ཏི་མོ་ཐི་གཉིས་པ་ལེའུ་ 3 - རྫོང་ཁ་

ཉིནམ་མཐའན་མཇུག་ལུ་ངན་པ་འབྱུང་ནི་ཨིན་པའི་སྐོར།

¹ དེ་འབདཝ་ད་ ཉིནམ་མཐའན་མཇུག་གི་དུས་ལུ་ དཀའ་ངལ་ཐོབ་པའི་དུས་ཚོད་འདྲོག་སི་སི་འོང་དོ་ཟེར་ ཁྱོད་ཀྱིས་ཧ་གོ་དགོ།

² ག་ཅི་སྨོ་ཟེར་བ་ཅིན་ མི་འདི་ཚུ་ རང་དོན་གཙོ་བོ་བསྟེན་མི་ ཏི་རུ་ལུ་དགའ་མི་ རང་བསྟོད་རྐྱབ་མི་ ང་རྒྱལ་ཆེ་དྲགས་འབད་མི་ ཕ་མ་གི་ཁ་ལུ་མ་ཉན་མི་ བཀའ་དྲིན་བསམ་མ་ཤེས་མི་ དམ་པ་མེད་མི།

³ བྱམས་སེམས་མེད་མི་ བཀའ་དྲིན་བསྐྱང་མ་བཏུབ་མི་ གཞན་ལུ་ཁ་གཏང་མི་ མཚམས་ཚོད་མ་ཤེས་མི་ སྤྱོད་པ་གདུག་དྲགས་འབད་མི་ ལཱ་བཟང་པོ་མ་དགའ་མི།

⁴ མགུ་བསྐོར་བརྐྱབས་མི་ བག་མེད་མི་ རོ་རྔམ་སྟོན་མི་ དཀོན་མཆོག་ལུ་མ་དགའ་བར་དགའ་སྤྲོ་ལུ་འཚོལ་མི།

⁵ དེ་ལས་ ཕྱི་ལས་བལྟཝ་ད་ ཆོས་སེམས་ཅན་བཟུམ་མཐོང་རུང་ ཆོས་སེམས་ཀྱི་ནུས་ཤུགས་སྤང་སྟེ་སྡོད་མི་ཚུ་ཨིན་ ཁོང་ཆ་ཁྱབ་དང་འབྲེལ་བ་མ་འཐབ།

⁶ ག་ཅི་སྨོ་ཟེར་བ་ཅིན་ ཨ་ནི་བཟུམ་གྱི་མི་ལ་ལུ་ཅིག་གིས་ ཁྱིམ་ལས་ཁྱིམ་རྒྱུད་འགྱོ་སྟེ་ བཟའ་ཚང་ནང་ན་གི་མི་ཚུ་ལུ་ མགུ་བསྐོར་བརྐྱབས་ཏེ་ ཨམ་སྲུ་རྩ་རྒསམོ་ ཁོང་རང་གིས་འབད་མི་སྡིག་པ་དང་ འདོད་ཆགས་མ་འདྲཝ་འདི་ཚུ་གིས་ མནེམ་བཞག་མི་ཚུ་ལུ་ ཁོང་རའི་དབང་གི་འོག་ལུ་བཙུགསཔ་ཨིན།

⁷ འདི་བཟུམ་གྱི་ཨམ་སྲུ་ཚུ་གིས་ ཨ་རྟག་རང་ ཆོས་གསརཔ་ཚུ་ཤེས་ནི་གི་དོན་ལུ་ རྩ་འགེངས་རུང་ བདེན་པ་དེ་ཁོང་གིས་རྩ་ལས་རང་ཧ་གོ་མ་ཚུགས་པས།

⁸ དཔེར་ན་ ཡ་ནཱེས་དང་ ཡམ་བེརཱེས་གཉིས་ཀྱིས་ མོ་སཱེས་ལུ་ངོ་རྒོལ་འབད་དོཝ་བཟུམ་སྦེ་ ཨ་ནི་མི་འདི་ཚུ་གིས་ཡང་ སེམས་མེདཔ་ཐལ་ཏེ་ ཆོས་བདེན་པ་ལུ་ཆ་མ་བཞག་པར་ ངོ་རྒོལ་འབདཝ་ཨིན་མས།

⁹ དེ་འབདཝ་ད་ ཁོང་ཧེང་སྐལ་རང་ཡར་རྒྱས་འགྱོ་མི་ཚུགས་ ག་ཅི་སྨོ་ཟེར་བ་ཅིན་ ཡ་ནཱེས་དང་ ཡམ་བེརཱེས་གཉིས་འབྱུང་ཁུངས་མེདཔ་ཨིནམ་ གསལ་ཏོག་ཏོ་སྦེ་ཤེས་དོཝ་བཟུམ་སྦེ་ ཨ་ནི་མི་ཚུ་ཡང་ འབྱུང་ཁུངས་མེདཔ་ཨིནམ་ མི་ལེ་ཤ་གིས་གསལ་ཏོག་ཏོ་སྦེ་ཧ་གོ་འོང་།།

པའུལ་གྱིས་བཀོད་རྒྱ་བྱིན་པའི་སྐོར།

¹⁰ ད་ཁྱོད་ཀྱིས་ང་ལུ་བལྟ་སྟེ་ ང་གིས་སྟོན་མི་ཆོས་ ངེ་གི་སྤྱོད་ལམ་ ངེ་གི་མི་ཚེ་གི་དོན་དག་ འདི་ཁྱེད་ཀྱིས་ཤེས་ དེ་མ་ཚད་ ང་གིས་ག་དེ་སྦེ་ དད་པ་བསྐྱེད་ཅི་ག་ བཟོད་པ་སྒོམ་སྡོད་ཅི་ག་ བྱམས་པ་འབད་ཡི་ག་ སྡུག་བསྔལ་ལུ་བཟོད་བསྲན་བསྐྱེད་ཡི་ག་ འདི་ག་ར་ཁྱེད་ཀྱིས་ཤེས་ཅི།

¹¹ ང་ལུ་བྱུང་མི་གནོད་འཚེ་ དེ་ལས་ ཨཱན་ཏི་ཡོག་དང་ ཨི་ཀོ་ནི་ཨུམ་དང་ ལིས་ཏྲ་ནང་ ང་ལུ་བྱུང་མི་སྡུག་བསྔལ་དེ་ཚུ་ ག་དེམ་ཅིག་ ང་གི་བཟོད་པ་བསྒོམས་སྡོད་ཅི་ འདི་ཁྱོད་ཀྱིས་ཤེས་ཅི་ དེ་འབདཝ་ད་ གཙོ་བོ་གིས་འདི་ཚུ་ག་ར་ནང་ལས་ ང་ལུ་སྐྱབས་མཛད་གནང་ཡི།

¹² ག་ར་འབད་རུང་ ཁིརཱིས་ཡེ་ཤུ་ནང་ཆོས་སེམས་ཅན་གྱི་མི་ཚེ་སྦེ་ སྡོད་དགོ་པ་ཅིན་ ཨ་ནི་མི་འདི་ལུ་ཐད་རི་བ་རི་རང་ གནོད་པ་དང་དཀའ་ངལ་ཚུ་འོང་ར་འོང་ནི་ཨིན།

¹³ དེ་འབདཝ་ད་མི་ངན་པ་ མགུ་བསྐོར་བརྐྱབས་མི་ཚུ་གིས་ ཧེ་མ་རོགས་ལུ་མགུ་བསྐོར་བརྐྱབས་ཅི་བརྐྱབས་ཅི་ ད་ཁོང་རང་ལུ་ཡང་མགུ་བསྐོར་བརྐྱབས་ཏེ་ ལྷག་པར་དུ་ངན་པ་ལུ་འགྱུརཝ་ཨིན།

¹⁴ དེ་འབདཝ་ད་ ཁྱོད་ཀྱི་དོན་ལུ་གཅིག་སླབ་པ་ཅིན་ ཧེ་མ་ཁྱོད་རང་གིས་ལྷབ་སྟེ་ ཧ་གོ་མིའི་བདེན་པ་ནང་ འཕྲོ་མཐུད་དེ་རང་ སྒྲིང་སྒྲིང་སྦེ་སྡོད་ ག་ཅི་སྨོ་ཟེར་བ་ཅིན་ ཁྱོད་ལུ་སྟོན་བྱིན་མི་ཚུ་ཏན་ཏན་ཨིནམ་ ཁྱོད་རང་གིས་ཤེས།

¹⁵ དེ་མ་ཚད་ ཁིརཱིས་ཡེ་ཤུ་ལུ་དད་པ་བསྐྱེད་པའི་ཐོག་ལས་སྦེ་ ཐར་པའི་ལམ་ནང་འཁྱིད་ནིའི་ཤེས་རབ་གནང་མི་ དམ་པའི་གསུང་རབ་དེ་ ཆུང་ཀུ་བསྒང་ལས་ ཁྱོད་ཀྱིས་ཤེས།

¹⁶ གསུང་རབ་ནང་འབྲི་མི་ག་ར་ དཀོན་མཆོག་གི་ཐུགས་ཉིད་ལས་བྱུང་ནུག་ གསུང་རབ་དེ་ མི་ཚུ་ལུ་ཆོས་སྟོན་ནི་དང་ འཛོལ་བ་ཚུ་བཏོན་ནི་དང་ འཛོལ་བ་ནང་ལས་བཅོ་ཁ་རྐྱབ་ནི་དང་ དཀོན་མཆོག་གི་ཐུགས་དང་ལྡན་པའི་ལམ་ནང་འགྱོ་ནི་གི་སྦྱང་བ་ དེ་ཚུ་རེ་རེ་གི་དོན་ལུ་ ཕན་ཐོགས་ཡོད།

¹⁷ རྒྱུ་མཚན་དེ་ལས་བརྟེན་ཏེ་ དཀོན་མཆོག་གི་ཕྱག་ཞུ་མི་དེ་ ལཱ་བཟང་པོ་རེ་རེ་བཞིན་གྱི་སྦྱོང་བརྡར་ ཡོངས་སུ་རྫོགསཔ་སྦེ་ཐོབ་སྟེ་ཡོད་མི་གཅིག་ཨིན།།