³ བཙོན་པ་ཚུ་ལུ་ རང་ཡང་ཁོང་དང་གཅིག་ཁར་ བཙོན་ཁང་ནང་ཚུད་དེ་ཡོད་དོཝ་བཟུམ་ སེམས་ཁར་དྲན་སྡོད་དགོ་ ལེགས་ཤོམ་མ་འབད་བར་ཡོད་མི་ཚུ་ལུ་ རང་ལུ་འབྱུང་དོཝ་བཟུམ་སྦེ་ མནོ་བསམ་གཏང་དགོ།

⁴ གཉེན་དེ་ མི་ག་ར་ལས་གུས་བཀུར་ཐོབ་པའི་འོས་འབབ་ཡོདཔ་སྦེ་འབད་དགོ་ དེ་ལས་གཉེན་གྱི་ཉལ་ཁྲི་དེ་ གཙངམ་སྦེ་བཞག་དགོ་ ག་ཅི་སྨོ་ཟེར་བ་ཅིན་ དཀོན་མཆོག་གིས་ འདོད་ཆགས་ལོང་མི་དང་ གཉེན་ལས་འགལ་བའི་ལུས་འབྲེལ་འབད་མི་ཚུ་ ཁྲིམས་དཔྱད་ནི་ཨིན།

⁵ ཁྱེད་ཀྱི་བྱ་བ་སྤྱོད་ལམ་དེ་ ཏི་རུ་ལུ་སེམས་ཆགས་ནི་ལས་སྤང་སྡོད་དགོ་ ཁྱེད་ནང་ག་ཡོད་མི་འདི་གིས་ ཡི་རངས་སྦེ་སྡོད་དགོ་ ག་ཅི་སྨོ་ཟེར་བ་ཅིན་ དཀོན་མཆོག་གིས། ང་གིས་ཁྱེད་ལུ་ནམ་ཡང་མི་བཀོག་ ནམ་ཡང་ཁྱེད་མི་སྤང་ཟེར་ གསུངས་ནུག

⁶ འདི་གིས་འབད། གཙོ་བོ་ངེ་གི་རོགས་རམ་མཛད་མི་ཨིནམ་ལས་ མི་གིས་ང་ལུ་ག་ཅི་འབད་ཚུགས་ ང་ལུ་འདྲོག་དགོཔ་ཡོད་རང་མེད་ཟེར་ ང་བཅས་ཐེ་ཚོམ་མེད་པར་སླབ་ཚུགསཔ་ཨིན།

⁷ ཁྱེད་ལུ་དཀོན་མཆོག་གི་གསུང་སྟོན་མིའི་ སློབ་དཔོན་ཚུ་ལུ་ སེམས་ཁར་དྲན་ཏེ་ ཁོང་གི་འབད་ཐངས་བཅའ་ཐངས་ལས་གྲུབ་མིའི་ འབྲས་བུ་འདི་ཚུ་གི་སྐོར་ལས་ མནོ་བསམ་གཏང་ཞིནམ་ད་ ཁོང་ལུ་དད་པའི་དཔེ་སྦེ་བལྟ་སྟེ་སྡོད་དགོ།

⁸ ཡེ་ཤུ་ཁིརཱིས་དེ་ ཁ་ཙ་དང་ད་རེས་ དུས་རྒྱུན་དུ་མ་འགྱུར་བར་བཞུགསཔ་ཨིན།

⁹ སློབ་སྟོན་མ་གཅིགཔ་རྣམ་རྟོག་ལང་སི་སི་གིས་ ཁྱེད་འཐེན་འབག་འགྱོ་མ་བཅུག་ ག་ཅི་སྨོ་ཟེར་བ་ཅིན་ ང་བཅས་ལུ་ སེམས་ཤུགས་དེ་ དཀོན་མཆོག་གི་ཐུགས་རྗེ་གིས་གནངམ་མ་གཏོགས་ བཟའ་འཐུང་ལས་རྒྱུད་དེ་མེན་ འདི་ཚུ་གི་ཁ་ལུ་ཉན་འགྱོ་མི་ཚུ་ལུ་ ཁེ་བཟང་ག་ནི་ཡང་མེད།

¹⁰ ང་བཅས་ལུ་མཆོད་ཁྲི་གཅིག་ཡོད་ འདི་ནང་ལས་ དམ་པའི་གུར་ཁང་ནང་ཞབས་ཏོག་ཞུ་མི་བླམ་ཚུ་གིས་ བཟའ་ཐག་མི་ཆོད་བས།

¹¹ ཧེ་མ་གི་ལུགས་སྲོལ་ནང་མཁན་ཆེན་གྱིས་ སྡིག་པའི་མཆོདཔ་ཕུལ་ནི་གི་དོན་ལུ་ སེམས་ཅན་གྱི་ཁྲག་ ག་ར་ལས་དམ་པའི་ས་གནས་ནང་འབག་འོངས་ཏེ་ སྡིག་པའི་མཆོདཔ་སྦེ་ཕུལ་ཞིནམ་ད་ སེམས་ཅན་དེ་ལུ་ སྡོད་སྒར་གྱི་ཕྱི་ཁར་འབག་ མེ་གཏངམ་ཨིན་མས།

¹² དཔེ་འདི་བཟུམ་སྦེ་ ཡེ་ཤུ་ཡང་ ཁོ་རའི་སྐུ་ཁྲག་གིས་མི་ལུ་དམ་པ་བཟོ་ནི་སྦེ་ ཁྲོམ་གྱི་སྒོ་ར་ཁའི་ཕྱི་ཁར་ལུ་ སྐུ་གཟུགས་ལུ་སྡུག་བསྔལ་མྱོང་སྟེ་གཤགས་ནུག

¹³ དེ་འབདཝ་ལས་ ང་བཅས་ཆ་ཁྱབ་ཡང་ སྡོད་སྒར་ཕྱི་ཁར་ཁོ་ལུ་མཇལ་བ་འགྱོ་སྟེ་ གཞན་གྱིས་ཁོ་སྐྱོ་དྲགས་སྦེ་བརྩི་ནིའི་སྡུག་བསྔལ་ ང་བཅས་ཀྱིས་ཡང་ ཁོ་དང་གཅིག་ཁར་མྱོང་གེ།

¹⁴ མ་གཞི་ ནཱ་འཛམ་བུ་གླིང་ནང་རྟག་བུ་སྡོད་ནི་གི་ཁྲོམ་ ང་བཅས་ལུ་མིན་འདུག་ དེ་འབདཝ་ད་ མ་འོང་པའི་ཁྲོམ་དེ་ལུ་ང་བཅས་སྒུག་སྡོདཔ་ཨིན།

¹⁵ དེ་འབདཝ་ལས་ དཀོན་མཆོག་ལུ་ ཡེ་ཤུ་ལས་རྒྱུད་དེ་ ང་བཅས་ཀྱི་མཆོདཔ་དེ་ ཨ་རྟག་རང་བསྟོད་པ་ཕུལ་གེ་ ཨ་ནི་བསྟོད་པ་དེ་ག་ཅི་སྨོ་ཟེར་བ་ཅིན་ རང་གི་ཁ་གིས་ ཡེ་ཤུ་དེ་གཙོ་བོ་ཨིན་ཟེར་འཛོམ་དཔང་འབད་དེ་ཞུ་ནི་ཨིན།

¹⁶ དེ་ལས་ལེགས་ཤོམ་འབད་ནི་དང་ རང་ལུ་ག་ཡོད་མི་ཚུ་ མི་གཞན་ལུ་བགོ་བཤའ་རྐྱབ་བྱིན་ནི་འདི་མ་བརྗེད་ འདི་བཟུམ་གྱི་མཆོད་པ་ལུ་ དཀོན་མཆོག་གིས་ཐུགས་དགྱེསཔ་ཨིན།

¹⁷ ཁྱེད་ཀྱི་སློབ་དཔོན་ཚུ་ལུ་གུས་ཞབས་ཕུལ་ཏེ་ ཁོང་གིས་སླབ་མི་ཁ་ལུ་ཉན་དགོ་ ཁོང་གི་འགན་ཁུར་དེ་ ཁྱེད་ཆ་ཁྱབ་ལུ་བདག་འཛིན་འཐབ་ནི་ཨིན་ དེ་ལས་ ཉིནམ་གཅིག་གི་ཚེ་ ཁོང་གིས་ག་འབད་མི་དེ་ རྩིས་སྤྲོད་དགོ་ཟེར་ཤེས་ དེ་འབདཝ་ལས་ ཁོང་གི་ཁ་ལུ་ཉན་ཞིནམ་ད་ ཁོང་གི་ལཱ་ལུ་ སྤྲོ་བ་བསྐྱེད་བཅུག་ དེ་སྦེ་མེན་པ་ཅིན་ ཁོང་སེམས་ཕམ་སྟེ་ དགའ་སྤྲོ་མེད་པར་འབད་འོང་ འདི་གིས་ཁྱེད་ལུ་ཕན་མི་བཏགས།།

མཐའན་མཇུག་གི་བསླབ་བྱ་གི་སྐོར།

¹⁸ ང་བཅས་ཀྱི་དོན་ལུ་སྨོན་ལམ་ཞུ་ ང་བཅས་ཀྱི་དྲན་ཤེས་གསལ་ཏོག་ཏོ་ཡོད་ཟེར་ ང་བཅས་ལུ་ཏན་ཏན་ཡོད་ དེ་ལས་བཟང་ལྷམ་ལྷམ་སྦེ་སྡོད་ནིའི་འདོད་པ་ཡང་ཡོདཔ་ཨིན།

¹⁹ ཁག་ཆེ་ཤོས་རང་ ང་མགྱོགས་པར་ཁྱེད་སྡོད་སར་ལོག་འོང་བཅུག་ཟེར་ ངེ་གི་དོན་ལུ་སྨོན་ལམ་བཏབ་གནང་ཟེར་ ཁྱེད་ཆ་ཁྱབ་ལུ་ཞུཝ་ཨིན།

^20-21 ལུག་ཛིཔ་ངོ་མ་ཡེ་ཤུ་ཁིརཱིས་ལུ་ གཤགས་ས་ལས་སྐུ་གསོན་པོ་བཞེང་གནང་མི་ ཞི་བདེ་གི་དཀོན་མཆོག་གིས་ དུས་རྒྱུན་གྱི་ཞལ་འཆེས་ཀྱི་སྐུ་ཁྲག་ལས་རྒྱུད་དེ་ ཁོ་གི་ཐུགས་དགོངས་ག་ར་ གྲུབ་ནི་གི་དོན་ལུ་ ཁྱེད་ཆ་ཁྱབ་ ལཱ་ལེགས་ཤོམ་མ་འདྲཝ་འབད་ནི་གི་དོན་ལུ་ ཁག་ཆེཝ་དེ་ཚུ་གྲ་སྒྲིག་མཛད་གནང་བཅུག་ དེ་ལས་ཁོ་གིས་ཐུགས་དགྱེས་པའི་ཕྱག་ལཱ་དེ་ ཡེ་ཤུ་ཁིརཱིས་ལས་རྒྱུད་དེ་ ང་བཅས་ཀྱི་མི་ཚེ་ནང་ མཛད་གནང་བཅུག་ ད་ དུས་རྒྱུན་དུ་རང་ བསྟོད་པ་དེ་ ཡེ་ཤུ་ཁིརཱིས་ ཁོ་རང་གི་ཨིན་ནོ་ ཨ་མཱེན།

²² སྤུན་ཆ་ཚུ་ ང་གིས་ཁྱེད་ཆ་ཁྱབ་ལུ་ དེ་ཚུ་ག་ར་ཐུང་ཀུ་སྦེ་བྲིས་ཡི་ དེ་འབདཝ་ལས་ ངེ་གི་བསླབ་བྱ་ལུ་ གསན་གནང་ཟེར་ཞུ་དོ།

²³ ང་བཅས་ཀྱི་སྤུན་ཆ་ ཏི་མོ་ཐི་བཙོན་ནང་ལས་ཐར་ཡི་ཟེར་ འདི་ཡང་ཁྱེད་ཆ་ཁྱབ་ལུ་ ཤེས་བཅུག་ནིའི་འདོད་པ་ ང་ལུ་ཡོད་ ཁོ་མགྱོགས་པར་འོང་པ་ཅིན་ ཁོ་ཡང་འཁྱིད་དེ་ ང་བཅས་གཉིས་ཁྱེད་ འཕྱད་པ་འཐོན་འོང་།

²⁴ ཁྱེད་ཀྱི་སློབ་དཔོན་དང་དདཔ་ཅན་ཚུ་ལུ་ ང་ལས་སྐུ་གཟུགས་བཟང་པོ་ཡོད་ཟེར་སླབ་གནང་ རྒྱལ་ཁབ་ ཨི་ཏྲ་ལི་གི་མི་ཚུ་གིས་ ཁྱེད་ལུ་སྐུ་གཟུགས་བཟང་པོ་ཟེར་སླབ་བཏང་དེས།

²⁵ ཁྱེད་ག་ར་ལུ་དཀོན་མཆོག་གིས་ཐུགས་རྗེ་གནང་བཅུག། །།