ཐེ་ས་ལོ་ནི་ཀ་གཉིས་པ་ལེའུ་ 3 - རྫོང་ཁ་

དདཔ་ཅན་ཚུ་གིས་སྨོན་ལམ་ཞུ་དགོ་པའི་སྐོར།

¹ མཐའན་མཇུག་ལུ་སྤུན་ཆ་ཚུ་ ཁྱེད་ཀྱིས་ང་བཅས་ཀྱིས་དོན་ལུ་སྨོན་ལམ་ཞུ་ གཙོ་བོ་གི་གཏམ་བཟང་དེ་ གནམ་མེད་ས་མེད་དར་ཁྱབ་འགྱོ་སྟེ་ ཧེ་མ་ཁྱེད་ཀྱིས་གཏམ་བཟང་དེ་ལུ་ ག་དེ་སྦེ་ཞེ་ས་འབད་དེ་དད་པ་བསྐྱེད་ཅི་ག་ འདི་བཟུམ་སྦེ་མི་ཚུ་གིས་ཡང་ཞེ་ས་འབད་དེ་ དད་པ་བསྐྱེད་བཅུག་ཟེར་སྨོན་ལམ་ཞུ།

² དེ་ལས་དཀོན་མཆོག་གིས་ང་བཅས་ལུ་ མི་ངན་པ་དང་ཟོགཔ་ཚུ་ལས་སྐྱབས་མཛད་གནང་ཟེར་སྨོན་ལམ་ཞུ་ ག་ཅི་སྨོ་ཟེར་བ་ཅིན་ མི་ཆ་མཉམ་གྱིས་རང་དད་པ་མི་བསྐྱེད་བས།།

པའུལ་གྱིས་དདཔ་ཅན་ཚུ་ལུ་བློ་གཏད་པའི་སྐོར།

³ ཨིན་ཏེ་འབད་རུང་ ང་བཅས་ཀྱི་གཙོ་བོ་དེ་དམ་ཚིག་ཅན་ཨིནམ་ལས་ ཁོ་གིས་ཁྱེད་ལུ་སྒྲིང་སྒྲིང་མཛད་དེ་ ཁྱེད་ལུ་ངན་པ་ལས་ཡང་སྐྱབས་མཛད་གནང་འོང་།

⁴ ང་བཅས་ཀྱིས་ཁྱེད་ལུ་འབད་ཟེར་བསྐུལ་བཞག་མི་ཚུ་ ཁྱེད་ཀྱིས་འབད་དོཝ་འོང་ དེ་ལས་ཕར་འབད་དེ་རང་སྡོད་འོང་ཟེར་ གཙོ་བོ་ནང་ང་བཅས་ལུ་ཐད་རི་བར་རི་རེ་བ་ཡོད།

⁵ གཙོ་བོ་གིས་ཁྱེད་ལུ་ དཀོན་མཆོག་གི་བྱམས་པའི་ལམ་དང་ ཁིརཱིས་ཀྱི་བཀའ་སྡུག་བཟོད་ཚུགས་ནིའི་ལམ་ནང་ འཁྱིད་གནང་བཅུག།

ལཱ་ཨིན་ཅི་མིན་ཅི་འབད་དགོ་པའི་སྐོར།

⁶ དབའེ་སྤུན་ཆ་ཚུ་ ང་བཅས་ཀྱིས་ཁྱེད་ལུ་གཙོ་བོ་ཡེ་ཤུ་ཁིརཱིས་ཀྱི་མཚན་ནང་ལུ་ སྒྱིད་ངན་འབད་མི་དང་ ང་བཅས་ལས་ཐོབ་མི་ཆོས་དང་མ་མཐུན་པར་སྡོད་མི་ཚུ་དང་ ཁ་འབྲལ་ཏེ་སྡོད་ཟེར་དྲན་བསྐུལ་འབད་དོ།

⁷ ག་ཅི་སྨོ་ཟེར་བ་ཅིན་ ཁྱེད་ཀྱིས་ ང་བཅས་ག་འབད་དོཝ་བཟུམ་སྦེ་འབད་དགོཔ་ཤེས་ ང་བཅས་ཁྱེད་དང་གཅིག་ཁར་སྡོད་པའི་སྐབས་ལུ་ སྒྱིད་ངན་ཏེ་མ་སྡོད།

⁸ ཡང་ན་ ང་བཅས་ཀྱིས་ཁྱེད་ག་ལས་ཡང་ རིན་མ་སྤྲོད་པར་ལྟོ་མ་ཟ་ དེ་འབདཝ་ད་ང་བཅས་ཀྱིས་ ཁྱེད་ལུ་རྒུད་བཀལ་འོང་ཟེར་མནོ་བསམ་གཏང་སྟེ་ ཉིན་ནུབ་མེད་པར་དཀའཝ་སྤྱད་དེ་ལཱ་འབད་ཡི།

⁹ ང་བཅས་ཀྱིས་དེ་སྦེ་འབད་མིའི་དོན་དག་དེ་ ང་བཅས་ཁྱེད་ལས་རོགས་རམ་ལེན་ནི་གི་ དབང་ཚད་མེདཔ་མེན་ དེ་འབདཝ་ད་ཁྱེད་ལུ་ དཔེ་སྟོན་ནིའི་དོན་ལུ་འབད་འབདཝ་ཨིན།

¹⁰ ང་བཅས་ཁྱེད་དང་གཅིག་ཁར་སྡོད་པའི་སྐབས་ལུ་ མི་ག་ར་འབད་རུང་ ལཱ་འབད་དགོ་མ་མནོ་བ་ཅིན་ ལྟོ་ཟ་ནི་མེད་ཟེར་ ང་བཅས་ཀྱིས་ཁྱེད་ལུ་བཀའ་རྒྱ་བྱིན་ཡི།

¹¹ དེ་འབདཝ་ད་ ཁྱེད་ཀྱི་གྲལ་ཁ་ལས་ ལ་ལུ་ཅིག་ག་ནི་ཡང་མ་འབད་བར་སྒྱིད་ངན་སྦེ་སྡོད་དེ་ མི་གཞན་གྱི་ལཱ་ནང་དཀྲོག་ཁ་རྐྱབ་སྡོདཔ་ཨིན་མས་ཟེར་ སླབ་ས་ང་བཅས་ཀྱིས་གོ་ཡི།

¹² ང་བཅས་ཀྱིས་ ཡེ་ཤུ་ཁིརཱིས་ཀྱི་དབང་ཚད་ནང་ དེ་བཟུམ་གྱི་མི་ཚུ་ལུ་ སེམས་ཤུགས་བསྐྱེད་དེ་སྡོད་ཟེར་སླབ་དགོཔ་མ་ཚད་ ཁོང་རང་དགོ་མི་ལཱ་ཀྲིག་ཀྲི་འབད་དེ་ ཁོང་རང་གི་བཞེས་སྒོ་འཚོལ་ཟ་དགོ་ཟེར་བཀའ་རྒྱ་བྱིན་དོ།

¹³ དེ་འབདཝ་ད་ ཁྱེད་སྤུན་ཆ་ཚུ་གི་སྐོར་ལས་འབད་བ་ཅིན་ ལེགས་ཤོམ་འབད་ནི་ལུ་ཞེ་མ་བསུན།

¹⁴ ང་བཅས་ཀྱིས་ཨ་ནི་ཡི་གུ་ནང་བྲིས་མི་བཀོད་རྒྱ་ཚུ་ མི་ལ་ལུ་གིས་ཉེན་ཁུ་བཏབ་མ་བཏུབ་པ་ཅིན་ ཁོང་ག་དང་ག་ཨིན་ན་ ལེགས་ཤོམ་སྦེ་ངོ་བལྟ་བཞག་ དེ་ལས་ཁོང་ལུ་ངོ་ཚ་བཅུག་ནི་གི་དོན་ལུ་ ཁོང་དང་གཅིག་ཁར་འབྲེལ་བ་མ་འཐབ།

¹⁵ དེ་འབདཝ་ད་ ཁོང་ལུ་དགྲ་སྦེ་མ་བརྩིས་བར་ ཁྱེད་རང་གི་སྤུན་ཆ་བཟུམ་སྦེ་མནོ་བསམ་བཏང་སྟེ་ ཁོང་ལུ་རྣ་བ་སྐྱེལ།།

མཐའན་མཇུག་གི་བཀྲིས་སྨོན་ལམ་ཞུ་བའི་སྐོར།

¹⁶ ད་གཙོ་བོ་ཁོ་རང་ ཞི་བདེ་གི་གཙོ་བོ་ཨིནམ་ལས་ ཁྱེད་ལུ་རྟག་བུ་ ག་ཅི་ནང་རང་འབད་རུང་ ཞི་བདེ་གནང་བཅུག་ གཙོ་བོ་ཁྱེད་ག་ར་དང་མཉམ་གཅིག་བཞུགས་བཅུག

¹⁷ ང་ པའུལ་ལས་ཁྱེད་ཆ་ཁྱབ་ལུ་སྐུ་གཟུགས་བཟང་པོ་ཟེར་ ང་རང་གི་ལགཔ་གིས་ ཨ་ནི་ཚིག་བཅད་འདི་འབྲི་གཏང་དོ་ ཡི་གུ་དེ་ང་ལས་རང་ཨིན་ཟེར་བའི་ངོ་རྟགས་ཀྱི་དོན་ལུ་ ངེ་གི་ཡི་གུའི་མཐའན་མཇུག་ལུ་ དེ་སྦེ་རང་འབྲིཝ་ཨིན།

¹⁸ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་ཐུགས་རྗེ་ ཁྱེད་ག་ར་དང་གཅིག་ཁར་བཞུགས་བཅུག། །།