ག་ལ་ཏི་ལེའུ་ 6 - རྫོང་ཁ་

འགན་ཁག་འབག་སྟེ་གཞན་ལུ་ཆ་རོགས་འབད་དགོ་པའི་སྐོར།

¹ ངེ་གི་སྤུན་ཆ་ཚུ་ དདཔ་ཅན་གཅིག་གིས་ལཱ་འཛོལ་བ་འབད་དེ་འོང་པ་ཅིན་ ཁྱེད་དམ་པའི་ཐུགས་ཉིད་དང་མཐུན་སྡོད་མི་ཚུ་གིས་ མི་དེ་ལུ་འགྲོས་ཀྱིས་འབད་བཤད་སླབ་སྟེ་ ལམ་བདེན་པ་ནང་འཁྱིད་དགོ་ དེ་འབདཝ་ད་ རང་ཡང་མི་དེ་བཟུམ་སྦེ་ བར་ཆད་ནང་མ་ཚུད་ནི་གི་དོན་ལུ་ཟབ་ཟབ་འབད་དགོ།

² གཅིག་དང་གཅིག་གི་དཀའ་ངལ་ནང་ཆ་རོགས་འབད་བ་ཅིན་ དེ་གིས་འབད་ ཁིརཱིས་ཀྱིས་གནང་མི་བཀའ་ཁྲིམས་འདི་ནང་ཚངམ་ཨིན།

³ དེ་ལས་མི་ག་ར་འབད་རུང་ ག་ར་ལས་ང་རང་མཐོ་ཟེར་མནོ་བསམ་གཏང་སྟེ་འབད་བ་ཅིན་ རང་གིས་རང་ལུ་མགུ་བསྐོར་རྐྱབ་ཨིན།

⁴ ག་ར་འབད་རུང་ རང་གི་ལཱ་འདི་ཚུ་ལེགས་ཤོམ་སྦེ་འབད་དགོ་ དེ་ལས་དེ་གིས་འབད་ རང་གིས་འབད་མི་དེ་ལུ་ངལ་རངས་ནི་མ་གཏོགས་ གཞན་གྱི་དེ་སྐྱོ་ཤོས་དང་ རང་གི་དེ་དྲགཔ་སྦེ་ དོ་འགྲན་མིན་དགོ།

⁵ ག་ཅི་སྨོ་ཟེར་བ་ཅིན་ ག་ར་འབད་རུང་ དཀོན་མཆོག་གི་གཟིགས་སར་ རང་རང་སོ་སོ་གི་འགན་ཁུར་རང་གིས་འབག་དགོ།

⁶ དཀོན་མཆོག་གི་གསུང་ལྷབ་མི་ཚུ་གིས་ རང་གི་ནང་ག་ཡོད་མི་དེ་བགོ་བཤའ་རྐྱབ་སྦེ་ སློབ་དཔོན་དེ་ལུ་ཕུལ།

⁷ དཀོན་མཆོག་ལུ་མེས་མེད་བསྐྱུར་ཏེ་ ཁྱེད་རང་ལུ་མགུ་བསྐོར་མ་རྐྱབས་ ག་ཅི་སྨོ་ཟེར་བ་ཅིན་ མི་གིས་ས་ཁར་ག་བཏབ་མི་དེ་རང་ རྔཝ་ཨིན།

⁸ ག་ར་འབད་རུང་ རང་བཞིན་རྙིང་པའི་འདོད་པ་ལྟར་དུ་སོན་བཏབ་པ་ཅིན་ དེ་གི་འབྲས་བུ་འདི་ མཇུག་བསྡུ་ནི་མེད་པའི་ཆདཔ་ཕོག་ནི་ཨིན་ ག་ར་འབད་རུང་ དམ་པའི་ཐུགས་ཉིད་ལུ་ཐུགས་དགྱེས་བཅུག་པ་ཅིན་ དེ་གི་འབྲས་བུ་འདི་ཚེ་མཐའ་མེདཔ་ཐོབ་ནི་ཨིན།

⁹ ལཱ་ལེགས་ཤོམ་འབད་ནི་ལུ་ འུ་སྡུག་སྟེ་རྒྱབ་བཤུད་མ་རྐྱབ་པ་ཅིན་ དུས་ཚོད་ཀྲིག་ཀྲི་ལུ་འབྲས་བུ་འདི་ཐོབ་ནི་ཨིན།

¹⁰ ད་ནམ་རང་འབད་རུང་ ང་བཅས་ཀྱིས་གཞན་གྱི་དོན་ལུ་ལཱ་ལེགས་ཤོམ་འབད་བའི་གོ་སྐབས་ཐོབ་པ་ཅིན་ འབད་དགོ་ དེ་ལས་ཡང་ལྷགཔ་སྦེ་ རང་གི་དདཔ་ཅན་བཟའ་ཚན་ཚུ་ལུ་ལེགས་ཤོམ་འབད་བྱིན་དགོ།།

པའུལ་གྱིས་མཐའན་མཇུག་གི་བསླབ་བྱ་གི་སྐོར།

¹¹ ད་ལྟོ་ང་གིས་བྲིས་མི་ཡིག་བཟོ་སྦོམ་དེ་ལུ་བལྟ་ཤིག་ འདི་ང་རང་གི་ལག་པ་གིས་བྲིས་བྲིསཝ་ཨིན།

¹² ཁྱེད་ཆ་ཁྱབ་ལུ་ ཡ་ཧུ་ད་པའི་ལུགས་སྲོལ་བཞིན་དུ་ ལུས་ལུ་རྟགས་བཀལ་དགོ་ཟེར་ཨུ་ཚུགས་རྐྱབ་མིའི་དོན་དག་ངོ་མ་དེ་ ཁིརཱིས་ཁྲམ་ཤིང་གུ་གཤགས་ཅི་ཟེར་ཆོས་བཤདཔ་ད་ གནོད་འཚེ་བཀལ་འོང་ཟེར་མནོ་སྟེ་ འདི་ནང་ལས་སྐྱབས་འབད་ནི་གི་ཧད་བཏགས་རྐྱངམ་གཅིག་ཨིན།

¹³ ལུས་ལུ་རྟགས་བཀལ་མི་དེ་ཚུ་ ཁོང་རང་ཡང་བཀའ་ཁྲིམས་ག་ར་རིམ་པ་བཞིན་དུ་མི་སྲུང་ དེ་འབདཝ་ད་ ཁོང་གིས་ཁྱེད་ལུ་ལུགས་སྲོལ་བཞིན་དུ་ ལུས་ལུ་རྟགས་བཀལ་བཅུག་མི་དེ་ ཁྱེད་ཁོང་གི་སློབ་མ་སྦེ་ རང་བསྟོད་བརྐྱབ་ནི་གི་དོན་ལུ་ཨིན།

¹⁴ ང་བཅས་རང་གི་གཙོ་བོ་ཡེ་ཤུ་ཁིརཱིས་ཁྲམ་ཤིང་གུ་ གཤགས་གནང་མི་དེ་མ་གཏོགས་ གཞན་ག་ནི་ཡང་ ང་གིས་རང་བསྟོད་མི་བརྐྱབ་ ག་ཅི་སྨོ་ཟེར་བ་ཅིན་ ཁིརཱིས་ཁྲམ་ཤིང་གུ་གཤགས་པའི་ཐོག་ལས་སྦེ་ འཇིག་རྟེན་འདི་ངེ་གི་དོན་ལུ་ཤི་སོངམ་མ་ཚད་ ང་ཡང་འཇིག་རྟེན་གྱི་དོན་ལུ་ཤི་སོངམ་བཟུམ་སྦེ་ཨིན།

¹⁵ ལུས་ལུ་རྟགས་བཀལ་ནི་དང་མ་བཀལ་ནི་གི་དབྱེ་བ་མེད་ ཁག་ཆེ་ཤོས་དེ་ ང་བཅས་མི་ཚེ་གསརཔ་ལུ་འགྱུར་ཏེ་སྡོད་ནི་ཨིན།

¹⁶ ཨ་ནི་བཟུམ་གྱི་ཁྲིམས་གསརཔ་སྲུང་མི་ དཀོན་མཆོག་གི་མི་རིགས་ངོ་མ་ཆ་ཁྱབ་ལུ་ ཞི་བདེ་དང་སྙིང་རྗེ་འབྱུང་བར་ཤོག

¹⁷ ད་དེ་ལས་ཕར་ ག་གིས་ཡང་ཧེ་མ་བཟུམ་སྦེ་ང་ལུ་དཀྲོགས་མ་བཅུག་ ག་ཅི་སྨོ་ཟེར་བ་ཅིན་ ངེ་གི་གཟུགས་ལུ་ཡོད་མི་རྨ་ཤུལ་གྱིས་ ང་ཡེ་ཤུ་གི་སྐུ་ཚབ་སྦེ་ཁུངས་བཀལཝ་ཨིན།

¹⁸ ངེ་གི་སྤུན་ཆ་ཚུ་ ང་བཅས་རང་གི་ཡེ་ཤུ་ཁིརཱིས་ཀྱི་ཐུགས་རྗེ་ ཁྱེད་ཀྱི་སེམས་ཉིད་ནང་གནས་པར་ཤོག་ ཨ་མཱེན།། །།