ཀོ་ལོ་སི་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ དཀོན་མཆོག་གི་ཐུགས་དགོངས་བཞིན་དུ་ ཁིརཱིས་ཡེ་ཤུ་གི་སྐུ་ཚབ་ ང་ པའུལ་དང་ ང་བཅས་ཀྱི་སྤུན་ཆ་ ཏི་མོ་ཐི་ལས།

² ཀོ་ལོ་སི་ཁྲོམ་ནང་ཡོད་མི་ དཀོན་མཆོག་གི་མི་ དད་པ་ནང་ན་འཐན་ཏོག་ཏོ་ཡོད་མིའི་ ཁིརཱིས་ཀྱི་སྤུན་ཆ་ཚུ་ལུ་ ཡི་གུ་འདི་འབྲི་དོ་ ང་བཅས་ཀྱི་ཡབ་དཀོན་མཆོག་གིས་ ཁྱེད་ཆ་ཁྱབ་ལུ་ ཐུགས་རྗེ་དང་ཞི་བདེ་གནང་བཅུག།

བཀའ་དྲིན་ཆེ་ཟེར་ཞུ་བའི་སྐོར།

³ ང་བཅས་ཀྱིས་ཁྱེད་ཀྱི་དོན་ལུ་སྨོན་ལམ་ཞུཝ་ད་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་ཡབ་དཀོན་མཆོག་ལུ་ རྟག་བུ་རང་བཀའ་དྲིན་ཆེ་ཟེར་ཞུཝ་ཨིན།

⁴ ག་ཅི་སྨོ་ཟེར་བ་ཅིན་ ཁྱེད་ཀྱིས་ཁིརཱིས་ཡེ་ཤུ་ལུ་དདཔ་དང་ དཀོན་མཆོག་ཁོ་རའི་དམ་པའི་མི་ཚུ་ལུ་བརྩེ་གདུང་བསྐྱེད་པའི་སྐོར་ལས་ ང་བཅས་ཀྱིས་གོ་ཡི།

⁵ འདི་ཁྱེད་ཀྱི་དོན་ལུ་ ཞིང་ཁམས་ལུ་བཞག་ཡོད་པའི་རེ་བ་དེ་ལུ་བརྟེན་ཏེ་ཨིན་ དེ་གི་སྐོར་ལས་ ཁྱེད་ཆ་ཁྱབ་ཀྱིས་ཧེ་མ་ལས་ བདེན་པའི་གཏམ་བཟང་གི་ཐོག་ལས་སྦེ་རྣ་བ་གོ་ཡི།

⁶ ཁྱེད་ལུ་གཏམ་བཟང་བཤད་པའི་ ཉིནམ་དང་པ་ལས་འགོ་བཟུང་སྟེ་ དཀོན་མཆོག་གི་ཐུགས་རྗེ་ངོ་མ་དེ་ ཁྱེད་ཀྱིས་ཉམས་མྱོང་འབད་ཡི་ ད་ཁྱེད་ཀྱི་སྦུག་ལུ་འབྲས་བུ་བཏགས་ཏེ་ ཡར་རྒྱས་གོང་འཕེལ་འགྱོ་དོཝ་བཟུམ་ འཛམ་བུ་གླིང་ནང་ཡང་ཡར་རྒྱས་གོང་འཕེལ་འགྱོ་སྟེ་ཡོད།

⁷ དེ་ ང་བཅས་དང་མཉམ་ལཱ་འབད་མི་ བརྩེ་བའི་ཞབས་ཕྱིཔ་ ཨེ་པ་ཕརཱས་ལས་ཁྱེད་ཀྱིས་གོ་ཡི་ ཁོ་ཁིརཱིས་ཀྱི་ཞབས་ཕྱིཔ་ན་འཐན་ཏོག་ཏོ་ ང་བཅས་ཀྱི་ཐོག་ལས་ ཁྱེད་ལུ་ཆ་རོགས་འབད་མི་གཅིག་ཨིན།

⁸ ཁྱེད་ལུ་དམ་པའི་ཐུགས་ཉིད་ལས་བྱུང་ཡོད་པའི་བརྩེ་གདུང་གི་སྐོར་ལས་ ཁོ་གིས་ང་བཅས་ལུ་བཤད་དེ་སླབ་ཅི།།

ཀོ་ལོ་སི་པ་ཚུ་གི་དད་པ་ཡར་རྒྱས་འགྱོ་བའི་དོན་ལུ་ པའུལ་གྱིས་སྨོན་ལམ་ཞུ་བའི་སྐོར།

⁹ དེ་འབདཝ་ལས་བརྟེན་ཏེ་ ང་བཅས་ཀྱིས་དེ་གོ་བའི་ཉིནམ་ལས་རང་འགོ་བཟུང་སྟེ་ དཀོན་མཆོག་གི་ཐུགས་འདོད་བསྒྲུབ་པའི་དོན་ལུ་ ཁོ་རའི་ཆོས་དང་འབྲེལ་བའི་བློ་གྲོས་དང་ཤེས་ཡོན་ ཁྱེད་ཆ་ཁྱབ་ཀྱི་མི་ཚེ་ནང་ མ་ལང་ལངམ་སྦེ་ གནང་བཅུག་ཟེར་ སྨོན་ལམ་ཞུ་ནི་མ་བཞག

¹⁰ དེ་གིས་འབད་ ག་ཅི་རང་འབད་རུང་ ཁྱེད་ལུ་གཙོ་བོ་གི་འོས་འབབ་ཡོདཔ་སྦེ་ ཁོ་ལུ་ཐུགས་དགྱེས་པའི་བྱ་བ་སྤྱོད་ལམ་ལེགས་ཤོམ་སྒྲིགས་ནི་ཨིན་ དེ་ལས་ལཱ་ལེགས་ཤོམ་ག་ཅི་རང་ཨིན་རུང་ འདི་གི་འབྲས་བུ་བཏགསཔ་མ་ཚད་ དཀོན་མཆོག་དང་གཅིག་ཁར་འབྲེལ་བ་ཡར་རྒྱས་འགྱོ་ནི་ཨིན།

¹¹ དཀའ་ངལ་བྱུང་པའི་སྐབས་ལུ་ ཁྱེད་བཟོད་པ་སྒོམ་སྡོད་ཚུགས་པའི་དོན་ལུ་ དཀོན་མཆོག་གི་ཚད་མེད་པའི་དབང་ཤུགས་དེ་གིས་ ཁྱེད་སྒྲིང་སྒྲིང་སྦེ་སྡོད་ནིའི་ཤུགས་གནང་བཅུག

¹² དཀོན་མཆོག་ཁོ་རའི་དམ་པའི་མི་ཚུ་ལུ་ འོད་ཟེར་གྱི་རྒྱལ་སྲིད་ནང་ ཤུལ་ནོར་ཐོབ་ནིའི་འོས་འབབ་མཛད་ཡོད་མི་དེ་ལུ་ ཁྱེད་དགའ་ཚོར་བསྐྱེད་དེ་ ཡབ་དཀོན་མཆོག་ལུ་བཀའ་དྲིན་ཆེ་ཟེར་ཞུ་འོང་མནོ་སྟེ་ ང་གིས་སྨོན་ལམ་ཞུ་ཡི།།

ག་ར་དང་གཅིག་ཁར་མཐུན་ལམ་མཛད་པའི་སྐོར།

¹³ ཁོ་གིས་ང་བཅས་ལུ་ གནག་དུང་དུ་གི་རྒྱལ་སྲིད་ནང་ལས་སྐྱབས་མཛད་དེ་ ཁོ་གི་བརྩེ་བའི་སྲས་ཀྱི་རྒྱལ་སྲིད་ནང་ ང་བཅས་ལུ་གནས་སོར་གནང་ཡི།

¹⁴ སྲས་ལས་རྒྱུད་དེ་ ང་བཅས་ཐར་པ་གཏང་པའི་བླུ་རིན་དང་ སྡིག་པའི་བཤགས་པ་ཡོདཔ་ཨིན།

¹⁵ ཁིརཱིས་དེ་ དངོས་སུ་སྦེ་མཇལ་མ་ཚུགས་པའི་དཀོན་མཆོག་གི་སྐུ་བརྙན་ཨིན་ ཁོ་དཀོན་མཆོག་གིས་མཛད་གནང་མིའི་ཆ་མཉམ་ནང་ལས་ འགོ་དང་པ་སྦེ་འཁྲུངས་ནུག

¹⁶ ག་ཅི་སྨོ་ཟེར་བ་ཅིན་ དཀོན་མཆོག་གིས་མཛད་གནང་མི་ཆ་མཉམ་ ཞིང་ཁམས་དང་འཇིག་རྟེན་ནང་ཨིན་རུང་ མིག་གིས་མཐོང་མི་དང་མ་མཐོང་མི་ཚུ་ཨིན་རུང་ ཁྲི་གུ་སྡོད་མི་ བདུད་དང་བཙན་ག་ར་ གནམ་ཁ་གི་དབང་འཛིན་ཚུ་ཨིན་རུང་ ཆ་མཉམ་སྲས་ལས་རྒྱུད་དེ་ སྲས་ཀྱི་དོན་ལུ་མཛད་མཛདཔ་ཨིན།

¹⁷ འབྱུང་བ་ག་ར་གི་ཧེ་མ་ལས་ཁོ་བཞུགས་ནུག་ འབྱུང་བ་དེ་ཚུ་ཁོ་ལས་བརྟེན་ཏེ་ གནས་ཡོདཔ་ཨིན།

¹⁸ ཁོ་རའི་སྐུ་གཟུགས་འདི་ཆོས་ཚོགས་ཨིན་ དེ་ལས་དབུ་འདི་ཁོ་ཨིན་ ཁོ་དབང་ཚད་ཅན་སྦེ་འབྱོན་ནི་གི་དོན་ལུ་ འགོ་ཐོག་ལས་རང་བཞུགས་ཡོདཔ་མ་ཚད་ ཤི་མི་ཚུ་གི་གྲལ་ཁ་ལས་ གསོན་པོ་སྦེ་ལོང་མི་ ཁོ་དང་པ་ཨིན།

¹⁹ ག་ཅི་སྨོ་ཟེར་བ་ཅིན་ དཀོན་མཆོག་གི་རང་བཞིན་འདི་ ཁིརཱིས་ནང་ཚངམ་སྦེ་གནས་ཏེ་ དཀོན་མཆོག་ཐུགས་དགྱེསཔ་མ་ཚད།

²⁰ འཇིག་རྟེན་དང་ཞིང་ཁམས་ནང་ཡོད་རིགས་ཡོད་ཚད་ཅིགཔ་དེ་ ཁོ་རང་ནང་འཆམ་ཁ་མཛད་པའི་དོན་ལུ་ ཁྲམ་ཤིང་གུ་ལུ་འཛགས་མི་ ཁིརཱིས་ཀྱི་སྐུ་ཁྲག་ལས་རྒྱུད་དེ་ ག་ར་དང་གཅིག་ཁར་མཐུན་ལམ་མཛད་གནང་ནུག

²¹ ཧེ་མ་ཁྱེད་ཆ་ཁྱབ་དཀོན་མཆོག་དང་འབྲེལ་བ་མེད་མི་ ངོ་ལོག་ནི་གི་མནོ་བསམ་བཏང་སྟེ་ སྤྱོད་ངན་འབད་མི་ཚུ་ཨིན་རུང་།

²² ད་ལྟོ་དཀོན་མཆོག་གིས་ཁྱེད་ཆ་ཁྱབ་ལུ་ ཁོ་རའི་གཟིགས་ས་ལུ་སྐྱོན་མེདཔ་དང་གཙངམ་ དེ་ལས་དམ་པ་གཅིག་སྦེ་བཏོན་པའི་དོན་ལུ་ ཁོ་གིས་ཁྱེད་ཆ་ཁྱབ་ལུ་ ཁིརཱིས་མིའི་ལུས་ལུ་བྱོན་ཏེ་གཤགས་པའི་ཐོག་ལས་སྦེ་ འཆམ་ཁ་མཛད་གནང་ཡི།

²³ དེ་འབདཝ་ད་ ཁྱེད་ཀྱིས་འཕྲོ་མཐུད་དེ་རང་ གཏམ་བཟང་ལུ་དད་པ་སྒྲིང་སྒྲིང་སྦེ་བསྐྱེད་དེ་ དེ་གི་གུ་ལུ་ རྨང་གཞི་བཟུམ་སྦེ་བརྟན་ཏོག་ཏོ་སྦེ་སྡོད་དགོ་ ཁྱེད་ཀྱིས་རྣ་བ་གོ་མི་གཏམ་བཟང་གི་རེ་བ་བསྐྱེད་ནི་ལུ་བཞག་ནི་མི་འོང་ ང་ པའུལ་ ཨ་ནི་གཏམ་བཟང་གི་ཞབས་ཕྱིཔ་གཅིག་ལུ་འགྱུརཝ་ཨིནམ་མ་ཚད་ འཛམ་བུ་གླིང་ག་ར་ནང་ ཁྱབ་བསྒྲགས་འབད་མི་གཏམ་བཟང་འདི་ཨིན།

²⁴ ད་ང་ཁྱེད་ཀྱི་དོན་ལུ་སྡུག་བསྔལ་མྱོང་ནི་ལུ་ དགའ་སྤྲོ་བསྐྱེད་སྡོདཔ་ཨིན་ ཁིརཱིས་ཀྱི་སྐུ་གཟུགས་ཨིན་པའི་ཆོས་ཚོགས་ཀྱི་དོན་ལུ་ ང་རའི་གཟུགས་ཀྱིས་ ཁོ་གི་སྡུག་བསྔལ་མཐར་སྐྱེལ་ནི་ཨིན།

²⁵ དཀོན་མཆོག་གི་གསུང་དེ་ ཡོངས་སུ་རྫོགསཔ་སྦེ་ ཁྱེད་ཆ་ཁྱབ་ལུ་སྟོན་བྱིན་ཟེར་ ང་ལུ་འགན་ཁག་གནངམ་ལས་བརྟེན་ཏེ་ ང་ཆོས་ཚོགས་ཀྱི་ཞབས་ཕྱིཔ་ལུ་འགྱུར་ཡི།

²⁶ དུས་རབས་ལས་དུས་རབས་དང་ མི་རབས་ལས་མི་རབས་ཚུན་ཚོད་ སྦ་བཞག་མི་གསང་བ་དེ་ ད་ཁོ་རའི་དམ་པའི་མི་ཚུ་ལུ་གསལ་ཏོག་ཏོ་སྦེ་སྟོན་གནང་ཡི།

²⁷ དཀོན་མཆོག་གིས་སྦ་བཞག་མི་གསང་བ་དེ་ ག་ཅི་དེས་ཅིག་གཟི་བརྗིད་ཆེ་ཏོག་ཏོ་ཨིན་ན་ ཁྱེད་ ཕྱིའི་མི་རིགས་ཚུ་གི་དོན་ལུ་ཡང་ སྟོན་བྱིན་ནི་འདི་ ཁོ་གི་ཐུགས་འདོད་ཨིན་ གསང་བ་དེ་ག་ཅི་ཨིན་ན་ཟེར་བ་ཅིན་ ཁྱེད་ཀྱི་ནང་ན་ཁིརཱིས་བཞུགས་ཏེ་ཡོད་ ཁྱེད་ཡང་ཁིརཱིས་བཟུམ་སྦེ་གཟི་བརྗིད་ཅན་སྦེ་འགྱུར་ནི་ཨིན་ འདི་ལས་ཕར་ ཁྱེད་རེ་བ་བསྐྱེད་དེ་སྒུག་སྡོདཔ་ཨིན།

²⁸ དེ་གིས་འབད་ ང་བཅས་ཀྱིས་མི་ག་ར་ལུ་ ཁིརཱིས་ཁོ་རང་བཟུམ་སྦེ་རང་ ལྷག་ཆད་ག་ནི་ཡང་མེད་པར་ ག་ར་ཚངམ་སྦེ་སྟོན་ཚུགས་པའི་དོན་ལུ་ མི་རེ་རེ་ལུ་ཤེས་རབ་ཀྱི་ཐོག་ལས་སྦེ་ ཆོས་སྟོན་ནི་དང་ཉེན་བརྡ་འབད་དེ་ ཁོ་གི་སྐོར་ལས་ཁྱབ་བསྒྲགས་འབདཝ་ཨིན།

²⁹ དེ་གིས་འབད་ ངེ་གི་སེམས་ནང་ ཕྱག་ལཱ་མཛད་མི་ ཁོ་གི་མཐུ་སྟོབས་ལས་བརྟེན་ཏེ་ ང་རྩ་འགེངས་ཏེ་ ལཱ་འདི་ལུ་སེམས་བཙུགས་ཏེ་འབདཝ་ཨིན།།