ཏི་མོ་ཐི་གཉིས་པ་ལེའུ་ 2 - རྫོང་ཁ་

ཡེ་ཤུ་ཁིརཱིས་ཀྱི་དམ་ཚིག་ཅན་གྱི་དམག་མི་གི་སྐོར།

¹ དེ་འབདཝ་ལས་ ངེ་གི་བུ་ ཁིརཱིས་ཡེ་ཤུ་གི་ཐུགས་རྗེ་གི་རྒྱུད་ལས་སྦེ་ སྤོབས་པ་ཅན་དང་ལྡནམ་སྦེ་སྡོད་བཅུག

² དེ་ལས་འཛོམ་དཔང་ལེ་ཤ་གི་སྦུག་ལུ་ ཁྱོད་ཀྱིས་ང་ལས་གོ་མི་ཆོས་ཚུ་ མི་ན་འཐན་ཏོག་ཏོ་ ལྕོགས་གྲུབ་ཡོད་མི་ཚུ་ལུ་སྟོན་བྱིན་ དེ་ལས་ཁོང་གིས་གཞན་ཚུ་ལུ་ཡང་སྟོན་ཚུགས།

³ དམག་མི་བཟང་པོ་བཟུམ་ཅིག་སྦེ་ ཁིརཱིས་ཡེ་ཤུ་གི་དོན་ལུ་ ང་དང་གཅིག་ཁར་ བཟོད་པ་སྒོམས་སྡོད་དེ་སྡུག་བསྔལ་འབག་དགོ།

⁴ དམག་མི་གཅིག་གིས་ མི་སེར་གྱི་ལཱ་ནང་ལུ་བཅའ་མར་མི་གཏོགས་ ག་ཅི་སྨོ་ཟེར་ཅིན་ ཁོ་གིས་རང་གི་དམག་དཔོན་ལུ་སེམས་དགའ་བཅུག་ནི་གི་དོན་ལུ་ ལཱ་འབདཝ་ཨིན།

⁵ ད་རུང་རྩེདམོ་རྩེད་མི་གིས་ རྩེདམོ་ག་ཅི་རང་འབད་རུང་ ཁྲིམས་དང་བསྟུན་ཏེ་མ་རྩེད་བ་ཅིན་ གསོལ་རས་མི་ཐོབ།

⁶ ཞིང་ལཱ་དཀའཝ་སྤྱད་དེ་འབད་མི་གིས་ ལོ་ཐོག་དང་པ་གི་སྐལཝ་འདི་ ཁོ་གིས་ཐོབ་དགོ།

⁷ ང་གིས་ཁྱོད་ལུ་བྲིས་མི་དེ་ཚུ་ ལེགས་ཤོམ་སྦེ་མནོ་བསམ་གཏང་དགོ་ ག་ཅི་སྨོ་ཟེར་བ་ཅིན་ གཙོ་བོ་གིས་ཁྱོད་ལུ་ཧ་གོ་ནིའི་རིག་པ་ག་ར་གནང་འོང་།

⁸ ང་གིས་གཏམ་བཟང་བཤད་མི་དང་འཁྲིལ་ཏེ་ གཤགས་ས་ལས་སྐུ་གསོན་པོ་སྦེ་བཞེངས་མི་དང་ རྒྱལཔོ་ ད་བིད་ཀྱི་གདུང་བརྒྱུད་ལས་བྱོན་མི་ཡེ་ཤུ་ཁིརཱིས་ལུ་ སེམས་ཁར་དྲན་དགོ།

⁹ ཨ་ནི་གཏམ་བཟང་གི་དོན་ལུ་ ང་གིས་སྡུག་བསྔལ་མྱོང་སྟེ་མི་ཉེས་པ་ཅན་ལུ་འབད་དོཝ་བཟུམ་སྦེ་ ང་ལུ་ལྕགས་ཐག་གིས་བཅིངས་ཏེ་བཞག་ཅི་ དེ་འབདཝ་ད་ ང་ལུ་ལྕགས་ཐག་གིས་བཅིངས་བཞག་དོཝ་བཟུམ་སྦེ་ དཀོན་མཆོག་གི་གསུང་དེ་ལུ་བཅིང་བཞག་མི་ཚུགས།

¹⁰ དེ་འབདཝ་ལས་ ཁིརཱིས་ཡེ་ཤུ་གི་རྒྱུད་ལས་བྱུང་མི་ཐར་པ་དང་ མཐའ་མེད་པའི་གཟི་བརྗིད་ཐོབ་ནི་སྦེ་ ཁོང་དཀོན་མཆོག་གིས་བཙག་འཐུ་མཛད་མི་ཚུ་གི་དོན་ལུ་ ང་དཀའ་ངལ་དེ་ཚུ་ག་ར་བཟོད་པ་བསྒོམས་ཏེ་སྡོདཔ་ཨིན།

¹¹ ང་བཅས་ཁོ་དང་མཉམ་གཅིག་ཤི་བ་ཅིན་ ཁོ་དང་མཉམ་གཅིག་གསོན་པོ་སྦེ་སྡོད་ནི་ཡོད།

¹² ང་བཅས་ཀྱིས་བཟོད་པ་སྒོམ་པ་ཅིན་ ཁོ་དང་མཉམ་གཅིག་རྒྱལ་སྲིད་སྐྱོང་ནི་ཡོད་ ང་བཅས་ཀྱིས་ཁོ་ལུ་ངོ་མི་ཤེས་ཟེར་བ་ཅིན་ ཁོ་གིས་ཡང་ང་བཅས་ལུ་ངོ་མི་ཤེས་ཟེར་གསུང་འོང་།

¹³ ང་བཅས་ན་འཐན་ཏོག་ཏོ་མེད་རུང་ ཁོ་ན་འཐན་ཏོག་ཏོ་སྦེ་བཞུགས་འོང་ ག་ཅི་སྨོ་ཟེར་བ་ཅིན་ ཁོ་རང་གི་དམ་བཅའ་ལས་མི་འགལ་ཟེར་ སླབ་མི་གཏམ་དེ་ བདེན་པ་དང་ཆ་བཞག་ཚུགས་མི་གཅིག་ཨིན།

¹⁴ དེ་ཚུ་གི་སྐོར་ལས་ མ་ཆད་པ་རང་ དྲན་བསྐུལ་འབད་དེ་སྡོད་དགོ་ དེ་ལས་དཀོན་མཆོག་གི་མཚན་འཛོམ་དཔང་བཙུགས་ཏེ་ ཁུངས་མེད་པའི་ཚིག་གི་སྐོར་ལས་ རྩོད་པ་མ་རྐྱབས་ཟེར་ ཁྱོད་ཀྱིས་དདཔ་ཅན་ཚུ་ལུ་བཀའ་དམ་དྲགས་སྦེ་བྱིན་དགོ་ ག་ཅི་སྨོ་ཟེར་བ་ཅིན་ འདི་བཟུམ་གྱི་རྩོད་པ་རྐྱབ་ནི་གི་བློ་ཚུ་གིས་ གོ་མི་ཚུ་ལུ་གནོད་ནི་མ་གཏོགས་ ཕན་མི་ཐོགས།།

དཀོན་མཆོག་གི་ཐུགས་དགྱེས་མིའི་ལས་མི་གི་སྐོར།

¹⁵ དཀོན་མཆོག་གིས་ཐུགས་དགྱེས་མིའི་མི་གཅིག་འབྱུང་ནི་གི་དོན་ལུ་ རྩ་འགེངས་དགོ་ ཁྱོད་ ལས་མི་བཟང་པོ་བཟུམ་སྦེ་ རང་ལུ་བལྟ་སྟེ་ངོ་ཚ་མ་དགོཔ་དང་ བདེན་པའི་གསུང་དེ་ཀྲིག་ཀྲི་སྦེ་ སྟོན་བྱིན་མི་གཅིག་སྦེ་སྡོད་དགོ།

¹⁶ དེ་འབདཝ་ད་ ཁུངས་མེད་པའི་ འཇིག་རྟེན་པའི་གཏམ་ཚུ་ལུ་ཉན་ནི་ནང་ བཅའ་མར་མ་གཏོགས་ ག་ཅི་སྨོ་ཟེར་བ་ཅིན་ གཏམ་འདི་ཚུ་གིས་ རང་ལུ་ ཆོས་སེམས་ཡོད་མིའི་སྤྱོད་ལམ་ལས་ ཕར་ཕར་རང་འཁྱིད་འགྱོ་འོང་།

¹⁷ གཟུགས་ཀྱི་རྨ་རུལཝ་ད་ རྨ་དེ་འཕྲོ་ལས་སྦོམ་འགྱོ་ནིའི་ཉེན་ཁ་ཡོད་དོཝ་བཟུམ་སྦེ་ ཁུངས་མེད་པའི་གཏམ་འདི་ཚུ་ མི་ལེ་ཤ་ནང་ཁྱབ་བསྒྲགས་འགྱོ་སྟེ་ གནོད་པ་སྦོམ་འབྱུང་ནིའི་ཉེན་ཁ་ཡོད་ ཨ་ནི་གཏམ་སྟོན་མི་ཚུ་གི་གྲལ་ལས་ ཧའི་མེ་ན་ཡཱེས་དང་ ཕི་ལེ་ཏུས་ཨིན།

¹⁸ ཁོང་གིས་བདེན་པའི་ལམ་ནང་ལས་ཐོན་ཏེ་ དུས་མཐའན་མཇུག་ལུ་ཤི་ས་ལས་གསོན་པོ་ལོང་ནི་དེ་བྱུང་ཚར་ཡི་ཟེར་སླབ་སྦེ་ མི་ལ་ལུ་ལུ་དད་པ་བསྐྱེད་ས་ལས་བཀགཔ་ཨིན་མས།

¹⁹ དེ་འབདཝ་ད་ དཀོན་མཆོག་གི་བདེན་པ་དེ་ རྩིགཔ་འགྱམ་སྒྲིང་སྒྲིང་ཡོད་མི་བཟུམ་ཅིག་ཨིན་ དེའི་གུ་བརྗོད་ཚིག་གཉིས་ཀྱི་ཕྱག་ཐམ་ཡང་ཡོད་ དེ་ག་ཅི་སྨོ་ཟེར་བ་ཅིན་ གཙོ་བོ་གིས་ ཁོ་རང་གི་མི་ཚུ་ངོ་མཁྱེན་ དེ་ལས་ མི་ག་ར་འབད་རུང་ གཙོ་བོ་གི་མཚན་འཛོམ་དཔང་འབད་མི་འདི་གིས་ ལཱ་ངན་པ་སྤང་དགོ་ཟེར་བྲིས་ཏེ་ཡོད།

²⁰ མི་ཕྱུགཔ་གི་ཁྱིམ་ནང་ གསེར་དང་དངུལ་གྱི་བཟོ་མིའི་ཧོད་ཆ་རྐྱངམ་གཅིག་མེན་པར་ ཤིང་དང་ས་གི་བཟོ་མིའི་ཧོད་ཆ་ཚུ་ཡང་ཡོད་ ཧོད་ཆ་རིན་གོང་སྦོམ་ཚུ་ རྟེན་འབྲེལ་བརྩིས་པའི་སྐབས་ གཡོག་བཀོལ་ནི་དང་ རིན་གོང་ཆུང་ཀུ་གི་ཅ་ལ་ཚུ་ ཉིན་བསྟར་གྱི་དོན་ལུ་ཨིན།

²¹ དེ་འབདཝ་ལས་ མི་ག་ར་འབད་རུང་ ངན་པ་འདི་ཚུ་སྤང་སྟེ་ གཙང་ཏོག་ཏོ་སྦེ་སྡོད་པ་ཅིན་ ཁོ་དཀོན་མཆོག་གི་དོན་ལུ་ ཧོད་ཆ་ཁག་ཆེ་ཏོག་ཏོ་བཟུམ་སྦེ་འབྱུང་འོང་ དེ་ལས་ཁོ་གི་མི་ཚེ་དེ་ དམ་པ་སྦེ་མཛད་གནང་སྟེ་ ཁོ་རང་གི་སྦྱིན་བདག་གི་དོན་ལུ་གོ་ཆོདཔ་བྱུང་སྟེ་ ལཱ་ལེགས་ཤོམ་ག་ར་འབད་ནི་ལུ་ གྲ་སྒྲིག་སྦེ་སྡོད་འོང་།

²² དེ་གི་དོན་ལུ་ གཞོན་མིའི་ཆགས་ཞེན་དེ་ཚུ་སྤང་དགོ་ དེ་ལས་སེམས་དག་ཏོག་ཏོ་གི་ཐོག་ལས་ གཙོ་བོའི་མཚན་བརྗོད་མི་ཚུ་དང་མཉམ་ དཀོན་མཆོག་གི་ཐུགས་དང་ལྡན་པའི་ལཱ་ཕྲངམ་དང་ དད་པ་དང་བྱམས་པ་ དེ་ལས་ཞི་བདེ་གི་ལམ་བདའ་འགྱོ་དགོ།

²³ འབྱུང་ཁུངས་མེད་པའི་བློ་སླབ་སྟེ་ རྩོད་པ་རྐྱབས་ནི་འདི་སྤང་ ཁྱེད་ཀྱིས་ཤེས་ དེ་ཚུ་ནང་ལས་འཐབ་འཛིང་འབད་ནི་རྐྱངམ་གཅིག་བྱུངམ་ཨིན།

²⁴ གཙོ་བོ་གི་ཕྱག་ཞུ་མི་དེ་ཚུ་ འཐབ་འཛིང་འབད་མི་བཏུབ་ དེ་འབདཝ་ད་ བརྩེ་བ་བསྐྱེད་མི་དང་ ཆོས་སྟོན་ཚུགས་མི་སློབ་དཔོན་དང་ མི་ག་ར་ལུ་བཟོད་པ་སྒོམ་ཚུགས་མི།

²⁵ དེ་ལས་བདེན་པ་གི་དགྲ་འབད་མི་ལུ་ཉམ་ཆུང་ཏོག་ཏོ་སྦེ་བཅོ་ཁ་རྐྱབ་ཚུགས་དགོ་ དེ་ལས་ཡང་ཅིན་ དཀོན་མཆོག་གིས་ཁོང་ལུ་སེམས་འགྱུར་གནང་སྟེ་ བདེན་པ་ལུ་ཧ་གོ་ཚུགས་པའི་སེམས་གནང་འོང་།

²⁶ དེ་ལས་ཁོང་གི་སེམས་དྲན་པ་བདའ་ཟུན་ཏེ་ བདུད་ཀྱིས་ཁོང་ལུ་ ཁོ་རའི་འདོད་པ་བསྟར་དུ་འབད་བཅུག་ནིའི་དོན་ལུ་ བཙོན་ནང་བསྡམས་བཞག་མི་ཧིང་ནང་ལས་སྤར་ཐར་ཚུགས།།