ཧིབ་རུ་ལེའུ་ 12 - རྫོང་ཁ་

དཀོན་མཆོག་གིས་སྒྲིགས་བཙུགས་པའི་སྐོར།

¹ འདི་འབདཝ་ལས་བརྟེན་ ཨ་ནི་འཛོམ་དཔང་ལེ་ཤ་ ང་བཅས་ཀྱི་གདོང་ཁར་ལུ་བཞག་ཡོདཔ་ལས་ ཚ་གྱང་འདྲཝ་མ་འདྲཝ་གི་ཁུར་ཆ་དང་ ང་བཅས་ལུ་འཇམ་ཏོང་ཏོ་སྦེ་ ཧིང་ནང་བཙུག་མིའི་སྡིག་པ་བཀོག་བཞག་སྟེ་ ང་བཅས་ཀྱི་གདོང་ཁར་ལུ་ཡོད་མི་ བང་རྒྱུག་དེ་ དཀའཝ་སྤྱད་དེ་རྒྱུག་གེ།

² ང་བཅས་ཀྱི་དད་པ་འགོ་བཙུགས་གནང་མི་དང་ ཡང་དག་པ་མཛད་གནང་མི་ ཡེ་ཤུ་ལུ་བལྟ་དགོ་ ཁོ་གིས་ གཞི་འཛུགས་གནང་མི་ དགའ་སྤྲོ་ ཐོབ་ནིའི་དོན་ལུ་ ཁྲམ་ཤིང་གུ་ ངོ་ཚ་སི་སི་སྦེ་གཤགས་ཏེ་ སྡུག་བསྔལ་བཞེས་ནུག་ དེ་ལས་ ད་ལྟོ་ཁོ་དཀོན་མཆོག་གི་གསེར་ཁྲི་གི་གཡས་ཁ་ཐུག་བཞུགས་ཏེ་ཡོད།

³ ཁོ་གི་སྐོར་ལས་ སྡིག་ཅན་ཚུ་གིས་ བློ་ངན་པ་དེ་ཚུ་སླབ་ གནོདཔ་བཀལ་རུང་ ཐུགས་ལུ་བཟོད་པ་སྒོམ་བཞུགས་མི་ཡེ་ཤུ་ལུ་ སེམས་ཁར་དྲན་དགོ་ དེ་ལས་ཁྱེད་སེམས་ཤི་སྟེ་འབད་རུང་ ལཱ་ལེགས་ཤོམ་འབད་ནི་ལུ་ འུ་སྡུག་སྟེ་ ཐང་མི་ཆད་འོང་།

⁴ ད་ལྟོ་གི་ཚུན་ཚོད་ ཁྱེད་ཀྱིས་ སྡིག་པ་གི་གདོང་ལན་འབདཝ་ད་ ཤི་དགོཔ་ཚུན་ཚོད་ དཀའཝ་མ་སྤྱད།

^5-6 དེ་མ་ཚད་ དཀོན་མཆོག་གིས་ཁྱེད་ལུ་ ཁོ་རང་གི་ཨ་ལོ་བཟུམ་སྦེ། ངེའི་བུ་ གཙོ་བོ་གི་སྒྲིགས་དེ་ ཁུངས་མེདཔ་སྦེ་མནོ་བསམ་མ་གཏང་ ཁོ་གིས་ཁྱོད་ལུ་བཅོ་ཁ་རྐྱབ་ད་ སེམས་མ་ཤི་ ག་ཅི་སྨོ་ཟེར་བ་ཅིན་ གཙོ་བོ་གིས་ག་དགའ་མི་ཚུ་ལུ་ སྒྲིགས་བཙུགསཔ་ཨིནམ་མ་ཚད་ ཁོ་རའི་ཨ་ལོ་སྦེ་བརྩིས་མི་ཚུ་ལུ་ ཁོ་གིས་བཅོ་ཁ་ཡང་རྐྱབ་ཨིན་ཟེར་ གསུངས་མི་བསླབ་བྱ་དེ་ཚུ་ ཁྱེད་ཀྱིས་བརྗེད་སོང་ཡི་ག།

⁷ སྒྲིགས་བཙུགསཔ་ད་ བཟོད་པ་སྒོམ་སྡོད་དགོ་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཁྱེད་ལུ་བུ་བཟུམ་སྦེ་རང་ བྱམས་པ་མཛདཔ་ཨིན་ ཨ་པ་གིས་ སྒྲིགས་མ་བཙུགས་མི་བུ་ཡོདཔ་འོང་ག།

⁸ དེ་འབདཝ་ད་ ག་ར་ལུ་སྒྲིགས་བཙུགས་དོཝ་བཟུམ་སྦེ་ ཁྱེད་ལུ་མ་བཙུགས་པ་ཅིན་ ཁྱེད་བུ་ངོ་མ་མེན་པར་ བུ་འབྲང་ཨིན།

⁹ ད་རུང་ང་བཅས་ག་ར་ལུ་སྒྲིགས་བཙུགས་མིའི་འཇིག་རྟེན་གྱི་ཨ་པ་ཡོད་ ང་བཅས་ཀྱིས་ཁོང་ལུ་གུས་ཞབས་འབད་ཡི་ དེ་ལས་ཡང་ལྷགཔ་སྦེ་ ང་བཅས་སེམས་ཉིད་ཀྱི་ཡབ་ཀྱི་བཀའ་ལུ་ཉན་ཏེ་ ང་བཅས་ཚེ་ངོ་མ་ཐོབ་སྟེ་ སྡོད་དགོཔ་ཨིན་མེན་ན།

¹⁰ འཇིག་རྟེན་གྱི་ཨ་པ་ཚུ་གིས་ ཡུདཔ་ཐེངས་ཅིག་གི་དོན་ལུ་ ཁོང་རང་གི་ཤེས་མི་དང་འཁྲིལ་ཏེ་ སྒྲིགས་བཙུགསཔ་ཨིན་ དེ་འབདཝ་ད་དཀོན་མཆོག་གིས་ སྒྲིགས་བཙུགས་མི་དེ་ ང་བཅས་ལུ་ཕན་ཐོགས་ནི་དང་ ཁོ་བཟུམ་སྦེ་ དམ་པ་འགྱུར་བཅུག་ནིའི་དོན་ལུ་ཨིན།

¹¹ སྒྲིགས་བཙུགས་ནི་དེ་ ཉམས་དགའ་ཏོག་ཏོ་དང་སྤྲོ་བ་ཆེ་ཏོག་ཏོ་ཅིག་མེན་ འདི་ན་ཟུག་ཅན་ཅིག་ཨིན་ ཨིན་རུང་ཤུལ་ལས་ འདི་བཟུམ་གྱི་སྦྱོང་བརྡར་ཡོད་མི་གིས་ ཞི་བདེ་ཐོབ་སྟེ་ དཀོན་མཆོག་གི་ཐུགས་དང་ལྡན་པའི་ལཱ་ཕྲངམ་འབད་དེ་སྡོད་འོང་།

¹² དེ་འབདཝ་ལས་བརྟེན་ཏེ་ ཁེ་རྒོ་མེད་པའི་ལགཔ་དང་ ཤུགས་མེད་པའི་པུས་མོ་དེ་ཚུ་ སྒྲིང་སྒྲིང་བཟོ།

¹³ ཁྱེད་འགྱོ་སའི་ལམ་ཕྲང་ཏང་ཏ་བཟོ་ དེ་ལས་ཞབོ་འཐེང་བཏང་འགྱོ་མིའི་ མི་ཚུ་གིས་ ཧེང་བཀལ་ ཞབོ་འགྱོ་ནི་མེན་པར་ དྲག་སྟེ་ལམ་འགྱོ་ཚུགས་འོང་།།

འཐུས་མ་ཤོར་བར་ རིགཔ་སྒྱིམ་དགོ་པའི་བསླབ་བྱ་གི་སྐོར།

¹⁴ མི་ག་ར་དང་གཅིག་ཁར་ ག་དེ་དྲག་དྲག་ མཐུན་ལམ་ལེགས་ཤོམ་སྦེ་སྒྲིག་སྟེ་སྡོད་ནི་དང་ དམ་པ་སྦེ་སྡོད་ནིའི་དོན་ལུ་ རྩ་འགེངས་དགོ་ ག་ཅི་སྨོ་ཟེར་བ་ཅིན་ མི་འདི་ གཙངམ་སྦེ་མཛད་དེ་རྩ་ལས་མེད་པ་ཅིན་ ཁོ་གིས་ གཙོ་བོ་དང་མཇལ་མི་ཚུགས།

¹⁵ དཀོན་མཆོག་གི་ཐུགས་རྗེ་ཐོབ་ནི་མེདཔ་སྦེ་ འགྱོ་མ་བཅུག་ནིའི་དོན་ལུ་ ཁྱེད་ཀྱི་སྦུག་ནང་ཡོད་མི་ཚུ་ ལེགས་ཤོམ་སྦེ་བདག་འཛིན་འཐབ་དགོ་ དེ་འབདཝ་ལས་ ཁྱེད་ཀྱི་སྦུག་ནང་ཡོད་མི་ཚུ་ ཞན་སེམས་བསྐྱེད་མ་བཅུག་ནིའི་དོན་ལུ་ རིགཔ་སྒྱིམ་སྟེ་སྡོད་དགོ་ ཞན་སེམས་ཀྱིས་མ་སྒྲིགཔ་བཟོ་སྟེ་ ཁྱེད་ཀྱི་གྲལ་ཁ་ལས་ལེ་ཤ་ལུ་མེདཔ་བཏང་ནི་ཨིན།

¹⁶ ག་ར་འབད་རུང་ ཚུལ་མིན་ འཇིག་རྟེན་པ་ ཨི་སའུ་བཟུམ་སྦེ་ བུ་སྦོམ་ཤོས་འབད་རུང་ བཞེས་སྒོ་ཁམ་རྡོག་གཅིག་གི་དོན་ལུ་ ཁོ་ཧེ་མ་སྐྱེས་མིའི་ཐོབ་ཐངས་བཙོང་བཏང་མི་བཟུམ་ལུ་ མ་འགྱུར་ནིའི་དོན་ལུ་ རིགཔ་སྒྱིམ་སྟེ་སྡོད་དགོ།

¹⁷ ཤུལ་ལས་ཁོ་གིས་ཨ་པ་གི་བྱིན་རླབས་ལོག་ཐོབ་ནི་གི་རེ་བ་བསྐྱེད་དེ་འབད་རུང་ འཐུས་ཤོར་ཡི་ཟེར་ཁྱེད་ཀྱིས་ཤེས་ ཨིན་རུང་ ཁོ་གིས་མིག་ཆུ་འཛག་སྟེ་ བྱིན་རླབས་དེ་ལོག་ལེན་ནི་སྦེ་རྩ་འགེངས་རུང་ འགྱོད་སེམས་ཀྱི་ཐབས་ཤེས་ག་ནི་ཡང་མེདཔ་སོང་ནུག

¹⁸ ཁྱེད་ཆ་ཁྱབ་ འཛམ་བུ་གླིང་གི་གངས་རི་ སི་ནའི་གུ་ མེ་ལྷབས་འདྲོག་སི་སི་དང་ ས་སྨུག་ གནག་དུང་དུ་ དེ་ལས་རླུང་འཚུབ་ཀྱི་སྦོ་ལོགས་ཁར་འོང་འོངམ་མེན།

¹⁹ འདི་མ་ཚད་ དུང་སྐད་སྦོམ་དང་ དཀོན་མཆོག་གི་གསུང་སྐད་ཀྱི་སྦོ་ལོགས་ཡང་ ཁྱེད་འོང་འོངམ་མེན་ ཨ་ནི་གསུང་སྐད་གོ་མི་ཚུ་གིས་ ད་འདི་ལས་ཕར་ ཚིག་ཐེངས་གཅིག་རང་ གསུང་མ་ད་ཟེར་ཞུ་ནུག

²⁰ ག་ཅི་སྨོ་ཟེར་བ་ཅིན་ རི་དྭགས་སེམས་ཅན་ཨིན་རུང་ གངས་རི་དེ་ལུ་འདོགས་པ་ཅིན་ འདི་རྡོ་གིས་བརྡུང་སྟེ་ བསད་གཏང་ཟེར་མིའི་བཀའ་དེ་ལུ་ ཁོང་བཟོད་མ་ཚུགསཔ་ཨིན་མས།

²¹ འདི་གི་མཐོང་རྒྱ་དེ་ གནམ་མེད་ས་མེད་འདྲོག་སི་སི་འབད་ནི་འདི་གིས་ མོ་སཱེས་ཀྱིས་ཡང་ ང་འདྲོགས་ཏེ་གསིག་དོ་ཟེར་སླབ་ནུག

²² དེ་འབདཝ་ད་ ཁྱེད་ཆ་ཁྱབ་གསོན་པོའི་དཀོན་མཆོག་གི་གངས་རི་ ཟི་ཨཱོན་དང་ ཞིང་ཁམས་ཀྱི་ཁྲོམ་ ཡེ་རུ་ཤ་ལེམ་ དེ་ལས་དེའི་ནང་ གྱངས་ཁ་མ་ཆོད་པའི་ཕོ་ཉ་གི་དགའ་སྤྲོའི་ཚོགས་འཛོམས་ནང་ལྷོད་ཅི།

²³ ཁྱེད་ཆ་ཁྱབ་ཞིང་ཁམས་ལུ་མིང་ཐོ་བཀོད་ཚར་མི་ འགོ་དང་པ་སྐྱེས་མི་ཚུ་གི་ཚོགས་འཛོམས་ནང་ལྷོད་ཅི་ ག་ར་གི་ཁྲིམས་ཕྱེ་མིའི་དཀོན་མཆོག་གི་སྐུ་མདུན་ལུ་བཅར་ཡི་ ཁྱེད་ཡང་དག་པ་བཟོ་ཚར་མི་ ཆོས་སེམས་ཡོད་མི་ཚུ་གི་སེམས་ཉིད་ཀྱི་སྦུག་ལུ་འོང་ཡི།

²⁴ ཞལ་འཆེས་གསརཔ་གི་བར་མི་ ཡེ་ཤུ་གི་སྐུ་མདུན་ལུ་བཅར་ཡི་ ཨ་བཱེལ་གྱི་ཁྲག་ལས་ཡང་དྲགཔ་སྦེ་ དོན་དག་སྦོམ་ཡོད་པའི་སྐུ་ཁྲག་གཏོར་བཞག་སར་ཡང་ལྷོད་ཅི།

²⁵ འདི་གིས་འབད་ རིགཔ་སྒྱིམ་སྟེ་སྡོད་ དཀོན་མཆོག་གིས་ ཁྱེད་ལུ་ག་གསུངས་མི་དེ་ལུ་ སྣང་མེད་བརྩིས་ཏེ་མ་སྡོད་ འཇིག་རྟེན་ནང་གི་ དྲན་བསྐུལ་གནང་མི་དེ་ལུ་ སྣང་མེད་བརྩིས་མི་ཆ་ཁྱབ་ཀྱིས་ སྤར་མ་ཐར་བ་ཅིན་ འདི་ལས་ཡང་ལྷགཔ་སྦེ་ ཞིང་ཁམས་ལས་ དྲན་བསྐུལ་གནང་མི་དེ་ལུ་ ང་བཅས་ཀྱིས་སྣང་མེད་བརྩིས་བ་ཅིན་ ག་དེ་སྦེ་སྤར་ཐར་ནི་སྨོ།

²⁶ དེའི་སྐབས་ལུ་ ཁོ་གི་གསུང་སྐད་ཀྱིས་འཇིག་རྟེན་གཡོམ་རྐྱབ་བཏང་ཡི་ དེ་འབདཝ་ད་ ད་ལྟོ་ཁོ་གིས། ད་རུང་ཚར་གཅིག་ འཇིག་རྟེན་རྐྱངམ་གཅིག་མེན་པར་ ཞིང་ཁམས་ཡང་ གཡོམ་རྐྱབ་གཏང་ནི་ཨིན་ཟེར་ ཁས་བླངས་དེ་སྦེ་བཞེས་ནུག

²⁷ ད་རུང་ཚར་གཅིག་ཟེར་གསུངས་མི་ཚིག་འདི་གིས་ ག་ཅི་སྟོནམ་སྨོ་ཟེར་བ་ཅིན་ གཡོམ་བརྐྱབ་གཏང་ཚུགས་མི་དེ་ཚུ་ གཅིག་འབདན་ ག་ར་མཛད་ཡོད་མི་ཚུ་སྤོག་གཏང་ནི་ཨིན་མས་ དེ་འབདཝ་ད་ གཡོམ་བརྐྱབ་གཏང་མ་ཚུགས་མི་དེ་ཚུ་རྐྱངམ་གཅིག་ རྒྱབ་ལས་ལུས་འོང་།

²⁸ འདི་གིས་འབད་ གཡོམ་བརྐྱབས་ཏེ་གཏང་མ་ཚུགས་མིའི་རྒྱལ་སྲིད་ཐོབ་ཡོདཔ་ལས་བརྟེན་ ང་བཅས་དགའ་ཚོར་བཀའ་དྲིན་ཕུལ་གེ་ དེ་ལས་ད་རུང་ ང་བཅས་ཀྱིས་ དཀོན་མཆོག་ལུ་མཇལཝ་ད་ ཡ་མཚན་ཆེ་སྟེ་ གུས་ཞབས་ཞུ་བའི་ཐོག་ལས་ ཁོ་གི་ཐུགས་དགྱེས་མི་ཞབས་ཏོག་ཞུ་གེ།

²⁹ ག་ཅི་སྨོ་ཟེར་བ་ཅིན་ ང་བཅས་ཀྱི་དཀོན་མཆོག་དེ་ འཚིག་གཏང་མིའི་མེ་ དེ་ཨིན།།