ཨི་ཕི་སིཔ་ལེའུ་ 4 - རྫོང་ཁ་

ཆོས་ཚོགས་གཟུགས་གཅིག་བཟུམ་སྦེ་ཨིན་པའི་སྐོར།

¹ དེ་འབདཝ་ལས་ དཀོན་མཆོག་གིས་ཁྱེད་ལུ་ག་ཅི་འབད་བཙག་འཐུ་གནང་གནངམ་ཨིན་ན་ འདི་ལུ་ཁྱེད་ཀྱིས་འོས་འབབ་ཡོདཔ་སྦེ་སྡོད་ཟེར་ ང་གཙོ་བོ་གི་དོན་ལུ་བཙོན་པ་གཅིག་གིས་ ཁྱེད་ལུ་གསོལཝ་བཏབ་ཨིན།

² དོན་ལས་རང་ ཁྱེད་སེམས་ཉམ་ཆུང་དང་ གཞི་འཇམ་ཏོག་ཏོ་ སུ་ཐག་རིངམོ་གི་སྤྱོད་ལམ་གཙོ་བོ་བསྟེན་ཏེ་ གཅིག་གིས་གཅིག་ལུ་ བཟོད་པ་བསྒོམས་ཏེ་བྱམས་པ་འབད་དགོ།

³ ཁྱེད་ག་ར་སེམས་གཅིག་སྦེ་མཐུན་པའི་ཐོག་ལས་ ཐུགས་ཉིད་ཀྱི་ནང་ན་མཐུན་ལམ་སྒྲིག་ནི་དེ་ བཀོག་མ་བཞག་པར་ རྩ་འགེངས་ཏེ་སྒྲིག་སྡོད་ཟེར་ང་གིས་ཞུ་ནི་ཨིན།

⁴ དཀོན་མཆོག་གིས་ཁྱེད་ལུ་ཁོ་རང་གི་མི་སྦེ་བཙག་འཐུ་གནང་སྟེ་ རེ་བ་གཅིག་ཐོབ་དོཝ་བཟུམ་སྦེ་ ང་བཅས་ག་ར་གཟུགས་གཅིག་བཟུམ་སྦེ་སོང་སྟེ་ ཐུགས་ཉིད་གཅིག་ཐོབ་ཨིནམ་མ་ཚད།

⁵ ང་བཅས་ག་ར་གི་གཙོ་བོ་འདི་གཅིག་དང་ དད་པ་གཅིག་ དེ་ལས་ཁྲུས་གསོལ་ཡང་གཅིག་ཨིན།

⁶ དཀོན་མཆོག་གཅིགཔ་འདི་ ང་བཅས་ག་ར་གི་ཡབ་ཡང་ཨིན་ ཁོ་ག་ར་ལས་མཐོ་ས་བཞུགསཔ་ཨིནམ་མ་ཚད་ ག་ར་གི་ཐོག་ལས་ཕྱག་ལཱ་མཛད་དེ་ ག་ར་གི་ནང་ན་བཞུགས་ཡོདཔ་ཨིན།

⁷ ཁིརཱིས་ཀྱིས་ཁོ་རའི་ཐུགས་འདོད་དང་བསྟུན་ཏེ་ ང་བཅས་རེ་རེ་ལུ་ཐུགས་རྗེ་གསོལ་རས་སྦེ་གནང་ནུག

⁸ འདི་གི་དོན་ལུ་ གསུང་རབ་ནང་དེ་སྦེ་གསུངས་ཏེ་འདུག ཁོ་ཡར་མཐོ་ས་ལུ་འབྱོནམ་ད་ བཟུང་སྟེ་བཞག་ཡོད་མི་ཚུ་ ཁོ་རང་དང་མཉམ་གཅིག་འཁྱིད་བྱོན་ཡི་ དེ་ལས་ཁོ་གིས་མི་ཚུ་ལུ་གསོལ་རས་གནང་ནུག

⁹ (ད་ཡར་མཐོ་ས་བྱོན་ཡི་ཟེར་བའི་དོན་དག་འདི་ག་ཅི་སྨོ་ འདི་གི་དོན་དག་འདི་ ཁོ་དང་པོ་མར་འཛམ་བུ་གླིང་ནང་ཡང་འབབ་བྱོན་ཡི།

¹⁰ མར་འབབ་བྱོན་མི་འདི་ ཡར་གནམ་ཁ་ག་ར་ལས་མཐོ་ས་བྱོན་མིའི་མི་ཡང་ཨིན་ དེ་སྦེ་ཡར་བྱོན་མིའི་དོན་དག་འདི་ ག་ར་ནང་གསོལ་རས་ལྟེམ་ལྟེ་སྦེ་བཀང་ནི་གི་དོན་ལུ་ཨིན།)

¹¹ ད་རུང་ཁིརཱིས་ཀྱིས་གནང་མི་གསོལ་རས་འདི་ཚུ་ ལ་ལུ་སྐུ་ཚབ་ ལ་ལུ་ལུང་སྟོན་པ་ ལ་ལུ་ཆོས་བཤད་མི་ ལ་ལུ་ལུག་རྫིཔ་ དེ་ལས་ལ་ལུ་སློབ་དཔོན་འདི་ཚུ་ཨིན།

¹² ག་ཅི་སྨོ་ཟེར་བ་ཅིན་ གཅིག་གིས་གཅིག་ལུ་ཆ་རོགས་འབད་དེ་ ང་བཅས་ཁིརཱིས་ཀྱི་སྐུ་གཟུགས་དེ་ཕན་ཐོགས་ཅན་འཐོན་ནི་གི་དོན་ལུ་ ཁོ་གིས་ང་བཅས་ལུ་ལྕོགས་གྲུབ་ཅན་སྦེ་མཛད་གནང་ཡི།

¹³ དེ་ལས་ང་བཅས་ག་ར་གིས་དད་པ་གཅིག་བསྐྱེད་དེ་ དཀོན་མཆོག་གི་སྲས་ཀྱི་སྐོར་ལས་ཤེས་ཡོན་ཐོབ་ད་ མནོ་བསམ་གཅིག་སྦེ་བཏང་སྟེ་ ཁིརཱིས་ཁོ་རང་བཟུམ་སྦེ་རང་ ལྷག་ཆད་ག་ནི་ཡང་མེད་པར་ ཚངམ་སྦེ་མ་བྱུང་ཚུན་ཚོད་ ཁོ་གསོལ་རས་གནང་སྟེ་རང་བཞུགས་འོང་།

¹⁴ དེ་འབདཝ་ལས་བརྟེན་ཏེ་ གཞན་ལུ་མགུ་བསྐོར་ནིའི་ཐབས་ལམ་བསྟོན་ཏེ་ ང་བཅས་ལུ་ཆོས་རྫུས་མ་སྟོན་རུང་རང་ ང་བཅས་ལོ་ན་མ་ཁུག་པའི་ཨ་ལོ་བཟུམ་སྦེ་ ཤིང་རླུང་གིས་ཕར་དང་ཚུར་གཡུག་མི་ཚུ་བཟུམ་སྦེ་འགྱོ།

¹⁵ གཅིག་གིས་གཅིག་ལུ་བརྩེ་བ་བསྐྱེད་པའི་ཐོག་ལས་ བདེན་པའི་བློ་སླབ་དགོ་ དེ་ལས་ཁིརཱིས་འདི་ཆོས་ཚོགས་ཀྱི་དབུ་ཁྲིད་འབདཝ་ལས་ ང་བཅས་ཡང་ཁིརཱིས་ག་ཨིནམ་བཟུམ་སྦེ་ ཡར་རྒྱས་འགྱོ་དགོ།

¹⁶ དེ་ལས་ང་བཅས་དད་པ་བསྐྱེད་མི་ཚུ་ ཁོ་གི་སྐུ་གཟུགས་བཟུམ་སྦེ་ཨིན་ གཟུགས་ཀྱི་ཚིགས་ཏོ་ཚུ་ག་ར་ཀྲིག་ཀྲི་སྦེ་མཐུད་དེ་ གཟུགས་ཀྱི་ཡན་ལག་རེ་རེ་གིས་ལཱ་ཀྲིག་ཀྲི་སྦེ་འབད་བ་ཅིན་ གཟུགས་ཡར་སྦོམ་འགྱོ་སྟེ་ སྒྲིང་སྒྲིང་སྦེ་སྡོད་འོང་ འདི་བཟུམ་སྦེ་ང་བཅས་དདཔ་ཅན་ཚུ་གིས་ གཅིག་གིས་གཅིག་ལུ་བྱམས་པ་འབད་བའི་ཐོག་ལས་ རང་རང་སོ་སོ་གི་འགན་ཁག་འབག་པ་ཅིན་ ང་བཅས་ཡང་ཁོ་གི་སྐུ་གཟུགས་སྦེ་ཡར་རྒྱས་འགྱོ་སྟེ་ སྒྲིང་སྒྲིང་སྦེ་སྡོད་འོང་།།

སེམས་ཡོངས་སུ་རྫོགསཔ་སྦེ་བསྐྱར་གསོ་འབད་དགོ་པའི་སྐོར།

¹⁷ འདི་གི་དོན་ལུ་ གཙོ་བོ་གི་མཚན་ནང་ ང་གིས་ཁྱེད་ལུ་རྣ་བ་སྐྱེལ་ཏེ་སླབ་དོ་ ད་འདི་ལས་ཕར་ཁྱེད་ལོག་སྟེ་ དཀོན་མཆོག་དང་གཞན་འབྲེལ་མེད་མི་ཚུ་བཟུམ་སྦེ་མ་འབད་ ཁོང་ཁུངས་མེད་པའི་མནོ་བསམ་དང་བསྟུན་ཏེ་ སྤྱོད་ལམ་ཟོགཔོ་བསྒྲིགས་ཏེ་སྡོདཔ་ཨིན།

¹⁸ ཁོང་གི་སེམས་སྲ་ཀྲག་ཨིནམ་མ་ཚད་ དཀོན་མཆོག་གིས་གནང་མི་ཚེ་གི་སྐོར་ལས་ཡོན་ཏན་མེད་མི་ཨིནམ་ལས་ གནག་དུང་དུ་ནང་གི་མནོ་བསམ་བཏང་སྟེ་ དཀོན་མཆོག་གི་ཚེ་གི་གྲལ་ཁར་མེད།

¹⁹ ཁོང་ལུ་ལེགས་ཤོམ་དང་ཟོགཔོ་གི་དབྱེ་བ་ཕྱེ་ནིའི་ཤེས་རབ་མིན་འདུག་ ཚད་ལས་བརྒལ་ཏེ་ ཁོང་གིས་སྤྱོད་ལམ་གཙང་ཏོག་ཏོ་མེན་མི་མ་འདྲཝ་ལེ་ཤ་ནང་ སེམས་བཙུགས་ཞིནམ་ད་ འདོད་ཆགས་ཀྱི་དབང་དུ་གཏང་སྟེ་སྡོདཔ་ཨིན།

²⁰ དེ་འབདཝ་ད་ ཁྱེད་ཀྱིས་ཁིརཱིས་ཀྱི་སྐོར་ལས་ཨ་ནི་བཟུམ་གྱི་སྦྱང་བ་འབད་འབདཝ་མེན།

²¹ ཡེ་ཤུ་ནང་ཡོད་མི་བདེན་པ་དང་བསྟུན་ཏེ་ ཁོ་གི་སྐོར་ལས་ཁྱེད་ཀྱིས་རྣ་བ་གོ་ཡོདཔ་མ་ཚད་ ཆོས་ཡང་ཧ་གོ་སྟེ་ཡོད་མེན་ན།

²² ཁྱེད་ཀྱིས་ཧ་གོ་མི་དེ་ ཧེ་མ་གི་རང་བཞིན་རྙིངམ་ སྡིག་པ་འབད་མི་འདི་ཚུ་ ཕར་བཀོ་བཞག་དགོ་ ཨ་ནི་སྡིག་པ་དེ་གིས་ རང་ལུ་མགུ་བསྐོར་བརྐྱབས་ཏེ་ རང་བཞིན་རྙིངམ་དེ་ལུ་མེདཔ་གཏང་གཏངམ་ཨིན་མས།

²³ དེ་སྦེ་མེན་པར་ རང་གི་སེམས་དེ་ ཡོངས་སུ་རྫོགསཔ་སྦེ་ བསྐྱར་གསོ་འབད་དེ།

²⁴ རང་བཞིན་འདི་གསརཔ་ལུ་བསྒྱུར་ཏེ་སྡོད་དགོ་ རང་བཞིན་གསརཔ་འདི་ དཀོན་མཆོག་གི་རང་བཞིན་བཟུམ་སྦེ་ དོན་ལས་རང་ ཁོ་རའི་ཐུགས་དང་ལྡན་པའི་ཕྲངམ་དང་ མ་གཙངམ་ག་ནི་ཡང་མེདཔ་སྦེ་མཛད་མཛདཔ་ཨིན།

²⁵ འདི་གི་དོན་ལུ། ཤོབ་རྐྱབ་ནི་ཚུ་སྤང་སྟེ་ ཁྱེད་རེ་རེ་གིས་རང་གི་ཁྱིམ་ཚང་ཚུ་ལུ་བདེན་པའི་གཏམ་སླབ། ག་ཅི་སྨོ་ཟེར་བ་ཅིན་ ང་བཅས་གཟུགས་གཅིག་གི་ཡན་ལག་འདི་ཚུ་ཨིན།

²⁶ ཁྱེད་རང་ཙིགཔ་ཟ་བ་ཁེ་མེད་ དེ་འབདཝ་ད་ དེ་གིས་འབད་དེ་སྡིག་པ་མ་འབད། ཙིགཔ་ཟ་བའི་དུས་ཚོད་ལུ་ ཉིམ་ལཱའི་རྒྱབ་མ་འཛུལ་བའི་ཧེ་མ་ལས་ ཁྱེད་ཀྱིས་ཙིགཔ་ཟ་ནི་དེ་ སེམས་ཁར་ལས་བརྗེདཔ་དགོ།

²⁷ དེ་ལས་ཕར་ བདུད་ སེ་ཏཱན་ལུ་གོ་སྐབས་མ་བྱིན།

²⁸ ཨརཝ་རྐུ་མི་ཚུ་གིས་ད་རུང་ཨརཝ་མ་རྐུ་ དེ་སྦེ་འབད་ནིའི་ཚབ་ལུ་ དཀའཝ་སྤྱད་དེ་ རང་གི་ལགཔ་གིས་ལཱ་ཕྲང་སྟེ་འབད་ དེ་ལས་མེད་མི་ཚུ་ལུ་ ཁོ་གིས་ཆ་རོགས་འབད་ཚུགས་འོང་།

²⁹ ཁྱེད་ཀྱི་ཁ་ལས་བློ་ཟོགཔོ་འཐོན་མ་བཅུག་ དེ་འབདཝ་ད་ ཁྱེད་ཀྱི་ཁ་ལས་འཐོན་མི་བློ་ཚུ་གིས་ རོགས་ལུ་ཕན་ཐོགས་བྱུང་བཅུག་ནི་མ་གཏོགས་ བློ་གཞན་མ་སླབ་ དེ་ལས་འདི་གིས་ ཉན་མི་ཚུ་ལུ་ཆ་རོགས་འབད་འོང་།

³⁰ དཀོན་མཆོག་གི་དམ་པའི་ཐུགས་ཉིད་ལུ་ཐུགས་ཕམ་མ་བཅུག་ ག་ཅི་སྨོ་ཟེར་བ་ཅིན་ ཐུགས་ཉིད་ལས་འབད་ ཁྱེད་ཐིའུ་བརྐྱབས་ཏེ་ ཉིནམ་མཐའན་མཇུག་ལུ་ དགོངས་ཡངས་གནང་ནི་དེ་ ཏན་ཏན་མཛད་ནུག

³¹ སེམས་ཁར་གྱི་མནོ་བསམ་གདུག་ཁིག་ཁི་ ཙིགཔ་ཟ་ནི་ ཁོང་ཁྲོ་ལང་ནི་ འཐབ་འཇག་ནི་ རོགས་ལུ་ངན་པ་སླབ་ནི་ སྤྱོད་ལམ་ངན་པ་མ་འདྲཝ་འདི་ཚུ་ག་ར་ ཁྱེད་ཀྱི་སེམས་ཁར་ལས་སྤང་།

³² འདི་གི་ཚབ་ལུ་ ཁྱེད་གཅིག་གིས་གཅིག་ལུ་སེམས་བཟངམ་ བརྩེ་བ་དང་ལྡནམ་སྦེ་འགྱུར་ཏེ་ གཅིག་གིས་གཅིག་ལུ་བཀའ་དྲིན་བསྐྱང་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཡང་ ཁིརཱིས་ཀྱི་ཐོག་ལས་སྦེ་ ཁྱེད་ལུ་བཀའ་དྲིན་བསྐྱང་གནང་ཡི།།