ཨི་ཕི་སིཔ་ལེའུ་ 2 - རྫོང་ཁ་

ཐུགས་རྗེ་གི་ཐོག་ལས་སྐྱབས་མཛད་པའི་སྐོར།

¹ དེ་ལས་ཧེ་མ་ཁྱེད་ སྡིག་པ་འབད་མི་ཚུ་དང་ ཚུལ་ཁྲིམས་ལས་བརྒལ་མི་ཚུ་ཨིནམ་ལས་ ཁྱེད་ལུ་ཤི་སོང་མི་ཚུ་སྦེ་བརྩིས་གནང་ཡི།

² ཧེ་མ་ཁྱེད་ཀྱིས་ དུས་ངན་པ་དེ་གི་ལུགས་སྲོལ་འབད་དེ་སྡོདཔ་ད་ ཁྱེད་གནམ་ཁ་ལུ་སྡོད་མི་འདྲེ་ཚུ་གི་འགོ་དཔོན་གྱི་འོག་ལུ་སྡོད་ནུག་ ཨ་ནི་འདྲེ་དེ་གིས་ད་ལྟོ་ཡང་ དཀོན་མཆོག་གི་བཀའ་ལུ་ མ་ཉན་མི་ཚུ་གི་སེམས་ཁར་ལཱ་འབད་དེ་སྡོདཔ་ཨིན།

³ ང་བཅས་ཡང་ ཧེ་མ་ཁོང་བཀའ་ལུ་མ་ཉན་མི་ཚུ་དང་གཅིག་ཁར་ལཱ་ངན་པ་འབད་དེ་ ང་བཅས་རའི་འདོད་པ་ལྟར་དུ་འབད་དེ་ ལུས་དང་སེམས་ཀྱི་མནོ་བསམ་གྱི་འདོད་པའི་དབང་དུ་གཏང་ དེ་ལས་ཁོང་གཞན་ཚུ་བཟུམ་སྦེ་རང་ ཆདཔ་ཕོག་མི་ཚུ་གི་གྲལ་ཁར་ལུ་སྡོད་ཅི།

⁴ ཨིན་རུང་ དཀོན་མཆོག་ཚད་མེད་པའི་སྙིང་རྗེ་ཅན་ཨིནམ་ལས་ ཁོ་གིས་ང་བཅས་ལུ་བྱམས་པ་གནམ་མེད་ས་མེད་མཛད་ནུག

⁵ ང་བཅས་ཀྱིས་སྡིག་པ་འབད་དེ་ ཤི་སོང་མི་སྦེ་བརྩིས་ཏེ་འབད་རུང་ ཁོ་གིས་ང་བཅས་ལུ་ཁིརཱིས་དང་མཉམ་གསོན་པོ་སྦེ་བརྩིས་གནང་ཡི་ དེ་ལས་བཅུད་བསྡུ་སྟེ་སླབ་པ་ཅིན་ ཁོ་གི་ཐུགས་རྗེ་གིས་ ཁྱེད་ལུ་སྐྱབས་མཛད་དེ་ཡོད།

⁶ ཁིརཱིས་གཤགས་ས་ལས་གསོན་པོ་སྦེ་བཞེངས་གནངམ་ད་ ང་བཅས་ལུ་ཡང་ཁོ་དང་གཅིག་ཁར་ལྷོང་གནང་ནུག་ དེ་ལས་ཁིརཱིས་ཡེ་ཤུ་ལས་རྒྱུད་དེ་ ང་བཅས་ལུ་དབང་ཚད་གནང་སྟེ་ ཞིང་ཁམས་ལུ་ཁོ་དང་མཉམ་གཅིག་སྡོད་བཅུག་ཅི།

⁷ དེ་སྦེ་འབད་མི་དེ་ ཁིརཱིས་ཡེ་ཤུ་གི་ཐོག་ལས་ང་བཅས་ཀྱི་བཀའ་དྲིན་བསམ་སྟེ་ ཁོ་གིས་ཁོ་རའི་ཐུགས་རྗེ་འདི་ ག་ཅི་དེས་ཅིག་སྦོམ་ཨིན་ན་ མ་འོངས་པའི་དུས་རབས་ལུ་སྟོན་གནང་ནི་གི་དོན་ལུ་ཨིན།

⁸ ག་ཅི་སྨོ་ཟེར་བ་ཅིན་ ཁྱེད་ཀྱིས་དད་པ་བསྐྱེདཔ་ལས་བརྟེན་ཏེ་ ཁོ་གི་ཐུགས་རྗེ་གི་ཐོག་ལས་ ཁྱེད་ལུ་སྐྱབས་མཛད་ཅི་ འདི་ཁྱེད་རང་གིས་འབད་དེ་ཐོབ་ཐོབ་མེན་ ཐར་བ་དེ་དཀོན་མཆོག་གི་གསོལ་རས་ཨིན།

⁹ ལཱ་བཟང་པོ་འབད་དེ་གིས་ཡང་ཐོབ་ཐོབ་མེན་ ལཱ་འབད་དེ་ཐོབ་ཐོབ་འབད་བ་ཅིན་ མི་གིས་ རང་བསྟོད་རྐྱབས་འོང་།

¹⁰ དེ་འབདཝ་ད་ དཀོན་མཆོག་གི་ཕྱག་གིས་མཛད་དེ་ ང་བཅས་ཁོ་གི་ཕྱག་བཟོ་ཨིན་ དེ་ལས་ཁིརཱིས་ཡེ་ཤུ་གི་ཐོག་ལས་ དཀོན་མཆོག་གིས་ཧེ་མ་ལས་རང་ གྲ་སྒྲིག་མཛད་གནང་མིའི་ ལཱ་བཟང་པོ་འདི་འབད་བཅུག་ནི་སྦེ་ ང་བཅས་ལུ་མཛད་གནང་ཡི།།

ཡ་ཧུ་ད་པ་དང་ཕྱིའི་མི་རིགས་ཚུ་དཀོན་མཆོག་གིས་བཟའ་ཚན་གཅིག་སྦེ་མཛད་པའི་སྐོར།

¹¹ ཁོང་ ཡ་ཧུ་ད་པ་ཚུ་གིས་ཁྱེད་ལུ་ ཡ་ཧུ་ད་པའི་རྟགས་མ་སྐྱེལ་མི་ཚུ་རིགས་མ་གཙངམ་ཨིན་ཟེར་སླབ་ཨིན་མས་ ཁོང་གིས་འབད་བ་ཅིན་ གཟུགས་ཁར་རྟགས་སྐྱེལཝ་ཙམ་གྱིས་ གཟུགས་གཙངམ་ཨིན་ཟེར་མནོཝ་ཨིན་མས་ ཨིན་ཏེ་འབད་རུང་ ཨ་ནི་རྟགས་འདི་ ཕྱི་ཁར་ལུ་བཏོན་ནི་རྐྱངམ་གཅིག་ལས་བརྒལ་མེད་ དེ་འབདཝ་ལས་ ང་གིས་ཁྱེད་ཧེ་མ་ཕྱིའི་མི་རིགས་ཨིན་མི་ཚུ་ལུ་ དྲན་བསྐུལ་གཅིག་ཞུ་དགོ་མནོ་ཡི།

¹² ཧེ་མ་གི་དུས་ལུ་ ཁྱེད་ཁིརཱིས་དང་གཅིག་ཁར་འབྲེལ་བ་མེད་མི་དང་ ཨཱིས་ར་ཨཱེལ་གྱི་མི་ཁུངས་ཀྱི་གྲལ་ཁར་མེད་མི་ དཀོན་མཆོག་གིས་ཁས་ལེན་བཞེས་མི་ཞལ་འཆེས་ཐོབ་མི་གྲལ་ཁར་མེད་མི་ དེ་ལས་འཇིག་རྟེན་ནང་ལུ་རེ་བ་དང་དཀོན་མཆོག་མེད་མི་སྦེ་སྡོད་སྡོདཔ་ཨིན།

¹³ ཨིན་རུང་ ཁྱེད་ད་ལྟོ་ཁིརཱིས་ཡེ་ཤུ་གི་ནང་ན་ཨིན་ མ་གཞི་ ཁྱེད་ཧེ་མ་དཀོན་མཆོག་ལས་ཐག་རིང་ས་སྡོད་རུང་ ཁིརཱིས་ཀྱི་སྐུ་ཁྲག་གིས་འབད་ ད་ལྟོ་ཁོ་གི་སྦོ་ལོགས་ཁར་སྐྱེལ་གནང་སྟེ་ཡོད།

¹⁴ ཧེ་མ་ང་བཅས་ ཡ་ཧུ་ད་པ་དང་ཕྱིའི་མི་རིགས་ཚུ་གི་སྦུག་ལུ་ མ་འཆམ་བཟོ་མི་དེ་ལུ་རྩ་མེད་གཏང་སྟེ་ ཁིརཱིས་ཁོ་རང་གི་སྐུ་གཟུགས་ཀྱིས་ང་བཅས་གཉིས་ཆ་རང་ལུ་གཅིག་སྦེ་མཛད་གནང་ཡི་ ག་ཅི་སྨོ་ཟེར་བ་ཅིན་ ང་བཅས་ཀྱི་མཐུན་ལམ་འདི་ཁོ་རྐྱངམ་གཅིག་ཨིན།

¹⁵ ཡ་ཧུ་ད་པ་ཚུ་གི་བཀའ་ཁྲིམས་འདི་ཆ་མེད་བཏང་སྟེ་ ང་བཅས་མི་རིགས་གཉིས་ཀྱི་གྲལ་ཁ་ལས་ ཁོ་གི་ནང་ན་ལུ་ མི་རིགས་གསརཔ་གཅིག་སྦེ་མཛད་དེ་ མཐུན་ཏོག་ཏོ་མཛད་གནང་ནུག

¹⁶ ཁིརཱིས་ཀྱིས་ཁྲམ་ཤིང་གུ་གཤགས་པའི་ཐོག་ལས་སྦེ་ ང་བཅས་ ཡ་ཧུ་ད་པ་དང་ཕྱིའི་མི་རིགས་ཚུ་གི་སྦུག་ལུ་ མ་འཆམ་ཡོད་མི་དེ་མེདཔ་གཏང་ཡི་ དེ་ལས་ ཡ་ཧུ་ད་པ་དང་ཕྱིའི་མི་རིགས་ཚུ་ མི་རིགས་གཅིག་སྦེ་མཐུན་ལམ་མཛད་དེ་ དཀོན་མཆོག་དང་ང་བཅས་གཉིས་ཆ་རང་གི་བར་ན་ཡང་ མཐུན་ལམ་མཛད་གནང་ཡི།

¹⁷ དེ་ལས་ཁོ་བྱོན་ཏེ་ ཁྱེད་ཁོ་ལས་ཐག་རིང་ས་སྡོད་མི་ཚུ་དང་ ང་བཅས་ཁོ་གི་སྦོ་ལོགས་ཁར་ཡོད་མི་ཚུ་ལུ་ མཐུན་ལམ་གྱི་གཏམ་བཟང་འདི་བཤད་གནང་ཡི།

¹⁸ ཁོ་ལས་རྒྱུད་དེ་ ང་བཅས་ ཡ་ཧུ་ད་པ་དང་ཕྱིའི་མི་རིགས་ཚུ་ལུ་ ཐུགས་ཉིད་གཅིག་གི་ནང་ལས་སྦེ་ ཡབ་དཀོན་མཆོག་གི་སྐུ་མདུན་ལུ་འགྱོ་ཚུགསཔ་མཛད་གནང་ཡི།

¹⁹ ད་ཁྱེད་ཕྱི་ཁར་ལས་འོང་མིའི་མི་དང་ ནམ་ཡང་ངོ་མ་ཤེས་མིའི་མི་མེན་ དེ་འབདཝ་ད་ ཁྱེད་དཀོན་མཆོག་གི་བཟའ་ཚང་ཨིནམ་མ་ཚད་ ཁྱེད་ཀྱི་མི་ཁུངས་ཡང་ དཀོན་མཆོག་ཁོ་རའི་དམ་པའི་མི་དང་གཅིག་ཁར་ཡོདཔ་ཨིན།

²⁰ ཁྱེད་ཆ་ཁྱབ་ སྐུ་ཚབ་ཚུ་དང་ལུང་སྟོན་པ་ཚུ་གི་རྩིགཔ་འགྱམ་གྱི་ཐོག་ཁར་བཟོ་ཡོད་པའི་དཀོན་མཆོག་གི་བཞུགས་ཁང་ཨིན་ འདི་བཞུགས་ཁང་གི་ཟུར་རྡོ་ཁག་ཆེ་ཏོག་ཏོ་དེ་ཁིརཱིས་ཡེ་ཤུ་ཁོ་རང་ཨིན།

²¹ དེ་གིས་འབད་ བཞུགས་ཁང་ག་ར་ཁིརཱིས་ལས་བརྟེན་ཏེ་ རྡོ་གུ་རྡོ་བརྩེགས་ཏེ་ ང་བཅས་ཡར་ཡར་གཙོ་བོ་ནང་ དམ་པའི་མཆོད་ཁང་བཟུམ་སྦེ་འགྱོཝ་ཨིན།

²² ཁིརཱིས་ལས་བརྟེན་ཏེ་ དཀོན་མཆོག་ཁོ་རའི་ཐུགས་ཉིད་བཞུགས་ནི་གི་དོན་ལུ་ ཁྱེད་ཡང་ང་བཅས་དང་གཅིག་ཁར་ བཞུགས་ཁང་གཅིག་སྦེ་མཛད་པའི་བསྒང་ཡོད།།