ཧིབ་རུ་ལེའུ་ 11 - རྫོང་ཁ་

དད་པ་ནང་ན་འཐན་ཏོག་ཏོ་སྦེ་སྡོད་མི་ཚུ་གི་སྐོར།

¹ དད་པ་འདི་ རེ་བ་བསྐྱེད་མི་འདི་ལུ་བློ་གཏད་ནི་དང་ མིག་གི་མ་མཐོང་མི་འདི་ལུ་བདེན་འཛིན་རེ་ནི་ འདི་ཨིན།

² འདི་བཟུམ་གྱི་དད་པ་བསྐྱེད་པའི་ཐོག་ལས་སྦེ་ དང་ཕུགས་ཀྱི་མི་ཚུ་ དཀོན་མཆོག་གིས་ཐུགས་དགྱེས་ནུག

³ དད་པ་ལས་རྒྱུད་དེ་ འཇིག་རྟེན་ག་ར་དཀོན་མཆོག་གི་བཀའ་ལས་སྦེ་བྱུང་ནུག་ཟེར་ ང་བཅས་ཀྱིས་ཧ་གོ་ཚུགས་པས་ དེ་ལས་ མཐོང་ཡོད་པའི་དངོས་པོ་དེ་ཚུ་ མ་མཐོང་པའི་དངོས་པོ་དེ་ཚུ་ལས་སྦེ་ བྱུང་འོངས་ནུག

⁴ དད་པ་ལས་རྒྱུད་དེ་ ཨ་བཱེལ་གྱིས་ ཀཱེན་ལས་དྲགཔ་སྦེ་ དཀོན་མཆོག་གི་ཐུགས་དགྱེས་པའི་མཆོད་པ་ཕུལ་ནུག་ དཀོན་མཆོག་གིས་ དེ་སྦེ་འབད་མི་དེ་ ཨ་བཱེལ་འདི་ ཁོ་རའི་ཐུགས་དང་ལྡན་པའི་མི་ཕྲངམ་ཨིན་ཟེར་ སྟོན་གནངམ་ཨིན་མས་ ད་ ཁོ་ཤི་སོང་སྟེ་འབད་རུང་ ཁོ་གི་དད་པ་དེ་ ང་བཅས་ཀྱི་དོན་ལུ་ད་ལྟོ་ཡང་དཔེ་གཅིག་ཨིན།

⁵ དད་པ་ལས་རྒྱུད་དེ་ ཨེ་ནོག་དེ་ ཤི་མ་དགོཔ་སྦེ་ཞིང་ཁམས་ལུ་དྲངས་ནུག་ དཀོན་མཆོག་གིས་ཁོ་བསྣམས་འབྱོནམ་ལས་ ཁོ་ག་ཏེ་འཚོལ་རུང་མ་ཐོབ་པས་ ཁོ་ཡར་མ་བསྣམས་པའི་ཧེ་མ་ ཁོ་གིས་དཀོན་མཆོག་གི་ཐུགས་དགྱེས་བཅུག་པའི་དཔེ་སྦེ་འཐོན་ནུག

⁶ དད་པ་མེད་པ་ཅིན་ དཀོན་མཆོག་གི་ཐུགས་དགྱེས་མི་ཚུགས་ ག་ར་འབད་རུང་ ཁོ་གི་སྐུ་མདུན་ལུ་བཅར་མི་ཆ་ཁྱབ་ཀྱིས་ དཀོན་མཆོག་དེ་ངོ་མ་ཨིན་ ཁོ་ལུ་སེམས་ཀྱི་གཏིང་ལས་རང་འཚོལ་འོང་མི་ཚུ་ལུ་ ཁོ་གིས་གསོལ་རས་གནངམ་ཨིན་ཟེར་ དད་པ་བསྐྱེད་དགོཔ་ཨིན།

⁷ དད་པ་ལས་རྒྱུད་དེ་ ནོ་ཝ་གིས་དཀོན་མཆོག་ལས་ ཁོ་གིས་མ་མཐོང་མི་གཅིག་གི་སྐོར་ལས་ ཉེན་བརྡ་ཐོབ་ད་ ཁོ་གིས་དཀོན་མཆོག་གི་བཀའ་ལུ་ཉན་ཏེ་ ཁོ་རའི་བཟའ་ཚང་ལུ་སྐྱབས་འབད་ནི་གི་དོན་ལུ་ གྲུ་སྦོམ་གཅིག་བཟོ་ནུག་ དད་པ་འདི་གིས་འབད་ ཁོ་གིས་འཛམ་བུ་གླིང་གི་སྐྱོན་དེ་སྟོན་བྱིན་ཏེ་ ཁོ་དཀོན་མཆོག་གི་ཐུགས་དང་ལྡན་པའི་མི་ཕྲངམ་ཚུ་གི་གྲལ་ཁར་ཚུད་ནུག

⁸ དད་པ་ལས་རྒྱུད་དེ་ ཨབ་ར་ཧམ་ལུ་དཀོན་མཆོག་གིས་ ཁས་བླངས་བཞེས་མི་ས་གནས་འདི་ནང་སོང་ཟེར་བཀའ་གནངམ་ད་ ཁོ་རང་ག་ཏེ་འགྱོཝ་ཨིན་ན་མ་ཤེས་ཏེ་འབད་རུང་ ཁོ་གིས་བཀའ་ལུ་ཉན་ཏེ་སོང་ནུག

⁹ དད་པ་ལས་རྒྱུད་དེ་ ཁོ་ཁས་བླངས་བཞེས་གནང་མི་ས་གནས་ནང་ ཕྱིའི་མི་གཅིག་བཟུམ་སྦེ་ གུར་སྤུབ་སྟེ་ སྒར་བཅགས་སྡོད་ནུག་ འདི་དང་འདྲཝ་སྦེ་ ཨི་སག་དང་ ཡ་ཀོབ་ཡང་ ཁོ་བཟུམ་སྦེ་སྡོད་ནུག་ ཁོང་གཉིས་ཀུ་ཡང་ ཨབ་ར་ཧམ་དང་འདྲན་འདྲ་ཁས་བླངས་ཀྱི་བགོ་བཤའ་ཐོབ་མི་ཚུ་ཨིན་མས།

¹⁰ ག་ཅི་སྨོ་ཟེར་བ་ཅིན་ ཁོ་གིས་རྨང་གཞི་སྒྲིང་སྒྲིང་ཡོད་པའི་ཁྲོམ་ལུ་སྒུག་སྡོད་ཅི་ འདི་ལུ་འགྱམ་བཙུགས་ཏེ་ཡར་ལྷོང་གནང་མི་དེ་ དཀོན་མཆོག་ཁོ་རང་ཨིན།

¹¹ དད་པ་ལས་རྒྱུད་དེ་ ས་ར་ལོ་ན་རྒས་ཏེ་ རབས་ཆད་མ་ལུ་ཐལ་སོང་རུང་ མོ་གི་ལུས་ལུ་ཨ་ལོ་སྐྱེ་ནིའི་སྟོབས་ཤུགས་ཐོབ་ནུག་ ག་ཅི་སྨོ་ཟེར་བ་ཅིན་ མོ་ལུ་ཁས་བླངས་གནང་མི་དེ་ དམ་ཚིག་ཅན་ཨིན་ཟེར་ མོ་གིས་དད་པ་བསྐྱེད་བསྐྱེདཔ་ཨིན་མས།

¹² དེ་འབདཝ་ལས་ ཨབ་ར་ཧམ་ཁོ་རང་དབུགས་མ་ཆདཔ་ཙམ་གྱི་ཕུང་པོ་འདི་ལས་ རྒྱལ་ཁབ་ཡོངས་སུ་བྱུང་འོངས་ནུག་ ཁོ་གི་བུ་བརྒྱུད་ཚུ་ གནམ་ཁའི་སྐརམ་བཟུམ་དང་ རྒྱ་མཚོ་མཐའ་མའི་བྱེམ་བཟུམ་སྦེ་ གྱངས་ཁ་མ་ཆོདཔ་ཡོད་མིའི་ ཕམ་སྦེ་བྱུང་ནུག

¹³ ཨ་ནི་མི་ཚུ་གིས་ དཀོན་མཆོག་གིས་ཁས་བླངས་བཞེས་གནང་མི་དེ་ མ་ཐོབ་སྟེ་འབད་རུང་ ཁོང་ག་ར་དད་པ་བསྐྱེད་དེ་རང་ཤི་སོང་ནུག་ ཁས་བླངས་འདི་ལུ་ཁོང་གིས་ ཐག་རིང་ས་ལས་སྦེ་བལྟ་སྟེ་ གདོང་ལེན་འབད་དེ་སྡོདཔ་མ་ཚད་ ཁོང་འཛམ་བུ་གླིང་འདི་ནང་ལུ་མགྱོནམ་དང་ ཕྱིའི་མི་གཅིག་ཨིན་མས་ཟེར་ ཁ་བཟེད་ནུག

¹⁴ འདི་བཟུམ་གྱི་བློ་སླབ་མི་ཚུ་གིས་ ཁོང་རང་གི་དོན་ལས་རྒྱལ་ཁབ་གཅིག་འཚོལ་ཡོད་པའི་དཔེ་སྟོནམ་ཨིན་མས།

¹⁵ ཁོང་གིས་ཤུལ་ལས་བཀོག་བཞག་མི་ ཁོང་རའི་གཡུས་འདི་ སེམས་ཁར་དྲན་དྲནམ་འབད་བ་ཅིན་ ཁོང་རང་གི་གཡུས་ཁར་ ལོག་འགྱོ་ནི་གི་གོ་སྐབས་ཡང་ཐོབ་ཐོབ་འོང་།

¹⁶ དེ་འབདཝ་ད་ ཁོང་ཆ་ཁྱབ་ཀྱིས་དེ་ལས་ཡང་དྲག་པའི་རྒྱལ་ཁབ་ གཅིག་འབདན་ ཞིང་ཁམས་ལུ་རེ་བ་བསྐྱེད་ནུག་ རྒྱུ་མཚན་འདི་ལུ་བརྟེན་ཏེ་ དཀོན་མཆོག་གིས་ ཁོང་གི་དཀོན་མཆོག་ཨིན་ཟེར་ ཞལ་གྱི་བཞེས་ནི་ལུ་ ཞལ་མི་སྐྱེམས་ ག་ཅི་སྨོ་ཟེར་བ་ཅིན་ དཀོན་མཆོག་གིས་ ཁོང་གི་དོན་ལུ་ཁྲོམ་གསརཔ་གཅིག་ གྲ་སྒྲིག་མཛད་གནང་ནུག

¹⁷ དད་པ་ལས་རྒྱུད་དེ་ དཀོན་མཆོག་གིས་ ཨབ་ར་ཧམ་ལུ་ ཁོ་གི་དད་པའི་བརྟག་དཔྱད་གནང་བའི་སྐབས་ལུ་ ཁོ་གིས་ ཨི་སག་ དམར་མཆོད་སྦེ་ ཕུལ་ནི་འབད་ནུག་ ཁས་བླངས་ཐོབ་མི་དེ་གིས་ ཁོ་རའི་བུ་གཅིགཔ་དེ་མཆོད་པ་སྦེ་ཕུལ་ནི་སྦེ་ གྲ་སྒྲིག་བརྐྱབས་ནུག

¹⁸ ཧེ་མ་དཀོན་མཆོག་གིས་ཁོ་ལུ་ ཨི་སག་ལས་རྒྱུད་དེ་ ཁྱོད་ཀྱི་བུ་བརྒྱུད་ཀྱི་མིང་བཞག་ནི་ཨིན་ཟེར་གསུངས་གསུངསམ་ཨིནམ་ལས་ ཁོ་གིས་གྲ་སྒྲིག་བརྐྱབས་ནུག

¹⁹ དཀོན་མཆོག་གིས་ ཨི་སག་ ཤི་ས་ལས་གསོན་པོ་ལྷོང་གནང་ཚུགས་ཟེར་ ཨབ་ར་ཧམ་གྱིས་མནོ་བསམ་བཏངམ་མ་ཚད་ དཔེ་བཟུམ་ཅིག་སྦེ་ ཁོ་གིས་ ཨི་སག་ཤི་ས་ལས་ལོག་སྟེ་ཐོབ་ནུག

²⁰ དད་པ་ལས་རྒྱུད་དེ་ ཨི་སག་གིས་ཁོ་རའི་བུ་ ཡ་ཀོབ་དང་ ཨི་སའུ་ལུ་ མ་འོང་པའི་དུས་ཀྱི་དོན་ལུ་བྱིན་རླབས་གནང་ནུག

²¹ དད་པ་ལས་རྒྱུད་དེ་ ཡ་ཀོབ་ཤི་བའི་བསྒང་ ཡོ་སེབ་ཀྱི་བུ་རེ་རེ་ལུ་བྱིན་རླབས་གནང་ནུག་ དེ་ལས་ ཁོ་རའི་ལགཔ་འཁརཝ་གུ་ཧེན་ཏེ་ དཀོན་མཆོག་ལུ་བསྟོད་པ་ཕུལ་ནུག

²² དད་པ་ལས་རྒྱུད་དེ་ ཡོ་སེབ་ཀྱི་དུས་མཇུག་བསྡུ་རནམ་ད་ ཨཱིས་ར་ཨཱེལ་པ་དེ་ཚུ་ ཨི་ཇིབ་རྒྱལ་ཁབ་ལས་གཞི་སྤོ་འགྱོ་དགོ་པའི་སྐོར་ལས་ སླབ་མ་ཚད་ ཁོ་རའི་རུ་ཏོ་འདི་ལུ་ ག་ཅི་འབད་དགོཔ་ཨིན་ན་ འདི་གི་སྐོར་ལས་བཀོད་རྒྱ་གནང་ནུག

²³ དད་པ་ལས་རྒྱུད་དེ་ མོ་སཱེས་སྐྱེཝ་ད་ ཨའི་དང་ཨ་པ་གིས་ ཁོ་གཞན་དང་མ་འདྲ་བའི་ཨ་ལོ་འཇའ་རིསམ་སྦེ་མཐོང་སྟེ་ རྒྱལ་པོའི་བཀའ་ཤོག་བལྟ་སྟེ་ཡང་མ་འདྲོག་པར་ ཟླཝ་གསུམ་ཚུན་ཚོད་གཡིབ་སྟེ་བཞག་ནུག

²⁴ དད་པ་ལས་རྒྱུད་དེ་ མོ་སཱེས་སྦོམ་འགྱོཝ་ད་ ཨི་ཇིབ་རྒྱལཔོ་གི་སྲསམོ་གི་བུ་ཨིན་ཟེར་ ཁ་བཟེད་མ་བཏུབ་པས།

²⁵ ཁོ་གིས་ ཡུདཔ་ཐེངས་ཅིག་སྡིག་པའི་དགའ་སྤྲོ་ནང་སྡོདཔ་བ་འདི་ དཀོན་མཆོག་གི་མི་དེ་ཚུ་དང་གཅིག་ཁར་ སྡུག་བསྔལ་མྱོང་སྟེ་སྡོད་ནི་འདི་ལུ་ གདམ་ཁ་རྐྱབ་ནུག

²⁶ ཨི་ཇིབ་རྒྱལ་ཁབ་ཀྱི་རྒྱུ་ནོར་ལོངས་སྤྱོད་དང་འཕྱདཔ་ད་ ཁིརཱིས་ཀྱི་དོན་ལུ་བློ་བཙོང་སྟེ་སྡོད་ནི་འདི་ ག་ར་ལས་དྲགཔ་སྦེ་བརྩིས་ནུག་ ག་ཅི་འབད་ཟེར་བ་ཅིན་ ཁོ་གིས་དཀོན་མཆོག་གི་གསོལ་རས་སྒུག་སྟེ་ སྡོད་སྡོདཔ་ཨིན་མས།

²⁷ དད་པ་ལས་རྒྱུད་དེ་ རྒྱལཔོ་དགོངསམ་ཁྲེལ་མི་ལུ་བལྟ་སྟེ་མ་འདྲོག་པར་ ཁོ་རྒྱལ་ཁབ་ ཨི་ཇིབ་ལས་ཐོན་སོང་ནུག་ ག་ཅི་སྨོ་ཟེར་བ་ཅིན་ མིག་གིས་ མ་མཇལ་མི་དཀོན་མཆོག་ལུ་ མཇལ་མཇལཝ་བཟུམ་སྦེ་རང་བལྟ་སྟེ་ དཀའཝ་སྤྱད་སྡོད་ནུག

²⁸ དད་པ་ལས་རྒྱུད་དེ་ ཁོ་གིས་ ཤི་ས་ལས་ཐར་བའི་དུས་ཆེན་སྲུང་སྟེ་ བསད་པ་འོང་མི་ཕོ་ཉ་དེ་གིས་ ཨཱིས་ར་ཨཱེལ་པ་ཚུ་གི་བུ་འགོ་སྐྱེས་ཚུ་ལུ་ གནོད་པ་བཀལ་མ་བཅུག་པའི་དོན་ལུ་ སྒོའི་གུ་ཁྲག་གཏོར་ནུག

²⁹ དད་པ་ལས་རྒྱུད་དེ་ ཨཱིས་ར་ཨཱེལ་པ་དེ་ཚུ་རྒྱ་མཚོ་དམརཔོ་ནང་ལས་ ས་སྐམ་ནང་བཟུམ་སྦེ་འགྲོ་འགྲུལ་འབད་ནུག་ དེ་འབདཝ་ད་ ཨི་ཇིབ་པ་དེ་ཚུ་ཡང་ ཁོང་བཟུམ་སྦེ་བརྒལ་ནི་འབདཝ་ད་ རྒྱ་མཚོ་ནང་ཐིམ་སྟེ་ཤི་སོང་ནུག

³⁰ དད་པ་ལས་རྒྱུད་དེ་ མི་དེ་ཚུ་ཉིནམ་བདུན་ཚུན་ཚོད་ ཁྲོམ་ ཡེ་རི་ཀོ་གི་གྱང་བསྐོར་ར་བརྐྱབས་ད་ གྱང་འགྱེལ་སོང་ནུག

³¹ དད་པ་ལས་རྒྱུད་དེ་ གཞང་བཙོངམ་ རེ་ཧབ་ཀྱིས་ བྱ་བལྟ་མི་ཚུ་ལུ་ མོ་གི་ཁྱིམ་ནང་འོང་བཅུག་ནི་འདི་གིས་ མོ་ལུ་དཀོན་མཆོག་གི་བཀའ་ལུ་མ་ཉན་མི་ཚུ་དང་གཅིག་ཁར་ བསད་མ་བཀོག་བས།

³² ད་ ང་གིས་འདི་བ་ལྷགཔ་སྦེ་ ག་ཅི་སླབ་ནི་སྨོ་ གི་དེ་ཨཱོན་དང་ བ་རག་ སེམ་སཱོན་དང་ ཡེབ་ཐ་ ད་བིད་དང་ ས་མུ་ཨཱེལ་ དེ་ལས་ལུང་སྟོན་པ་ཚུ་གི་སྐོར་ལས་ སླབ་ནིའི་དུས་ཚོད་མིན་འདུག

³³ དེ་ཚུ་གིས་དད་པ་ལས་རྒྱུད་དེ་ རྒྱལ་ཁབ་ཚུ་ཕམ་གཏང་ དྲང་བདེན་གྱི་ཐོག་ལས་གཞུང་སྐྱོང་ དེ་ལས་ དཀོན་མཆོག་གིས་ ཁས་བླངས་བཞེས་ཡོད་མི་དེ་ཚུ་ཐོབ་མ་ཚད་ སེངྒེ་གི་ཁ་ཡང་བསྡམས་ཚུགས་ནུག

³⁴ མེ་ལྷབས་ལྡིང་མི་དེ་ཡང་བསད་ དེ་མ་ཚད་ དཔའ་རྟགས་རྣོས་ཁིག་ཁི་གུ་ལས་སྤར་ཐར་ནུག་ ཞན་ཁོག་ཚུ་སྟོབས་ཤུགས་ཅན་ལུ་འགྱུར་ དམག་རྐྱབ་ས་ལུ་མི་སྟོབས་ཅན་སྦེ་ཐོན་ ཕྱི་ཁའི་དམག་མི་ཚུ་བདའ་བཏང་ནུག

³⁵ ཨམ་སྲུ་ཚུ་གིས་ ཁོང་རའི་བུ་ཤི་ས་ལས་གསོན་པོ་ལོག་ཐོབ་ནུག ལ་ལུ་གིས་སྡུག་མྱོང་སྟེ་ ཤུལ་ལས་གསོན་པོ་སྦེ་ལྷོང་གནང་བའི་དུས་ལུ་ གསོལ་རས་ལེགས་ཤོམ་ཐོབ་འོང་ཟེར་ སྡུག་བསྔལ་ལས་ཐར་བའི་འདོད་པ་མ་བསྐྱེད་པས།

³⁶ ལ་ལུ་ཅིག་ལུ་ མེས་མེད་བསྐྱུར་ རྟས་ལྕག་གིས་དྲང་ ལ་ལུ་ལྕགས་ཐག་གིས་བཅིང་ བཙོན་ནང་བཙུགས་ནུག

³⁷ ལ་ལུ་རྡོ་གིས་བརྡུང་སྟེ་བསད་བཀོག་ ལ་ལུ་སོག་ལེ་གིས་གཉིས་སྦེ་བཏོགས་ ལ་ལུ་དཔའ་རྟགས་ཀྱིས་བསད་བཀོག་ནུག་ ལ་ལུ་ལུག་དང་ར་གི་པགས་ཀོའི་བགོ་ལ་བཟོ་གྱོན་ ཐབས་རྡུགས་སི་སི་སྦེ་སྡོད་དེ་ རོགས་ཀྱིས་གནོདཔ་བཀལ་ཏེ་སྡུག་ལེ་ཤ་བྱིན་ནུག

³⁸ ཁོང་རི་སྟོང་དང་གངས་རི་ལས་ཕར་བཤལ་ཏེ་ བྱག་ཕུག་དང་དོང་ཚུ་ནང་སྡོད་དགོཔ་ཐལ་ནུག་ དེ་འབདཝ་ད་ ཁོང་ཆ་ཁྱབ་ལུ་ འཇིག་རྟེན་པ་ཚུ་གིས་ ཁོང་རའི་མི་སྦེ་བརྩི་ནིའི་འོས་འབབས་མིན་འདུག

³⁹ འདི་ཚུ་ག་ར་གིས་ དད་པ་གི་ཐོག་ལས་ དཀོན་མཆོག་གིས་ཐུགས་དགྱེས་མི་སྦེ་འཐོན་ཏེ་འབད་རུང་ དཀོན་མཆོག་གིས་ཁས་བླངས་བཞེས་གནང་མི་ཚུ་ ཁོང་ག་གིས་ཡང་མ་ཐོབ་པས།

⁴⁰ ག་ཅི་སྨོ་ཟེར་བ་ཅིན་ དཀོན་མཆོག་གིས་ང་བཅས་ཀྱི་དོན་ལུ་ འདི་བ་ལྷག་པའི་འཆར་གཞི་གཅིག་བརྩོམས་གནང་ཡི་ འདི་གིས་ ཁོང་ལུ་ཡང་ ང་བཅས་དང་གཅིག་ཁར་ཡང་དག་པ་ མཛད་གནང་ནིའི་དོན་ལུ་ཨིན།།