པེ་ཏྲོ་གཉིས་པ་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ ཨ་ནི་ཡི་གུ་འདི་ ཡེ་ཤུ་ཁིརཱིས་ཀྱི་ཕྱག་ཞུ་མི་སྐུ་ཚབ་ ང་ སི་མཱོན་པེ་ཏྲོ་གིས་ ང་བཅས་རའི་དཀོན་མཆོག་ སྐྱབས་མགོན་ཡེ་ཤུ་ཁིརཱིས་ཀྱི་ དྲང་བདེན་གྱི་རྒྱུད་ལས་སྦེ་ ང་བཅས་ཀྱི་དད་པ་བཟུམ་སྦེ་ ཁྱེད་ཀྱི་དད་པ་ཡང་ རིན་ཐང་ཅན་བཟུམ་སྦེ་ཐོབ་སྟེ་ཡོད་མི་ཚུ་ལུ་བྲིས་དོ།

² དཀོན་མཆོག་དང་ང་བཅས་ཀྱི་གཙོ་བོ་ཡེ་ཤུ་ཁིརཱིས་ལུ་ ངོ་ཤེས་པའི་ཐོག་ལས་ ཁྱེད་ལུ་ཐུགས་རྗེ་དང་ཞི་བདེ་གནང་བར་ཤོག།

མི་ཚེ་དོན་དག་དང་ལྡནམ་སྦེ་སྡོད་དགོ་པའི་སྐོར།

³ དཀོན་མཆོག་གིས་ ཁོ་རའི་ཡ་མཚན་ཆེ་བའི་གཟི་བརྗིད་དང་མཆོག་ཏུ་གྱུར་པའི་རང་བཞིན་གྱི་རྒྱུད་ལས་ ང་བཅས་ལུ་ཁོ་རའི་མི་སྦེ་འབོ་གནང་ཡི་ དེ་ལས་ ང་བཅས་ཀྱིས་ཁོ་ལེགས་ཤོམ་སྦེ་ ངོ་ཤེས་ཞིནམ་ད་ ཁོ་རའི་དབང་ཤུགས་ཀྱིས་ ང་བཅས་ཀྱི་ནང་ན་ཕྱག་ལཱ་མཛད་དེ་ ང་བཅས་ཆོས་སེམས་བསྐྱེད་ནི་སྦེ་ ཁག་ཆེཝ་འདི་ཚུ་ག་ར་གནང་སྟེ་ཡོད།

⁴ དེ་གིས་འབད་ ཁོ་རའི་གཟི་བརྗིད་དང་མཆོག་ཏུ་གྱུར་པའི་རང་བཞིན་གྱི་ཐོག་ལས་ ང་བཅས་ལུ་རིན་གོང་ཆེ་བའི་ ཁས་བླངས་སྦོམ་དེ་ཚུ་གནང་སྟེ་ཡོད་ ཨ་ནི་ཁས་བླངས་ཚུ་གིས་འབད་དེ་ ཁྱེད་ཆ་ཁྱབ་ ཁོ་གི་རང་བཞིན་ནང་བཅའ་མར་གཏོགས་ཚུགསཔ་མ་ཚད་ འཇིག་རྟེན་ནང་གི་འདོད་ཆགས་ངན་པ་ མི་ལུ་མེདཔ་གཏང་མི་ཚུ་ལས་ ཁྱེད་བྱོག་ཐལ་ཚུགས།

⁵ ག་ཅི་སྨོ་ཟེར་བ་ཅིན་ རྒྱུ་མཚན་དེ་ལས་བརྟེན་ཏེ་ ཁྱེད་རང་གི་དད་པ་ཡར་སེང་རྐྱབ་ནི་གི་དོན་ལུ་ དད་པ་དེའི་གུ་སྤྱོད་བཟང་ སྤྱོད་བཟང་དེའི་གུ་ཤེས་རབ།

⁶ ཤེས་རབ་དེའི་གུ་མཚམས་ཚོད་ཤེས་ནི་ མཚམས་ཚོད་ཤེས་ནི་དེའི་གུ་བཟོད་པ་ བཟོད་པ་དེའི་གུ་ཆོས་སེམས།

⁷ ཆོས་སེམས་དེའི་གུ་ སྤུན་ཆ་བར་ན་གི་བྱམས་བརྩེ་ བྱམས་བརྩེ་དེའི་གུ་ ག་ར་ལུ་བྱམས་པ་ དེ་ཚུ་ག་ར་ ཁྱེད་ཀྱི་མི་ཚེ་ནང་ལུ་ སྤུས་ཚད་ལེགས་ཤོམ་ཡོད་མི་འདི་ཚུ་ཐེབས་སྦེ་འབད་དགོ།

⁸ ག་ཅི་སྨོ་ཟེར་བ་ཅིན་ ཨ་ནི་དེ་ཚུ་ ག་ར་ཁྱེད་ཀྱི་མི་ཚེ་ནང་ཡར་རྒྱས་འགྱོ་བ་ཅིན་ འབྲས་བུ་མེདཔ་དང་ཕན་ཐོགས་མེདཔ་ འགྱོ་ནི་ཚུ་ལས་བཀག་སྟེ་ ཁྱེད་ཡེ་ཤུ་ཁིརཱིས་ཀྱི་ཡོན་ཏན་དང་ལྡནམ་སྦེ་སྡོད་འོང་།

⁹ དེ་འབདཝ་ད་ ཨ་ནི་མེད་མི་འདི་ ཐག་རིང་ས་གི་ཅ་ལ་ ག་ཅི་ཡང་མ་མཐོང་མི་ མིག་ཏོ་ཞརཝ་བཟུམ་སྦེ་ཨིན་ དེ་གིས་ ཧེ་མ་གི་སྡིག་པ་དག་སོང་མི་ཚུ་ དཔྱད་རིག་མ་གཏང་བར་ བརྗེད་སོང་མི་གཅིག་ཨིན།

¹⁰ དེ་འབདཝ་ལས་ སྤུན་ཆ་ཚུ་ དཀོན་མཆོག་གིས་ཁྱེད་ལུ་འབོ་སྟེ་ཡོད་མི་དང་ བཙག་འཐུ་གནང་སྟེ་ཡོད་མི་འདི་ དོན་ལས་རང་ བརྟན་ཏོག་ཏོ་སྦེ་གྲུབ་ནི་ལུ་ སྤུས་ཚད་ལེགས་ཤོམ་ཡོད་མི་འདི་ཚུ་ རྩ་འགེངས་ཏེ་འབད་དགོ་ འདི་བཟུམ་སྦེ་འབད་བ་ཅིན་ ཁྱེད་ནམ་ཡང་འཐུས་མི་ཤོར།

¹¹ དེ་ལས་ཨ་ནི་བཟུམ་སྦེ་ ང་བཅས་རང་གི་གཙོ་བོ་དང་སྐྱབས་མགོན་ཡེ་ཤུ་ཁིརཱིས་ཀྱི་ མཐའ་མེད་པའི་རྒྱལ་སྲིད་ནང་ དཀོན་མཆོག་གིས་ ཕུན་སུམ་ཚོགས་པ་དང་བཅསཔ་སྦེ་ སྒོ་ཕྱེ་གནང་སྟེ་ ཁྱེད་ཆ་ཁྱབ་ཀྱིས་འཛུལ་ནི་ཐོབ་འོང་།།

པེ་ཏྲོ་ཁོ་རང་འཛམ་གླིང་སྤང་སྟེ་འགྱོ་དགོ་པའི་སྐོར།

¹² དེ་ལས་ཨ་ནི་ལོ་རྒྱུས་དེ་ཚུ་ ཧེ་མ་ལས་ཁྱེད་ཆ་ཁྱབ་ཀྱིས་ཤེསཔ་ལས་བརྟེན་ བདེན་པ་དེ་ཨ་རྟག་རང་ཁྱེད་ནང་ སྒྲིང་སྒྲིང་སྦེ་བཟུང་བཞགཔ་ཨིན་རུང་ ང་གིས་ཁྱེད་ལུ་དྲན་བསྐུལ་འབདཝ་ཨིན།

¹³ ང་རང་ཨ་ནི་ལུས་ཀྱི་ཕུང་པོ་དེ་ནང་ སྡོད་པའི་རིང་ལུ་ ཨ་ནི་ལོ་རྒྱུས་དེ་ཚུ་གི་སྐོར་ལས་ ཁྱེད་ཀྱི་སེམས་ཁར་དྲན་བསྐུལ་འབད་ནི་འདི་ ཀྲིག་ཀྲི་ཨིན་ཟེར་ ང་རང་གིས་མནོ་བསམ་གཏངམ་ཨིན།

¹⁴ ག་ཅི་སྨོ་ཟེར་བ་ཅིན་ ང་ནཱ་འཛམ་བུ་གླིང་ནང་ སྡོད་ནི་གི་དུས་ཚོད་དེ་ལེ་ཤ་མེད་ མགྱོགས་པ་རང་ང་ཤི་འོང་ཟེར་ གཙོ་བོ་ཡེ་ཤུ་ཁིརཱིས་ཀྱིས་ང་ལུ་སྟོན་གནང་ཡི།

¹⁵ འདི་འབདཝ་ལས་ ང་ཤི་ཚར་བའི་ཤུལ་ལས་ཡང་ ཁྱེད་ཀྱིས་ཨ་ནི་ལོ་རྒྱུས་ཚུ་ དུས་ནམ་རང་འབད་རུང་ ཁྱེད་ཀྱི་སེམས་ཁར་ལུ་དྲན་བཅུག་གེ་ཟེར་ ང་རྩ་འགེངསམ་ཨིན།།

གཙོ་བོ་ཡེ་ཤུ་ཁིརཱིས་ལོག་འབྱོན་ནི་དེ་ཏན་ཏན་ཨིན་པའི་སྐོར།

¹⁶ དེ་ལས་ང་བཅས་ཀྱིས་ཁྱེད་ལུ་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ དབང་ཤུགས་ཀྱི་ཐོག་ལས་ལོག་འབྱོན་ནི་སྐོར་ལས་བཤདཔ་ད་ མི་རིག་པ་ཅན་ཚུ་གིས་ མགུ་སྐོར་རྐྱབ་ནི་གི་དོན་ལུ་བཟོ་ཡོད་པའི་གཏམ་ཚུ་བཟུམ་སྦེ་མེན་ དེ་འབདཝ་ད་ ང་བཅས་རང་གི་མིག་ཏོ་གིས་མཐོང་མི་ ཁོ་རའི་གཟི་བརྗིད་ཀྱི་འཛོམ་དཔང་བཤདཔ་ཨིན།

¹⁷ ག་ཅི་སྨོ་ཟེར་བ་ཅིན་ ཁོ་གིས་ ཡབ་དཀོན་མཆོག་ལས་ གུས་ཞབས་དང་བསྟོད་པ་ཐོབ་པའི་སྐབས་ལུ་ མཆོག་ཏུ་གྱུར་པའི་གཟི་བརྗིད་ལས་ ཨ་ནི་ངེ་གི་བུ་གཅེས་ཤོས་ཕངས་ཤོས་འདི་ཨིན་ ཁོ་ལུ་བལྟ་སྟེ་ ང་གནམ་མེད་ས་མེད་ངལ་རངས་ཡི་ཟེར་ གསུང་སྐད་གཅིག་གིས་གསུངསམ་ད།

¹⁸ ང་བཅས་ཀྱིས་ཡང་གནམ་ཁར་ལས་གསུང་སྐད་འདི་གོ་ཡི་ ག་ཅི་སྨོ་ཟེར་བ་ཅིན་ དེའི་སྐབས་ང་བཅས་ཁོ་དང་མཉམ་དམ་པའི་སྒང་གུ་སྡོད་སྡོདཔ་ཨིན།

¹⁹ ཉམས་མྱོང་དེ་ཚུ་ལས་བརྟེན་ཏེ་ ལུང་སྟོན་པ་ཚུ་གིས་བཤད་མི་གཏམ་འདི་ལུ་ ང་བཅས་བློ་གཏདཔ་ཨིན་ ཁོང་གིས་བྲིས་བཞག་མི་ལུ་ ཁྱེད་ཀྱིས་དྲནམ་བཏོན་ཏེ་བལྟ་དགོ་ ག་ཅི་སྨོ་ཟེར་བ་ཅིན་ འདྲོ་པ་ནམ་མ་ནངས་ཚུན་ཚོད་ གནག་དུང་ནང་ལུ་ཤར་མི་ ས་ཏི་གི་འོད་དེ་ལུ་བལྟ་དོཝ་བཟུམ་སྦེ་ ཁིརཱིས་ཀྱིས་ ཐོ་རངས་སྐར་ཆེན་གྱི་འོད་བཟུམ་སྦེ་ འབད་མི་དེ་ ཁྱེད་ཀྱི་སེམས་ཁར་མ་ཤར་ཚུན་ཚོད་ ལུང་སྟོན་པ་གི་གསུང་དེ་ལུ་ཡང་ ཉན་ཁུག་བཏབ་སྟེ་སྡོད་པ་ཅིན་ ཁྱེད་ལུ་ལེགས་ཤོམ་འབྱུང་འོང་།

²⁰ དང་པ་ ཁྱེད་ཀྱིས་ག་ར་ལས་ཧ་གོ་དགོཔ་འདི་ གསུང་རབ་ནང་ལུང་སྟོན་པ་ག་གིས་ཡང་ ཁོང་རང་གི་མནོ་བསམ་བཞིན་དུ་མ་འབྲི།

²¹ ག་ཅི་སྨོ་ཟེར་བ་ཅིན་ ལུང་སྟོན་པ་ག་གིས་ཡང་ མིའི་འདོད་པ་བཞིན་དུ་མེན་པར་ དཀོན་མཆོག་གིས་གསུངས་མིའི་ལུང་བསྟན་འདི་ དམ་པའི་ཐུགས་ཉིད་ཀྱིས་ལམ་སྟོན་མཛད་དེ་ ལུང་སྟོན་པ་གིས་གསུངསམ་ཨིན།།