པེ་ཏྲོ་གཉིས་པ་ལེའུ་ 3 - རྫོང་ཁ་

གཙོ་བོ་ཡེ་ཤུ་ལོག་འབྱོན་ནིའི་ཉིནམ་གི་སྐོར།

¹ ངེ་གི་བྱམས་པའི་ཆ་རོགས་ཚུ་ ད་ཨ་ནི་ཁྱེད་ལུ་བྲིས་མི་འདི་ ངེ་གི་ཡི་གུ་གཉིས་པ་ཨིན་ ང་གིས་བྲིས་མིའི་ཡི་གུ་ གཉིས་ཆ་ར་གི་དོན་དག་འདི་གཅིག་ཨིན་ འདི་ཁྱེད་ལུ་གཤིས་རྒྱུད་བཟང་པོ་འཐོན་བཅུག་ནི་སྦེ་ དྲན་བསྐུལ་འབདཝ་ཨིན།

² ང་གིས་དྲན་བསྐུལ་འབད་མི་དེ་ཨ་ནི་ཨིན་ ཧེ་མ་ལས་ལུང་སྟོན་པ་དམ་པ་ཚུ་གིས་སླབ་མི་འདི་དང་ ཁྱེད་ཀྱི་སྐུ་ཚབ་ཚུ་ལས་རྒྱུད་དེ་ གཙོ་བོ་སྐྱབས་མགོན་གྱི་བཀའ་དེ་ དྲན་པའི་དོན་ལུ་ཨིན།

³ དང་པ་རང་ ཁྱེད་ཀྱིས་ཨ་ནི་ཧ་གོ་དགོ་ དུས་མཐའན་མཇུག་གི་ཉིནམ་འདི་ལུ་ ཁོང་རང་གི་འདོད་པ་ངན་པ་གི་དབང་དུ་འགྱོ་མི་ སྐྱོན་འཚོལ་མི་དེ་ཚུ་འོངས་ཏེ་ སྐྱོན་སློང་ནི་ཨིན།

⁴ ག་དེ་སྦེ་ཟེར་བ་ཅིན་ ཁོང་གིས་ ཁོ་ལོག་འབྱོན་ནི་ཟེར་ཁས་བླངས་བཞེས་མི་འདི་ ག་ཏེ་བྱོན་ཡི་ ད་ལྟོ་ཚུན་ཚོད་ཀྱི་བར་ན་ ག་ར་བྱུང་ཡི་ ང་བཅས་ཀྱི་ཕ་བརྒྱུད་ཡང་ག་ར་གྱོང་ཚར་ནུག་ དེ་མ་ཚད་འཇིག་རྟེན་འདི་ཧེ་མ་ལས་ ཆགས་དོཝ་བཟུམ་སྦེ་རང་འདུག་ཟེར་སླབ་འོང་།

^5-6 ག་ཅི་སྨོ་ཟེར་བ་ཅིན་ ད་རུང་ ཁོང་གིས་ དུས་ཡུན་རིངམ་གི་ཧེ་མ་ དཀོན་མཆོག་གི་གསུང་གིས་ གནམ་མཛད་ ཆུ་གི་སྤུར་ཡོད་ས་ལས་ ས་གཞི་སོ་སོ་སྦེ་ཕྱེ་ དེ་ལས་དང་ཕུགས་ཀྱི་འཛམ་གླིང་ ཆུ་རུད་སྦོམ་གྱིས་ཁྱབ་སྟེ་ རྩ་མེད་བཏང་ཡི་ཟེར་ ཁོང་གིས་ཤེས་རུང་བརྗེད་རྫུས་བཏབ་སྟེ་ སེམས་ཁར་མ་དྲན་པར་ སྣང་མེད་སྦེ་བཞག་ནུག

⁷ ཨིན་རུང་ དཀོན་མཆོག་ལུ་བལྟ་སྟེ་མ་འདྲོག་མི་ཚུ་ལུ་ ཁྲིམས་ཕྱེ་བའི་ཉིནམ་གི་དོན་ལུ་ ཨ་ནི་གསུང་དེ་གིས་རང་ ད་ལྟོ་ཡོད་མིའི་འཛམ་གླིང་དང་གནམ་འདི་ མེ་གིས་རྩ་མེད་གཏང་ནི་སྦེ་བཞག་གནང་ཡི།

⁸ དེ་འབདཝ་ད་ ངེ་གི་བྱམས་པའི་ཆ་རོགས་ཚུ་ གཙོ་བོ་གི་གཟིགས་ས་ལུ་ ཉིནམ་གཅིག་འདི་ལོ་སྟོང་ཕྲག་གཅིག་དང་ ལོ་སྟོང་ཕྲག་གཅིག་འདི་ཉིནམ་གཅིག་ཨིན་ འདི་ཁྱེད་ཀྱི་སེམས་ཁ་ལས་མ་བརྗེད།

⁹ དེ་ལས་ ཁྱེད་ལ་ལུ་ཅིག་གི་སེམས་ཁར་ གཙོ་བོ་གིས་ཁས་བླངས་བཞེས་མི་འདི་ དུས་ཡུན་འགོར་ནི་མས་ཟེར་མནོ་བསམ་དེ་སྦེ་གཏང་འོང་ ཨིན་རུང་ འདི་དུས་ཡུན་འགོརཝ་མེན་ ཁོ་གི་ཐུགས་དགོངས་འདི་ མི་ཕུད་རྡོག་གཅིག་ཡང་མེདཔ་མ་ཐལ་བར་ འགྱོད་སེམས་བསྐྱེད་དེ་ སེམས་འགྱུར་བཅུག་གེ་ཟེར་ ཁོ་བཟོད་པ་བསྒོམས་ཏེ་བཞུགསཔ་ཨིན་མས།

¹⁰ དེ་འབདཝ་ད་ གཙོ་བོའི་ཉིནམ་འདི་ ཨརཝ་བཟུམ་སྦེ་འོང་ནི་ཨིན་ དེའི་སྐབས་ གནམ་མེད་ས་མེད་ངར་སྐད་བརྐྱབས་ཏེ་ གནམ་འདི་ཡལ་འགྱོ་ནི་དང་ དེ་ནང་ཡོད་ཚད་ཅིགཔ་མེ་གིས་འཚིག་སྟེ་འགྱོ་འོང་ འཛམ་བུ་གླིང་དང་དེ་ནང་ཡོད་མི་ག་ར་ ག་ནི་ཡང་མེད་པར་མེདཔ་འགྱོ་འོང་།

^11-12 ད་ཨ་ནི་བཟུམ་སྦེ་ག་ར་བྱུང་སྟེ་འོང་ནི་ཨིན་པ་ཅིན་ ཁྱེད་ཀྱི་མི་ཚེ་འདི་ མི་ག་ཅི་བཟུམ་སྦེ་སྡོད་དགོཔ་སྨོ་ དོན་ལས་རང་ ཁྱེད་ཀྱི་མི་ཚེ་འདི་ དམ་པ་དང་ཆོས་སེམས་ཡོདཔ་སྦེ་སྡོད་ནི་ དཀོན་མཆོག་གི་ཉིནམ་འདི་མགྱོགས་པར་འོང་ནི་གི་དོན་ལུ་ ག་ཅི་འབདཝ་དྲག་ག་བལྟ་སྟེ་སྒུག་སྡོད་ནི་ འདི་ཚུ་གནམ་མེད་ས་མེད་ཁག་ཆེ་ཏོག་ཏོ་ཨིན་ ཉིནམ་དེ་ལུ་ ཁོ་གིས་གནམ་ མེ་གིས་འཚིག་སྟེ་ རྩ་མེད་གཏང་ནི་ཨིནམ་མ་ཚད་ ཡོད་ཚད་ཅིགཔ་ག་ར་ མེའི་དྲོད་ཤུགས་ཀྱིས་ཞུ་ནི་ཨིན།

¹³ དེ་འབདཝ་ད་ ང་བཅས་ཀྱིས་ ཁོ་གིས་ཁས་བླངས་བཞེས་མི་འདི་ ཞིང་ཁམས་གསརཔ་དང་ས་གཞི་གསརཔ་ དཀོན་མཆོག་གི་ཐུགས་དང་ལྡན་པའི་ཕྲངམ་གིས་གང་མི་འཛམ་གླིང་གི་དོན་ལུ་ རེ་འདོད་བསྐྱེད་དེ་སྡོད་ནི་ཨིན།།

མཐའན་མཇུག་གི་བཀྲིས་ལེགས་སྨོན་ཞུ་བའི་སྐོར།

¹⁴ ངེ་གི་བྱམས་པའི་ཆ་རོགས་ ཨ་ནི་དེ་ཚུ་འབྱུང་འོང་ཟེར་སྒུག་སྡོད་ནི་འདི་གིས་ བརྩོན་ཤུགས་བསྐྱེད་དེ་ སྡིག་པའི་ཐིག་པ་ཐག་ཐིག་སྦེ་ ཆགས་ཡོད་པའི་སྐྱོན་ཚུ་མེད་པར་ དཀོན་མཆོག་དང་གཅིག་ཁར་མཐུན་ཏོག་ཏོ་སྦེ་སྡོད་དགོ།

¹⁵ གཙོ་བོ་འདི་ ཁྱེད་ལུ་ཐར་པ་ཐོབ་བཅུག་ནི་སྦེ་ སྒོ་སྐབས་གནང་ནི་གི་དོན་ལས་ སྒུག་བཞུགསཔ་ཨིན་ཟེར་ཁྱེད་ཀྱིས་ཧ་གོ་དགོ་ ཨ་ནི་བཟུམ་སྦེ་ ང་བཅས་ཀྱི་བྱམས་པའི་སྤུན་ པའུལ་ལུ་ དཀོན་མཆོག་གིས་ཤེས་རབ་གནངམ་བཞིན་དུ།

¹⁶ ཁོ་གིས་བྲིས་མིའི་ཡི་གུ་ག་ར་ནང་ ཨ་ནི་བཟུམ་གྱི་བསྐོར་ལས་ ཁྱེད་ལུ་བྲིསཝ་ཨིན་ ཁོ་གིས་བྲིས་མིའི་བསམ་འཆར་ལ་ལུ་ཅིག་ཧ་གོ་ནི་ལ་ཁག་འདུག་ དེ་ལས་ཁོང་ལེགས་ཤོམ་སྦེ་ཧ་མ་གོ་མི་དང་ བརྟན་ཏོག་ཏོ་མེད་མི་དེ་ཚུ་གིས་ གསུང་རབ་ཀྱི་དེབ་སོ་སོ་ནང་གི་ གོ་བ་ཚུ་སོ་སོ་སྦེ་འགྱུར་བཏང་དོཝ་བཟུམ་སྦེ་ ཁོ་གིས་བྲིས་མི་ཡི་གུ་གི་གོ་བ་ཚུ་ཡང་འགྱུར་བཏངམ་མས་ དེ་སྦེ་འབདཝ་ད་ ཁོང་རང་གིས་རང་ལུ་མེདཔ་གཏངམ་ཨིན།

¹⁷ དེ་འབདཝ་ལས་ ངེ་གི་བྱམས་པའི་ཆ་རོགས་ཚུ་ ཨ་ནི་དྲནམ་བཏོན་དགོཔ་འདི་ ཁྱེད་ཀྱིས་ཧེ་མ་ལས་ཤེས་ ཁྲིམས་ནང་མ་གནས་མིའི་མི་ཚུ་བཟུམ་སྦེ་ འཛོལ་བ་གི་དབང་དུ་མ་གཏང་པར་ རང་བརྟན་ཏོག་ཏོ་ ཨིན་མི་དེ་ ཉམས་མ་བཅུག་ནིའི་དོན་ལུ་ དྲནམ་བཏོན་དགོ།

¹⁸ དེ་འབདཝ་ལས་ ང་བཅས་རང་གི་ གཙོ་བོ་དང་སྐྱབས་མགོན་ཡེ་ཤུ་ཁིརཱིས་ཀྱི་ ཐུགས་རྗེ་དང་ཤེས་རབ་ནང་ཡར་འཕེལ་འགྱོ་དགོ་ ཁོ་ལུ་གཟི་བརྗིད་དང་གུས་ཞབས་ ད་ལྟོ་དང་ཨ་རྟག་རང་ཁོ་གི་ཨིན་ནོ་ ཨ་མཱེན།། །།