པེ་ཏྲོ་གཉིས་པ་ལེའུ་ 2 - རྫོང་ཁ་

ལུང་སྟོན་པ་རྫུས་མ་གི་སྐོར་ལས།

¹ ཨཱིས་ར་ཨཱེལ་པ་དེ་ཚུ་གི་སྦུག་ལུ་ ལུང་སྟོན་པ་རྫུས་མ་ལེ་ཤ་རང་འཐོན་ཡོདཔ་བཟུམ་སྦེ་ ཁྱེད་ཀྱི་སྦུག་ལུ་ཡང་ སློབ་དཔོན་རྫུས་མ་དེ་ཚུ་ཐོན་འོང་ ཁོང་གིས་གནོད་པ་བཀལ་མི་ཆོས་རྫུས་མ་འདི་ ཆོས་བདེན་པ་བཟོ་སྟེ་ ཁོང་རང་ལུ་སྐྱབས་མཛད་མི་བདག་པོ་ལུ་ཡང་ ཁོང་གིས་དགོ་མ་བཏུབ་ དེ་ལས་ཁོང་རའི་གུ་ལུ་ མགྱོགས་པ་རང་ཉེས་ཆད་ཕོག་ནི་ཨིན།

² མི་ལེ་ཤ་གིས་ཁོང་གི་རྟིང་བདའ་འགྱོ་སྟེ་ ཁོང་ལས་མ་རབས་ཀྱི་སྤྱོད་པ་ངན་པ་དེ་ཚུ་ལྷབ་སྟེ་ ངོ་ཚ་སི་སི་གི་ལཱ་འབད་དེ་ ཁིརཱིས་ཀྱི་ལམ་བདེན་པ་འདི་ལུ་ཁོང་གིས་བློ་བཙོང་འོང་།

³ ཁོང་གིས་དགོ་འདོད་ཀྱི་གཏམ་རྫུན་མ་བཟོ་བཟོཝ་ཚུ་སྟོན་ཏེ་ ཁྱེད་ལས་ཏི་རུ་ལེན་འོང་ དེ་འབདཝ་ད་ ཧེ་མ་ལས་ ཁོང་གི་དོན་ལུ་གྲ་སྒྲིག་སྦེ་ཡོད་མིའི་ཉེས་ཆད་འདི་ ལམ་ཁར་ཡོད་ མགྱོགས་པ་རང་ཁོང་གི་གུ་ཕོག་སྟེ་ བརླག་གཏང་འོང་།

⁴ འགོ་དང་པ་གི་ཕོ་ཉ་དེ་ཚུ་གིས་སྡིག་པ་འབདཝ་ད་ ཁྲིམས་ཕྱེ་བའི་ཉིནམ་ཚུན་ཚོད་ ཁོང་ལུ་མར་ས་འོག་གི་བཙོན་ཁང་གནག་དུང་དུ་ནང་བཙུགས་ཏེ་ ལྕགས་ཐག་གིས་བསྡམ་བཞག་ནུག་ ཁོང་ཕོ་ཉ་འབད་རུང་ དཀོན་མཆོག་གིས་ཁོང་ལུ་ཐར་མ་གཏང་པས།

⁵ དེ་ལས་དང་ཕུགས་ ནོ་ཝ་གི་སྐབས་ལུ་ དཀོན་མཆོག་གི་ཐུགས་དང་ལྡན་པའི་ཕྲངམ་གི་ ཆོས་བཤད་མི་ ནོ་ཝ་ཁོ་རང་དང་ ཁོ་གི་བཟའ་ཚན་བདུན་ལུ་ དཀོན་མཆོག་གིས་སྐྱོན་ག་ནི་ཡང་ཕོག་མ་བཅུག་པར་བཞག་གནང་རུང་ དཀོན་མཆོག་ལུ་བལྟ་སྟེ་མ་འདྲོག་མི་ཚུ་ལུ་ ཐར་མ་གཏང་པར་ ཆུ་རུད་ཀྱིས་མེདཔ་བཏང་གནང་ནུག

⁶ འདི་བཟུམ་སྦེ་རང་ དཀོན་མཆོག་ལུ་མ་འདྲོག་མིའི་མི་རབས་ངན་པ་དེ་ཚུ་ལུ་ ཤུལ་ལས་ཉེས་ཁྲིམས་ག་དེ་སྦེ་ཕོག་ནི་ཨིན་ན་ ཁོ་གིས་ དཔེ་འདི་ ཁྲོམ་ སོ་དོམ་དང་ གོ་མོ་ར་ མེ་གིས་འཚིག་བཅུག་སྟེ་ ཐལཝ་ལུ་འགྱུར་བཅུག་ཞིནམ་ལས་ འཛམ་གླིང་ནང་ལས་འཕྱག་བཏང་གནང་མི་བཟུམ་ཅིག་མཛད་ནུག

⁷ དེ་སྦེ་ཨིན་ཏེ་འབད་རུང་ ཆོས་སེམས་ཡོད་མི་ ལཱུད་ཀྱིས་ ཁྲོམ་འདི་ནང་གི་ཉེས་པ་དང་འདོད་ཆགས་ཀྱི་ལཱ་མ་གཙངམ་དེ་ཚུ་ལུ་བལྟ་སྟེ་ ཁོ་ཁམས་ཕོག་རྐྱབ་སྟེ་སྡོད་ཅི་ དེ་ལས་ ཁོ་ ཁྲོམ་ སོ་དོམ་ལུ་ ཕོག་པའི་ཉེས་ཁྲིམས་འདི་ནང་ལས་ དཀོན་མཆོག་གིས་སྐྱབས་མཛད་གནང་ནུག

⁸ ག་ཅི་སྨོ་ཟེར་བ་ཅིན་ ཁོ་ཨ་རྟག་རང་ལཱ་ངན་པ་འབད་མི་དེ་ཚུ་དང་གཅིག་ཁར་སྡོད་དེ་ ཉིནམ་རེ་འཆར་རང་ དེ་ལུ་མིག་གིས་མཐོང་ རྣ་བ་གོཝ་ད་ ཁོ་ཆོས་སེམས་ཡོད་ནི་དེ་གིས་ དཀའ་ངལ་མྱོང་སྟེ་སྡོད་སྡོདཔ་མས།

⁹ དེ་འབདཝ་ལས་བརྟེན་ཏེ་ ང་བཅས་ཀྱིས་དེ་ཧ་གོ་ཚུགསཔ་ ཆོས་སེམས་ཡོད་མི་ཚུ་ལུ་ ཁོ་གིས་བར་ཆད་ནང་ལས་སྐྱབས་མཛད་ནི་ དེ་ལས་མི་ངན་པ་ཚུ་ལུ་ མཐའན་མཇུག་གི་ཁྲིམས་ཕྱེ་བའི་ཉིནམ་ཚུན་ཚོད་ལུ་ ཁྲིམས་ཀྱི་འོག་ལུ་ ག་དེ་སྦེ་བཞག་དགོཔ་ཨིན་ན་ འདི་ག་ར་གཙོ་བོ་ཁོ་རང་གིས་མཁྱེན།

¹⁰ དེ་ལས་ དོན་ལས་རང་ ཨ་ནི་ཁྲིམས་འདི་ ཁོང་རང་གི་འདོད་པ་བཞིན་དུ་ རང་བཞིན་ངན་པ་གི་ཐོག་ལས་སྦེ་སྡོད་མི་ཚུ་དང་དཀོན་མཆོག་གི་དབང་ཚད་ལུ་ གུས་ཞབས་མ་འབད་མི་དེ་ཚུ་ལུ་གཏང་ནི་ཨིན། ཨ་ནི་ལྟ་བ་མཐོ་དྲགས་དང་ ཁམས་ཆེ་དྲགས་ཀྱི་སློབ་དཔོན་རྫུས་མ་དེ་ཚུ་གིས་ མཐོ་བའི་གཟི་བརྗིད་ཡོད་མི་ཚུ་ལུ་ ཁ་ངན་སླབ་སྟེ་རྒོལཝ་མ་ཚད་ མི་འདྲོག་པས།

¹¹ དེ་འབདཝ་ད་ ཕོ་ཉ་དེ་ཚུ་ སློབ་དཔོན་རྫུས་མ་ཚུ་ལས་ དབང་དང་ཤུགས་གནམ་མེད་ས་མེད་ སྦོམ་ཡོད་དེ་འབད་རུང་ སློབ་དཔོན་བཟུམ་སྦེ་གཙོ་བོ་གི་སྐུ་མདུན་ལུ་ མཐོ་བའི་གཟི་བརྗིད་ཡོད་མི་ཚུ་གི་སྐོར་ལས་ ཁ་ངན་སླབ་སྟེ་རྒོལ་ནི་ལུ་ ཁོང་ཕོ་ཉ་ཚུ་འདྲོགཔ་ཨིན་མས།

¹² ཨ་ནི་མི་དེ་ཚུ་ བློ་རིག་མེད་པའི་སེམས་ཅན་བཟུམ་སྦེ་ ཁོང་རའི་རང་བཞིན་གྱིས་ག་སླབ་མི་འདི་འབད་དེ་ རི་དྭགས་སེམས་ཅན་བཟུམ་སྦེ་ཨིན་ ཁོང་རང་གིས་ཧ་མ་གོ་མི་འདི་ཚུ་གི་སྐོར་ལས་ ཁོ་རང་གིས་ཁ་ངན་སླབ་ཨིན་མས་ ད་རུང་ རི་དྭགས་སེམས་ཅན་ མི་ཚུ་གིས་བཟུང་སྟེ་གསད་པའི་ཕྱོགས་སུ་འགྱོ་དོཝ་བཟུམ་སྦེ་ ཁོང་རང་གི་འབད་བཞག་ངན་པ་དེ་གིས་ དོན་ལས་རང་ ཁོང་རང་ལུ་མེདཔ་བཏང་སྟེ།

¹³ ཁོང་ གནོད་པ་བཀལ་མི་གི་ཚབ་ལུ་ ལོག་སྟེ་རང་ ཁོང་ལུ་གནོད་རྐྱེན་བྱུང་དགོ། ཁོང་ཉིན་མ་ སྒྲིག་ཁྲིམས་མེད་པའི་ཚོགས་སྟོན་འབད་ནི་ལུ་ དགའ་སྤྲོ་འགྱུརཝ་ཨིན་ ཁོང་ཁྱེད་ཀྱི་སྦུག་ལུ་བློ་བཙོང་སི་སི་དང་ སྐྱོན་ཆགས་ཏེ་ཡོད་མི་ཚུ་ཨིན་ ཁོང་གིས་གཡོ་སྒྱུ་རྐྱབ་ནི་ལུ་དགའ་སྟེ་ མཚམས་ཚོད་མ་ཤེས་པར་ ལོངས་སྤྱོད་དེ་ ཁྱེད་དང་གཅིག་ཁར་ཟ་སྡོདཔ་ཨིན།

¹⁴ ཁོང་གི་མིག་ཏོ་གིས་ ལུས་འབྲེལ་འབདཝ་མས་ ཁོང་གིས་ལཱ་ངན་པ་ག་དེ་ཅིག་འབད་རུང་ ཚིམས་ནི་མིན་འདུག་ ཁོང་གིས་དད་པ་ཉུང་དྲགས་འབད་མི་ཚུ་ལུ་ སྡིག་པ་གི་ཧིང་ནང་བཙུགཔ་མ་ཚད་ ཁོང་རང་ལུ་འདོད་པ་བཙོང་ནི་གི་སྦྱོང་བརྡར་འབདཝ་ཨིན་མས་ ཁོང་ཆདཔ་ཕོག་མི་བུ་གཞི་ཨིན།

¹⁵ ཨ་ནི་སློབ་དཔོན་རྫུས་མ་དེ་ཚུ་ ཕྲང་ལམ་བྱང་སྟེ་ ལམ་རྫུས་མ་བདའ་སྟེ་འགྱོཝ་ཨིན་མས་ ཁོང་ལཱ་ངན་པ་གི་འབྲས་བུ་ལུ་དགའ་མི་ བེ་ཨོར་གྱི་བུ་ བ་ལམ་གྱི་རྟིང་བདའ་འགྱོཝ་ཨིན་མས།

¹⁶ དེ་འབདཝ་ད་ ཁ་སླབ་མ་ཤེས་པའི་བོང་ཀུ་དེ་གིས་ ཁྱོད་ཀྱིས་སྡིག་པ་འབད་བ་འགྱོ་དོ་ཟེར་ མི་གི་སྐད་ནང་ཁ་སླབ་སྟེ་ འཆོལ་ལོང་གི་འབད་བཞག་སྒྲིག་ས་ལས་ལུང་སྟོན་པ་ བ་ལམ་འདི་ལུ་བཀག་ནུག

¹⁷ ཨ་ནི་སློབ་དཔོན་རྫུས་མ་དེ་ཚུ་ ཆུ་མེད་པའི་ཆུ་རྐ་དང་ རླུང་གིས་འཐུ་འབག་མི་ས་སྨུག་བཟུམ་སྦེ་ཨིན་ ཁོང་གི་དོན་ལུ་ མུན་པའི་གནག་དུང་འདི་བཞག་ཡོདཔ་ཨིན།

¹⁸ ག་ཅི་སྨོ་ཟེར་བ་ཅིན་ ཁོང་མི་རྩ་རྒས་བཟུམ་ ང་རྒྱལ་ལངས་ཏེ་བློ་སླབ་ཨིན་མས་ ཡུད་ཙམ་ཅིག་གཟུགས་ཀྱི་རང་བཞིན་དང་འཁྲིལ་ཏེ་སྡོད་ནི་ལས་ཐར་ཏེ་ ཕྲང་ལམ་བདའ་འགྱོ་སྡོདཔ་ད་ ཁོང་སློབ་དཔོན་རྫུས་མ་ཚུ་གིས་ གཟུགས་ཀྱི་རང་བཞིན་འདོད་ཆགས་ལས་སྦེ་གཡོ་སྒྱུ་བརྐྱབས་ཏེ་ ད་རུང་སྡིག་པའི་ཧིང་ནང་བཙུགཔ་ཨིན་མས།

¹⁹ ཁོང་གིས་ཨ་ནི་མི་ཚུ་ལུ་རང་དབང་བྱིན་ནི་ཟེར་ཁ་ཚིག་བྱིནམ་ཨིན་མས་ དེ་འབདཝ་ད་ ཁོང་རང་སྡིག་པའི་གཡོགཔོ་ སྤྱོད་ངན་འབད་མི་ཚུ་ཨིན་མས་ ག་ཅི་སྨོ་ཟེར་བ་ཅིན་ རང་ལུ་དབང་མི་འདོད་པ་འདི་ ག་ཅི་ཨིན་རུང་ ཨ་ནི་གི་གཡོགཔོ་སྦེ་ ང་བཅས་བྱུངམ་ཨིན།

²⁰ ང་བཅས་ཀྱི་གཙོ་བོ་ སྐྱབས་མགོན་ཡེ་ཤུ་ཁིརཱིས་ ངོ་ཤེསཔ་ལས་བརྟེན་ཏེ་ འཇིག་རྟེན་གྱི་ངན་པ་དེ་ཚུ་ལས་རང་དབང་ཐོབ་སྟེ་ཨིན་རུང་ ཁོང་ལོག་སྟེ་ འདི་ནང་རང་བཅའ་མར་གཏོགས་ འདོད་པའི་དབང་དུ་བཏང་སྟེ་འབད་བ་ཅིན་ ཁོང་ཧེ་མ་ལས་ཡང་ཐེབས་སྦེ་མཐའ་རྡུགས་སི་སི་འགྱོ་འོང་།

²¹ ག་ཅི་སྨོ་ཟེར་བ་ཅིན་ ཁོང་ལུ་གནང་མི་ དམ་པའི་བཀའ་ཧ་གོ་སྟེ་ རྒྱབ་བཤུད་རྐྱབ་འགྱོཝ་བ་འདི་ དཀོན་མཆོག་གི་ཐུགས་དང་ལྡན་པའི་ཕྲངམ་ལམ་དེ་ ཁོང་གིས་ཤེས་རང་མ་ཤེས་པ་ཅིན་ ལེགས་ཤོམ་འགྱོ་འགྱོཝ་འོང་།

²² རོ་ཁྱི་དེ་ཁོ་རང་གིས་ཁ་ལས་བསྐྱུག་བཞག་མི་འདི་ལོག་སྟེ་ཟ་བ་འགྱོཝ་ཨིན་ ཕགཔ་དེ་ག་དེ་ཅིག་ཆུ་འཁྱུ་རུང་ ཧེ་མ་ཁོ་རང་སྡོད་སའི་འདམ་པ་དེ་ནང་རང་ལོག་འགྱོཝ་ཨིན་ཟེར་ བདེན་པའི་དཔེ་དང་འཁྲིལ་ཏེ་ ཁོང་ལུ་ཡང་བྱུང་ནུག།