ཐེ་ས་ལོ་ནི་ཀ་གཉིས་པ་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ ཡབ་དཀོན་མཆོག་དང་ གཙོ་བོ་ཡེ་ཤུ་ཁིརཱིས་ནང་ཡོད་མི་ ཁྲོམ་ ཐེ་ས་ལོ་ནི་ཀ་གི་ཆོས་ཚོགས་ལུ་ ང་ པའུལ་དང་ སཱིལ་ཝ་ནུས་དང་ ཏི་མོ་ཐི་གིས་ཁྱེད་ལུ་ ཨ་ནི་ཡི་གུ་འདི་འབྲི་དོ།

² ང་བཅས་ཀྱི་ཡབ་དཀོན་མཆོག་དང་ གཙོ་བོ་ཡེ་ཤུ་ཁིརཱིས་ཀྱིས་ ཁྱེད་ལུ་ཐུགས་རྗེ་དང་ཞི་བདེ་གནང་བཅུག།

བཀའ་དྲིན་ཆེ་ཟེར་ཞུ་དགོ་པའི་སྐོར།

³ ང་བཅས་ཀྱི་སྤུན་ཆ་ཚུ་ ཁྱེད་ཀྱི་སྐོར་ལས་ དཀོན་མཆོག་ལུ་དུས་རྟག་བུ་རང་ ང་བཅས་ཀྱིས་བཀའ་དྲིན་ཆེ་ཟེར་ཞུཝ་ཨིན་ དེ་སྦེ་ཞུ་དགོཔ་དེ་ཀྲིག་ཀྲི་ར་ཨིན་ ག་ཅི་སྨོ་ཟེར་བ་ཅིན་ ཁྱེད་ཀྱི་དད་པ་གནམ་མེད་ས་མེད་ ཡར་རྒྱས་འགྱོཝ་ཨིནམ་མ་ཚད་ ཁྱེད་རང་ གཅིག་གིས་གཅིག་ལུ་ བྱམས་པ་འབད་ནི་ཡར་སེང་འགྱོ་དེས།

⁴ དེ་འབདཝ་ལས་བརྟེན་ དཀོན་མཆོག་གི་ཆོས་ཚོགས་ཚུ་ནང་ ཁྱེད་ལུ་ག་དེ་ཅིག་གནོད་འཚེ་དང་ དཀའ་ངལ་ཚུ་བྱུང་སྟེ་འབད་རུང་ ཁྱེད་ཀྱིས་བཟོད་པ་བསྒོམས་ཏེ་ དད་པ་ནང་སྒྲིང་སྒྲིང་སྦེ་སྡོད་པའི་སྐོར་ལས་ ང་བཅས་ཀྱིས་བསྟོད་པ་རྐྱབ་ཨིན།

⁵ ཁྱེད་ལུ་གནོད་འཚེ་བཀལ་རུང་ དེ་ཚུ་བཟོད་པ་བསྒོམ་ནི་དེ་གིས་ ཁྱེད་ལུ་དཀོན་མཆོག་གི་རྒྱལ་སྲིད་ནང་འཛུལ་ནི་གི་འོས་འབབ་ཡོད་ དེ་ལས་ཨ་ནི་འདི་ དཀོན་མཆོག་གིས་ ཁྲིམས་ཕྲང་སྟེ་ཕྱེཝ་ཨིན་ཟེར་བའི་ཁུངས་བཀལཝ་ཨིན།།

ཁིརཱིས་བྱོན་ཏེ་ཁྲིམས་ཕྲང་ཕྱེ་ནི་ཨིན་ཟེར་བའི་སྐོར།

⁶ ཁྱེད་ལུ་གནོད་འཚེ་བཀལ་མི་ཚུ་ལུ་ དཀོན་མཆོག་གིས་ ལོག་སྟེ་གནོད་འཚེ་ སྐྱིན་མ་གནང་མི་འདི་ ཀྲིག་ཀྲི་རང་ཨིན།

^7-8 གཙོ་བོ་ཡེ་ཤུ་གནམ་ཁ་ལས་མེ་ལྷབ་ནང་ལུ་ ཁོ་རང་གི་ཤུགས་ཅན་ཕོ་ཉ་ཚུ་དང་གཅིག་ཁར་བྱོན་ཏེ་ དཀོན་མཆོག་དང་གཞན་འབྲེལ་མེད་ཟེར་སླབ་མི་ཚུ་ལུ་དང་ ང་བཅས་ཀྱི་གཙོ་བོ་ཡེ་ཤུ་གི་སྐོར་ལས་ གཏམ་བཟང་ལུ་མ་ཉན་མི་ཚུ་ལུ་ ཁྲིམས་གཏངམ་ད་ ཁྱེད་བསྡུག་བསྔལ་མྱོང་སྡོད་མི་ཚུ་ལུ་ ང་བཅས་དང་གཅིག་ཁར་ངལ་འཚོ་ཐོབ་ནི་ཨིན།

⁹ དཀོན་མཆོག་དང་གཞན་འབྲེལ་མེད་ཟེར་སླབ་མི་ཚུ་ལུ་ དུས་རྒྱུན་དུ་རང་རྩ་མེད་གཏང་ནི་གི་ཉེས་ཆད་ཕོག་ནི་ཨིནམ་མ་ཚད་ གཙོ་བོ་གི་སྐུ་མདུན་དང་ ཁོ་གི་གཟི་བརྗིད་དང་ལྡན་པའི་དབང་ལས་ ཁ་འབྲལ་སྡོད་འོང་།

¹⁰ དེ་ནམ་ལུ་འབྱུང་ནི་ཨིན་ན་ཟེར་བ་ཅིན་ གཙོ་བོ་བྱོན་པའི་ཉིནམ་ལུ་འབྱུང་འོང་ དེའི་ཉིནམ་ ཁོ་རའི་དམ་པའི་མི་ཚུ་ལས་བསྟོད་པ་ཐོབ་ནིའི་དོན་ལུ་དང་ ཁོ་ལུ་དད་པ་བསྐྱེད་མི་ཚུ་ ཧ་ལས་ནིའི་དོན་ལུ་ བྱོན་ནི་ཨིན་ ད་ཁྱེད་ འདི་ཚུ་གི་གྲལ་ཁར་ཚུད་འོང་ ག་ཅི་སྨོ་ཟེར་བ་ཅིན་ ང་བཅས་ཀྱིས་ཁོ་གི་སྐོར་ལས་འཛོམ་དཔང་འབདཝ་ད་ ཁྱེད་ཀྱིས་དད་པ་བསྐྱེད་ཅི།།

པའུལ་གྱིས་དདཔ་ཅན་ཚུ་གིས་དོན་ལུ་སྨོན་ལམ་ཞུ་བའི་སྐོར།

¹¹ དེ་འབདཝ་ལས་ ང་བཅས་རྟག་བུ་རང་ ཁྱེད་ཀྱི་དོན་ལུ་སྨོན་ལམ་ཞུཝ་ཨིན་ སྨོན་ལམ་ནང་དཀོན་མཆོག་གིས་ཁྱེད་ལུ་ དོན་དག་ག་ཅི་གི་དོན་ལུ་འབོ་འབོཔ་ཨིན་ན་ དེ་ནང་ཁྱེད་འོས་འབབ་ཡོད་མི་གཅིག་བྱུང་བཅུག་ དེ་ལས་ཁོ་གི་དབང་གིས་འབད་ ཁྱེད་ཀྱི་བསམ་པ་བཟང་པོ་དང་ དད་པ་གི་ལཱ་ག་ར་གྲུབ་བཅུག་ཟེར་ཞུཝ་ཨིན།

¹² དེ་འབདཝ་ལས་ མི་ག་ར་གིས་ཁྱེད་ཀྱི་ཐོག་ལས་ ང་བཅས་ཀྱི་གཙོ་བོ་ཡེ་ཤུ་གི་མཚན་ལུ་ བསྟོད་པ་དང་ཞེ་ས་ཕུལ་ནི་ཨིནམ་མ་ཚད་ ཁོ་གིས་ཁྱེད་ལུ་ཡང་བསྟོད་པ་གནང་ནི་ཨིན་ དེ་ག་ར་ང་བཅས་ཀྱི་དཀོན་མཆོག་དང་ གཙོ་བོ་ཡེ་ཤུ་ཁིརཱིས་ཀྱི་ཐུགས་རྗེ་ལས་སྦེ་ཐོབ་ནི་ཨིན།།