ཨི་ཕི་སིཔ་ལེའུ་ 5 - རྫོང་ཁ་

འོད་ཟེར་གྱི་ལམ་བདའ་སྟེ་འགྱོ་དགོ་པའི་སྐོར།

¹ དེ་འབདཝ་ལས་ ཁྱེད་དཀོན་མཆོག་གི་གཅེས་པའི་ཨ་ལོ་ཚུ་ཨིནམ་ལས་ ཁོ་གིས་མཛད་མི་ཕྱག་ལཱ་ལུ་དཔེ་སྦེ་བལྟ་སྟེ་ ཁྱེད་ཀྱིས་ཡང་ཅོག་འཐདཔ་སྦེ་འབད་དགོ།

² ཁིརཱིས་ཀྱིས་ང་བཅས་ལུ་བྱམས་པ་མཛད་དེ་ ང་བཅས་ཀྱི་དོན་ལུ་ཁོ་རང་གི་ཚེ་སྲོག་བློས་གཏང་དོཝ་བཟུམ་སྦེ་ ཁྱེད་ཀྱིས་ཡང་ཁིརཱིས་ཀྱི་དཔེ་བལྟ་སྟེ་ བྱམས་པའི་ལམ་བདའ་སྟེ་འགྱོ་ ཁོ་གི་ཚེ་སྲོག་དེ་ དམར་མཆོད་སྦེ་ཕུལ་ཏེ་ དཀོན་མཆོག་གི་ཐུགས་དགྱེས་པའི་དྲི་བསང་ཞིམ་ཏོག་ཏོ་གཅིག་ལུ་འགྱུར་ནུག

³ དེ་འབདཝ་ད་ ཁྱེད་དཀོན་མཆོག་གི་མི་ཚུ་འབད་ནི་དེ་གིས་ མ་རབས་ཀྱི་ལཱ་ མ་གཙངམ་མའི་ལཱ་ དེ་ལས་དགོ་འདོད་བཙོང་ནི་ དེ་ཚུ་འབད་མི་བཏུབ་ དེ་མ་ཚད་ ཁྱེད་ཀྱི་སྦུག་ལུ་དེ་ཚུ་གི་མིང་ཙམ་ཡང་ཐོན་བཅུག་ནི་མི་འོང་།

⁴ ད་རུང་ཁྱེད་ཀྱིས་འཆལ་གཏམ་སླབ་ནི་ ཁུངས་མེད་པའི་བློ་སླབ་ནི་ བློ་ཟོགཔོ་སླབ་ནི་ དེ་ཚུ་ག་ར་ཀྲིག་ཀྲི་མེན་མི་སྤྱོད་ལམ་ཨིན་ དེ་འབདཝ་ད་ དེ་ཚུ་འབད་ནིའི་ཚབ་ལུ་ གཙོ་བོ་ལུ་བཀའ་དྲིན་ཆེ་ཟེར་ཞུ་དགོ།

⁵ ག་ཅི་སྨོ་ཟེར་བ་ཅིན་ ཁྱེད་ཀྱིས་དེ་ཐད་རི་བ་རི་ཤེས་ ལཱ་མ་རབས་འབད་མི་ ལཱ་མ་གཙངམ་འབད་མི་ དེ་ལས་མི་དགོ་འདོད་ཅན་འདི་ཚུ་ ཁིརཱིས་དང་དཀོན་མཆོག་གི་རྒྱལ་སྲིད་ནང་ཤུལ་ནོར་ ཐོབ་རང་མི་ཐོབ་ དེ་མ་ཚད་ འདོད་པ་བཙོང་ནི་འདི་ འཇིག་རྟེན་པའི་ཅ་ལ་ཚུ་ལུ་ཆགས་སེམས་བསྐྱེད་ནི་གི་སྡིག་པ་ཨིན།

⁶ མི་གཞན་ག་གིས་ཡང་ དེ་ཚུ་འབད་དེ་འབད་རུང་ ཁྱད་མེད་ཟེར་ཁུངས་མེད་པའི་བློ་ཚུ་སླབ་སྟེ་ ཁྱེད་ལུ་མགུ་བསྐོར་རྐྱབ་མ་བཅུག་ ག་ཅི་སྨོ་ཟེར་བ་ཅིན་ དེ་ཚུ་གིས་འབད་དེ་ དཀོན་མཆོག་ལུ་མ་ཉན་མི་ཚུ་གི་གུ་ལུ་ ཁོ་གི་ཆདཔ་ཕོག་ནི་ཨིན།

⁷ འདི་གི་དོན་ལུ་ཁོང་དང་མཉམ་གཅིག་མ་སྡོམས།

⁸ ཧེ་མ་ ཁྱེད་གནག་དུང་དུ་ནང་སྡོད་མི་ཚུ་ཨིན་ དེ་འབདཝ་ད་ ད་ལྟོ་ཁྱེད་གཙོ་བོ་གི་མི་ཚུ་འབད་ནི་འདི་གིས་ ཁྱེད་འོད་ཟེར་གྱི་མི་ཚུ་ཨིན་ དེ་འབདཝ་ལས་ འོད་ཟེར་གྱི་སྲས་དང་སྲསམོ་སྦེ་སྡོད།

⁹ (ག་ཅི་སྨོ་ཟེར་བ་ཅིན་ འོད་ཟེར་གྱི་འབྲས་བུ་འདི་ སྤྱོད་ལམ་བཟང་པོ་འབད་ནི་དང་ ལཱ་ཀྲིག་ཀྲི་འབད་ནི་ དེ་ལས་ལཱ་ཕྲངམ་འབད་ནི་ འདི་ཚུ་ཨིན།)

¹⁰ དེ་ལས་གཙོ་བོ་ལུ་ཐུགས་དགྱེས་པའི་སྤྱོད་ལམ་ངོ་མ་འདི་ ག་ཅི་ཨིན་ན་ འཚོལ་བལྟ་ཞིནམ་ལས་ འདི་ཚུ་ཧ་གོ་དགོ།

¹¹ གནག་དུང་དུ་ནང་འབད་མི་འབྲས་བུ་ངན་པའི་ལཱ་འདི་ཚུ་ནང་ བཅའ་མར་མ་གཏོགས་ དེ་བ་འདི་ ཨ་ནི་བཟུམ་གྱི་ལཱ་ཚུ་ ཕྱི་ཁར་འོད་ཟེར་ནང་བཏོན་དགོ།

¹² ག་ཅི་སྨོ་ཟེར་བ་ཅིན་ ཁོང་གིས་གསང་སྟེ་འབད་མི་ལཱ་ཚུ་གི་སྐོར་ལས་ སླབ་ནི་ཡང་ངོ་ཚཝ་མས།

¹³ དེ་འབདཝ་ད་ ག་ཅི་འབད་རུང་ གནག་དུང་དུ་ནང་ཨིན་མི་འདི་ཚུ་ ཕྱི་ཁར་བཏོན་པ་ཅིན་ འདི་ཚུ་འོད་ཟེར་ནང་གསལ་ཏོག་ཏོ་སྦེ་མཐོང་ཚུགས་འོང་།

¹⁴ ག་ཅི་སྨོ་ཟེར་བ་ཅིན་ ག་ར་མཐོང་ཚུགསཔ་བཟོ་མི་འདི་འོད་ཟེར་ཨིན་ དེ་འབདཝ་ལས་བརྟེན་ཏེ་ དེ་སྦེ་སླབ་ནི་འདུག གཉིད་ལོག་སྡོད་མི་ཁྱོད་ གཉིད་སད་དེ་ ཤི་ས་ལས་ཡར་ལོང་ཤོག་ ཁིརཱིས་ཀྱིས་ཁྱོད་ཀྱི་གུ་ལུ་འོད་ཤར་ནི་ཨིན།

¹⁵ འདི་གི་དོན་ལུ་ རྩ་རྒས་བཟུམ་སྦེ་མེན་པར་ ཤེས་རབ་ཅན་བཟུམ་སྦེ་འབད་དེ་ ཁིརཱིས་ཀྱི་ལམ་ནང་ག་དེ་སྦེ་འགྱོ་དགོཔ་ཨིན་ན་ ན་འཐན་སྦེ་བལྟ་སྟེ།

¹⁶ དུས་ཚོད་གཅིག་ཡང་འཕྲོ་བརླག་མ་གཏང་ ག་ཅི་སྨོ་ཟེར་བ་ཅིན་ ད་རེས་ནངས་པ་གི་དུས་ཚོད་འདི་ངན་པ་ཨིན་མས།

¹⁷ དེ་གིས་འབད་ ག་ནི་ཡང་མ་ཤེསཔ་བཟུམ་སྦེ་སྡོད་ནི་མེན་པར་ གཙོ་བོ་གི་ཐུགས་དགོངས་འདི་ག་ཅི་ཨིན་ན་ འདི་ཚུ་ཧ་གོ་སྟེ་སྡོད་དགོ།

¹⁸ ཆང་གིས་འགྲངས་ཏེ་མ་སྡོད་ དེ་གིས་ཁྱོད་ལུ་མེདཔ་རྐྱབས་འོང་ དེ་འབདཝ་ད་ ཐུགས་ཉིད་ཀྱིས་གང་སྟེ་སྡོད།

¹⁹ ཁྱེད་འཛོམས་པའི་དུས་ལུ་ གསུང་དང་མགུར་མ་ དེ་ལས་གཙང་མའི་གླུ་ཚུ་འཐེན་ཏེ་ཕུལ་ སེམས་ཀྱི་གཏིང་ལས་རང་གཙོ་བོ་ལུ་གླུ་དབྱངས་ཕུལ།

²⁰ དེ་ལས་རྟག་བུ་རང་ ག་ར་གི་དོན་ལུ་ ང་བཅས་རའི་གཙོ་བོ་ཡེ་ཤུ་ཁིརཱིས་ཀྱི་མཚན་ནང་ ཡབ་དཀོན་མཆོག་ལུ་བཀའ་དྲིན་ཆེ་ཟེར་ཞུ།།

རྨགཔ་དང་ཨམ་སྲུ་གི་སྐོར་ལས།

²¹ ཁྱེད་ཀྱིས་ཁིརཱིས་ལུ་གུས་ཞབས་ཞུ་མི་སེམས་ཀྱིས་ གཅིག་དང་གཅིག་གི་ཁ་ལུ་ཉན་སྡོད་དགོ།

²² ཨམ་སྲུ་ཚུ་གཙོ་བོ་གི་བཀའ་ལུ་ཉན་དོཝ་བཟུམ་ རང་གི་རྨགཔ་གི་ཁ་ལུ་ཡང་ཉན་སྡོད་དགོ།

²³ ག་ཅི་སྨོ་ཟེར་བ་ཅིན་ ཆོས་ཚོགས་ཁིརཱིས་ཀྱི་སྐུ་གཟུགས་ཨིནམ་ལས་ ཁིརཱིས་འདི་ཆོས་ཚོགས་ཀྱི་འགོ་དཔོན་དང་སྐྱབས་མགོན་ཡང་ཨིན་ དེ་ལས་འདི་བཟུམ་སྦེ་རང་ ཨམ་སྲུ་གི་འགོ་དཔོན་འདི་ མོ་རའི་རྨགཔ་ཨིན།

²⁴ འདི་གི་དོན་ལུ་ ཆོས་ཚོགས་ག་དེ་སྦེ་ཁིརཱིས་ཀྱི་ཕྱག་འོག་ལུ་སྡོད་ཡོདཔ་ཨིན་ན་ འདི་བཟུམ་སྦེ་རང་ ཨམ་སྲུ་ཚུ་ཡང་ག་ཅི་ནང་རང་འབད་རུང་ རང་གི་རྨགཔ་གི་ཁ་ལུ་ཉན་ཏེ་སྡོད་དགོ།

²⁵ རྨགཔ་ཚུ་གིས་ཡང་ ཁིརཱིས་ཀྱིས་ཆོས་ཚོགས་ཀྱི་དོན་ལུ་ ཁོ་རང་གི་ཚེ་སྲོག་གནང་སྟེ་བྱམས་པ་མཛད་དོཝ་བཟུམ་ རང་གི་ཨམ་སྲུ་ལུ་བྱམས་པ་འབད་དགོ།

²⁶ ཁིརཱིས་ཀྱིས་ཁོ་རའི་ཚེ་སྲོག་གནང་མི་དེ་ ཆུ་གིས་ཆུ་འཁྱུ་སྟེ་ཧིང་སངས་ས་བཟོ་དོཝ་བཟུམ་སྦེ་ ཁོ་གིས་བཀའ་གི་ཐོག་ལས་སྦེ་ ཆོས་ཚོགས་ལུ་གཙང་ཏོག་ཏོ་མཛད་གནང་ནིའི་དོན་ལུ་ཨིན།

²⁷ དེ་ལས་གཙང་ཏོག་ཏོ་མཛད་མི་དེ་ ཆོས་ཚོགས་གཙངམ་དང་སྐྱོན་ག་ནི་ཡང་མེད་པར་ ཁོང་གི་གུ་ལུ་ཐག་ཐིག་དང་གཉེར་མ་ གཞན་ག་ནི་ཡང་མ་ཆགསཔ་སྦེ་ གཟི་བརྗིད་ཅན་སྦེ་འགྱུར་ཏེ་ ཁོ་གི་སྐུ་མདུན་ལུ་འཁྱིད་འོང་ནིའི་དོན་ལུ་ཨིན།

²⁸ དེ་བཟུམ་སྦེ་རང་ རྨགཔ་ཚུ་གིས་ཡང་ རང་གི་ཨམ་སྲུ་ལུ་ རང་གི་གཟུགས་བཟུམ་སྦེ་མནོ་སྟེ་བྱམས་པ་འབད་དགོ་ རང་གི་ཨམ་སྲུ་ལུ་བྱམས་པ་འབད་མི་དེ་ མ་པ་རང་ལུ་ཡང་བྱམས་པ་འབདཝ་ཨིན།

²⁹ མི་ག་གིས་རང་འབད་རུང་ རང་གི་གཟུགས་ལུ་བལྟ་སྟེ་མ་དགའཝ་མི་འབད་ དེ་འབདཝ་ད་ ཁོ་གིས་རང་གི་གཟུགས་ལུ་གསོ་སྐྱོང་འབད་དེ་ བདག་འཛིན་འཐབ་འོང་ ཁིརཱིས་ཀྱིས་ཡང་ཆོས་ཚོགས་ལུ་ འདི་བཟུམ་སྦེ་རང་མཛདཔ་ཨིན།

³⁰ ག་ཅི་སྨོ་ཟེར་བ་ཅིན་ ང་བཅས་ཁོ་གི་སྐུ་གཟུགས་ཀྱི་ཡན་ལག་ཨིན།

³¹ དེ་འབདཝ་ལས་བརྟེན་ཏེ་ མི་གཅིག་གིས་ རང་གི་ཕམ་བཀོག་བཞག་ཞིནམ་ད་ རང་གི་ཨམ་སྲུ་དང་གཅིག་ཁར་བསྡོམས་ཏེ་སྡོདཔ་ཨིན་ དེ་ལས་ཁོང་གཉིས་ཆ་རང་གཟུགས་གཅིག་ལུ་འགྱུར་ཏེ་སྡོདཔ་ཨིན།

³² འདི་གི་ཁུངས་འདི་ཧ་གོ་ཚུགས་པ་ལ་ཁག་ཨིན་ ཨིན་རུང་ ང་གིས་ཁིརཱིས་དང་ཆོས་ཚོགས་ཀྱི་མཐུན་ལམ་གྱི་སྐོར་ལས་སླབ་དོ།

³³ ད་རུང་ ཁྱེད་རྨགཔ་ག་ར་འབད་རུང་ རང་གི་ཨམ་སྲུ་ལུ་ རང་ལུ་བཟུམ་སྦེ་བྱམས་པ་འབད་དགོ་ དེ་ལས་ཨམ་སྲུ་ཚུ་གིས་ཡང་ རང་གི་རྨགཔ་ལུ་གུས་ཞབས་འབད་དགོ།།