ག་ལ་ཏི་ལེའུ་ 4 - རྫོང་ཁ་

ང་བཅས་དཀོན་མཆོག་གི་སྲས་དང་སྲསམོ་ཨིན་མིའི་སྐོར།

¹ ཨ་ནི་འདི་ ང་གིས་དཔེ་གཞན་གཅིག་ལས་སྦེ་སླབ་པ་ཅིན་ ཕ་མིའི་རྒྱུ་ནོར་ག་ར་དབང་མི་བུ་གཅིག་ཨིན་རུང་ ཁོ་ཆུང་ཀུ་སྦེ་སྡོད་པའི་སྐབས་ལུ་ གཡོགཔོ་དང་དབྱེ་བ་མེད།

² ཁོ་རང་གི་ལོ་ཚད་དང་ཨ་པ་གིས་དབང་ཚད་མ་སྤྲོད་པའི་བར་ན་ བདག་འཛིན་འཐབ་མི་དང་གཉེར་པའི་འོག་ལུ་སྡོད་དགོ།

³ དེ་བཟུམ་སྦེ་རང་ ང་བཅས་ཡང་ཁིརཱིས་མ་བྱོན་པའི་བར་ན་ ག་ནི་ཡང་མ་ཤེས་པར་ཨ་ལོ་ཆུང་ཀུ་བཟུམ་སྦེ་ འཇིག་རྟེན་གྱི་འགྲོ་ལུགས་ཀྱི་རྒྱོབོ་རྒྱམོ་སྦེ་སྡོད་ནུག

⁴ དེ་འབདཝ་ད་ དུས་ཚོད་ཀྲིག་ཀྲི་ལུ་དཀོན་མཆོག་གིས་ ཁོ་རང་གི་སྲས་འཛམ་བུ་གླིང་ནང་གཏང་གནང་སྟེ་ ཡ་ཧུ་ད་པའི་བཀའ་ཁྲིམས་ཀྱི་འོག་ལུ་ ཨམ་སྲུ་གཅིག་ལས་སྐུ་འཁྲུངས་ནུག

⁵ དཀོན་མཆོག་གིས་ཁོ་ལུ་གཏང་གནང་མི་དེ་ ང་བཅས་བཀའ་ཁྲིམས་ཀྱི་གཡོག་ལས་ཐར་གནང་སྟེ་ ཁོ་རང་གི་སྲས་ངོ་མ་སྦེ་བཞག་ནི་གི་དོན་ལུ་ཨིན་མས།

⁶ ད་ང་བཅས་དཀོན་མཆོག་གི་སྲས་དང་སྲསམོ་ལུ་འགྱུར་སོངམ་ལས་ དཀོན་མཆོག་གིས་ཁོ་རང་གི་སྲས་ཀྱི་ཐུགས་ཉིད་དེ་ ང་བཅས་ཀྱི་སེམས་ནང་ལུ་གཏང་གནང་ཡི་ འདི་གིས་དཀོན་མཆོག་ལུ་ ཨབ་བ་ ངེ་གི་ཨ་པ་ཟེར་ཞུ་བཅུགཔ་ཨིན།

⁷ དེ་འབདཝ་ལས་ཁྱེད་རྒྱོབོ་རྒྱམོ་མེན་པར་ དཀོན་མཆོག་གི་སྲས་དང་སྲསམོ་ཨིན་ དེ་ལས་ཁྱེད་ཁོ་གི་སྲས་དང་སྲསམོ་ཨིནམ་ལས་ ཁོ་རང་གི་ཤུལ་འཛིན་ཡང་མཛད་ནུག།

ག་ལ་ཏི་ཚུ་ལུ་ཆོས་བཤད་མི་འདི་དོན་མེདཔ་ལུ་འགྱོ་བའི་ཚ་གྱང་གི་སྐོར།

⁸ ཧེ་མ་ཁྱེད་ཀྱིས་དཀོན་མཆོག་ངོ་མ་དང་གཞན་འབྲེལ་མེད་པའི་སྐབས་ལུ་ རང་བཞིན་གྱི་སྐུ་ཚུ་གི་རྒྱོབོ་རྒྱམོ་སྦེ་སྡོད་ནུག

⁹ དེ་འབདཝ་ད་ད་ལྟོ་ ཁྱེད་ཀྱིས་དཀོན་མཆོག་དང་གཞན་འབྲེལ་ཡོད་ཟེར་ (མ་པ་ཁོ་གིས་ཁྱེད་ངོ་མཁྱེན་རུང་) ཁྱེད་ཀྱིས་ག་ཅི་འབད་སྐྱོ་སི་སི་དང་དོན་དག་མེད་མི་ འཇིག་རྟེན་གྱི་འགྲོ་ལུགས་ལུ་ད་རུང་ལོག་སྟེ་འགྱོཝ་སྨོ།

¹⁰ ཁྱེད་ཀྱིས་ད་ལྟོ་ཡང་བཀའ་ཁྲིམས་ཀྱི་ལཱ་བཟུམ་སྦེ་ ཞག་དང་ཟླཝ་དང་ལོ་དང་བསྟུན་པའི་དུས་ཆེན་དེ་ཚུ་ལུ་རྩིས་བསྲུང་འབདཝ་ཨིན་མས།

¹¹ ང་གིས་ཧེ་མ་ཁྱེད་ཀྱི་དོན་ལུ་དཀའཝ་སྤྱད་དེ་འབད་མི་ལཱ་འདི་ཚུ་ དོན་དག་མེདཔ་འགྱོཝ་མ་ཚད་ ཁྱེད་ལམ་འཛོལ་འགྱོ་དོ་ཟེར་ང་ལུ་ཚ་གྱང་ཡོད།

¹² དབའེ་ ངེ་གི་སྤུན་ཆ་ཚུ་ ང་ཁྱེད་ཕྱིའི་མི་རིགས་ཚུ་བཟུམ་སྦེ་ བཀའ་ཁྲིམས་ཀྱི་རྒྱོབོ་རྒྱམོ་ལས་ རང་དབང་ཐོབ་ཅི་ ཁྱེད་ཡང་ང་བཟུམ་སྦེ་ བཀའ་ཁྲིམས་ཀྱི་གཡོག་རྒྱུག་པ་མ་སོང་ཟེར་གསོལཝ་བཏབ་ཨིན་ ང་གིས་དང་པ་ ཁྱེད་ལུ་ཆོས་བཤདཔ་ད་ ཁྱེད་ཀྱིས་ང་ལུ་འཛོལ་བ་ག་ནི་ཡང་མ་འབད།།

པའུལ་གྱིས་ ག་ལ་ཏི་ཚུ་ལུ་གསོལཝ་བཏབ་པའི་སྐོར།

¹³ ཧེ་མ་ཁྱེད་འབད་སར་འོངམ་ད་ ང་ན་སྟེ་སྡོད་རུང་ ཁྱེད་ཀྱིས་གཏམ་བཟང་ཉན་ནི་གི་གོ་སྐབས་ཐོབ་ཅི་ཟེར་ཁྱེད་རང་གིས་ཤེས།

¹⁴ ངེ་གི་གཟུགས་ཀྱི་ན་ཟུག་དེ་གིས་ ཁྱེད་ལུ་དཀའ་ངལ་དང་ཚོད་བལྟ་འབད་དོཝ་བཟུམ་ལུ་འགྱུར་རུང་ ཁྱེད་ཀྱིས་ང་ལུ་ཞེན་ལོག་སྟེ་བཀོག་མ་བཞག་པར་ ག་དེ་དྲག་དྲག་ དཀོན་མཆོག་གི་ཕོ་ཉ་ཡང་ན་ ཁིརཱིས་ཡེ་ཤུ་ལུ་བཟུམ་སྦེ་ང་ལུ་ལེགས་ཤོམ་འབད་བྱིན་ཡི།

¹⁵ ཧེ་མ་ང་བཅས་ཀྱི་སྦུག་ལུ་ཡོད་མི་དགའ་སྤྲོ་འདི་ ད་ག་ཏེ་སྨོ་ དེ་སྐབས་ལུ་ངེ་གི་དོན་ལུ་ ཁྱེད་རང་གི་མིག་ཏོ་ཡང་བཏོན་ཏེ་ང་ལུ་བྱིན་དགོཔ་ཐལ་རུང་ བྱིན་འོང་ཟེར་ང་གིས་སླབ་ཚུགས།

¹⁶ ད་ང་གིས་ཁྱེད་ལུ་ཕྲང་སྟེ་སླབ་ད་ ཁྱེད་ཀྱིས་ང་ལུ་དགྲ་སྦེ་བལྟ་ནི་ཨིན་ན།

¹⁷ ཁྱེད་ལུ་ཆོས་རྫུས་མ་སྟོན་མི་དེ་ཚུ་གིས་ ཁྱེད་དང་གཅིག་ཁར་འབྲེལ་བ་འཐབ་མི་དོན་དག་དེ་ལེགས་ཤོམ་མེན་པས་ ཁོང་གི་དོན་དག་ངོ་མ་དེ་ ཁྱེད་ང་ལས་ཁ་འཕྱལ་ཏེ་ ཁོང་རང་དང་གཅིག་ཁར་སྡོམ་ནི་གི་དག་སྣང་ཡོདཔ་ཨིན་མས།

¹⁸ ང་ཁྱེད་དང་གཅིག་ཁར་མ་སྡོད་དེ་འབད་རུང་ གཞན་ཚུ་གིས་ཁྱེད་དང་གཅིག་ཁར་འབྲེལ་བ་འཐབ་སྟེ་ བདག་འཛིན་འཐབ་ནི་དག་སྣང་ཡོད་པ་ཅིན་ ལེགས་ཤོམ་ཨིན་ དེ་འབདཝ་ད་ ལམ་གཡོ་གཡོཝ་ལུ་འཁྱིད་འགྱོ་བ་ཅིན་ལེགས་ཤོམ་མེན།

¹⁹ ངེ་གི་ཨ་ལོ་ཚུ་ ཡེ་ཤུ་ཁིརཱིས་ཀྱི་རང་བཞིན་དེ་ ཁྱེད་ཀྱི་ནང་ན་མ་འཁྲུངས་ཚུན་ཚོད་ ཨམ་སྲུ་ཨ་ལོ་སྐྱེསཝ་ད་ ན་ཟུག་རྐྱབ་དོཝ་བཟུམ་སྦེ་ ང་ད་རུང་ཡང་ཁྱེད་ཀྱི་དོན་ལུ་སྡུག་བསྔལ་མྱོང་དགོ།

²⁰ ང་ད་ལྟོ་རང་ ཁྱེད་དང་གཅིག་ཁར་ སྡོད་སྡོདཔ་འབད་བ་ཅིན་ ག་དེམ་ཅིག་དགའ་ནི་སྨོ་ འདི་བཟུམ་གྱི་བློ་སྲ་ཀྲག་ཀྲ་འདི་ཚུ་ སླབ་མི་དགོ་ ང་ག་ཅི་འབདཝ་དྲག་ག་མ་ཤེས་པར་ གནམ་མེད་ས་མེད་ཚ་གྱང་ལངས་ཏེ་ཡོད།།

ཁས་བླངས་དང་གཡོགམོ་གི་དཔེ་གི་སྐོར།

²¹ ཁྱེད་ ཡ་ཧུ་ད་པའི་བཀའ་ཁྲིམས་ཀྱི་འོག་ལུ་སྡོད་དགོ་མནོ་མི་ཚུ་ ཁྱེད་ཐད་རི་བ་རི་བཀའ་ཁྲིམས་ཀྱི་དོན་དག་འདི་ཚུ་ཧ་གོ་ཡི་ག་ ང་ལུ་སླབ་ཞིག

²² དཔེར་ན་ གསུང་རབ་ནང་ལུ་ ཨབ་ར་ཧམ་ལུ་བུ་གཉིས་ཡོད་ཟེར་བྲིས་ཏེ་འདུག་ བུ་གཅིག་ཁོ་གི་ཨམ་སྲུ་ངོ་མ་ རང་དབང་ཡོད་མི་ལས་དང་ བུ་གཅིག་ཁོ་རང་གི་གཡོགམོ་འདི་ལས་ཨིན་མས།

²³ དེ་ལས་གཡོགམོ་འདི་ལས་སྐྱེས་མི་བུ་འདི་ མི་གི་མནོ་བསམ་བཞིན་དུ་ཨིན་ དེ་འབདཝ་ད་ ཁོ་རང་གི་ཨམ་སྲུ་ངོ་མ་དེ་ལས་སྐྱེས་མི་དེ་ དཀོན་མཆོག་གི་ཁས་བླངས་བཞིན་དུ་ཨིན།

²⁴ ཨ་ནི་ཨམ་སྲུ་གཉིས་ཀྱི་དཔེ་འདི་ དཀོན་མཆོག་དང་ཁོ་གི་མི་ཚུ་གི་བར་ན་གི་ཞལ་འཆེས་གཉིས་ཀྱི་དཔེ་ཨིན་ གངས་རི་ སི་ནའི་གུ་ མོ་སཱེས་ལུ་གནང་མི་བཀའ་ཁྲིམས་ཀྱི་ཞལ་འཆེས་དེ་ ཨམ་སྲུ་ ཧ་གཱར་བཟུམ་གཅིག་ཨིན་ མོ་ལས་སྐྱེ་མི་འདི་རྒྱོབོ་རྒྱོམ་ཚུ་ཨིན།

²⁵ ད་ཨ་ནི་ཨམ་སྲུ་ ཧ་གཱར་དེ་ ཨ་ར་བི་ཡ་རྒྱལ་ཁབ་ཀྱི་གངས་རི་ སི་ནའི་གི་དཔེ་ཨིནམ་མ་ཚད་ ད་རེས་སྐབས་ཀྱི་ ཡེ་རུ་ཤ་ལེམ་གྱི་དཔེ་ཡང་ཨིན་ ག་ཅི་སྨོ་ཟེར་བ་ཅིན་ད་རེས་སྐབས་ཀྱི་ ཡེ་རུ་ཤ་ལེམ་དང་ འདི་ནང་སྡོད་མི་ག་ར་གིས་ བཀའ་ཁྲིམས་ཀྱི་གཡོག་རྒྱུག་སྟེ་སྡོདཔ་ཨིན།

²⁶ དེ་འབདཝ་ད་ ཨབ་ར་ཧམ་གྱི་ཨམ་སྲུ་ངོ་མ་ རང་དབང་ཡོད་མི་དེ་ ཞིང་ཁམས་ལུ་ཡོད་མི་ ཡེ་རུ་ཤ་ལེམ་གཞན་གྱི་དཔེ་ཨིན་ ཨ་ནི་ ཡེ་རུ་ཤ་ལེམ་འདི་ ང་བཅས་ཀྱི་ཨའི་ཨིནམ་མ་ཚད་ ང་བཅས་མོ་བཟུམ་སྦེ་ རང་དབང་ཅན་ཨིན།

²⁷ ག་ཅི་སྨོ་ཟེར་བ་ཅིན་གསུང་རབ་ནང་། བུ་གཞི་མེད་པའི་རབས་ཆད་ ཁྱོད་དགའ་སྤྲོ་འགྱུར་ སྐྱེས་ཟུག་མེད་མི་ ཁྱོད་སྐད་རྐྱབ་ མགུར་མ་འཐེན་ ཕོ་རྒྱ་དང་གཅིག་ཁར་ སྡོད་མི་ཨམ་སྲུ་འདི་ལས་ཡང་ རྨགཔ་ངོ་མ་ཡོད་མི་ ཨམ་སྲུ་གི་བུ་གཞི་མང་ཟེར་ བྲིསཝ་བཞིན་དུ་ཨིན།

²⁸ ད་སྤུན་ཆ་ཚུ་ ཨམ་སྲུ་ངོ་མ་གི་བུ་ ཨི་སག་ དཀོན་མཆོག་གི་ཁས་བླངས་བཞིན་དུ་སྐྱེསཝ་བཟུམ་སྦེ་ ཁྱེད་ཡང་དཀོན་མཆོག་གི་སྲས་དང་སྲསམོ་ཨིན།

²⁹ དེ་འབདཝ་ད་ གཡོགམོ་གི་བུ་གིས་ ཁས་བླངས་ཀྱི་བུ་ལུ་གནོད་པ་བཀལ་དོཝ་བཟུམ་སྦེ་ ང་བཅས་དམ་པའི་ཐུགས་ཉིད་ལས་སྐྱེས་མི་ཚུ་ལུ་ བཀའ་ཁྲིམས་སྲུང་དགོ་ཟེར་མི་ཚུ་གིས་ ད་ལྟོ་ཡང་གནོད་པ་བཀལ་དོ།

³⁰ ཨ་ནི་ལོ་རྒྱུས་ཀྱི་སྐོར་ལས་གསུང་རབ་ནང་ ག་ཅི་བྲིས་ཏེ་འདུག་ གཡོགམོ་ཨམ་སྲུ་དང་མོ་རའི་བུ་ལུ་ ཕྱི་བཏོན་གཏང་ བུ་དེ་གིས་ཨ་པ་གི་བགོ་བཤའ་རྩ་ལས་རང་མི་ཐོབ་ ཁས་བླངས་ཀྱི་བུ་དེ་གིས་ཨ་པའི་རྒྱུ་ནོར་ག་ར་ཐོབ་ནི་ཟེར་བྲིས་ཏེ་འདུག

³¹ དེ་འབདཝ་ལས་ངེ་གི་སྤུན་ཆ་ཚུ་ ང་བཅས་གཡོགམོ་ཨམ་སྲུ་གི་བུ་བརྒྱུད་མེན་ ང་བཅས་ཨམ་སྲུ་ངོ་མ་གི་བུ་བརྒྱུད་ རང་དབང་ཅན་ཨིན།།