ག་ལ་ཏི་ལེའུ་ 5 - རྫོང་ཁ་

དདཔ་ཅན་གྱི་རང་དབང་གི་སྐོར།

¹ དེ་ལས་ཁིརཱིས་ཀྱིས་ང་བཅས་ཀྱི་རང་དབང་གི་དོན་ལུ་ བཀའ་ཁྲིམས་ལས་ཐར་གནང་སྟེ་ཡོདཔ་ལས་ ད་རུང་ལོག་སྟེ་ བཀའ་ཁྲིམས་ཀྱི་གཡོག་མ་རྒྱུག་པར་ སྒྲིང་སྒྲིང་སྦེ་སྡོད།

² བལྟ་ཞིག་ ང་ པའུལ་གྱིས་ཁྱེད་ལུ་འདི་སླབ་དོ་ ཁྱེད་ཀྱིས་འཕྲོ་མཐུད་དེ་རང་ ཡ་ཧུ་ད་པའི་ལུགས་སྲོལ་བཞིན་དུ་ ལུས་ལུ་རྟགས་བཀལ་བ་ཅིན་ ཁིརཱིས་འདི་ཁྱེད་ཀྱི་དོན་ལུ་ཁུངས་ག་ནི་ཡང་མེདཔ་ཨིན།

³ ད་རུང་ཡང་ཁྱེད་ག་ར་ལུ་རྣ་བ་སྐྱེལ་དོ་ ཡ་ཧུ་ད་པའི་ལུགས་སྲོལ་བཞིན་དུ་ ལུས་ལུ་རྟགས་བཀལ་ཏེ་འབད་བ་ཅིན་ བཀའ་ཁྲིམས་ག་ར་ཨིན་ཅི་མིན་ཅི་སྲུང་དགོཔ་ཨིན།

⁴ བཀའ་ཁྲིམས་སྲུང་པའི་སྒོ་ལས་སྦེ་ དཀོན་མཆོག་གིས་ཁྱེད་ལུ་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་གནང་འོང་ཟེར་མནོ་བ་ཅིན་ ཁྱེད་ཀྱིས་ཡེ་ཤུ་ཁིརཱིས་དང་འབྲེལ་བ་མེདཔ་ཨིནམ་མ་ཚད་ དཀོན་མཆོག་གི་ཐུགས་རྗེ་ལས་ཡང་ཁ་འཕྱལཝ་ཨིན།

⁵ དེ་འབདཝ་ད་ ང་བཅས་ཀྱིས་དད་པ་ལག་ལེན་འཐབ་སྟེ་ ཐུགས་ཉིད་ཀྱིས་ང་བཅས་ལུ་ དཀོན་མཆོག་ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་གནང་ཡི་ཟེར་ཁས་ལེན་བཞེས་ཅི།

⁶ ག་ཅི་སྨོ་ཟེར་བ་ཅིན་ ང་བཅས་ཁིརཱིས་ཡེ་ཤུ་གི་ཨིན་མི་ཆ་ཁྱབ་ཀྱི་དོན་ལུ་ ཡ་ཧུ་ད་པའི་ལུགས་སྲོལ་བཞིན་དུ་ ལུས་ལུ་རྟགས་བཀལ་ནི་དང་མ་བཀལ་ནི་གི་དབྱེ་བ་མེད་ ཁག་ཆེ་ཤོས་འདི་ བྱམས་པ་འབད་བའི་སྒོ་ལས་ དད་པ་ཕྱི་བཏོན་དགོ་མི་དེ་ཨིན།

⁷ ད་ཁྱེད་དད་པའི་ནང་ ཡར་རྒྱས་འགྱོ་སྡོད་པའི་སྐབས་ལུ་ ལམ་བདེན་པ་དེ་ལས་ག་གིས་ཁྱེད་ལུ་རྒྱབ་ཁར་ལས་བཤེད་འཐེན་ཏེ་བཀག་རྐྱབ་སྨོ།

⁸ ཨ་ནི་བཟུམ་ ཐད་རི་བ་རི་ཁྱེད་ལུ་འབོ་མི་དཀོན་མཆོག་གིས་མཛད་བཅུགཔ་མེན།

⁹ དཔེར་ན་ བུལ་ཏོག་ཨ་ཙི་གཅིག་གིས་ཕྱི་བསྣད་བསྣདཝ་ལེ་ཤ་སྦོ་བཅུག་དོཝ་བཟུམ་སྦེ་ ཆོས་རྫུས་མ་གི་རྒྱུད་ལས་ མི་གཞན་ག་ར་ལུ་ལམ་འཛོལ་བ་ནང་འགྱོ་བཅུག་འོང་།

¹⁰ དེ་འབདཝ་ད་ ཁྱེད་ང་དང་གཅིག་ཁར་སེམས་མཐུན་ཏེ་སྡོད་འོང་ཟེར་ ང་བློ་གཏད་དེ་སྡོད་ཅི་ ག་ཅི་སྨོ་ཟེར་བ་ཅིན་ ང་བཅས་ག་ར་དཀོན་མཆོག་ནང་དད་པ་གཅིག་ཨིན་ ད་ཁྱེད་ལུ་ཨ་ནི་ཚུན་ཚོད་སེམས་དཀྲུགས་ཏེ་ མགུ་འཐོམ་བཅུག་མི་དེ་ལུ་ དཀོན་མཆོག་གི་ཉེས་ཆད་ཕོག་འོང་།

¹¹ ངེ་གི་སྤུན་ཆ་ཚུ་ ག་དེམ་ཅིག་སྦེ་ང་གིས་ད་ལྟོ་ཚུན་ཚོད་ ལུས་ལུ་རྟགས་བཀལ་དགོཔ་འདི་ ཁག་ཆེཝ་སྦེ་ཆོས་སྟོན་སྟོནམ་འབད་བ་ཅིན་ ཡ་ཧུ་ད་པ་ཚུ་གིས་ང་ལུ་གནོད་འཚེ་བཀལ་ཏེ་ ག་ཅི་འབད་དཀའ་ངལ་བྱིནམ་སྨོ་ ང་གིས་ཆོས་དེ་སྦེ་སྟོན་སྟོནམ་འབད་བ་ཅིན་ ཁོང་གིས་ང་ལུ་མ་དགའ་ནི་གི་དོན་དག་མིན་འདུག་ དེ་ལས་ད་རུང་ ཁིརཱིས་ཁྲམ་ཤིང་གུ་གཤགས་མིའི་གཏམ་བཟང་དེ་ ང་གིས་ཆ་མེད་གཏང་དོཝ་བཟུམ་སྦེ་ཨིན།

¹² ད་ཁྱེད་ལུ་དཀྲོགས་མི་དེ་ཚུ་ ཁོང་རང་གི་ལུས་ བཏོག་བཀོག་རུང་བཏུབ་པས།

¹³ ངེ་གི་སྤུན་ཆ་ཚུ་ ཁྱེད་ལུ་རང་དབང་ཡོདཔ་སྦེ་འབོ་སྟེ་ཡོད་ དེ་འབདཝ་ད་ རང་དབང་འདི་ སྡིག་ཅན་གྱི་རང་བཞིན་ལུ་ལག་ལེན་མ་འཐབ་པར་ བྱམས་པའི་ཐོག་ལས་སྦེ་ གཅིག་གིས་གཅིག་ལུ་ཆ་རོགས་འབད་བའི་དོན་ལུ་ཨིན།

¹⁴ ག་ཅི་སྨོ་ཟེར་བ་ཅིན་ རང་གི་ཁྱིམ་ཚང་ལུ་རང་དང་འདྲཝ་སྦེ་ བྱམས་པ་འབད་ཟེར་མི་ཁྲིམས་གཅིག་གིས་ བཀའ་ཁྲིམས་ག་ར་འདི་ནང་ཚངམ་ཨིན།

¹⁵ དེ་འབདཝ་ད་ གཅིག་གིས་གཅིག་ལུ་འཐབ་འཛིང་འབད་དེ་ཡོད་པ་ཅིན་ གཅིག་གིས་གཅིག་ལུ་མེདཔ་མ་གཏང་ནི་གི་དོན་ལུ་ ཟབ་ཟབ་འབད་དགོ།།

དམ་པའི་ཐུགས་ཉིད་དང་འཁྲིལ་ཏེ་སྡོད་དགོ་པའི་སྐོར།

¹⁶ ད་ང་གིས་སླབ་མི་དེ་ དམ་པའི་ཐུགས་ཉིད་དང་འཁྲིལ་ཏེ་འབད་བ་ཅིན་ མིའི་རང་བཞིན་གྱི་འདོད་པ་ངན་པ་དེ་ཚུ་མི་འབད་འོང་།

¹⁷ ག་ཅི་སྨོ་ཟེར་བ་ཅིན་ རང་བཞིན་རྙིངམ་གི་འདོད་པ་ངན་པ་དེ་གིས་ཐུགས་ཉིད་ལུ་རྒོལ་ ཐུགས་ཉིད་ཀྱི་འདོད་པ་དེ་གིས་ མིའི་རང་བཞིན་གྱི་འདོད་པ་དེ་ལུ་རྒོལ་ཏེ་ ཁོང་གཉིས་མ་མཐུནམ་འགྱོ་འོང་ དེ་ལས་མིའི་རང་བཞིན་གྱི་འདོད་པ་ལྟར་དུ་འབད་བ་ཅིན་ ཁྱེད་ཀྱིས་ལེགས་ཤོམ་འབད་དགོ་མནོ་མི་དེ་མི་འབད།

¹⁸ དེ་བཟུམ་སྦེ་ཁྱེད་ཀྱིས་ཐུགས་ཉིད་དང་འཁྲིལ་ཏེ་སྡོད་པ་ཅིན་ ཁྱེད་བཀའ་ཁྲིམས་ཀྱི་དབང་ཚད་འོག་ལུ་སྡོདཔ་མེན།

¹⁹ ཁྱེད་ཀྱིས་སྡིག་ཅན་གྱི་རང་བཞིན་དང་འཁྲིལ་སྡོདཔ་ད་ འབྲས་བུ་འདི་གསལ་ཏོག་ཏོ་སྦེ་ ཕྱི་འཐོན་འོངམ་ཨིན་ དེ་ཚུ་ག་ཅི་ཨིན་ན་ཟེར་བ་ཅིན་ ལུས་འབྲེལ་གྱི་ལཱ་ངན་པ་ འདོད་ཆགས་ཀྱི་མནོ་བསམ་གཏང་མི་ སྤྱོད་པ་ངན་པ་འབད་མི།

²⁰ སྐུ་ལུ་གསོལཝ་བཏབ་མི་ ངན་སྔགས་རྐྱབ་མི་ དགྲ་འབད་མི་ གཞན་ལུ་བརྩོད་པ་འཚོལ་མི་ མིག་ཏོ་ཚ་མི་ ཙིགཔ་ཟ་མི་ རང་འདོད་ཅན་འབད་མི་ མིའི་བར་ན་ལུ་དཀྲོགས་ཁ་རྐྱབ་མི་ སྡེ་ཚན་གྱི་ལུགས་སྲོལ་དང་མ་མཐུནམ་འབད་མི།

²¹ དོ་འགྲན་མི་ ར་བཟི་མི་ འཆལ་སྤྱོད་སྤྲོ་སྟོན་ནང་བཅའ་མར་གཏོགས་མི་ ཨ་ནི་འབད་དེ་སྡོད་མི་ཚུ་གིས་ དཀོན་མཆོག་གི་རྒྱལ་སྲིད་ནང་ བྱིན་རླབས་ཀྱི་བགོ་བཤའ་མི་ཐོབ་ཟེར་ ང་གིས་ཧེ་མ་ཡང་རྣ་བ་སྐྱེལ་ཡི་ ད་ལྟོ་ཡང་སླབ་དོ།

²² དེ་འབདཝ་ད་ དམ་པའི་ཐུགས་ཉིད་ཀྱི་འབྲས་བུ་འདི་ བྱམས་པ་འབད་ནི་ དགའ་སྤྲོ་བསྐྱེད་ནི་ ཞི་བདེ་མྱོང་ནི་ བཟོད་པ་བསྒོམ་ནི་ སྙིང་རྗེ་བསྐྱེད་ནི་ ལེགས་ཤོམ་འབད་ནི་ ན་འཐན་ཏོག་ཏོ་འབད་ནི།

²³ མཉམ་ཆུང་སྦེ་སྡོད་ནི་ མཚམས་ཚོད་ཤེས་ནི་ ཨ་ནི་དེ་ཚུ་ག་ར་དང་མ་མཐུན་མི་ཁྲིམས་མེད།

²⁴ ཁིརཱིས་ཡེ་ཤུ་གི་ཨིན་མི་ཆ་ཁྱབ་ཀྱིས་ འདོད་པ་ལུ་ཆགས་ནི་དང་ མིའི་རང་བཞིན་ལུ་དབང་མི་སྡིག་པ་འདི་གི་དབང་ཚད་འོག་ལས་འཐོན་ཏེ་ འདི་ང་བཅས་ཀྱི་དོན་ལུ་ཁྲམ་ཤིང་གུ་ཤི་ཚརཝ་བཟུམ་ཨིན།

²⁵ ང་བཅས་ཐུགས་ཉིད་ཀྱི་ཐོག་ལས་སྦེ་ གསོན་པོ་སྦེ་སྡོདཔ་ཨིན་པ་ཅིན་ ཐུགས་ཉིད་དང་འཁྲིལ་ཏེ་སྡོད་དགོ།

²⁶ དེ་ལས་ང་རྒྱལ་ལང་ནི་མི་འོང་ གཅིག་གིས་ཅིག་ལུ་སེམས་དཀྲུགས་ནི་དང་ དོ་འགྲན་ནི་གི་མནོ་བསམ་ཡང་གཏང་ནི་མི་འོང་།།