ཨི་ཕི་སིཔ་ལེའུ་ 1 - རྫོང་ཁ་

པའུལ་གྱིས་བཀྲ་ཤིས་བདེ་ལེགས་ཞུ་བའི་སྐོར།

¹ དཀོན་མཆོག་གི་ཐུགས་དགོངས་ལས་སྦེ་ ཁིརཱིས་ཡེ་ཤུ་གི་སྐུ་ཚབ་ཨིན་མི་ ང་ པའུལ་གྱིས་ ཁྲོམ་ ཨི་ཕི་སི་ནང་ཡོད་མི་དཀོན་མཆོག་ཁོ་རའི་དམ་པའི་མི་ཚུ་ ཁིརཱིས་ཡེ་ཤུ་ལུ་དདཔ་སྒྲིང་སྒྲིང་བསྐྱེད་མི་ཚུ་ལུ་ ཡི་གུ་འདི་འབྲི་དོ།

² ང་བཅས་ཀྱི་ཡབ་དཀོན་མཆོག་དང་གཙོ་བོ་ཡེ་ཤུ་ཁིརཱིས་ཀྱིས་ ཁྱེད་ཆ་ཁྱབ་ལུ་ཐུགས་རྗེ་དང་ཞི་བདེ་གནང་བཅུག།

ཞིང་ཁམས་ལས་བྱུང་མི་བྱིན་རླབས་ཀྱི་སྐོར།

³ ང་བཅས་རའི་གཙོ་བོ་ཡེ་ཤུ་ཁིརཱིས་ཀྱི་ཡབ་དཀོན་མཆོག་ལུ་བསྟོད་པ་ཕུལ་བར་ཤོག་ ཁོ་གིས་ང་བཅས་ལུ་ཁིརཱིས་ལས་རྒྱུད་དེ་ ཞིང་ཁམས་ལས་བྱུང་མི་སེམས་ཉིད་ཀྱི་བྱིན་རླབས་ག་ར་གནང་ཡི།

⁴ དེ་གིས་འབད་ དཀོན་མཆོག་གིས་ང་བཅས་ལུ་ ཁོ་རའི་གཟིགས་ས་ལུ་གཙངམ་དང་སྐྱོན་ག་ནི་ཡང་མེདཔ་སྦེ་བཞག་ནིའི་དོན་ལུ་ འཛམ་བུ་གླིང་མ་མཛད་པའི་ཧེ་མ་ལས་ ཁིརཱིས་ལས་རྒྱུད་དེ་ ང་བཅས་ལུ་བཙག་འཐུ་མཛད་གནང་ཡི།

⁵ དཀོན་མཆོག་གིས་ང་བཅས་ལུ་བྱམས་པ་མཛད་ནི་འདི་གིས་ ཡེ་ཤུ་ཁིརཱིས་ཀྱི་ཐོག་ལས་སྦེ་ ང་བཅས་ལུ་ཁོ་རའི་བཟའ་ཚང་ནང་ བུ་ཚབ་སྦེ་བཅའ་མར་གཏོགས་བཅུག་ནིའི་དོན་ལུ་ ཁོ་རའི་ཐུགས་དགོངས་དང་འཁྲིལ་ཏེ་ ཧེ་མ་ལས་རང་འཆར་གཞི་མཛད་གནང་ནུག

⁶ དེ་གིས་འབད་ ཁོ་གི་གཟི་བརྗིད་ཅན་དང་ལྡན་པའི་ཐུགས་རྗེ་གི་དོན་ལུ་བསྟོད་པ་ཕུལ་བར་ཤོག་ ག་ཅི་སྨོ་ཟེར་བ་ཅིན་ ཁོ་གི་བྱམས་པའི་སྲས་ལས་སྦེ་ ང་བཅས་ལུ་སྐྱིད་སྡུག་གནང་ཡི།

⁷ དཀོན་མཆོག་གི་ཐུགས་རྗེ་རྫོགས་ནི་མེདཔ་དེ་གིས་ ཁིརཱིས་ལས་རྒྱུད་དེ་ ཁོ་གི་སྐུ་ཁྲག་གི་སྒོ་ལས་འབད་དགོངས་ཡངས་གནང་སྟེ་ ང་བཅས་ཀྱི་སྡིག་པ་བཀའ་དྲིན་བསྐྱང་གནང་ཡི།

⁸ ད་རུང་རྫོགས་ནི་མེད་པའི་ཐུགས་རྗེ་འདི་གིས་ དཀོན་མཆོག་གིས་ང་བཅས་ལུ་རིག་པ་དང་ཤེས་རབ་ གཏོང་ཕོད་ཆེན་པོའི་སྒོ་ལས་གནངམ་ད།

⁹ ཧེ་མ་ཁོ་རའི་ཐུགས་དགྱེས་པའི་ཐུགས་དགོངས་དང་བསྟུན་ཏེ་ གསང་བཞག་མི་དམིགས་ཡུལ་འདི་ ཁིརཱིས་ཀྱི་སྐོར་ལས་ ང་བཅས་ལུ་ཤེས་བཅུག་ནུག

¹⁰ དམིགས་ཡུལ་དེ་དང་མཐུན་ཏེ་ དུས་ཚོད་ཀྲིག་ཀྲི་སྦེ་རན་པའི་བསྒང་ལས་ ཞིང་ཁམས་ནང་ལུ་ཡོད་མི་ཚུ་དང་ འཇིག་རྟེན་ནང་ཡོད་མི་ཚུ་ག་ར་ ཁིརཱིས་ཀྱི་ཕྱག་འོག་ལུ་བཞག་གནང་ནི་ཨིན།

¹¹ དེ་བཟུམ་སྦེ་རང་ ཁིརཱིས་ལས་རྒྱུད་དེ་ ང་བཅས་ཀྱིས་ཤུལ་ནོར་གྱི་བགོ་བཤའ་ཐོབ་ཅི་ ག་ཅི་སྨོ་ཟེར་བ་ཅིན་ དཀོན་མཆོག་གིས་ག་ཅི་རང་མཛད་རུང་ ཁོ་རའི་ཐུགས་དགོངས་དང་བསྟུན་ཏེ་ ཁོ་རའི་དམིགས་ཡུལ་སྒྲུབ་ནི་སྦེ་ འཆར་གཞི་འགོ་དང་པ་ལས་རང་མཛད་གནང་ནུག

¹² དེ་གིས་འབད་ ང་བཅས་ཁིརཱིས་ནང་འགོ་དང་པ་ལས་བློ་གཏད་མི་ཚུ་གི་རྒྱུད་ལས་ དཀོན་མཆོག་གི་མཚན་ཡར་ཡར་སྙན་གྲགས་འགྱོ་སྟེ་ ཁོ་ལུ་བསྟོད་པ་ཕུལ་ནི་ཨིན།

¹³ དེ་ལས་ཁྱེད་ཀྱིས་ཡང་ སྐྱབས་མཛད་པའི་གཏམ་བཟང་ བདེན་པའི་བློ་འདི་གོཝ་ད་ ཁོ་ལུ་དད་པ་བསྐྱེད་དེ་ ཁྱེད་དཀོན་མཆོག་གི་མི་ཨིན་ཟེར་ཁུངས་སྐྱལ་བའི་དོན་ལུ་ དཀོན་མཆོག་གིས་ཐིའུ་བརྐྱབས་གནང་སྟེ་ ཁས་ལེན་བཞེས་ཡོད་མི་དམ་པའི་ཐུགས་ཉིད་ཁྱེད་ལུ་གནང་ཡི།

¹⁴ ང་བཅས་ཁོ་རའི་མི་ཚུ་གིས་ཤུལ་ནོར་གྱི་བགོ་བཤའ་མ་ཐོབ་ཚུན་ཚོད་ཀྱི་ བར་ན་གི་རྒྱབ་མི་འདི་དམ་པའི་ཐུགས་ཉིད་ཨིན་ འདི་ག་ར་དཀོན་མཆོག་གི་མཚན་ཡར་ཡར་སྙན་གྲགས་འགྱོ་སྟེ་ ཁོ་ལུ་བསྟོད་པ་ཕུལ་ནི་གི་དོན་ལུ་ཨིན།།

པའུལ་གྱིས་ ཨི་ཕི་སིཔ་ཚུ་གི་དོན་ལུ་སྨོན་ལམ་བཏབ་པའི་སྐོར།

¹⁵ འདི་གི་དོན་ལས་སྦེ་ ཁྱེད་ཀྱིས་ཡེ་ཤུ་ཁིརཱིས་ལུ་དད་པ་སྒྲིང་སྒྲིང་བསྐྱེད་མི་དང་ དཀོན་མཆོག་ཁོ་རའི་དམ་པའི་མི་ཚུ་ལུ་ཁྱེད་ཀྱིས་ བྱམས་པ་འབད་བའི་སྐོར་ལས་གོཝ་ད།

¹⁶ ང་གིས་ཁྱེད་ཆ་ཁྱབ་ཀྱི་དོན་ལུ་སྨོན་ལམ་བཏབ་སྟེ་ བཀའ་དྲིན་ཆེ་ཟེར་ཞུ་སྟེ་རང་ཡོད།

¹⁷ ངེ་གི་སྨོན་ལམ་ནང་ ང་བཅས་རའི་གཙོ་བོ་ཡེ་ཤུ་ཁིརཱིས་ཀྱི་དཀོན་མཆོག་གི་ གཟི་བརྗིད་དང་ལྡན་པའི་ཡབ་ ངོ་ཤེས་ཚུགས་པའི་དོན་ལུ་ ཁྱེད་ཆ་ཁྱབ་ལུ་ཤེས་རབ་དང་ཤེསཔ་མཐོངམ་གི་རིག་པ་གནང་ཟེར་ཞུཝ་ཨིན།

^18-19 འདི་གིས་མ་ཚད་པར་ དཀོན་མཆོག་གིས་ང་བཅས་ལུ་ འབོ་མི་གི་རེ་བ་འདི་ ག་ཅི་ཨིན་ན་ དེ་ལས་ཁོ་གིས་ ཁོ་རའི་དམ་པའི་མི་ཚུ་ལུ་ ཁས་ལེན་བཞེས་མི་ཤུལ་བཞག་གི་བགོ་བཤའ་འདི་ ག་ཅི་དེས་ཅིག་གཟི་བརྗིད་ཆེ་ཏོག་ཏོ་ཨིན་ན་ དེ་ལས་ཁོ་གི་ཚད་མེད་པའི་དབང་དེ་ ང་བཅས་དད་པ་བསྐྱེད་མི་ཚུ་གི་སྦུག་ལུ་ལཱ་འབད་དེ་ ག་ཅི་དེས་ཅིག་སྟོབས་ཤུགས་ཅན་ཨིན་ན་ འདི་ཚུ་ ཁྱེད་ཀྱིས་གསལ་ཏོག་ཏོ་སྦེ་ཤེས་བཅུག་ནིའི་སྨོན་ལམ་ཞུཝ་ཨིན།།

དཀོན་མཆོག་གི་ཚད་མེད་པའི་དབང་གི་སྐོར།

²⁰ ཁོ་རའི་དབང་དེ་གིས་ ཁིརཱིས་ལུ་གཤགས་ས་ལས་ལོག་སྐུ་གསོན་པོ་སྦེ་བཞེངས་གནང་སྟེ་ ཞིང་ཁམས་ལུ་དཀོན་མཆོག་གི་ཕྱག་གཡས་ཁ་ཐུག་ལུ་བཞུགས་བཅུག་ནུག

²¹ ཁིརཱིས་འདི་དཀོན་མཆོག་གི་ཕྱག་གཡས་ཁ་ཐུག་བཞུགསཔ་ད་ ད་ལྟོ་གི་དུས་ལུ་ཨིན་རུང་ མ་འོངས་པའི་དུས་ལུ་ཨིན་རུང་ ཁིརཱིས་འདི་གནམ་ཁ་གི་བདུད་དང་བཙན་ག་ར་གི་གུ་ལུ་དབངམ་ཨིནམ་མ་ཚད་ དབང་འཛིན་ཚུ་ལུ་ཡང་དབངམ་ཨིན་ སྟོབས་ཤུགས་ཚུ་གི་ནང་ལས་སྟོབས་ཤུགས་ཅན་ཨིནམ་མ་ཚད་ གཙོ་བོ་ཚུ་གི་ནང་ལས་གཙོ་ཅན་ དེ་ལས་གནམ་དང་སའི་གུ་ཡོད་མི་མཚན་གཞན་ག་ར་ལས་ ཁོ་གོ་གནས་མཐོ་ཤོས་གུ་བཞུགས་བཅུག་ནུག

²² དེ་ལས་དཀོན་མཆོག་གིས་ག་ར་ ཁོ་གི་ཞབས་པའི་འོག་ལུ་བཙུགས་གནང་སྟེ་ ཁིརཱིས་ཆོས་ཚོགས་ཀྱི་དོན་ལུ་ ག་ར་གི་ཡོངས་འཛིན་སྦེ་མཛད་ནུག

²³ ཆོས་ཚོགས་ཁོ་གི་སྐུ་གཟུགས་ཨིན་ ཆོས་ཚོགས་ནང་ ཁོ་ཁྱབ་སྟེ་བཞུགསཔ་ཨིནམ་མ་ཚད་ ཁོ་ག་ར་ནང་ཡོངས་སུ་རྫོགསཔ་སྦེ་ཁྱབ་སྟེ་བཞུགསཔ་ཨིན།།