ཐེ་ས་ལོ་ནི་ཀ་གཉིས་པ་ལེའུ་ 2 - རྫོང་ཁ་

ཁྲིམས་དང་མ་ལྡན་མིའི་མི་གི་སྐོར།

¹ དབའེ་སྤུན་ཆ་ཚུ་ ང་བཅས་ཀྱི་གཙོ་བོ་ཡེ་ཤུ་ཁིརཱིས་བྱོན་པའི་ཉིནམ་དང་ ང་བཅས་ག་ར་ ཁོ་གི་སྐུ་མདུན་ལུ་གཅིག་ཁར་འཛོམ་ནི་གི་སྐོར་ལས་ བློ་གཅིག་སླབ་པ་ཅིན།

² གཙོ་བོ་གི་ཉིནམ་དེ་ལྷོད་ཅི་ཟེར་ ཁྱེད་ཚ་གྱང་ལང་ མགུ་འཐོམ་སྟེ་མ་སྡོད་ཟེར་སླབ་ནི་ཨིན་ ཉིནམ་དེ་གི་སྐོར་ལས་ གཞན་ཚུ་གིས་ ང་བཅས་ཀྱིས་ལུང་བསྟན་ ཡང་ན་ཁ་འཐེན་ ཡང་ན་ཡི་གུ་ནང་དེ་སྦེ་བྲིས་ཡི་ཟེར་སླབ་འོང་།

³ མི་ཚུ་གིས་ཁྱེད་ལུ་ ག་དེ་སྦེ་འབད་རུང་ མགུ་བསྐོར་ནང་བཙུགས་མ་བཅུག་ ག་ཅི་སྨོ་ཟེར་བ་ཅིན་ དང་པ་ མི་ལེ་ཤ་གིས་དཀོན་མཆོག་ལུ་ངོ་རྒོལ་འབད་དགོཔ་ཨིནམ་མ་ཚད་ ཁྲིམས་དང་མ་ལྡན་མིའི་མི་ དུས་རྒྱུན་དུ་རང་རྩ་མེད་གཏང་ནིའི་ཉེས་ཆད་ཕོག་མི་དེ་ ཕྱི་ཁར་མ་ཐོན་ཚུན་ཚོད་ གཙོ་བོ་གི་ཉིནམ་དེ་མི་འོང་།

⁴ ཁོ་གིས་ དཀོན་མཆོག་ལུ་འབད་རུང་ ལྷ་དང་སྐུ་ལུ་འབད་རུང་ མི་ཚུ་གིས་བསྟོད་པ་ཕུལ་སར་ ག་ཅི་རང་འབད་རུང་ འདི་ཚུ་ལུ་ངོ་རྒོལ་འབད་དེ་ ཁོ་གིས་ཁོ་རང་ལུ་ མཐོ་ཤོས་སྦེ་བརྩི་ནི་ཨིན་ ཁོ་དཀོན་མཆོག་གི་མགོན་ཁང་ནང་གི་བཞུགས་ཁྲི་གུ་སྡོད་སྦེ་ ཁོ་རང་དཀོན་མཆོག་ཨིན་ཟེར་སླབ་འོང་།

⁵ ང་ཁྱེད་དང་གཅིག་ཁར་སྡོད་པའི་སྐབས་ལུ་ འདི་ཚུ་གི་སྐོར་ལས་ང་གིས་ཁྱེད་ལུ་སླབ་ཅི་ འདི་ཁྱེད་ཀྱིས་མི་དྲན་པས་ག།

⁶ དཀོན་མཆོག་གི་གནང་མི་དུས་ཚོད་ཀྲིག་ཀྲི་མ་རན་མིའི་བར་དུ་ ཁྲིམས་དང་མ་ལྡན་མིའི་མི་དེ་ ཕྱི་ཁར་ཐོན་མ་བཅུག་པར་ བཀག་བཞག་མི་ཅིག་ཡོད་ དེ་ག་ཅི་ཨིན་ན་ ཁྱེད་ཀྱིས་ཤེས།

⁷ ག་ཅི་སྨོ་ཟེར་བ་ཅིན་ ཁྲིམས་ལུ་ཆ་མ་བཞག་མི་རང་བཞིན་དེ་ གསང་བ་གི་ཐོག་ལས་ ལཱ་འབད་ནི་འགོ་བཙུགས་ཚར་ཏེ་འབད་རུང་ ད་ལྟོ་བཀག་མི་འདི་ཐོན་མ་འགྱོ་ཚུན་ཚོད་ ཁྲིམས་དང་མ་ལྡན་མིའི་མི་དེ་གིས་ ལཱ་འབད་དེ་རང་སྡོད་འོང་།

⁸ གཙོ་བོ་ཡེ་ཤུ་གིས་ཁོ་ལུ་ ཁོ་རའི་ཞལ་གྱི་དབུགས་ཀྱིས་བསད་གཏང་ནི་ཨིནམ་མ་ཚད་ གཙོ་བོ་ཁོ་རའི་གཟི་བརྗིད་ནང་འབྱོནམ་ད་ དེ་ལུ་རྩ་མེད་མཛད་གནང་འོང་ དེ་འབདཝ་ད་ དེ་གི་ཧེ་མ་ ཨ་ནི་མི་ཕྱི་ཁར་ཐོན་འོངམ་ད།

⁹ ཁོ་གིས་ བདུད་ སེ་ཏཱན་གྱི་དབང་ཤུགས་ཀྱི་ཐོག་ལས་སྦེ་ རྟགས་མཚན་དང་ཧ་ལས་པའི་ལཱ་ རྫུས་མ་འབད་བ་འཐོན་འོང་།

¹⁰ དེ་ལས་ཁོ་གིས་མགུ་བསྐོར་ནང་ བཙུགས་ནི་གི་ཐབས་ཤེས་མ་འདྲཝ་དེ་ཚུ་ ལག་ལེན་འཐབ་སྟེ་ ཐར་པ་མ་ཐོབ་མིའི་མི་ཚུ་ལུ་ མགུ་བསྐོར་ནང་བཙུགས་འོང་ ག་ཅི་སྨོ་ཟེར་བ་ཅིན་ སྐྱབས་མཛད་མི་གཏམ་བདེན་པ་དེ་ལུ་ ཁོང་གིས་དགའ་མ་བཏུབ།

¹¹ དེ་སྦེ་འབད་ནི་དེ་གིས་ དཀོན་མཆོག་གིས་ཁོང་ལུ་ ཆོས་རྫུན་མ་ལུ་བདེན་འཛིན་རེ་བཅུག་ནི་སྦེ་ མགུ་འཐོམ་ནི་དབང་གནང་འོང་།

¹² དེ་ལས་ཁོང་གིས་བདེན་པ་ལུ་དད་པ་མ་བསྐྱེད་པར་ ལཱ་ངན་པ་འབད་ནི་ལུ་དགའཝ་ལས་ ཁོང་ག་ར་ལུ་ དཀོན་མཆོག་གིས་ཆདཔ་གནང་འོང་།།

ཐར་ལམ་ཐོབ་ནིའི་དོན་ལུ་བཙག་འཐུ་མཛད་གནང་བའི་སྐོར།

¹³ དེ་འབདཝ་ད་ གཙོ་བོ་གི་བྱམས་པའི་དདཔ་ཅན་སྤུན་ཆ་ཚུ་ ང་བཅས་ཀྱིས་ཁྱེད་ཀྱི་སྐོར་ལས་ དཀོན་མཆོག་ལུ་ཨ་རྟག་རང་བཀའ་དྲིན་ཆེ་ཟེར་ཞུ་སྟེ་རང་སྡོདཔ་ཨིན་ ག་ཅི་སྨོ་ཟེར་བ་ཅིན་ སྔོན་གོང་ལས་དཀོན་མཆོག་གིས་ ཁྱེད་དམ་པའི་ཐུགས་ཉིད་ཀྱི་ཐོག་ལས་སྦེ་ གཙངམ་མཛད་དེ་ བདེན་པ་ལུ་དད་པ་བསྐྱེད་དེ་ ཐར་པ་ཐོབ་བཅུག་ནི་གི་དོན་ལུ་ བཙག་འཐུ་མཛད་གནང་གནངམ་ཨིན།

¹⁴ དོན་ལས་རང་ ང་བཅས་ཀྱིས་བཤད་མི་གཏམ་བཟང་གི་ཐོག་ལས་སྦེ་ དཀོན་མཆོག་གིས་ཁྱེད་ལུ་ འདི་གི་དོན་ལུ་ འབོ་འབོཔ་ཨིན་ དེ་འབདཝ་ལས་ ཁྱེད་ཀྱིས་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་གཟི་བརྗིད་དེ་ཐོབ་ཚུགས།

¹⁵ དེ་འབདཝ་ལས་ སྤུན་ཆ་ཚུ་ དེ་གི་དོན་ལས་ དད་པ་ནང་སྒྲིང་སྒྲིང་སྦེ་སྡོད་དེ་ ང་བཅས་ཀྱི་ཁ་གིས་སླབ་མི་ཚུ་དང་ ཡི་གུ་གི་ཐོག་ལས་སྟོན་བྱིན་མི་ཆོས་ཚུ་ སེམས་ཁར་དྲན་ཏེ་ ལེགས་ཤོམ་སྦེ་བསྲུང་སྟེ་སྡོད།།

པའུལ་གྱིས་དདཔ་ཅན་ཚུ་གི་དོན་ལུ་སྨོན་ལམ་ཞུ་བའི་སྐོར།

¹⁶ ད་ ང་བཅས་ལུ་ཐུགས་རྗེ་གི་ཐོག་ལས་བྱམས་པ་མཛད་དེ་ འགྱུར་བ་མེད་པའི་སེམས་གསོ་དང་ རེ་བ་ལེགས་ཤོམ་གནང་མི་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཁོ་རང་དང་ ང་བཅས་ཀྱི་ཡབ་དཀོན་མཆོག་གིས།

¹⁷ ཁྱེད་ལུ་སེམས་གསོ་གནང་སྟེ་ ལཱ་བཟང་པོ་འབད་ནི་དང་ བློ་ལེགས་ཤོམ་སླབ་ནི་གི་དོན་ལུ་ དབང་ཤུགས་གནང་བཅུག།