ག་ལ་ཏི་ལེའུ་ 2 - རྫོང་ཁ་

པའུལ་སྐུ་ཚབ་ཨིནམ་སྦེ་ཆ་བཞག་པའི་སྐོར།

¹ དེ་ལས་ལོ་བཅུ་བཞི་གི་ཤུལ་ལས་ ང་དང་ བཱར་ན་བཱས་ ད་རུང་ ཡེ་རུ་ཤ་ལེམ་ལུ་སོང་ཡི་ དེའི་སྐབས་ལུ་ང་བཅས་ཀྱིས་ ཏི་ཏུས་ཡང་འཁྱིད་སོང་ཡི།

² ཡེ་རུ་ཤ་ལེམ་ལུ་འགྱོ་དགོ་མི་འདི་ དཀོན་མཆོག་གིས་ང་ལུ་དངོས་སུ་སྦེ་མཇལ་ཁ་གནངམ་བཞིན་དུ་ཨིན་ དེ་ལས་ཡར་ལུ་ ང་གིས་ཕྱིའི་མི་རིགས་ཀྱི་སྦུག་ལུ་གཏམ་བཟང་དེ་ ག་དེ་སྦེ་བཤད་ཅི་ག་ ཁོང་འགོ་དཔོན་ཨིན་ཟེར་མནོ་མི་ཚུ་ལུ་ཞུ་ཡི་ དེ་འབདཝ་ད་ ང་གིས་བཤད་མི་འདི་ དོན་དག་མེདཔ་མ་འགྱོ་ནིའི་དོན་ལུ་ ང་ཁོང་ཆ་ཁྱབ་དང་གཅིག་ཁར་ སོ་སོ་སྦེ་སྡོད་དེ་རང་ཁ་སླབ་ཅི།

³ ཁོང་ཆ་ཁྱབ་ཀྱིས་ངེའི་བློ་ལུ་ཁ་བཟེདཝ་མ་ཚད་ ང་དང་གཅིག་ཁར་ཡོད་མི་ ཏི་ཏུས་འདི་ ཕྱིའི་མི་རིགས་གཅིག་ཨིན་རུང་ ཡ་ཧུ་ད་པའི་ལུགས་སྲོལ་བཞིན་དུ་རྟགས་བཀལ་དགོཔ་མ་འཐོན།

⁴ ཨ་ནི་ ཡ་ཧུ་ད་པའི་རྟགས་དེ་གི་སྐོར་ལས་ ག་དེ་སྦེ་འགྱོ་འགྱོཝ་ཨིན་ན་ཟེར་བ་ཅིན་ ལ་ལུ་གིས་ཡེ་ཤུ་པ་བཟོ་སྟེ་ ཁིརཱིས་ཡེ་ཤུ་ལས་ང་བཅས་ཀྱིས་ཐོབ་མི་དབང་ཚད་དེ་བལྟ་ནི་གི་དོན་ལུ་ མེན་བརྫུ་བཏབ་སྟེ་ང་བཅས་ཀྱི་སྦུག་ལུ་འཛུལ་འོངས་ཡི་ ཁོང་གིས་ང་བཅས་ལུ་ ཡ་ཧུ་ད་པའི་བཀའ་ཁྲིམས་ཀྱི་གཡོགཔོ་སྦེ་བཟོ་ནི་འབདཝ་ཨིན་མས།

⁵ དེ་འབདཝ་ད་ གཏམ་བཟང་གི་བདེན་པ་སྲུང་བཞག་སྟེ་ ཁྱེད་ཀྱི་ནང་ན་གནས་ནི་གི་དོན་ལུ་ ང་བཅས་ཀྱིས་ཁོང་ལུ་རྩ་ལས་རང་ཁ་བཟེད་མ་བཏུབ།

⁶ དེ་ལས་འགོ་དཔོན་ཨིན་ཟེར་མནོ་མི་ཚུ་གིས་ཡང་ ང་གིས་སྟོན་མིའི་ཆོས་དེ་ལས་གཞན་ཐེབས་ག་ནི་ཡང་མ་སྟོན་ (ཁོང་ཆ་ཁྱབ་ག་དེ་སྦེ་རང་ཁག་ཆེ་དྲགས་སྦེ་རྩི་རུང་ ང་ལུ་ཁྱད་པར་ག་ནི་ཡང་མེད་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཕྱི་ཁར་མིའི་དྲག་ཞན་བལྟ་སྟེ་ ཉེ་རིང་མི་ཕྱེ།)

⁷ དེ་གིས་འབད་ པེ་ཏྲོ་ལུ་དཀོན་མཆོག་གིས་ ཡ་ཧུ་ད་པ་ཚུ་ལུ་ གཏམ་བཟང་བཤད་པའི་འགན་ཁག་གནངམ་བཟུམ་སྦེ་ དཀོན་མཆོག་གིས་ང་ལུ་ཕྱིའི་མི་རིགས་ཚུ་ལུ་ གཏམ་བཟང་བཤད་པའི་འགན་ཁག་ཡང་གནང་ཡོདཔ་ ཁོང་གིས་མཐོང་ཅི།

⁸ ག་ཅི་སྨོ་ཟེར་བ་ཅིན་ ཡ་ཧུ་ད་པ་ཚུ་གི་སྦུག་ལུ་ལཱ་འབད་ནི་གི་དོན་ལུ་ པེ་ཏྲོ་ལུ་སྐུ་ཚབ་ཀྱི་ལྕོགས་གྲུབ་གནང་མི་དཀོན་མཆོག་དེ་གིས་ ཕྱིའི་མི་རིགས་ཚུ་གི་སྦུག་ལུ་ལཱ་འབད་ནི་གི་དོན་ལུ་ ང་ལུ་ཡང་སྐུ་ཚབ་ཀྱི་ལྕོགས་གྲུབ་གནང་སྟེ་ཡོད།

⁹ དེ་གིས་འབད་ ཨ་ནི་ལཱ་འབད་ནི་གི་དོན་ལུ་ ང་གིས་ཐུགས་རྗེ་ཐོབ་ཡོདཔ་ཁོང་གིས་ཤེས་ཅི་ ཡ་ཀོབ་དང་ ཀེ་ཕཱས་དང་ ཡོ་ཧ་ནཱན་ ཆོས་ཚོགས་ཀྱིས་ཡོད་ན་མེད་ན་སྦེ་ཆ་བཞག་མི་ཚུ་ཨིན་ ཁོང་གསུམ་གྱིས་ང་དང་ བཱར་ན་བཱས་གཅིག་ཁར་མཐུན་ཏེ་ གཅིག་སྦེ་ལཱ་འབད་ནི་གི་བྱིན་རླབས་ཞུ་བྱིན་ཏེ་ ང་བཅས་ཕྱིའི་མི་རིགས་ཚུ་གི་སྦུག་ལུ་འགྱོ་ནི་དང་ ཁོང་ ཡ་ཧུ་ད་པའི་སྦུག་ལུ་འགྱོ་ནི་ཟེར་ཁ་བཟེད་ཡི།

¹⁰ དེ་ལས་ཁོང་གིས་ ང་བཅས་ཀྱི་སྦུག་ལུ་ཡོད་མི་སྤྱང་ཀ་ཚུ་ལུ་སེམས་ཁར་དྲན་ཏེ་ ཆ་རོགས་འབད་དགོཔ་སྦེ་བསླབ་བྱ་བྱིན་ཡི་ དེ་སྦེ་འབད་ནི་གི་འདོད་པ་འདི་ང་ལུ་ཡང་ཡོདཔ་ཨིན།།

པའུལ་གྱིས་ ཀེ་ཕཱས་ལུ་རྒོལ་བའི་སྐོར།

¹¹ དེ་གི་ཤུལ་ལས་ ཀེ་ཕཱས་ ཁྲོམ་ ཨཱན་ཏི་ཡོག་ལུ་འོང་པའི་སྐབས་ ང་གིས་ཁོ་ལུ་མིའི་གདོང་ཁར་རང་བཀག་བརྐྱབས་ཅི་ ག་ཅི་སྨོ་ཟེར་བ་ཅིན་ ཁོ་གིས་འཛོལ་བ་ཐད་རི་བ་རི་འབདཝ་ལས་བརྟེན་ཏེ་ཨིན།

¹² ཁོ་འགོ་དང་པ་འོངམ་ད་ ཕྱིའི་མི་རིགས་ལས་ཨིན་མི་དདཔ་ཅན་ཚུ་དང་གཅིག་ཁར་བཞེས་སྒོ་ཟ་ཡི་ དེ་འབདཝ་ད་སྐུ་ཚབ་ ཡ་ཀོབ་ཀྱི་ཆ་རོགས་ཚུ་ལྷོདཔ་ད་ པེ་ཏྲོ་གིས་ཕྱིའི་མི་རིགས་ཚུ་དང་གཅིག་ཁར་འབྲེལ་བ་མེདཔ་བཟུམ་སྦེ་བཟོ་སྟེ་ ཁོང་དང་གཅིག་ཁར་བཞེས་སྒོ་ཟ་མ་བཏུབ་ ག་ཅི་སྨོ་ཟེར་བ་ཅིན་ཁོང་ ཡ་ཧུ་ད་པའི་རྟགས་ཡོད་མི་སྡེ་མཚན་ལས་འབད་ནི་དེ་གིས་ ཁོ་འདྲོགས་ཏེ་ཨིན་མས།

¹³ དེ་ལས་འདི་ཁར་གྱི་ ཡ་ཧུ་ད་པའི་དདཔ་ཅན་ཚུ་གིས་ པེ་ཏྲོ་གི་འབད་བཞག་ལུ་བལྟ་སྟེ་ ཁོ་དང་གཅིག་ཁར་ ཁ་ཆོས་འབད་མི་སྦེ་སྡོམ་མ་ཚད་ བཱར་ན་བཱས་ཀྱིས་ཡང་འདི་ལུ་བལྟ་སྟེ་ ཁོང་དང་གཅིག་ཁར་སྡོམ་ཡི།

¹⁴ ང་གིས་དེ་ཚུ་མཐོངམ་ད་ ཁོང་གི་འབད་བཞག་འདི་ གཏམ་བཟང་གི་བདེན་པ་དང་མ་འཁྲིལཝ་ལས་ ང་གིས་ཁོང་ག་ར་གི་གདོང་ཁར་ ཀེ་ཕཱས་ལུ་ ཁྱོད་མ་གཞི་ ཡ་ཧུ་ད་པ་ཨིན་ དེ་འབདཝ་ད་ཁྱོད་ཀྱིས་ ཡ་ཧུ་ད་པའི་བཀའ་ཁྲིམས་བཀོག་བཞག་སྟེ་ ཕྱིའི་མི་རིགས་བཟུམ་སྦེ་སྡོདཔ་ཨིན་མས་ དེ་ལས་ཁྱོད་ཀྱིས་བཀོག་བཞག་མི་བཀའ་ཁྲིམས་འདི་ཚུ་ ལོག་སྟེ་ཕྱིའི་མི་རིགས་ཚུ་ལུ་ཡང་ ཁྱོད་ཀྱིས་འབད་བཅུགཔ་ཨིན་ན་ཟེར་སླབ་ཅི།

¹⁵ མ་པ་ང་བཅས་སྐྱེས་བའི་བསྒང་ལས་ ཡ་ཧུ་ད་པ་ཨིན་ ང་བཅས་ཀྱི་དོན་ལུ་ ཁོང་ཕྱིའི་མི་རིགས་ཚུ་ མི་རིགས་སྡིག་ཅན་ཨིན།

¹⁶ དེ་འབདཝ་ད་ མི་ག་ར་འབད་རུང་ ཡ་ཧུ་ད་པའི་བཀའ་ཁྲིམས་སྲུང་སྟེ་ དཀོན་མཆོག་གི་གཟིགས་སར་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མི་འབྱུང་ དེ་འབདཝ་ད་འདི་ ཡེ་ཤུ་ཁིརཱིས་ལུ་དད་པ་བསྐྱེདཔ་ལས་བརྟེན་ཏེ་ཨིན་ཟེར་ ང་བཅས་ཀྱིས་ཤེས་ དོན་དག་འདི་ལས་སྦེ་ ང་བཅས་དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་འབྱུང་ནི་གི་དོན་ལུ་ ང་བཅས་ ཡ་ཧུ་ད་པ་གིས་ཡང་ ཁིརཱིས་ཡེ་ཤུ་ལུ་དད་པ་བསྐྱེད་ཅི་ ག་ཅི་སྨོ་ཟེར་བ་ཅིན་ མི་ག་གིས་ཡང་ བཀའ་ཁྲིམས་སྲུང་སྟེ་ ཐུགས་དང་ལྡན་པའི་ མི་ཕྲངམ་སྦེ་བྱུང་མི་ཚུགས།

¹⁷ ང་བཅས་ཀྱིས་བཀའ་ཁྲིམས་མ་སྲུང་པར་ དཀོན་མཆོག་གི་ཐུགས་དང་ལྡན་པའི་ མི་ཕྲངམ་སྦེ་འབྱུང་ནི་གི་དོན་ལུ་ ཁིརཱིས་ལུ་དད་པ་བསྐྱེདཔ་ད་ ཡ་ཧུ་ད་པ་ཚུ་གི་དོན་ལུ་ ང་བཅས་ཡང་སྡིག་ཅན་སྦེ་བརྩི་འོང་པ་ཅིན་ འདི་ཡེ་ཤུ་ཁིརཱིས་ཀྱིས་ང་བཅས་ལུ་སྡིག་པ་འབད་བཅུགཔ་སྦེ་བརྩི་ནི་ཨིན་ན་ དེ་སྦེ་རྩ་ལས་རང་མེན།

¹⁸ དེ་འབདཝ་ད་ ང་གིས་བཀའ་ཁྲིམས་རྙིངམ་དེ་མེདཔ་གཏང་ཞིནམ་ད་ ད་རུང་ལོག་སྟེ་སྲུང་སྡོད་པ་ཅིན་ ང་ཁྲིམས་ལུ་རྒོལ་མི་གཅིག་ཨིན།

¹⁹ ང་བཀའ་ཁྲིམས་སྲུང་སྡོད་ནི་ལུ་ག་དེ་ཅིག་རྩ་འགེངས་རུང་ བཀའ་ཁྲིམས་རེ་རེ་བཞིན་དུ་སྲུང་སྟེ་ སྡོད་མ་ཚུགས་ དེ་འབདཝ་ལས་ ཡ་ཧུ་ད་པའི་བཀའ་ཁྲིམས་འདི་ ངེ་གི་དོན་ལུ་ཤི་སོངམ་མ་ཚད་ ང་དཀོན་མཆོག་གི་དོན་ལུ་གསོན་པོ་སྦེ་སྡོདཔ་ཨིན།

²⁰ ཁིརཱིས་ ཁྲམ་ཤིང་གུ་གཤགསཔ་ད་ ང་ཡང་ཁོ་དང་གཅིག་ཁར་ཤི་སོངམ་བཟུམ་སྦེ་ཨིན་ ད་ལྟོ་ང་རང་གིས་འབད་ གསོན་པོ་སྦེ་སྡོདཔ་མེན་ དེ་འབདཝ་ད་ ཁིརཱིས་ངེ་གི་ནང་ན་བཞུགས་ཡོད་ དེ་ལས་ང་མི་ལུས་ནང་སྡོད་དེ་ དཀོན་མཆོག་གི་སྲས་ ང་ལུ་བྱམས་པ་མཛད་མི་དང་ ཁོ་རང་གི་སྐུ་ཚེ་ང་ལུ་གནང་མི་དེ་ལུ་ དད་པ་བསྐྱེད་དེ་སྡོདཔ་ཨིན།

²¹ དེ་ལས་དཀོན་མཆོག་གིས་ཐུགས་རྗེ་གི་ཐོག་ལས་ མཛད་མི་ཕྱག་ལཱ་འདི་ ང་གིས་དོན་དག་མེདཔ་བཟོ་སྟེ་མི་བཞག་ ག་ཅི་སྨོ་ཟེར་བ་ཅིན་ དཀོན་མཆོག་གི་ཐུགས་དང་ལྡན་པའི་ཕྲངམ་སྦེ་མཛད་མི་འདི་ བཀའ་ཁྲིམས་སྲུང་སྟེ་ཐོབ་པ་ཅིན་ ཁིརཱིས་ཁྲམ་ཤིང་གུ་གཤགས་མི་འདི་ དོན་དག་མིན་འདུག།