ཨི་ཕི་སིཔ་ལེའུ་ 3 - རྫོང་ཁ་

པའུལ་གྱིས་དཀོན་མཆོག་གི་གསང་ལམ་གྱི་སྐོར་ལས་ཆོས་བཤད་པའི་སྐོར།

¹ དེ་འབདཝ་ལས་ ཁིརཱིས་ཡེ་ཤུ་གི་ཐོག་ལས་སྦེ་ ཁྱེད་ ཕྱིའི་མི་རིགས་ཚུ་ལུ་ གཏམ་བཟང་བཤད་ནི་འདི་གིས་ ང་ པའུལ་བཙོན་པ་སྦེ་སྡོདཔ་ཨིན།

² ཁྱེད་ལུ་ཕན་ཐོག་པའི་དོན་ལུ་ དཀོན་མཆོག་གིས་ཁོ་རའི་ཐུགས་རྗེ་གི་སྐོར་ལས་ བཤད་དགོ་མི་ཕྱག་ལཱ་ ང་ལུ་གནང་ཡི་ཟེར་ཁྱེད་ཀྱིས་གོ་གོཝ་འོང་།

³ ང་གིས་གོང་ལས་དུམ་གྲ་ཅིག་ཁྱེད་ལུ་འབྲི་དོཝ་བཟུམ་སྦེ་ དཀོན་མཆོག་གིས་གསང་ལམ་ང་ལུ་དངོས་སུ་སྦེ་སྟོན་གནང་ཡི།

⁴ ཁྱེད་ཀྱིས་ཨ་ནི་ཡི་གུ་ལྷགཔ་ད་ ཁིརཱིས་ཀྱི་སྐོར་ལས་ཡོད་མི་གསང་ལམ་འདི་ ང་གིས་ག་ཅི་ཧ་གོ་ཡི་ག་ ཁྱེད་ཀྱིས་ཤེས་ཚུགས།

⁵ ཨ་ནི་གསང་ལམ་འདི་ ཁོ་རའི་དམ་པའི་སྐུ་ཚབ་དང་ལུང་སྟོན་པ་ཚུ་ལུ་ ཐུགས་ཉིད་ལས་རྒྱུད་དེ་ ད་རེས་ཀྱི་དུས་ལུ་སྟོན་གནང་དོཝ་བཟུམ་སྦེ་ ཧེ་མ་གི་མི་རབས་ཚུ་ལུ་དངོས་སུ་སྦེ་སྟོན་མ་གནང་པས།

⁶ གསང་ལམ་འདི་ག་ཅི་ཨིན་ན་ཟེར་བ་ཅིན་ ཁིརཱིས་ཡེ་ཤུ་གི་གཏམ་བཟང་གི་ཐོག་ལས་སྦེ་ ཁྱེད་ཕྱིའི་མི་རིགས་ཚུ་ ཡ་ཧུ་ད་པ་དང་གཅིག་ཁར་ དཀོན་མཆོག་ལས་ཤུལ་ནོར་ཐོབ་མི་ཚུ་དང་ ཁོ་གི་སྐུ་གཟུགས་གཅིག་ཨིན་མི་ཚུ་ དེ་ལས་ཁོ་གིས་ཁས་ལེན་བཞེས་མིའི་ཐོབ་ཐངས་ཚུ་ཡང་འདྲན་འདྲ་སྦེ་མཛད་གནང་ནུག

⁷ དཀོན་མཆོག་གི་དབང་གིས་འབད་དེ་ ཁོ་རའི་ཐུགས་རྗེ་དེ་ ང་ལུ་གསོལ་རས་སྦེ་གནངམ་ལས་བརྟེན་ཏེ་ ང་གཏམ་བཟང་གི་ཞབས་ཕྱིཔ་གཅིག་སྦེ་བྱུང་ཡི།

^8-9 དཀོན་མཆོག་གི་མི་ག་ར་གི་གྲལ་ཁ་ལས་ ང་ཆུང་ཤོས་གཅིག་འབད་རུང་ ཕྱིའི་མི་རིགས་ཚུ་ལུ་ ཁིརཱིས་ཀྱི་སྐོར་ལས་ཡ་མཚན་ཆེན་བའི་ལོ་རྒྱུས་ཚུ་ བཤད་ནི་གི་དོན་ལུ་མ་ཚད་པར་ ག་ར་མཛད་མི་དཀོན་མཆོག་གིས་ ལོ་མང་རབས་ཀྱི་ཧེ་མ་ལས་གསང་བཞག་མི་འཆར་གཞི་འདི་ མི་ག་ར་ལུ་གསལ་ཏོག་ཏོ་སྦེ་སྟོན་ནི་གི་དོན་ལུ་ ཨ་ནི་ཐུགས་རྗེ་དེ་ང་ལུ་གནང་ཡི།

¹⁰ འདི་གི་དམིགས་ཡུལ་འདི་ ཆོས་ཚོགས་ཀྱི་ཐོག་ལས་སྦེ་ དཀོན་མཆོག་གི་མཁྱེན་རབ་མ་འདྲཝ་མ་འདྲཝ་འདི་ཚུ་ བདུད་དང་བཙན་ག་ར་ དེ་ལས་གནམ་ཁ་གི་དབང་འཛིན་ཚུ་ལུ་ ད་ལྟོ་ཤེས་བཅུག་ནི་གི་དོན་ལུ་ཨིན།

¹¹ ད་ཧེ་མ་ཁོ་རའི་ཐུགས་བསམ་དང་བསྟུན་མི་ དུས་མཐའ་མེད་པའི་འཆར་གཞི་འདི་ དཀོན་མཆོག་གིས་ང་བཅས་རའི་གཙོ་བོ་ཁིརཱིས་ཡེ་ཤུ་ལས་རྒྱུད་དེ་མཛད་མཛདཔ་ཨིན།

¹² ད་ང་བཅས་ཀྱིས་ཁིརཱིས་ལུ་དད་པ་བསྐྱེད་པའི་ཐོག་ལས་སྦེ་ དཀོན་མཆོག་གི་གཟིགས་སར་མ་འདྲོག་པར་ བློ་ཁོག་སྦོམ་སྦེ་འགྱོ་ཚུགསཔ་ཨིན།

¹³ དེ་འབདཝ་ལས་ ང་གིས་ཁྱེད་ལུ་སླབ་ཨིན་ ང་ཁྱེད་ཀྱི་དོན་ལུ་སྡུག་བསྔལ་མྱོང་སྟེ་ཡོད་རུང་ ཁྱེད་སེམས་མ་ཕམ་ ག་ཅི་སྨོ་ཟེར་བ་ཅིན་ ང་གི་མྱོང་མི་སྡུག་བསྔལ་ཚུ་ ཁྱེད་ཀྱི་དོན་ལུ་ལེགས་ཤོམ་ཨིན།།

ཨི་ཕི་སིཔ་ཚུ་གི་དོན་ལུ་སྨོན་ལམ་ཞུ་བའི་སྐོར།

^14-15 གནམ་དང་ས་ཁར་ཡོད་མི་ ཡབ་དཀོན་མཆོག་གི་བཟའ་ཚན་ག་ར་གིས་ ཁོ་གི་ངོ་རྟགས་ཐོབ་སྟེ་ཡོད་ ཁོ་གི་སྐུ་མདུན་ལུ་ང་པུས་མོ་བཙུག་སྟེ་ སྨོན་ལམ་ཞུ་མི་དོན་དག་དེ་ཨ་ནི་ཨིན།

¹⁶ ཁོ་གི་ཚད་མེད་པའི་གཟི་བརྗིད་ཀྱི་ཐོག་ལས་ ཁོ་གི་ཐུགས་ཉིད་ཀྱིས་ ཁྱེད་ཀྱི་སེམས་ཉིད་སྒྲིང་སྒྲིང་བཟོ་ནི་གི་དབང་གནང་བཅུག

¹⁷ དེ་ལས་དེ་གིས་འབད་དེ་ དད་པའི་ཐོག་ལས་ ཁིརཱིས་ཁྱེད་ཀྱི་སེམས་ནང་བཞུགས་བཅུག་ དེ་མ་ཚད་ བྱམས་པ་དེ་ ཁྱེད་ཀྱི་སེམས་ནང་ ཤིང་གི་རྩ་བ་དང་ཁྱིམ་གྱི་རྩིགཔ་འགྱམ་བཟུམ་སྦེ་བསྐྱེད་དེ།

¹⁸ དཀོན་མཆོག་ཁོ་རའི་དམ་པའི་མི་ཚུ་དང་མཉམ་གཅིག་ ཁྱེད་ཀྱིས་ཁིརཱིས་ཀྱི་བྱམས་པ་འདི་ ཕར་དང་ཚུར་རྒྱ་སྦོམ་ཆུང་ག་དེམ་ཅིག་ཡོདཔ་ཨིན་ན་ ཡར་དང་མར་གྱི་རིང་ཐུང་དང་ གཏིང་ཟབ་དེ་ག་དེམ་ཅིག་ཡོདཔ་ཨིན་ན་ ཧིང་སངས་ས་ཤེས་ཏེ།

¹⁹ བདའ་ཟུན་མ་ཚུགས་མི་ ཁིརཱིས་ཀྱི་བྱམས་པ་སྦོམ་འདི་ ཁྱེད་ཀྱིས་ཧ་གོ་ཚུགས་ཏེ་ དཀོན་མཆོག་ཁོ་རང་གི་རང་བཞིན་དེ་གིས་ ཁྱེད་ཀྱི་ནང་གང་བཅུག

²⁰ ད་དཀོན་མཆོག་གིས་ ང་བཅས་ཀྱི་ནང་ན་ ཁོ་རའི་དབང་ལས་རྒྱུད་དེ་ ང་བཅས་ཀྱིས་ཞུ་མི་དང་མནོ་མི་ལས་ཡང་ཐེབས་སྦེ་མཛད་ཚུགསཔ་ཨིན།

²¹ དེ་གིས་འབད་ དུས་རྟག་བུ་རང་ མི་བརྒྱུད་ལས་མི་བརྒྱུད་ཚུན་ཚོད་རང་ ཆོས་ཚོགས་དང་ཁིརཱིས་ཡེ་ཤུ་ལས་རྒྱུད་དེ་ དཀོན་མཆོག་གི་མཚན་ཡར་ཡར་སྙན་གྲགས་ཅན་སྦེ་འགྱོ་བཅུག་ ཨ་མཱེན།།