ཀོ་ལོ་སི་ལེའུ་ 2 - རྫོང་ཁ་

¹ ང་ཁྱེད་ཆ་ཁྱབ་དང་ ཁྲོམ་ ལེའོ་དེ་ཀི་ཡ་ནང་སྡོད་མི་ཚུ་ དེ་ལས་ང་ལུ་ནམ་ཡང་མ་མཐོང་མི་ཚུ་གི་དོན་ལུ་ ང་གིས་ག་དེམ་ཅིག་དཀའཝ་སྤྱད་དེ་ ལཱ་འབད་ཡི་ག་ དེ་ཁྱེད་ལུ་ཤེས་བཅུག་དགོ་མནོ་བའི་འདོད་པ་ཡོད།

² ང་གིས་དཀའཝ་སྤྱད་མི་དེ་ ཁྱེད་ཆ་ཁྱབ་ཀྱིས་སྟོབས་ཤུགས་སྦོམ་སྦེ་ཐོབ་ནིའི་དོན་ལུ་ཨིན་ དེ་ག་དེ་འབད་ཟེར་བ་ཅིན་ ཁྱེད་ཀྱིས་བྱམས་པ་གི་སྐོར་ལས་སྦྱོང་བརྡར་ཐོབ་ནི་ཨིནམ་མ་ཚད་ དཀོན་མཆོག་གི་གསང་བ་གི་ཤེས་ཡོན་ ཁིརཱིས་ལུ་ངོ་ཤེས་ནི་དེ་ ཁྱེད་ཆ་ཁྱབ་ཀྱིས་ཏན་ཏན་སྦེ་ཧ་གོ་སྟེ་ ཐད་རི་བ་རི་བློ་ཁོག་སྦོམ་སྦེ་འཐོན་ནི་ཨིན།

³ ཤེས་རབ་དང་ཡོན་ཏན་གྱི་རྒྱུ་ནོར་ཚུ་ག་ར་ ཁིརཱིས་ནང་སྦ་བཞག་སྟེ་ཡོདཔ་ཨིན།

⁴ ང་གིས་སླབ་མི་དེ་ མི་ག་གིས་ཡང་ཁྱེད་ལུ་གཏམ་རྫུནམ་སྟོན་ཏེ་ མགུ་བརྡུང་མ་བཅུག་ནིའི་དོན་ལུ་ཨིན།

⁵ ངེ་གི་ལུས་དེ་ ཁྱེད་དང་མཉམ་མེད་དེ་འབད་རུང་ ངེ་གི་སེམས་ཨ་རྟག་རང་ ཁྱེད་དང་གཅིག་ཁར་ཡོད་ ཁྱེད་ཀྱི་སྒྲིགས་ལམ་དང་ལྡན་པའི་སྤྱོད་པ་དང་ ཁིརཱིས་ལུ་དད་པ་བརྟན་ཏོག་ཏོ་ཡོདཔ་ཤེས་ཏེ་ ང་སེམས་དགའཝ་ཨིན།།

ཁིརཱིས་ལས་རྒྱུད་དེ་མི་ཚེ་གསརཔ་ཐོབ་ནི་ཨིན་པའི་སྐོར།

⁶ དེ་འབདཝ་ལས་ ཧེ་མ་ཁྱེད་ཀྱིས་ཁིརཱིས་ཡེ་ཤུ་ལུ་ རང་གི་གཙོ་བོ་སྦེ་ཞུ་དོཝ་བཟུམ་སྦེ་རང་ འཕྲོ་མཐུད་དེ་ བྱ་བ་སྤྱོད་ལམ་ལེགས་ཤོམ་སྒྲིགས་ཏེ་ ཁོ་གི་ལམ་ནང་འགྱོ་དགོ།

⁷ ཤིང་གི་ར་ཏོ་གཏིང་ཟབ་དྲགས་འཛུལ་མི་དང་ ཁྱིམ་གྱི་རྩིགཔ་འགྱམ་གཏིང་རིངམ་སྦེ་བཙུགས་ཏེ་སྒྲིང་སྒྲིང་བཟོ་དོཝ་བཟུམ་སྦེ་རང་ ཁྱེད་ཆ་ཁྱབ་ཀྱིས་ཡང་ ཁིརཱིས་ལས་བརྟེན་ཏེ་སྡོད་དགོ་ ཧེ་མ་ཁྱེད་ལུ་སྟོན་མི་དེ་ བདེན་པ་ཨིན་མས་ཟེར་ཐད་རི་བ་རི་ཤེས་ཏེ་ ཨ་རྟག་རང་བཀའ་དྲིན་ལེགས་སོ་ཞུ་སྟེ་རང་སྡོད།

⁸ རིགཔ་བསྒྱིམ་སྟེ་སྡོད་ དེ་མེན་པ་ཅིན་ ཁུངས་མེད་པའི་ཆོས་དང་ གཏམ་རྫུན་མ་ལུ་བརྟེན་མི་གཞི་ཚུ་གིས་ ཁྱེད་ཀྱི་དད་པ་ལུ་འགྱུར་གཏང་འོང་ ཨ་ནི་བཟུམ་གྱི་སྟོན་པ་ཚུ་ ཁིརཱིས་ལས་མེན་པར་ མི་གི་ལམ་ལུགས་སྲོལ་དང་ འཇིག་རྟེན་གྱི་ལམ་ལས་འབྱུངམ་ཨིན།

⁹ ག་ཅི་སྨོ་ཟེར་བ་ཅིན་ དཀོན་མཆོག་གི་རང་བཞིན་ ཁིརཱིས་ཀྱི་སྐུ་གཟུགས་ནང་ཚངམ་སྦེ་གནསཔ་ཨིན།

¹⁰ སྟོབས་ཤུགས་དང་དབང་འཛིན་ ཆ་མཉམ་གྱི་དབུ་ཨིན་པའི་ཁིརཱིས་ ཁྱེད་ཆ་ཁྱབ་ཀྱི་གུ་ལུ་ཁྱབ་སྟེ་བཞུགས་ཡོདཔ་ཨིན།

¹¹ ཁིརཱིས་ལས་རྒྱུད་དེ་ གཙང་པའི་རྟགས་སྐྱེལ་གནངམ་ད་ ཁྱེད་ཆ་ཁྱབ་སྡིག་པའི་རང་བཞིན་སྤང་སྟེ་ གཙངམ་ལུ་འགྱུར་ཡི་ མི་གི་ལག་པ་གིས་སྐྱེལ་མི་རྟགས་མེན་པར་ ཁིརཱིས་ཀྱི་རྟགས་ངོ་མ་ལས་རྒྱུད་དེ་ཨིན།

¹² ཁྱེད་ཆ་ཁྱབ་ཁྲུས་གསོལ་ཞུ་བའི་བསྒང་ ཁིརཱིས་དང་མཉམ་གཅིག་དོང་ནང་བཙུག་བཙུགཔ་ཨིན་ དེ་ལས་ཁིརཱིས་ལུ་སྐུ་གསོན་པོ་སྦེ་ བཞེང་གནང་མི་དཀོན་མཆོག་གི་ ཧ་ལས་པའི་སྟོབས་ཤུགས་ལུ་དད་པ་བསྐྱེད་དེ་ ཁྱེད་ཁོ་དང་མཉམ་སྐུ་གསོན་པོ་སྦེ་ལྷོང་གནང་ཡི།

¹³ ཁྱེད་ཆ་ཁྱབ་ཁྲིམས་ལས་འགལ་བའི་ལཱ་འབད་དེ་ ཤི་སོངམ་བཟུམ་སྦེ་ཨིནམ་ད་ སྡིག་པའི་རང་བཞིན་ལས་མ་ཐར་བའི་སྐབས་ལུ་ དཀོན་མཆོག་གིས་ཁྱེད་ཆ་ཁྱབ་ལུ་ ཁིརཱིས་དང་གཅིག་ཁར་གསོན་པོ་སྦེ་ལྷོང་གནང་ཡི་ ཁོ་གིས་ང་བཅས་ཀྱི་སྡིག་པ་ག་ར་ལས་བཤགས་པ་གནང་ཡི།

¹⁴ ང་བཅས་ལུ་སྐྱོན་བཏོན་མི་ཁྲིམས་ཀྱི་དབང་ཆ་ཡོད་པའི་ཡིག་ཐོ་ ང་བཅས་ཀྱིས་འབྱོར་མ་ཚུགས་པའི་བུ་ལོན་དེ་ ཁོ་གིས་བསྣམས་ཏེ་ ཁྲམ་ཤིང་གུ་ལྕགས་གཟེར་བསྡབས་ཏེ་ ཆ་མེད་བཏང་གནང་ཡི།

¹⁵ དཀོན་མཆོག་གིས་སྟོབས་ཤུགས་ཅན་དང་ དབང་འཛིན་ཅན་ཚུ་ལུ་ཕམ་བཏང་གནང་སྟེ་ ག་ར་གི་གདོང་ཁར་ལས་ ཁིརཱིས་ཁྲམ་ཤིང་གུ་གཤགས་པའི་ཐོག་ལས་སྦེ་ དམག་འདི་ལས་རྒྱལ་ཁ་ཐོབ་ཅི།།

ག་གིས་ཡང་ཁྱེད་ལུ་གཅིག་ཁྱད་མ་ཆོདཔ་བཟོ་མ་བཅུག་ཟེར་བའི་སྐོར།

¹⁶ དེ་གིས་འབད་ བཟའ་ནི་དང་འཐུང་ནི་ཡང་ན་ དུས་སྟོན་གྱི་སྐོར་ལས་ ནམ་གང་ཡང་ན་ ངལ་འཚོ་བའི་ཉིནམ་བརྩི་བསྲུང་ནིའི་སྐོར་ལས་ མི་ག་གིས་ཡང་ཁྱེད་ལུ་སྐྱོན་བཏག་མ་བཅུག

¹⁷ དེ་ཚུ་ག་ར་འོང་ནི་འབད་བའི་གནས་ཚུལ་གྱི་གྱིབ་མ་རྐྱངམ་གཅིག་ཨིན་ མ་གཞི་ བདེན་པ་ངོ་མ་འདི་ ཁིརཱིས་ཁོ་རང་ཨིན།

¹⁸ ཉམ་ཆུང་རྫུན་མ་འབད་མི་དང་ ཕོ་ཉ་ཚུ་ལུ་བསྙེན་བཀུར་ཞུ་མི་ལས་སྦེ་ ག་གིས་ཡང་ ཁྱེད་ཆ་ཁྱབ་གཅིག་ཁྱད་མ་ཆོདཔ་བཟོ་མ་བཅུག་ ཨ་ནི་བཟུམ་གྱི་མི་གིས་ མ་མཐོང་མི་ལུ་འདི་ཨིན་ཟེར་སྟོན་ཏེ་ འཇིག་རྟེན་པའི་སེམས་ཀྱིས་ ཁུངས་མེད་པའི་མནོ་བསམ་བཏང་སྟེ་ དཔའ་རྔམ་སྟོནམ་ཨིན།

¹⁹ ཨ་ནི་བཟུམ་གྱི་མི་གིས་ སྐུ་གཟུགས་ཀྱི་དབུ་ཨིན་མི་ཁིརཱིས་ལུ་ སྒྲིང་སྒྲིང་སྦེ་བཤེད་མི་བཞག་པས་ ཨིན་རུང་ ཁིརཱིས་ལས་རྒྱུད་དེ་ གཟུགས་ཀྱི་ཡན་ལག་ཚུ་ག་ར་ བདག་འཛིན་འབད་ནི་མ་ཚད་ གཅིག་ཁར་བཤེད་བཞགཔ་ཨིན་ དེ་གིས་འབད་ དཀོན་མཆོག་གི་ཐུགས་དགོངས་བཞིན་དུ་ གཟུགས་དེ་ཡར་རྒྱས་ཐོན་འགྱོཝ་ཨིན།

^20-21 ཁྱེད་ཁིརཱིས་དང་གཅིག་ཁར་ཤི་སྟེ་ འཇིག་རྟེན་གྱི་དབང་ཆ་ཚུ་ལས་ཐར་པ་ཐོབ་ཆེཝ་ཨིན་རུང་ ཁྱེད་ག་ཅི་འབད་འཇིག་རྟེན་གྱི་མི་བཟུམ་སྦེ་ ལགཔ་མ་བཤེད་ བྲོཝ་མ་བལྟ་ ལགཔ་མ་འདོག་ཟེར་སླབ་མིའི་ལུགས་སྲོལ་འདི་ཚུ་སྲུང་སྡོདཔ་སྨོ།

²² འདི་ཚུ་ག་ར་ཉིནམ་གཅིག་མེདཔ་ཐལ་འགྱོ་ནི་ཨིན་ ག་ཅི་འབད་ཟེར་བ་ཅིན་ འདི་ཚུ་ག་ར་མི་གིས་བཟོ་མི་ཁྲིམས་དང་ མི་གིས་སྟོན་མིའི་བསླབ་བྱ་ལས་བརྟེན་ཏེ་ཨིན།

²³ འདི་ཚུ་ལུ་བལྟཝ་ད་ ཐབས་དང་ཤེས་རབ་བཟུམ་སྦེ་མཐོངམ་མས་ ག་ཅི་འབད་ཟེར་བ་ཅིན་ བརྩོན་ཤུགས་བསྐྱེད་དེ་ ཉམ་ཆུང་བཟོ་སྟེ་ རང་གི་གཟུགས་ལུ་བཏུལ་དགོ་ ཨིན་ཏེ་འབད་རུང་ སྡིག་པའི་རང་བཞིན་ལས་རྒྱལ་ཁ་ཐོབ་ནི་ལུ་ཕན་ནུས་ ག་ནི་ཡང་མེད།།