ག་ལ་ཏི་ལེའུ་ 3 - རྫོང་ཁ་

དད་པ་དང་བཀའ་ཁྲིམས་ཀྱི་སྐོར།

¹ ཨ་ཁའི་ ཁྱེད་ ག་ལ་ཏི་པ་རྩ་རྒས་ཚུ་ ཁྱེད་ལུ་ངན་སྔགས་རྐྱབ་དོཝ་བཟུམ་སྦེ་ ཁྱེད་ལུ་ག་གིས་ག་ནི་ཡང་མ་ཤེསཔ་བཟུམ་བཟོ་བཟོཝ་སྨོ་ ཡེ་ཤུ་ཁིརཱིས་འདི་ ཁྲམ་ཤིང་གུ་གཤགས་ཅི་ཟེར་ ཁྱེད་ལུ་གསལ་ཏོག་ཏོ་སྦེ་སྟོན་སྟོནམ་ཨིན་མེན་ན།

² ད་ང་གིས་ཁྱེད་ལས་གཅིག་ཤེས་དགོ་མནོ་སྟེ་ཡོད་ ཁྱེད་ཀྱིས་ ཡ་ཧུ་ད་པའི་བཀའ་ཁྲིམས་སྲུང་སྟེ་ དམ་པའི་ཐུགས་ཉིད་ཐོབ་ཐོབ་ཨིན་ན་ ཡང་ན་ཡེ་ཤུ་ཁིརཱིས་ཀྱི་སྐོར་ལས་གོ་སྟེ་ཐུགས་ཉིད་ཐོབ་ཐོབ་ཨིན་ན།

³ ཁྱེད་ག་དེམ་ཅིག་གི་རྩ་རྒས་སྨོ་ དམ་པའི་ཐུགས་ཉིད་ཀྱིས་ཁྱེད་ལུ་ཡེ་ཤུ་པའི་མི་ཚེ་གནང་ཞིནམ་ད་ མིའི་རང་བཞིན་གྱི་རྒྱུད་ལས་ ཡེ་ཤུ་པའི་མི་ཚེ་ཡར་རྒྱས་གཏང་ནི་ལུ་ ཁྱེད་ཀྱིས་ག་དེ་སྦེ་རྩ་འགེངསམ་སྨོ།

⁴ ག་ཅི་སྨོ་ཟེར་བ་ཅིན་ ཁྱེད་ཡེ་ཤུ་ལུ་དད་པ་བསྐྱེདཔ་ད་ གནམ་མེད་ས་མེད་དཀའཝ་སྤྱད་དེ་དད་པ་བསྐྱེད་ཅི་ འདི་དོན་དག་མེདཔ་ མ་སོང་ མེན་ན།

⁵ ང་གིས་ད་རུང་བློ་གཅིག་འདྲི་ནི་ཨིན་ དཀོན་མཆོག་གིས་ཁྱེད་ལུ་དམ་པའི་ཐུགས་ཉིད་གནང་སྟེ་ ཁྱེད་ཀྱི་སྦུག་ལུ་རྫུ་འཕྲུལ་གྱི་ཕྱག་ལཱ་མཛད་མི་འདི་ཚུ་ ཁྱེད་ཀྱིས་བཀའ་ཁྲིམས་སྲུང་སྟེ་ཨིན་ན་ ཡང་ན་ཁྱེད་ཀྱིས་ཁིརཱིས་ཀྱི་སྐོར་ལས་གོ་སྟེ་ དད་པ་བསྐྱེད་པའི་ཐོག་ལས་ཨིན་ན།

⁶ དེ་བཟུམ་སྦེ་རང་ ཨབ་ར་ཧམ་གྱི་སྐོར་ལས་དེ་སྦེ་བྲིས་ཏེ་ཡོད་ ཁོ་གིས་དཀོན་མཆོག་ལུ་དད་པ་བསྐྱེད་དེ་ དཀོན་མཆོག་གིས་ཁོ་རའི་ཐུགས་དང་ལྡན་པའི་ མི་ཕྲངམ་སྦེ་བརྩིས་གནང་ནུག

⁷ དེ་གིས་འབད་ དཀོན་མཆོག་ལུ་དད་པ་བསྐྱེད་མི་ཚུ་ག་ར་ དོན་ལས་རང་ ཨབ་ར་ཧམ་གྱི་བུ་བརྒྱུད་ཨིན་ཟེར་ཤེས་དགོ།

⁸ ད་རུང་ དཀོན་མཆོག་གིས་ཕྱིའི་མི་རིགས་ཚུ་ལུ་ཡང་ དད་པའི་ཐོག་ལས་སྐྱབས་མཛད་ནི་ཟེར་ ཧེ་མ་ལས་རང་གསུང་རབ་ནང་བྲིས་ནུག་ ཨ་ནི་གཏམ་བཟང་འདི་གི་སྐོར་ལས་ དཀོན་མཆོག་གིས་ ཨབ་ར་ཧམ་དང་ཁས་བླངས་བཞེས་ཏེ་ མི་རིགས་ག་ར་ཁྱོད་ལས་རྒྱུད་དེ་བྱིན་རླབས་ཐོབ་ནི་ཟེར་བྲིས་ནུག

⁹ དེ་གིས་འབད་ དད་པ་བསྐྱེད་མི་ ཨབ་ར་ཧམ་དང་གཅིག་ཁར་ ཁིརཱིས་ལུ་དད་པ་བསྐྱེད་མི་ག་ར་གིས་ བྱིན་རླབས་ཐོབ་ནུག

¹⁰ དེ་འབདཝ་ད་ ག་ར་འབད་རུང་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་འབྱུང་ནི་གི་དོན་ལུ་ ཡ་ཧུ་ད་པའི་བཀའ་ཁྲིམས་སྲུང་སྟེ་སྡོད་མི་ཚུ་ ཆདཔ་ཕོག་སྟེ་རང་སྡོདཔ་ཨིན་ ག་ཅི་སྨོ་ཟེར་བ་ཅིན་ བཀའ་ཁྲིམས་ཀྱི་དེབ་ནང་བྲིས་མི་འདི་ཚུ་ རིམ་པ་བཞིན་དུ་ཉན་ཏེ་ ཨ་རྟག་རང་མ་འབད་མི་དེ་ཚུ་ དཀོན་མཆོག་གི་ཆད་པའི་འོག་ལུ་ཨིན་ཟེར་བྲིས་ཏེ་ཡོད།

¹¹ དཀོན་མཆོག་གིས་ཁོ་རང་གི་གཟིགས་སར་ བཀའ་ཁྲིམས་ལས་བརྟེན་ཏེ་ ག་ལུ་ཡང་ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་མི་གནང་ཟེར་ གསལ་ཏོག་ཏོ་སྦེ་སྟོན་སྟོནམ་ཨིན་ ག་ཅི་སྨོ་ཟེར་བ་ཅིན་ ཆོས་སེམས་ཡོད་མི་འདི་ དད་པ་ལས་བརྟེན་ཏེ་སྡོདཔ་ཨིན་ཟེར་གསུང་རབ་ནང་བྲིས་ཏེ་ཡོད།

¹² དེ་འབདཝ་ད་ བཀའ་ཁྲིམས་ཀྱི་དོན་དག་འདི་ཚུ་སྒྲུབ་ནི་ཨིན་པ་ཅིན་ དད་པའི་ཐོག་ལས་མེན་པར་ ལཱ་འབད་དེ་རྐྱངམ་གཅིག་སྒྲུབ་འོང་ གསུང་རབ་ནང་གི་བཀའ་ཁྲིམས་སྒྲུབ་ནི་ཨིན་པ་ཅིན་ བཀའ་ཁྲིམས་རིམ་པ་བཞིན་དུ་ག་ར་སྲུང་སྟེ་སྡོད་དགོ་ཟེར་དེ་སྦེ་བྲིས་ཏེ་ཡོད།

¹³ དེ་ལས་བཀའ་ཁྲིམས་ནང་ ཤིང་གུ་བརྐྱངས་མི་དེ་ལུ་ཆདཔ་ཕོགཔ་ཨིན་ཟེར་བྲིས་དོཝ་བཟུམ་སྦེ་ ཁིརཱིས་ཁྲམ་ཤིང་གུ་བརྐྱངསམ་ད་ ང་བཅས་ལུ་ཕོག་དགོ་མི་ཉེས་བྱ་འདི་ ཁོ་ལུ་ཕོག་སྟེ་ བཀའ་ཁྲིམས་ཀྱི་ཉེས་བྱ་ལས་ང་བཅས་ལུ་ཐར་གནང་ཡོདཔ་ཨིན།

¹⁴ དེ་ག་ཅི་སྨོ་ཟེར་བ་ཅིན་ ཨབ་ར་ཧམ་ལུ་གནང་མིའི་བྱིན་རླབས་འདི་ ཁིརཱིས་ཡེ་ཤུ་གི་ཐོག་ལས་སྦེ་ ཕྱིའི་མི་རིགས་ཚུ་གིས་ཡང་ཐོབ་ནི་གི་དོན་ལུ་ཨིན་ འདི་གིས་འབད་ ཁས་བླངས་བཞེས་མི་དམ་པའི་ཐུགས་ཉིད་དེ་ དད་པའི་སྒོ་ལས་ ད་ལྟོ་ང་བཅས་ག་ར་གིས་ཐོབ་སྟེ་ཡོད།།

དཀོན་མཆོག་གིས་ཁས་བླངས་བཞེས་མི་འདི་ཚུ་དང་བཀའ་ཁྲིམས་ཀྱི་ཁྱད་པར་གྱི་སྐོར།

¹⁵ ངེ་གི་སྤུན་ཆ་ཚུ་ མི་གི་ལུགས་སྲོལ་གྱི་དཔེ་ཅིག་སླབ་པ་ཅིན་ མི་གཉིས་ཀྱི་བར་ན་འགན་ཡིག་བཟོ་སྟེ་ ཐིའུ་བརྐྱབས་ཚར་ཞིནམ་ལས་ དེ་ནང་ལུ་ མི་གཅིག་རྐྱངམ་གཅིག་གིས་ ཁ་སྐོང་ཡང་བརྐྱབ་མི་ཚུགས་ ཆ་མེད་ཡང་གཏང་མི་ཚུགས།

¹⁶ དེ་བཟུམ་སྦེ་རང་དཀོན་མཆོག་གིས་ ཨབ་ར་ཧམ་དང་ཁོ་གི་བུ་བརྒྱུད་ལུ་ཁས་བླངས་བཞེས་ཅི་ དེ་འབདཝ་ད་ གསུང་རབ་ནང་ལུ་བལྟ་བ་ཅིན་ བུ་བརྒྱུད་ལེ་ཤ་གི་སྐོར་ལས་ ཁོ་གི་བུ་བརྒྱུད་ཟེར་མ་འབྲི་བས་ དེ་འབདཝ་ད་ བུ་བརྒྱུད་གཅིག་གི་སྐོར་ལས་བྲིས་ཏེ་ཡོད་ ཨ་ནི་བུ་གཅིགཔ་དེ་ ཡེ་ཤུ་ཁིརཱིས་ཨིན་ཟེར་ང་བཅས་ཀྱིས་ཤེས།

¹⁷ ད་ཨ་ནི་འདི་ དཀོན་མཆོག་གིས་ཧེ་མ་ལས་ ཨབ་ར་ཧམ་དང་གཅིག་ཁར་ཁས་བླངས་བཞེས་ཞིནམ་ད་ ཤུལ་ལས་ཁོ་རང་གིས་ལོ་ངོ་བཞི་བརྒྱ་གསུམ་བཅུ་ལུ་ མོ་སཱེས་ལུ་གནང་མིའི་བཀའ་ཁྲིམས་དེ་གིས་ ཧེ་མ་ཁས་བླངས་བཞེས་མི་དེ་ལུ་ ཆ་མེད་གཏང་མི་ཚུགས་ དེ་གིས་མ་ཚད་ ཤིག་སྟེ་ཡང་མི་གཏང་ཟེར་ང་གིས་སླབ་ཨིན།

¹⁸ ག་དེམ་ཅིག་སྦེ་ ཁས་བླངས་མི་གི་བྱིན་རླབས་འདི་ བཀའ་ཁྲིམས་ལས་བརྟེན་ཏེ་ཐོབ་པ་ཅིན་ ལཱ་ལས་བརྟེན་ཏེ་ཨིན་ ཁས་བླངས་མི་གི་དོན་དག་ག་ནི་ཡང་མེདཔ་སྦེ་འགྱོཝ་ཨིན་ དེ་འབདཝ་ད་དཀོན་མཆོག་གིས་ ཨཱབ་ར་ཧམ་ལུ་ཐུགས་རྗེ་གཟིགས་ཏེ་ བྱིན་རླབས་འདི་ཁས་བླངས་མི་གི་ཐོག་ལས་སྦེ་གནང་ནུག

¹⁹ དེ་སྦེ་ཨིན་པ་ཅིན་ བཀའ་ཁྲིམས་འདི་ག་ཅི་གི་དོན་ལུ་གནང་ཡི་ག་ཟེར་བ་ཅིན་ དཀོན་མཆོག་གིས་ མི་ཁོང་རང་གིས་འབད་མི་སྡིག་པ་བཏོན་ནི་གི་དོན་ལུ་ གནང་གནངམ་ཨིན་མས་ དེ་འབདཝ་ད་ ཨ་ནི་བཀའ་ཁྲིམས་འདི་ ཨབ་ར་ཧམ་ལུ་ཁས་བླངས་ཀྱི་ཐོག་ལས་གནང་མི་བུ་བརྒྱུད་འདི་ མ་བྱོན་ཚུན་ཚོད་ལུ་རྐྱངམ་གཅིག་གནང་ནུག་ དེ་ལས་ད་རུང་དཀོན་མཆོག་གིས་ བཀའ་ཁྲིམས་འདི་ཕོ་ཉ་ཚུ་ལས་རྒྱུད་དེ་ མོ་སཱེས་ལུ་གནང་སྟེ་ མོ་སཱེས་དཀོན་མཆོག་དང་མིའི་བར་ན་ལུ་ བར་མི་འབད་དེ་ བཀའ་ཁྲིམས་ཀྱི་བདག་སྐྱོང་འབད་ནུག

²⁰ ད་ང་བཅས་མི་གཉིས་ཀྱི་བར་ན་འགན་ཡིག་བཟོཝ་ད་ འཛོམ་དཔང་གཅིག་དགོ་ དེ་འབདཝ་ད་དཀོན་མཆོག་གིས་ ཨབ་ར་ཧམ་དང་ཁས་བླངས་བཞེསཔ་ད་ ཁོ་རང་རྐྱངམ་གཅིག་གིས་མཛད་ནུག

²¹ ད་བཀའ་ཁྲིམས་ཀྱིས་ དཀོན་མཆོག་གི་ཁས་བླངས་ཚུ་ལུ་རྒོལཝ་ཨིན་ན་ཟེར་བ་ཅིན་ འདི་དོན་ལས་རང་མེན་ ཁས་བླངས་དང་བཀའ་ཁྲིམས་གཉིས་ཀྱི་ལཱ་སོ་སོ་ཡོད་ ག་ཅི་སྨོ་ཟེར་བ་ཅིན་ ཁྲིམས་གཅིག་གིས་ཚེ་གསརཔ་གནངམ་ཨིན་པ་ཅིན་ དཀོན་མཆོག་གི་ཐུགས་དང་ལྡན་པའི་ཕྲངམ་སྦེ་མཛད་མི་འདི་ བཀའ་ཁྲིམས་ལས་རྒྱུད་དེ་ཐོབ་དགོ་པས།

²² དེ་འབདཝ་ད་ བཀའ་ཁྲིམས་འདི་གིས་འབད་ ང་བཅས་ག་ར་སྡིག་པའི་བཙོན་ཁང་ནང་སྡམ་བཞག་ཡོད་ཟེར་ གསལ་ཏོག་ཏོ་སྦེ་ཕྱི་འཐོནམ་མས་ དེ་གིས་འབད་ དཀོན་མཆོག་གིས་ཁས་བླངས་བཞེས་མི་བྱིན་རླབས་ཐོབ་ནི་གི་ལམ་འདི་ ག་གིས་ཡེ་ཤུ་ཁིརཱིས་ལུ་དད་པ་བསྐྱེད་ཅི་ག་ འདི་གི་དོན་ལུ་རྐྱངམ་གཅིག་ཨིན།

²³ ཁིརཱིས་ལུ་དད་པ་བསྐྱེད་ནི་གི་ལམ་སྟོན་མ་གནང་ཚུན་ཚོད་ ང་བཅས་བཀའ་ཁྲིམས་ཀྱི་འོག་ལུ་མནེམ་བཞག་དོཝ་བཟུམ་སྦེ་ཨིནམ་མ་ཚད་ བཀའ་ཁྲིམས་ཀྱི་ཐོག་ལས་སྦེ་ ང་བཅས་ལུ་བདག་འཛིན་འཐབ་དོཝ་བཟུམ་སྦེ་བྱུང་ནུག

²⁴ དེ་ལས་ད་ལྟོ་ཡེ་ཤུ་ཁིརཱིས་ལུ་དད་པ་བསྐྱེད་དེ་ ང་བཅས་ཁོ་རའི་ཐུགས་དང་ལྡན་པའི་ མི་ཕྲངམ་ལུ་འགྱུར་བཅུག་ནི་གི་དོན་ལུ་ ཡེ་ཤུ་ཁིརཱིས་མ་འབྱོན་པའི་བར་དུ་ བཀའ་ཁྲིམས་ཀྱིས་ང་བཅས་ལུ་བདག་འཛིན་འཐབ་ནུག

²⁵ དེ་འབདཝ་ད་ ད་ལྟོ་དད་པ་བསྐྱེད་སའི་ ཡེ་ཤུ་ཁིརཱིས་བྱོན་ནི་དེ་གིས་ བཀའ་ཁྲིམས་ཀྱིས་ང་བཅས་ལུ་བདག་འཛིན་འཐབ་མི་དགོ།

²⁶ ག་ཅི་སྨོ་ཟེར་བ་ཅིན་ ཁྱེད་ག་ར་གིས་ཁིརཱིས་ཡེ་ཤུ་ལུ་དད་པ་བསྐྱེད་ནི་དེ་གིས་ དཀོན་མཆོག་གི་སྲས་དང་སྲསམོ་ཨིན།

²⁷ དེ་ལས་ཁྱེད་ག་ར་འབད་རུང་ ཡེ་ཤུ་ཁིརཱིས་ནང་ཁྲུས་གསོལ་ཞུ་མི་ཆ་ཁྱབ་ ཡེ་ཤུ་ཁིརཱིས་ཀྱི་རང་བཞིན་འདི་ ཁྱེད་ལུ་བགོ་ལ་གྱོན་དོཝ་བཟུམ་སྦེ་ ཁྱེད་ཀྱི་ནང་ལས་ཕྱི་ཁར་འཐོན་འོང་།

²⁸ ད་ ཡ་ཧུ་ད་པ་ཨིན་རུང་མེན་རུང་ རྒྱོབོ་རྒྱམོ་ཨིན་རུང་ རང་དབང་ཡོད་རུང་ ཕོ་རྒྱ་ཨིན་རུང་ ཨམ་སྲུ་ཨིན་རུང་ དེ་ཚུ་ག་ར་དབྱེ་བ་ག་ནི་ཡང་མེད་པར་ ཁྱེད་ག་ར་ཁིརཱིས་ཡེ་ཤུ་ནང་ཅོག་འཐདཔ་ཨིན།

²⁹ ད་ཁྱེད་ག་ར་འབད་རུང་ ག་དེམ་ཅིག་སྦེ་ཁིརཱིས་ཀྱི་ཨིན་པ་ཅིན་ ཁྱེད་ ཨབ་ར་ཧམ་གྱི་བུ་བརྒྱུད་ངོ་མ་ཨིནམ་མ་ཚད་ ཁས་བླངས་བཞེས་མི་དང་འཁྲིལ་ཏེ་ ཁྱེད་བྱིན་རླབས་ཀྱི་ཤུལ་འཛིན་ཡང་ཨིན་ནོ།།