ཏི་མོ་ཐི་གཉིས་པ་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ དཀོན་མཆོག་གི་ཐུགས་དགོངས་བཞིན་དུ་ ཁིརཱིས་ཡེ་ཤུ་གི་སྐུ་ཚབ་ཨིན་མི་དང་ དཀོན་མཆོག་གིས་ཁས་བླངས་བཞེས་ཏེ་གནང་མི་ ཁིརཱིས་ཡེ་ཤུ་ནང་ཡོད་མིའི་ཚེ་དང་འཁྲིལ་ཏེ་ ང་ པའུལ་གྱིས།

² ངེ་གི་གཅེས་པའི་བུ་ ཏི་མོ་ཐི་ལུ་ ཨ་ནི་ཡི་གུ་འདི་འབྲི་དོ་ ཡབ་དཀོན་མཆོག་དང་ ང་བཅས་ཀྱི་གཙོ་བོ་ཁིརཱིས་ཡེ་ཤུ་གི་ ཐུགས་རྗེ་དང་ སྙིང་རྗེ་དང་ཞི་བདེ་ ཁྱོད་ལུ་གནང་བཅུག།

བཀའ་དྲིན་ཆེ་ཟེར་ཞུ་བའི་སྨོན་ལམ་གྱི་སྐོར།

³ ངེ་གི་ཕ་བརྒྱུད་ཚུ་གིས་འབད་དོཝ་བཟུམ་སྦེ་ ང་ཡང་དྲན་ཤེས་གསལ་ཏོག་ཏོ་གི་ཐོག་ལས་ དཀོན་མཆོག་ལུ་ཕྱག་ཞུཝ་ཨིན་ འདི་ལུ་ང་གིས་ཉིན་ནུབ་མེད་པར་ སྨོན་ལམ་བཏབ་ད་ ཁྱོད་ལུ་དྲན་ཏེ་ཨ་རྟག་རང་བཀའ་དྲིན་ཆེ་ཟེར་ཞུ་དོ།

⁴ ཁྱོད་ཀྱི་མིག་ལས་འཛག་མི་མིག་ཆུ་དེ་ ད་ལྟོ་ཚུན་ཚོད་ཡང་ ང་གིས་སེམས་ཁར་དྲན་ཏེ་རང་ཡོད་ དེ་སྦེ་འབད་ནི་འདི་གིས་ ངེ་གི་སེམས་ཁར་དགའ་ཚོར་ཐོབ་ནིའི་དོན་ལུ་ ཁྱོད་དང་གནམ་མེད་ས་མེད་འཕྱད་དགོ་མནོ་ཡི།

⁵ ཁྱོད་ཀྱིས་དད་པ་བསྐྱེད་ནི་གི་ཧེ་མ་ ཁྱོད་ཀྱི་ཨང་རྒས་ ལོ་ཨཱིས་དང་ ཨའི་ ཡུ་ནཱེས་ཀྱིས་ག་དེ་སྦེ་དད་པ་བསྐྱེད་ཅི་ག་ དེ་བཟུམ་སྦེ་རང་ ཤུལ་མ་ཁྱོད་ཡང་དད་པ་བསྐྱེད་ཅི་ཟེར་ངེ་གི་སེམས་ཁར་དྲན་ཡི་ དེ་ལས་ད་ལྟོ་ཚུན་ཚོད་ ཁྱོད་ཀྱིས་ཨ་ནི་བཟུམ་གྱི་དདཔ་ངོ་མ་བསྐྱེད་དེ་སྡོདཔ་ཨིན་ཟེར་ ང་གིས་ཐེ་ཚོམ་མེད་པར་ཤེས་ཅི།།

ཏི་མོ་ཐི་ལུ་སེམས་གསོ་འབད་བའི་སྐོར།

⁶ འདི་གི་དོན་ལུ་ ང་གིས་ཁྱོད་ཀྱི་གུ་ ལགཔ་བཀལ་བའི་ཐོག་ལས་སྦེ་ ཐོབ་མི་དཀོན་མཆོག་གི་གསོལ་རས་དེ་ མར་ཉམས་མ་བཅུག་པར་ ཁྱོད་ཀྱིས་ཨ་རྟག་རང་ དཔེར་ན་ མེ་རུ་གོ་ཐལ་གྱི་འོག་ལུ་སྦ་བཞག་སྟེ་ ལོག་མེ་འཕུཝ་ད་ མེ་འབར་བཅུག་དོཝ་བཟུམ་སྦེ་ གསོལ་རས་དེ་ལེགས་ཤོམ་སྦེ་བདག་འཛིན་འཐབ་དགོ་ཟེར་ ང་གིས་དྲན་བསྐུལ་འབདཝ་ཨིན།

⁷ ག་ཅི་སྨོ་ཟེར་བ་ཅིན་ དཀོན་མཆོག་གིས་ང་བཅས་ལུ་ སྤོབས་མེདཔ་མཛད་ནི་གི་སེམས་མེན་པར་ ཁོ་གིས་ སྟོབས་ཤུགས་ཀྱི་སེམས་དང་ བྱམས་སེམས་ དེ་ལས་རང་གིས་རང་སྒྲིགས་བཙུགས་ནིའི་སེམས་གནང་ནུག

⁸ དེ་འབདཝ་ལས་ང་བཅས་ཀྱི་གཙོ་བོ་གི་སྐོར་ལས་ གཞན་ལུ་བཤད་ནི་ལུ་འདྲོག་མི་དགོ་ དེ་མ་ཚད་ ང་གཙོ་བོ་གི་དོན་ལུ་བཙོན་པ་ཨིན་མི་ལུ་བལྟ་སྟེ་ཡང་ ངོ་ཚ་སྟེ་མ་སྡོད་ འདི་གི་ཚབ་ལུ་ དཀོན་མཆོག་གི་གནང་མི་དབང་ལུ་བློ་གཏད་དེ་ ང་དང་གཅིག་ཁར་གཏམ་བཟང་གི་དོན་ལུ་ དཀའ་ངལ་འབག་ནི་ནང་ ང་དང་བཅིག་ཁར་བཅའ་མར་གཏོགས།།

དཀོན་མཆོག་གི་གནང་མི་ཐར་པའི་གཏམ་བཟང་གི་སྐོར།

⁹ ཁོ་གིས་ང་བཅས་ལུ་སྐྱབས་མཛད་དེ་ ཁོ་རང་གི་མི་དམ་པ་སྦེ་སྡོད་ནིའི་དོན་ལུ་འབོ་ཅི་ དེ་གི་དོན་དག་དེ་ ང་བཅས་རང་གི་ལཱ་ལེགས་ཤོམ་ལུ་བརྟེན་ཏེ་མེན་ དེ་འབདཝ་ད་ འཛམ་བུ་གླིང་མ་མཛད་པའི་ཧེ་མ་ ཁོ་རང་གི་འཆར་གཞི་དང་འཁྲིལ་ཏེ་ ཁིརཱིས་ཡེ་ཤུ་གི་རྒྱུད་ལས་སྦེ་ ང་བཅས་ལུ་གནང་མི་ཐུགས་རྗེ་ འདི་ལས་བརྟེན་ཏེ་ཨིན།

¹⁰ ད་ཁིརཱིས་ཡེ་ཤུ་ང་བཅས་ཀྱི་སྐྱབས་མགོན་སྦེ་བྱོན་པའི་ཐོག་ལས་སྦེ་ ཐུགས་རྗེ་དེ་ཕྱི་ཁར་ཐོན་ཡི་ ཁོ་གིས་འཆི་བ་གི་དབང་ཤུགས་རྩ་མེད་གཏང་སྟེ་ གཏམ་བཟང་གོ་བའི་ཐོག་ལས་སྦེ་ ཚེ་ངོ་མ་དང་ འཆི་བ་མེད་པའི་སྐོར་ལས་ ང་བཅས་ལུ་གསལ་ཏོག་ཏོ་སྦེ་སྟོན་གནང་ཡི།

¹¹ ཨ་ནི་གཏམ་བཟང་གི་དོན་ལུ་ དཀོན་མཆོག་གིས་ང་ལུ་ཆོས་བཤད་མི་དང་སྐུ་ཚབ་ དེ་ལས་སློབ་དཔོན་གྱི་འགན་ཁུར་བཀལ་གནང་ཡི།

¹² དེ་གི་དོན་ལས་སྦེ་ ང་བཙོན་ཁང་ནང་སྡུག་བསྔལ་ཚུ་མྱོང་སྟེ་ཡོདཔ་ཨིན་ དེ་འབདཝ་ད་ དེ་ལུ་བལྟ་སྟེ་ ང་ངོ་མི་ཚ་ ག་ཅི་སྨོ་ཟེར་བ་ཅིན་ ག་ལུ་ང་གིས་དད་པ་བསྐྱེདཔ་ཨིན་ན་ ང་རང་གིས་ཤེས་ ད་རུང་ངེ་གི་ཚེ་སྲོག་འདི་ ཁོ་གི་ཕྱག་ལུ་བློ་གཏད་དེ་ཕུལ་མི་དེ་ཡང་ མཐའན་མཇུག་གི་ཉིནམ་ཚུན་ཚོད་ ཁོ་གིས་བདག་འཛིན་འཐབ་གནང་འོང་ཟེར་ ང་ལུ་རེ་བ་ཏན་ཏན་ཡོདཔ་ཨིན།

¹³ ཁྱོད་ཁིརཱིས་ཡེ་ཤུ་ནང་ལུ་དད་པ་དང་ བྱམས་པ་ནང་རང་སྡོད་དེ་ ང་གིས་ཁྱོད་ལུ་སྟོན་བྱིན་མི་བདེན་པའི་ཚིག་བརྟན་ཏོག་ཏོ་ཚུ་ དཔེ་གཅིག་སྦེ་ལག་ལེན་འཐབ་སྟེ་སྡོད།

¹⁴ ཁྱོད་ལུ་བཅོལ་བཞག་མི་བདེན་པ་བཟང་པོ་དེ་ཚུ་ ག་གིས་ཡང་འགྱུར་བཅོས་འབད་མ་བཅུག་ནིའི་དོན་ལུ་ ང་བཅས་ཀྱི་ནང་ན་བཞུགས་ཡོད་པའི་ཐུགས་ཉིད་ཀྱིས་ ཆ་རོགས་འབད་བའི་རྒྱུད་ལས་ སྲུང་བཞག་དགོ།།

ཆ་རོགས་འབད་མི་དདཔ་ཅན་ལུ་དགའ་ཚོར་བསམ་པའི་སྐོར།

¹⁵ ལུང་ཕྱོགས་ ཨེ་སི་ཡ་ནང་སྡོད་མི་ ཕི་གེ་ལུས་དང་ ཧཱེར་མོ་གེ་ནཱེས་གཉིས་ཀྱི་རྩིས་པའི་ དདཔ་ཅན་མང་ཤོས་ཀྱིས་རང་ ང་ལུ་བཀོག་བཞག་སྟེ་ཡར་སོངམ་ཨིནམ་དེ་ ཁྱོད་ཀྱིས་ཤེས།

¹⁶ གཙོ་བོ་གིས་ ཨོ་ནི་སི་ཕོ་རུས་ཀྱི་བཟའ་ཚང་ལུ་སྙིང་རྗེ་གཟིགས་བཅུག་ ག་ཅི་སྨོ་ཟེར་བ་ཅིན་ ཁོ་གིས་ཨ་རྟག་རང་ང་ལུ་སེམས་གསོ་འབདཝ་ཨིནམ་མ་ཚད་ ཁོ་གིས་ང་བཙོན་ཁང་ནང་སྡོད་མི་ལུ་བལྟ་སྟེ་ ངོ་མ་ཚ།

¹⁷ ཁོ་རྒྱལ་ས་ རོམ་ལུ་ལྷོདཔ་ད་ ང་ལུ་འཚོལ་ཏེ་ལཱ་ཁག་རྐྱབ་རུང་ ང་མ་འཕྱད་ཚུན་ཚོད་འཚོལ་ཏེ་འོངས་ནུག

¹⁸ མཐའན་མཇུག་གི་ཉིནམ་ལུ་ གཙོ་བོ་གིས་ ཨོ་ནི་སི་ཕོ་རུས་ལུ་སྙིང་རྗེ་གཟིགས་བཅུག་ ང་ཁྲོམ་ ཨི་ཕི་སི་ལུ་སྡོད་པའི་བསྒང་ལུ་ ཁོ་གིས་ང་ལུ་ག་དེ་ཅིག་ཆ་རོགས་འབད་ཡི་ག་ འདི་ཁྱོད་ཀྱིས་ལེགས་ཤོམ་སྦེ་ཤེས།།