ཨི་ཕི་སིཔ་ལེའུ་ 6 - རྫོང་ཁ་

ཕམ་དང་བུ་གཞི་གི་སྐོར་ལས་བསླབ་བྱ།

¹ ཨ་ལོ་ཚུ་གིས་ གཙོ་བོ་གི་ཐུགས་དགྱེས་མིའི་ལཱ་ རང་གི་ཕམ་གྱི་ཁ་ལུ་ཉན་དགོ་ ག་ཅི་སྨོ་ཟེར་བ་ཅིན་ འདི་ཀྲིག་ཀྲི་ཨིན།

² བཀའ་ཁྲིམས་ཚུ་གི་གྲལ་ཁར་ལས། རང་གི་ཕམ་ལུ་ཞབས་ཏོག་ཞུ་སྟེ་ཞེ་ས་འབད་ཟེར་ བྱིན་རླབས་དང་བཅསཔ་སྦེ་གནང་མི་བཀའ་ཁྲིམས་དང་པ་ནང་ དེ་སྦེ་བྲིས་ཏེ་འདུག

³ བྱིན་རླབས་དེ་ ཨ་ནི་ཨིན། དེ་སྦེ་འབད་བ་ཅིན་ ཁྱེད་ལུ་ལེགས་ཤོམ་འབྱུང་ནི་དང་ འཛམ་བུ་གླིང་ནང་ཚེ་རིངམ་སྦེ་སྡོད་ནི་ཐོབ།

⁴ ཨ་པ་ཚུ་གིས་ ཨ་ལོ་ཚུ་ལུ་ཙིགཔ་ཟ་མ་བཅུག་ དེ་འབདཝ་ད་ གཙོ་བོ་གི་ལམ་ལུགས་དང་བསྟུན་ཏེ་ ཨ་ལོ་ཚུ་ལུ་སྦྱོང་བརྡར་བྱིན་ཏེ་ འཛོལ་བ་ལས་བཅོ་ཁ་བརྐྱབས་ཏེ་བྱིན་དགོ།།

སྦྱིན་བདག་དང་རྒྱོབོ་རྒྱམོ་གི་སྐོར།

⁵ རྒྱོབོ་རྒྱམོ་ཚུ་གིས་ ཁིརཱིས་ལུ་ཕྱག་ཞུ་དོཝ་བཟུམ་སྦེ་ འཛམ་བུ་གླིང་ནང་རང་གི་སྦྱིན་བདག་ལུ་ཡང་ རང་གི་སེམས་ཁར་ལས་རང་འདྲོགས་ཏེ་ དོན་ལས་རང་ཞེ་ས་འབད་དེ་ ཁོ་གི་བཀའ་ལུ་ཉན་དགོ།

⁶ སྦྱིན་བདག་གིས་བལྟཝ་ད་རྐྱངམ་གཅིག་ལཱ་འབད་དེ་ སྦྱིན་བདག་ལུ་སེམས་ལྷུ་བའི་དོན་ལུ་མེན་པར་ ཁིརཱིས་ཀྱི་ཕྱག་ཞུ་མི་བཟུམ་སྦེ་ སེམས་ཀྱི་གདིང་ལས་རང་ དཀོན་མཆོག་གི་ཐུགས་དགྱེས་པའི་ལཱ་ཚུ་འབད་དགོ།

⁷ མི་ཚུ་གི་དོན་ལུ་མེན་པར་ དེ་འབདཝ་ད་ གཙོ་བོ་གི་དོན་ལུ་འབད་དོཝ་བཟུམ་སྦེ་ སེམས་དགའ་སྟེ་འབད་དགོ།

⁸ ག་ཅི་སྨོ་ཟེར་བ་ཅིན་ འདི་ཁྱེད་ཀྱིས་ཤེས་ རྒྱོབོ་རྒྱམོ་ཨིན་རུང་ རང་དབང་ཡོད་མི་ཨིན་རུང་ གཙོ་བོ་གིས་མི་རེ་རེ་ལུ་ ཁོང་གི་འབད་མི་ལཱ་ལེགས་ཤོམ་དང་བསྟུན་ཏེ་གསོལ་རས་གནང་འོང་།

⁹ སྦྱིན་བདག་ཚུ་གིས་ རྒྱོབོ་རྒྱམོ་ཚུ་ལུ་འདི་བཟུམ་སྦེ་རང་འབད་དགོ་ ཁོང་ལུ་ཤུགས་བཙོང་ནི་འདི་བཞག་དགོ་ ག་ཅི་སྨོ་ཟེར་བ་ཅིན་ འདི་ཁྱེད་ཀྱིས་ཤེས་ ཁྱེད་དང་ཁོང་གི་གཙོ་བོ་གཅིགཔ་འདི་ ཡར་ཞིང་ཁམས་ལུ་བཞུགས་ཡོད་ ཁོ་གིས་ག་ལུ་ཡང་ཉེ་རིང་མི་ཕྱེ།།

དཀོན་མཆོག་གི་དགྲ་ཆས་ཀྱི་སྐོར།

¹⁰ མཐའན་མཇུག་ལུ་ གཙོ་བོ་གི་ཧ་ལས་པའི་སྟོབས་ཤུགས་ལས་སྦེ་ ཁྱེད་སྒྲིང་སྒྲིང་སྡོད།

¹¹ བདུད་ཀྱི་ཐབས་ལ་ངན་པ་དེ་ཚུ་ལས་ ཁྱེད་སྒྲིང་སྒྲིང་སྦེ་ལོང་སྡོད་ཚུགས་ནིའི་དོན་ལུ་ དཀོན་མཆོག་གི་དགྲ་ཆས་ག་ར་གྱོན་ཏེ་སྡོད།

¹² ག་ཅི་སྨོ་ཟེར་བ་ཅིན་ ང་བཅས་ཀྱི་དམག་འདི་ མི་ཚུ་དང་མཉམ་གཅིག་རྐྱབ་མེན་པར་ བདུད་དང་བཙན་ གནམ་ཁ་གི་དབང་འཛིན་ཚུ་ གནག་དུང་དུ་གི་གཙོ་བོ་ཚུ་ དེ་ལས་འདྲེ་གདོན་ངན་པ་དེ་ཚུ་ག་ར་དང་མཉམ་གཅིག་རྐྱབ་ཨིན།

¹³ འདི་གི་དོན་ལུ་ ངན་པའི་ཉིནམ་འདི་འོངམ་ད་ ཁྱེད་དེ་ལུ་རྒྱབ་འགལ་འབད་ནིའི་དོན་ལུ་ དཀོན་མཆོག་གི་དགྲ་ཆས་ག་ར་གྱོན་ཏེ་སྡོད་ དེ་ལས་ཁྱེད་ཀྱིས་ག་ར་སྒྲུབ་ཚརཝ་ད་ སྒྲིང་སྒྲིང་སྦེ་ལོང་སྡོད་འོང་།

¹⁴ འདི་གི་དོན་ལུ་ ཁྱེད་ཡར་ལོང་སྦེ་ རང་གི་རྐེདཔ་ལུ་ བདེན་པའི་སྐེ་རགས་བཅིང་ རང་གི་བྱང་ཁོག་ལུ་ དྲང་པོ་གི་གོ་ཁྲབ་གྱོན།

¹⁵ དེ་ལས་རྐངམ་ལུ་ མཐུན་ལམ་བཟོ་མི་གཏམ་བཟང་བཤད་ནི་ལུ་ གྲ་སྒྲིག་འབད་ཡོད་མི་ལྷམ་བཙུགས།

¹⁶ ད་རུང་ཡང་ དདཔ་གི་དགྲ་ལི་ལག་པར་བཤེད་ འདི་གིས་ངན་པ་གི་མེ་མདའ་དེ་ཚུ་ལུ་ གསད་གཏང་ཚུགསཔ་ཨིན།

¹⁷ དེ་ལས་སྐྱབས་མཛད་མིའི་ལྕགས་རྨོག་ལེན་ཏེ་བཙུགས་ ཐུགས་ཉིད་ཀྱི་དཔའ་རྟགས་ཡང་ལེན་ཏེ་བཤེད་ དཔའ་རྟགས་དེ་དཀོན་མཆོག་གི་གསུང་ཨིན།

¹⁸ འདི་གི་དོན་ལུ་ ཐུགས་ཉིད་ཀྱི་རྒྱུད་ལས་སྨོན་ལམ་ཞུ་སྟེ་ དུས་ནམ་རང་འབད་རུང་ གསོལཝ་བཏབ་སྟེ་རང་སྡོད་ གནས་སྟངས་ག་ཅི་རང་འོང་རུང་ བརྟན་ཏོག་ཏོ་དང་ ན་འཐན་ཏོག་ཏོ་སྦེ་སྡོད་དེ་ དཀོན་མཆོག་ཁོ་རའི་དམ་པའི་མི་ག་ར་གི་དོན་ལུ་ རྟག་བུ་རང་རྩ་འགེངས་ཏེ་སྨོན་ལམ་ཞུ།

¹⁹ དེ་ལས་ ང་གིས་མ་འདྲོག་པར་ གཏམ་བཟང་གི་ཁུངས་བཤད་ཚུགས་ནི་གི་ཁེ་རྒོ་ ང་ལུ་གནང་བཅུག་ཟེར་ངེ་གི་དོན་ལུ་ཡང་སྨོན་ལམ་ཞུ།

²⁰ འདི་གི་དོན་ལུ་རང་ ང་བཙོན་ནང་ཚུད་ཡོད་མི་སྐུ་ཚབ་གཅིག་ཨིན་ ང་གིས་ག་ཅི་བཤད་དགོཔ་ཨིན་ན་ འདི་ནང་ང་གིས་མ་འདྲོག་པར་ གཏམ་བཟང་བཤད་ནི་མ་བཞག་པར་ འཕྲོ་མཐུད་དེ་རང་བཤད་ཚུགས་ནིའི་དོན་ལུ་ སྨོན་ལམ་ཞུ།།

མཐའན་མཇུག་གི་བསླབ་བྱ་གི་སྐོར།

²¹ དེ་འབདཝ་ད་ ང་ག་དེ་སྦེ་ཡོད་ག་ ག་ཅི་འབད་དེ་ཡོད་ག་ འདི་ཚུ་ཁྱེད་ཀྱིས་ཡང་ཤེས་ཚུགས་ནི་གི་དོན་ལུ་ གཙོ་བོ་གི་ཞབས་ཕྱིཔ་ ན་འཐན་ཏོག་ཏོ་དང་ བྱམས་པའི་ནུ་གཅུང་ ཏི་ཀི་ཀུས་ཀྱིས་ འདི་ཚུ་གི་སྐོར་ལས་ཁྱེད་ལུ་སླབ་འོང་།

²² ང་བཅས་ཀྱི་སྐོར་ལས་ལོ་རྒྱུས་འདི་ཚུ་ཁྱེད་ལུ་སླབ་སྟེ་ ཁྱེད་ཀྱི་སེམས་ལུ་དགའ་ཚོར་འབྱུང་ནིའི་དོན་ལུ་ ང་གིས་ཁོ་ཁྱེད་སྡོད་སར་ལུ་གཏང་དོ།

²³ ཡབ་དཀོན་མཆོག་དང་གཙོ་བོ་ཡེ་ཤུ་ཁིརཱིས་ཀྱིས་ སྤུན་ཆ་ཚུ་ལུ་ཞི་བདེ་དང་བྱམས་པ་ དད་པ་གནང་བཅུག

²⁴ ང་བཅས་རའི་གཙོ་བོ་ཡེ་ཤུ་ཁིརཱིས་ལུ་ རྫོགས་ནི་མེད་པའི་བརྩེ་བ་བསྐྱེད་མི་ཚུ་ལུ་ ཐུགས་རྗེ་གནང་བཅུག། །།