ཧིབ་རུ་ལེའུ་ 10 - རྫོང་ཁ་

ཁིརཱིས་ཁོ་རང་མཆོདཔ་སྦེ་ཕུལ་བའི་སྐོར།

¹ བཀའ་ཁྲིམས་དེ་ ཤུལ་མ་འོང་ནི་འབད་མི་ འབྱུང་བ་ལེགས་ཤོམ་གྱི་བཟོ་དབྱིབས་ངོ་མ་མེན་པར་ འདི་གི་གྱིབ་མ་གཅིག་ཨིན་ བཀའ་ཁྲིམས་ཀྱི་འོག་ལུ་ཡོད་མི་ཚུ་གིས་ མཇུག་བསྡུ་ནི་མེད་པའི་མཆོད་པ་ ལོ་ལྟར་བཞིན་དུ་ ཅོག་འཐདཔ་སྦེ་ ལོག་ཅི་ལོག་ཅི་ ཕུལཝ་ཨིན་མས་ དེ་འབདཝ་ད་ ཨ་ནི་བཟུམ་གྱི་མཆོད་པ་གིས་ དཀོན་མཆོག་གི་སྐུ་མདུན་ལུ་བཅར་མི་ཚུ་ ཡང་དག་པ་རྩ་ལས་ར་བཟོ་མི་ཚུགས།

² མཆོད་པ་འདི་གིས་ ཁོང་ལུ་ཡང་དག་པ་བཟོ་ཚུགས་ཚུགསཔ་འབད་བ་ཅིན་ ཁོང་གིས་མཆོད་པ་ཕུལ་ནི་དེ་ ཧེ་མ་ལས་རང་ བཞག་བཞགཔ་འོང་ དེ་ལས་མཆོདཔ་ཕུལ་མི་ཚུ་ ཐེངས་གཅིག་ནང་རང་ ཡང་དག་པ་བཟོ་སྟེ་ ཁོང་ཆ་ཁྱབ་ཀྱིས་འབད་མི་སྡིག་པ་འདི་ ཁོང་རང་གི་སེམས་ཁར་ཉེས་པ་ཡལ་ཏེ་མནོ་བསམ་མ་གཏངམ་འོང་།

³ དེ་འབདཝ་ད་ ཨ་ནི་ལོ་ལྟར་བཞིན་གྱི་མཆོད་པ་ཚུ་གིས་ མི་ཚུ་ལུ་ ཁོང་རའི་སྡིག་པ་སེམས་ཁར་དྲན་བཅུགཔ་ཨིན་མས།

⁴ ག་ཅི་སྨོ་ཟེར་བ་ཅིན་ གླང་དང་ར་གི་ཁྲག་མཆོད་དེ་གིས་ སྡིད་པ་གསལ་མི་ཚུགས།

⁵ འདི་གིས་འབད་ ཁིརཱིས་འཛམ་བུ་གླིང་ནང་བྱོན་པའི་སྐབས་ལུ་ དེ་སྦེ་གསུངས་ནུག མཆོད་པ་དང་ཕུལ་ཆ་ལུ་ནཱ་གིས་ཐུགས་མ་དགྱེས་ དེ་འབདཝ་ད་ ནཱ་གིས་ངེ་གི་དོན་ལུ་ གཟུགས་གཅིག་གྲ་སྒྲིག་མཛད་གནང་ཡི།

⁶ དམར་མཆོད་དང་སྡིག་པའི་མཆོད་པ་ཚུ་ལུ་ ནཱ་གིས་ཐུགས་མ་དགྱེས་པས།

⁷ དེ་ལས་ ཀྱེ་དཀོན་མཆོག་ ནཱ་གཟིགས་ལགས་ ངེ་གི་སྐོར་ལས་གསུང་དེབ་ནང་བྲིས་ཏེ་ཡོདཔ་བཞིན་དུ་ ནཱ་གི་ཐུགས་དགོངས་སྒྲུབ་ནིའི་དོན་ལུ་ ང་ནཱ་ལུ་འོངས་ཏེ་ཡོད་ཟེར་ཞུ་ཡི།

⁸ ལྟག་ལུ་ཁིརཱིས་ཀྱིས་དཀོན་མཆོག་ལུ་དེ་སྦེ་ཞུ་ནུག་ མཆོད་པ་དང་ཕུལ་ཆ་ དམར་མཆོད་དང་སྡིག་པའི་མཆོད་པ་ཚུ་ ནཱ་གིས་མ་བཞེསཔ་མ་ཚད་ ནཱ་གིས་དེ་ཚུ་ལུ་ཐུགས་མ་དགྱེས་ཟེར་ (འདི་ཚུ་ག་ར་བཀའ་ཁྲིམས་བཞིན་དུ་ ཕུལ་མི་མཆོདཔ་ཚུ་ཨིན།)

⁹ ད་རུང་ཤུལ་ལས་ཁིརཱིས་ཀྱིས་ ནཱ་གི་ཐུགས་དགོངས་སྒྲུབ་ནིའི་དོན་ལུ་ ང་ནཱ་ལུ་ཡོད་ཟེར་ཞུ་ཡི་ཟེར་ གསུངས་ཏེ་ ཞལ་འཆེས་གཉིས་པ་འགོ་བཙུག་ནིའི་དོན་ལུ་ ཧེ་མ་གི་ཞལ་འཆེས་འདི་ལུ་ ཆ་མེད་གཏང་བཞགཔ་ཨིན་མས།

¹⁰ ཨ་ནི་ཐུགས་དགོངས་འདི་ སྒྲུབ་པ་ལས་བརྟེན་ཏེ་ ཡེ་ཤུ་ཁིརཱིས་ཀྱིས་ སྐུ་གཟུགས་ནང་ དུས་རྟག་བུ་རང་གི་དོན་ལུ་ སྟབས་གཅིག་སྦེ་ མཆོདཔ་ཕུལ་བའི་སྒོ་ལས་ ང་བཅས་གཙངམ་སྦེ་མཛད་གནང་ཡི།

¹¹ བླམ་ག་ར་གིས་ ཉིནམ་རེ་འཆར་ར་ མཆོད་པ་ཅོག་འཐདཔ་སྦེ་ལོག་ཅི་ལོག་ཅི་ཕུལ་ཏེ་ ཞབས་ཏོག་སྒྲུབ་རུང་ འདི་གིས་སྡིག་པ་རྩ་ལས་ར་དག་མ་ཚུགསཔ་ཨིན་མས།

¹² དེ་འབདཝ་ད་ ཁིརཱིས་ཀྱིས་ སྡིག་པ་ཚུ་གི་དོན་ལུ་ དུས་རྟག་བུ་ར་གི་དོན་ལུ་ སྟབས་གཅིག་སྦེ་མཆོད་པ་ཕུལ་ཏེ་ ཁོ་དཀོན་མཆོག་གི་ཕྱག་གཡས་ཁ་ཐུག་ལུ་བཞུགས་ནུག

¹³ དེ་སྐབས་ལས་རང་ ཁོ་གི་དགྲ་ཚུ་ ཁོ་རའི་དབང་ཚད་འོག་ལུ་མ་བཙུག་ཚུན་ཚོད་ སྒུག་སྟེ་བཞུགས་ཡོད།

¹⁴ ག་ཅི་སྨོ་ཟེར་བ་ཅིན་ ཁིརཱིས་ཀྱི་མཆོད་པ་གཅིག་གི་ཐོག་ལས་སྦེ་ གཙངམ་སྦེ་མཛད་པའི་བསྒང་ཡོད་མི་ཚུ་ལུ་ ཨ་རྟག་རང་གི་དོན་ལུ་ ཡང་དག་པ་མཛད་གནངམ་ཨིན།

¹⁵ དམ་པའི་ཐུགས་ཉིད་ཀྱིས་ཡང་ འདི་གི་སྐོར་ལས་ ང་བཅས་ལུ་འཛོམ་དཔང་བཤདཔ་ཨིན་ འགོ་དང་པ་རང་ཁོ་གིས་དེ་སྦེ་གསུངས་ནུག

¹⁶ དུས་ཚོད་དེའི་ཤུལ་ལས་ ཁོང་དང་གཅིག་ཁར་བཟོ་ནི་འབད་མི་ ངེ་གི་ཞལ་འཆེས་འདི་ ཨ་ནི་ཨིན་ཟེར་ གཙོ་བོ་གིས་གསུངས་དོ་ ཁོང་གི་ཧིང་ཁ་ལུ་ ང་རའི་བཀའ་ཁྲིམས་བཙུག་བྱིན་ནི་ཨིནམ་མ་ཚད་ སེམས་ནང་ཡང་འབྲི་བྱིན་ནི་ཨིན།

¹⁷ དེ་ལས་ཁོ་གིས། ཁོང་གི་སྡིག་པ་དང་ལཱ་ཉེས་པ་ཚུ་ ང་གིས་ལོག་སྟེ་སེམས་ཁར་མི་དྲན་ཟེར་ གསུངས་ནུག

¹⁸ དེ་ཚུ་ག་ར་བཀའ་དྲིན་བསྐྱང་གནང་ཚར་མི་ཚུ་ ད་རུང་སྡིག་པའི་མཆོད་པ་ཕུལ་མི་དགོ།།

བཟོད་སྲན་བསྐྱེད་དེ་སྡོད་དགོ་པའི་སྐོར།

¹⁹ འདི་གིས་འབད་སྤུན་ཆ་ཚུ་ ཡེ་ཤུ་གི་སྐུ་ཁྲག་གི་ཐོག་ལས་སྦེ་ ག་ར་ལས་དམ་པའི་ས་གནས་ཀྱི་ནང་ན་ འགྱོ་ནིའི་བློ་ཁོག་ང་བཅས་ལུ་ཡོད།

²⁰ ག་ཅི་སྨོ་ཟེར་བ་ཅིན་ སྒོའི་ཡོལ་ལི་ཕྱེ་སྟེ་ ང་བཅས་ཀྱི་དོན་ལུ་ ལམ་གསརཔ་དང་གསོན་པོའི་ལམ་གནང་ཡི་ ཡོལ་ལི་དེ་ ཡེ་ཤུ་གི་སྐུ་གཟུགས་ཨིན།

²¹ འདི་མ་ཚད་ དཀོན་མཆོག་གི་བཟའ་ཚན་ནང་ ང་བཅས་ལུ་མཁན་ཆེན་གཅིག་ཡོདཔ་ཨིན།

²² དེ་འབདཝ་ལས་ ང་བཅས་དྲང་སེམས་བསྐྱེད་དེ་ དད་པའི་སྒོ་ལས་བློ་གཏད་ཞིནམ་ད་ དཀོན་མཆོག་གི་སྐུ་མདུན་ལུ་བཅར་གེ་ ག་ཅི་སྨོ་ཟེར་བ་ཅིན་ བླམ་གྱིས་གཙངམ་བཟོ་ནི་གི་དོན་ལུ་ཁྲག་གཏོར་དོཝ་བཟུམ་སྦེ་ ང་བཅས་ཀྱི་སེམས་འདི་ ཁིརཱིས་ཀྱི་སྐུ་ཁྲག་གིས་ མནོ་བསམ་ངན་པ་ལས་དག་ཏོག་ཏོ་བཟོ་སྟེ་ ཆུ་གཙང་ཏོག་ཏོ་གིས་ ང་བཅས་ཀྱི་གཟུགས་ཆུ་བཤལ་རྐྱབ་ཨིན།

²³ ང་བཅས་ཀྱིས་ཁས་ལེན་འབད་མི་རེ་བ་དེ་ལུ་ ཐེ་ཚོམ་མེད་པར་ དད་པ་སྒྲིང་སྒྲིང་སྦེ་བསྐྱེད་དེ་སྡོད་དགོ་ ག་ཅི་སྨོ་ཟེར་བ་ཅིན་ ཁས་བླངས་བཞེས་གནང་མི་དེ་ ན་འཐན་ཏོག་ཏོ་ཡོད།

²⁴ ང་བཅས་གཅིག་གི་གཅིག་ལུ་ ག་དེ་སྦེ་བྱམས་པ་དང་ལཱ་བཟང་པོ་གི་དོན་ལུ་ སེམས་ཤུགས་བསྐྱེད་བཅུག་ནི་ཨིན་ན་ འདི་གི་སྐོར་ལས་མནོ་བསམ་གཏང་དགོ།

²⁵ མི་ལ་ལུ་ཅིག་ལུ་ དདཔ་ཅན་འཛོམས་སར་འགྱོ་ནིའི་ལུགས་སྲོལ་མེདཔ་འོང་ དེ་འབདཝ་ད་ ཁྱེད་གཅིག་ཁར་འཛོམས་ཏེ་ གཅིག་གིས་གཅིག་ལུ་སེམས་ཤུགས་བྱིན་དགོ་ གཙོ་བོ་གི་ཉིནམ་དེ་ནཱ་སྦོ་ལོགས་ལྷོདཔ་ཨིནམ་ ཁྱེད་ཀྱིས་མཐོང་མཐོངམ་འབདཝ་ལས་བརྟེན་ཏེ་ འདི་ལས་ཡང་ལྷགཔ་སྦེ་འབད་དགོ།

²⁶ ག་ཅི་སྨོ་ཟེར་བ་ཅིན་ ང་བཅས་ཀྱིས་བདེན་པའི་རིགཔ་ཐོབ་ཞིནམ་ལས་ ཤེས་མཐོང་སྟེ་སྡིག་པ་འབད་བ་ཅིན་ སྡིག་བཤགས་ཀྱི་མཆོད་པ་ཡོད་རང་མེད།

²⁷ དེ་སྦེ་འབད་མི་ཚུ་ དཀོན་མཆོག་གི་དགྲ་ཚུ་དང་གཅིག་ཁར་ ཁོ་གི་ཁྲིམས་འདྲོག་སི་སི་ ཐལ་བར་བརླག་གཏང་མིའི་མེ་དེ་ལུ་ སྒུག་སྡོད་ནི་རྐྱངམ་གཅིག་ལས་བརྒལ་མེད།

²⁸ མོ་སཱེས་ཀྱི་བཀའ་ཁྲིམས་མ་སྲུང་མིའི་མི་དེ་ ག་ར་ཨིན་རུང་ འཛོམ་དཔང་འབད་མི་ གཉིས་ཡང་ན་ གསུམ་གྱིས་ བློ་འདི་བདེན་ཟེར་སླབ་མི་འཐོན་པ་ཅིན་ མི་འདི་སྙིང་རྗེ་མ་ཐོབ་པར་བསད་ནུག

²⁹ ད་ དཀོན་མཆོག་གི་སྲས་ལུ་ རྐང་མའི་འོག་ལུ་རྫོབ་མི་དང་ ང་བཅས་ལུ་གཙངམ་མཛད་མི་ ཞལ་འཆེས་ཀྱི་ཁྲག་ལུ་གོ་མ་ཆོདཔ་བཟོ་མི་ དེ་ལས་ ཐུགས་རྗེ་གནང་མིའི་ཐུགས་ཉིད་ལུ་བློ་བཙོང་མི་དེ་ཚུ་ལུ་ འདི་ལས་ཡང་ལྷགཔ་སྦེ་ ཁྲིམས་དམ་དྲགས་ཕོག་ནི་ཨིན་ཟེར་ ཁྱེད་རང་མནོ་བསམ་གཏང་དགོ།

³⁰ ག་ཅི་སྨོ་ཟེར་བ་ཅིན། དགྲ་ལན་འཇལ་ནི་གི་ལཱ་དེ་ངེ་གི་ཨིན་ སྐྱིན་ཚབ་ང་གིས་བྱིན་ནི་ཨིན་ཟེར་ གསུངས་མི་དེ་ ང་བཅས་ཀྱིས་ངོ་ཤེས་ ད་རུང་དེ་སྦེ་ཡང་གསུངས་ཡི། གཙོ་བོ་གིས་ ཁོ་རང་གི་མི་ཚུ་ ཁྲིམས་ཕྱེ་ནི་ཨིན།

³¹ གསོན་པོའི་དཀོན་མཆོག་གི་ཕྱག་ལུ་ཚུད་ནི་དེ་ ཁྲིམས་ག་ཅི་དེས་ཅིག་འདྲོག་སི་སི་ཨིན།

³² ཧེ་མ་གི་དུས་ཚུ་ སེམས་ཁར་དྲན་དགོ་ ཁྱེད་ཀྱིས་བདེན་པ་འདི་ ཧ་གོ་སྟེ་འོངས་པའི་སྐབས་ལུ་ ཁྱེད་གནམ་མེད་ས་མེད་སྡུག་བསྔལ་མྱོང་དགོཔ་བྱུང་རུང་ འཐུས་མ་ཤོར་བར་སྡོད་ཅི།

³³ རེ་ཅིག་སྐབས་ རོགས་ཀྱི་གདོང་ཁར་ ཁྱེད་ལུ་དམའ་ཕབ་རྐྱབ་ སྡུག་བསྔལ་ཐོབ་སྟེ་ ལྟདམོ་བཟུམ་སྦེ་སྟོན་སྡོད་ཅི་ རེ་ཅིག་སྐབས་ འདི་བཟུམ་གྱི་ དམའ་ཕབ་བཏང་ སྡུག་ཐོབ་སྡོད་མི་ཚུ་དང་འདྲན་འདྲ་སྦེ་ སྡུག་འབག་སྟེ་སྡོད་ཅི།

³⁴ བཙོན་པ་ཚུ་ལུ་ཁྱེད་ཀྱིས་སྙིང་རྗེ་བསྐྱེད་ཡོདཔ་མ་ཚད་ རང་གི་རྒྱུ་ནོར་ལུ་མི་གཞན་གྱིས་དབང་བཟུང་འབད་དེ་སྦེ་རུང་ དགའ་སྤྲོའི་སྒོ་ལས་ བློ་མ་ཕམ་པར་སྡོད་ཅི་ ག་ཅི་སྨོ་ཟེར་བ་ཅིན་ ཁྱེད་རང་ལུ་ དེ་ལས་ཡང་དྲགཔ་དང་ དུས་རྟག་བུ་རང་སྡོད་མིའི་རྒྱུ་ནོར་ཡོད་ཟེར་ ཁྱེད་ཀྱིས་ཤེསཔ་ལས་བརྟེན་ཏེ་ཨིན།

³⁵ དེ་འབདཝ་ལས་ ཨ་ནི་སྙིང་སྟོབས་དེ་ ཤོར་མ་བཅུག་ འདི་ལས་སྦེ་ ཁྱེད་ཀྱིས་གསོལ་རས་སྦོམ་ཐོབ་ནི་ཨིན།

³⁶ དེ་མ་ཚད་ ཁྱེད་ཀྱིས་དཀོན་མཆོག་གི་ཐུགས་དགོངས་ག་ར་སྒྲུབ་ཚར་བའི་ཤུལ་ལས་ ཁས་བླངས་བཞེས་ཡོད་མི་དེ་ཐོབ་ནིའི་དོན་ལུ་ ཁྱེད་ཆ་ཁྱབ་བཟོད་བསྲན་བསྐྱེད་དེ་སྡོད་དགོ།

³⁷ ག་ཅི་སྨོ་ཟེར་བ་ཅིན། ཡུདཔ་ཐེངས་ཅིག་ནང་ བྱོན་ནི་འབད་མི་དེ་ མ་ཕྱི་བར་ ཐད་རི་བ་རི་བྱོན་འོང་།

³⁸ དེ་འབདཝ་ད་ ང་གིས་མཐོང་སར་ ཆོས་སེམས་ཡོད་མི་དེ་ དད་པ་ལས་བརྟེན་ཏེ་ སྡོདཔ་ཨིན་ དེ་ལས་ཁོ་རྒྱབ་བཤུད་རྐྱབ་པ་ཅིན་ ཁོ་ལུ་བལྟ་སྟེ་ང་སེམས་མི་དགའ།

³⁹ ང་བཅས་རྒྱབ་བཤུད་རྐྱབ་མི་ མེདཔ་ཐལ་འགྱོ་མི་ཚུ་གི་གྲལ་ལས་མེན་ དེ་འབདཝ་ད་ དད་པ་བསྐྱེད་དེ་ ཐར་པ་ཐོབ་མི་ཚུ་གི་གྲལ་ལས་ཨིན་ནོ།།