ཏི་མོ་ཐི་གཉིས་པ་ལེའུ་ 4 - རྫོང་ཁ་

ལཱ་ན་འཐན་ཏོག་ཏོ་འབད་དགོ་པའི་སྐོར།

¹ དཀོན་མཆོག་གི་སྐུ་མདུན་ལུ་དང་ མི་གསོན་པོ་དང་ཤི་སོང་མི་ཚུ་ལུ་ ཁྲིམས་ཕྱེ་བ་འབྱོན་ནི་འབད་མི་ཁིརཱིས་ཡེ་ཤུ་གི་སྐུ་མདུན་ལུ་ དེ་ལས་ ཁིརཱིས་ཀྱིས་མཇལ་ཁ་གནང་བའི་ཉིནམ་འདི་དང་ ཁོ་གི་རྒྱལ་སྲིད་ འདི་ཚུ་འཛོམ་དཔང་སྦེ་བཙུགས་ཏེ་ ང་གིས་ཁྱོད་ལུ་བཀའ་རྒྱ་བྱིན་དོ།

² གཏམ་བཟང་བཤད་དེ་སྡོད་ དུས་ཚོད་ནམ་རང་འབད་རུང་ ཨ་རྟག་རང་གྲ་སྒྲིག་སྦེ་སྡོད་ འཛོལ་བ་བཏོན་ཏེ་ བཅོ་ཁ་རྐྱབ་སྟེ་བསླབ་བྱ་བྱིན་ དེ་ལས་བཟོད་པ་སྒོམ་པའི་ཐོག་ལས་སྦེ་ ཆོས་ལེགས་ཤོམ་སྦེ་སྟོན་ཏེ་ སེམས་གསོ་འབད་བྱིན།

³ ག་ཅི་སྨོ་ཟེར་བ་ཅིན་ མི་དེ་ཚུ་གིས་ཆོས་ཀྱི་གཞི་བརྟན་ཏོག་ཏོ་དེ་ལུ་ མ་ཉན་པར་འགྱོ་བའི་དུས་ཚོད་ཅིག་འོང་དོ་ དེའི་སྐབས་ལུ་ ཁོང་ཆ་ཁྱབ་ཀྱིས་ རང་རང་སོ་སོ་གི་སྤྲོ་བ་དང་བསྟུན་ཏེ་ ག་ཉན་དགོ་མནོ་མི་ ཁོང་ལུ་སྟོན་མི་སློབ་དཔོན་དེ་ཚུ་ལེ་ཤ་ གཅིག་ཁར་འབོ་སྟེ་སྡོད་འོང་།

⁴ དེ་ལས་ཁོང་གིས་བདེན་པ་དེ་ལུ་ ཆ་མ་བཞག་པར་ ཁུངས་མེད་པའི་གཏམ་དེ་ལུ་གཙོ་བོ་བསྟེན་ཏེ་ཉན་སྡོད་འོང་།

⁵ དེ་འབདཝ་ད་ ཁྱོད་ལུ་ག་ཅི་བྱུང་རུང་ དྲནམ་བཏོན་ དཀའ་ངལ་དེ་ཚུ་འབྱུངམ་ད་ གཙོ་བོ་གི་དོན་ལུ་བཟོད་པ་བསྒོམས་ གཏམ་བཟང་གི་ཆོས་བཤད་ནིའི་ལཱ་འབད་ དེ་ལས་དཀོན་མཆོག་གིས་ཁྱོད་ལུ་གནང་མི་ལཱ་གི་འགན་ཁག་དེ་འབད།

⁶ ག་ཅི་སྨོ་ཟེར་བ་ཅིན་ ང་རའི་མི་ཚེ་དེ་མཆོདཔ་སྦེ་བླུག་སྟེ་ཕུལ་ཚར་ནི་འབད་དོ་ ངེའི་མི་ཚེ་དེ་བཞག་སྟེ་འགྱོ་ནི་གི་དུས་ཚོད་ལུ་ལྷོད་ཅི།

⁷ ང་རའི་ཁ་ཐུག་ལས་ ག་དེ་དྲག་དྲག་ འགྲན་བསྡུར་འབད་ཡི་ མི་ཚེ་ནང་གི་འགྲན་བསྡུར་བང་རྒྱུགས་ཏེ་མཇུག་བསྡུ་ཡི་ དད་པའི་ལམ་ཡང་སྲུང་སྟེ་སྡོད་ཅི།

⁸ ད་མཐའན་མཇུག་གི་ཉིནམ་ནང་ ཁྲིམས་ཕྲང་སྟེ་ཕྱེ་མི་གཙོ་བོ་གིས་ལོག་བྱོན་ཏེ་ ངེ་གི་དོན་ལུ་བཞག་གནང་མི་ དཀོན་མཆོག་ཁོ་རའི་ཐུགས་དང་ལྡན་པའི་མི་ཕྲངམ་གི་གཙུག་རྒྱན་དེ་ ང་ལུ་གནང་འོང་ དེ་འབདཝ་ད་གསོལ་རས་འདི་ ང་རྐྱངམ་གཅིག་ལུ་མེན་ དེ་འབདཝ་ད་ ཁོ་འབྱོན་ནི་འབད་མི་ཉིནམ་དེ་ལུ་བརྩེ་བ་བསྐྱེད་དེ་ རེ་འདོད་ཀྱི་ཐོག་ལས་སྒུག་སྡོད་མི་ག་ར་ལུ་གནང་ནི་ཨིན།།

དམིགས་བསལ་གྱི་བསླབ་བྱ་གི་སྐོར།

⁹ ཁྱོད་ག་དེ་འབད་རུང་ ང་སྡོད་ས་མགྱོགས་པར་ཤོག

¹⁰ ག་ཅི་སྨོ་ཟེར་བ་ཅིན་ དེ་མཱས་ཀྱིས་ ད་ལྟོ་གི་འཇིག་རྟེན་ལུ་སེམས་ཆགས་ཏེ་ ང་ལུ་བཀོག་བཞག་སྦེ་ ཁྲོམ་ ཐེ་ས་ལོ་ནི་ཀ་ལུ་ཡར་སོང་ཡི་ དེ་ལས་ ཀེརཱེས་ཀཱེན་ ལུང་ཕྱོགས་ ག་ལ་ཏི་ལུ་ཡར་སོང་ཡི་ ཏི་ཏུས་ཡང་ལུང་ཕྱོགས་ དཱལ་མ་ཏི་ཡ་ལུ་ཡར་སོང་ཡི།

¹¹ ནཱ་ལུ་ང་དང་གཅིག་ཁར་ ལུ་ཀ་རྐྱངམ་གཅིག་ཡོད་ ཁྱོད་ཀྱིས་ མཱར་ཀུ་ཡང་འཚོལ་ཏེ་ ཁྱོད་འོངམ་ད་ གཅིག་ཁར་འཁྱིད་ཤོག་ ག་ཅི་སྨོ་ཟེར་བ་ཅིན་ དཀོན་མཆོག་གི་ཕྱག་ལཱ་ནང་ ཁོ་གནམ་མེད་ས་མེད་ཕན་བཏགས་མི་གཅིག་ཨིན།

¹² ང་གིས་ ཏི་ཀི་ཀུས་ ཁྲོམ་ ཨི་ཕི་སི་ལུ་བཏང་ཡི།

¹³ ཁྱོད་འོངམ་ད་ ང་གིས་ཁྲོམ་ ཏོརོ་ཨཱས་ནང་ ཀཱར་པུས་སྡོད་ས་ལུ་བཞག་མི་བགོ་ལ་ཚ་ཏོག་ཏོ་དང་ དཔེ་ཆ་དེ་ཚུ་དང་ དེ་ལས་ཁག་ཆེ་བ་རང་ པགས་ཀོ་གི་ཤོག་ཀུ་འདི་ཚུ་ ཁྱོད་དང་གཅིག་ཁར་འབག་ཤོག

¹⁴ སྤྲོས་བརྐོཔ་ ཨ་ལེག་སཱན་ཌཱེར་གྱིས་ ང་ལུ་གནོད་པ་སྦོམ་བཀལ་ཡི་ ཁོ་གིས་འབད་མི་ལཱ་དང་བསྟུན་ཏེ་ གཙོ་བོ་གིས་ཁོ་ལུ་ལན་མཛད་གནང་འོང་།

¹⁵ ཨ་ནི་མི་དེ་ལས་ ཁྱོད་ཡང་རིགཔ་བསྒྱིམ་སྡོད་ ག་ཅི་སྨོ་ཟེར་བ་ཅིན་ ང་བཅས་ཀྱིས་བཤད་མི་ཆོས་ལུ་ ཁོ་གིས་ངོ་རྒོལ་གནམ་མེད་ས་མེད་འབད་ཡི།

¹⁶ ང་གིས་ཁྲིམས་ཁང་ནང་འགོ་དང་པ་གསལ་ཆ་ཞུཝ་ད་ མི་ག་གིས་ཡང་ ངེ་གི་རྒྱབ་ལས་མ་འཐོན་པར་ ག་ར་གིས་ང་ལུ་བཀོག་བཞག་སྟེ་ ཡར་སོང་ཡི་ འདི་གི་ཉེས་པ་འདི་ ཁོང་གུ་ཕོག་མ་བཅུག

¹⁷ ཨིན་རུང་ གཙོ་བོ་ང་དང་མཉམ་གཅིག་བཞུགས་ཏེ་ ཁོ་གིས་ང་ལུ་སྟོབས་ཤུགས་གནང་ནི་དེ་གིས་ གཙོ་བོ་གི་གཏམ་བཟང་འདི་ ཡོངས་སུ་རྫོགསཔ་སྦེ་ ངེ་གི་ཐོག་ལས་ ཕྱིའི་མི་རིགས་ག་ར་གིས་རྣ་བ་གོ་ཡི་ དེ་མ་ཚད་ དཔེར་ན་ སེང་གེ་ལྟོགསཔ་གི་ཁ་ལས་སྤར་ཐར་དོཝ་བཟུམ་སྦེ་ ང་ལུ་སྲོག་ཐོག་ཉེས་ཁྲིམས་ལས་སྐྱབས་མཛད་ཅི།

¹⁸ དོན་ལས་རང་གཙོ་བོ་གིས་ང་ལུ་ རྐྱེན་ངན་གནོད་པ་ག་ར་ལས་སྐྱབས་མཛད་གནང་འོང་ དེ་ལས་ཁོ་རའི་ཞིང་ཁམས་ཀྱི་རྒྱལ་སྲིད་ནང་ ཁོ་གིས་ང་ལུ་སྐྱེལ་གནང་འོང་ གཟི་བརྗིད་དེ་ དུས་རྒྱུན་དུ་རང་ ཁོ་གི་ཨིན་ནོ་ ཨ་མཱེན།།

མཐའན་མཇུག་གི་བཀྲ་ཤིས་སྨོན་ལམ་ཞུ་བའི་སྐོར།

¹⁹ པིརཱིས་ཀ་དང་ ཨ་ཀུ་ལཱས་གཉིས་ལུ་དང་ ཨོ་ནི་སི་ཕོ་རུས་ཀྱི་བཟའ་ཚན་ག་ར་ལུ་ སྐུ་གཟུགས་བཟང་པོ་ཟེར་སླབ་གནང་།

²⁰ ཧེ་མ་ང་དང་གཅིག་ཁར་ཡོད་མི་ ཨེ་རཱས་ཏཱོས་དེ་ ཁྲོམ་ ཀོ་རཱིན་ཐི་ལུ་རང་སྡོད་ད་ཡི་ དེ་ལས་ ཏོརོ་ཕི་མུས་དེ་ གཟུགས་བདེ་ཏོག་ཏོ་མེད་པར་ ཁྲོམ་ མི་ལ་ཏུ་ལུ་ང་གིས་བཞག་སྦེ་འོང་ཡི།

²¹ ད་ཁྱོད་རང་གནམ་དགུན་གྱི་དུས་ཚོད་ མ་རནམ་ལས་ ནཱ་འོང་ནི་ཚ་ངེར་བཏོན་ དེ་ལས་ ཡུ་བུ་ལུས་ཀྱིས་སྐུ་གཟུགས་བཟང་པོ་ཟེར་སླབ་གཏང་དེས་ པུ་དཱེནས་དང་ ལི་ནུས་དང་ ཀལའུ་དི་ཡ་ཚུ་དང་ དདཔ་ཅན་སྤུན་ཆ་ག་ར་གིས་ཡང་ ཁྱོད་ལུ་སྐུ་གཟུགས་བཟང་པོ་ཟེར་སླབ་གཏང་དེས།

²² ད་གཙོ་བོ་འདི་ཁྱེད་ཀྱི་སེམས་ཉིད་ནང་བཞུགས་བཅུག་ ཁོ་གིས་ཁྱེད་ལུ་ཐུགས་རྗེ་གཟིགས་པར་ཤོག། །།