ཀོ་རཱིན་ཐི་གཉིས་པ་ལེའུ་ 9 - རྫོང་ཁ་

གྲོགས་རམ་འབད་བའི་དོན་ལུ་མ་དངུལ་བསྡུ་བའི་སྐོར།

¹ ད་ དཀོན་མཆོག་ཁོ་རའི་དམ་པའི་མི་ཚུ་ལུ་ གྲོགས་རམ་འབད་དགོ་པའི་སྐོར་ལས་ ཁྱེད་ལུ་ལེ་ཤ་འབྲི་དགོཔ་ཅིག་མིན་འདུག

² ག་ཅི་སྨོ་ཟེར་བ་ཅིན་ ཁྱེད་ཀྱིས་ཆ་རོགས་འབད་ནི་གི་བློ་འདོད་ཡོད་མི་འདི་ ང་གིས་ཤེས་ དེ་ལས་ ང་གིས་ མ་ཀེ་དོ་ནི་ཡ་གི་སྤུན་ཆ་ཚུ་ལུ་ ཁྱེད་ ཀོ་རཱིན་ཐི་པའི་སྤུན་ཆ་ཚུ་གིས་ ན་ཧིང་གི་ལོ་ནང་ལས་རང་ གྲོགས་རམ་གྱི་མ་དངུལ་བསྡུ་སྟེ་ སྐྱེལ་ཆོག་ཆོག་སྦེ་གྲ་སྒྲིག་བརྐྱབས་ཏེ་འདུག་ཟེར་ ཁྱེད་ཀྱི་སྐོར་ལས་བསྟོད་པ་བརྐྱབས་ཅི་ ད་ ཁྱེད་ཀྱི་དང་འདོད་དེ་གིས་ ཁོང་ མ་ཀེ་དོ་ནི་ཡ་གི་སྤུན་ཆ་ལེ་ཤ་ཅིག་ལུ་རང་ ཆ་རོགས་འབད་ནིའི་སེམས་ཤུགས་བསྐྱེད་བཅུག་ཅི།

³ དེ་འབདཝ་ད་ ང་གིས་ ཨ་ནི་སྤུན་ཆ་ཚུ་བཏང་དོ་ ག་ཅི་འབད་ཟེར་བ་ཅིན་ ཁྱེད་ཀྱི་སྐོར་ལས་ ང་གིས་ བསྟོད་པ་རྐྱབ་མི་འདི་བདེན་པ་སྦེ་འབྱུང་ནིའི་དོན་ལུ་དང་ ལྷག་པར་དུ་ ང་གིས་སླབ་མི་འདི་ ཁུངས་དང་ལྡནམ་སྦེ་འཐོན་ཏེ་ མ་དངུལ་ཚུ་བསྡུ་སྟེ་གྲ་སྒྲིག་སྦེ་ཡོད་མི་དེ་ མཐོང་བཅུག་ནི་སྦེ་ཨིན།

⁴ ག་དེམ་ཅིག་སྦེ་ མ་ཀེ་དོ་ནི་ཡ་གི་མི་དེ་ཚུ་ ང་དང་མཉམ་གཅིག་འོངས་ཏེ་ ཁྱེད་ཀྱིས་ཆ་རོགས་འབད་ནི་ལུ་ གྲ་སྒྲིག་མེདཔ་མཐོང་པ་ཅིན་ ཁྱེད་ཀྱི་སྐོར་ལས་ ང་གིས་བསྟོད་པ་རྐྱབ་མི་འདི་ བློ་བཙོང་སི་སི་འགྱོ་འོང་ ལྷག་པར་དུ་ ཁྱེད་རང་ཆ་ཁྱབ་ཡང་ ག་དེམ་ཅིག་ངོ་ཚ་སི་སི་སྦེ་འགྱོ་ནི་སྨོ།

⁵ དེ་འབདཝ་ལས་ ཨ་ནི་སྤུན་ཆ་འདི་ཚུ་ ངེ་གི་ཧེ་མ་ལས་གཏང་དགོཔ་དེ་ ཁག་ཆེ་བས་ཟེར་མནོ་ཡི་ ད་ ཁྱེད་ཀྱིས་ཁས་ལེན་འབད་ཚར་མི་གྲོགས་རམ་དེ་ཚུ་ གྲ་སྒྲིག་བརྐྱབ་ནི་ལུ་ཡང་ ཁོང་གིས་ཆ་རོགས་འབད་ཚུགས་ ཨིན་རུང་ དེ་ཚུ་ ཁྱེད་ལུ་ ང་བཅས་ཀྱིས་ དབང་བཙོང་གི་ཐོག་ལས་ ལེན་དོཝ་བཟུམ་མེན་པར་ ཁྱེད་ ཁྱེད་རང་གི་ སྤྲོ་བ་བསྐྱེད་དེ་བྱིནམ་ཨིན་ཟེར་བའི་ རེ་བ་བསྐྱེད་དེ་ཡོད།

⁶ དཔེ་གཅིག་འབད་བ་ཅིན་ མི་གཅིག་གིས་ སོན་ཨ་ཙི་ཅིག་གཏོར་བ་ཅིན་ ལོ་ཐོག་ཡང་ཨ་ཙི་ཅིག་ལས་བརྒལ་མི་ཐོབ་ སོན་འབོལ་ཏོག་ཏོ་སྦེ་གཏོར་བ་ཅིན་ མི་འདི་གིས་ ལོ་ཐོག་ཡང་འབོལ་ཏོག་ཏོ་སྦེ་ཐོབ་ནི་ཨིན།

⁷ ཁྱེད་མི་རེ་རེ་གིས་ རང་གི་སེམས་ཁར་ལས་ ག་དེམ་ཅིག་བྱིན་ནི་ཨིན་ན་ ཐག་བཅད་དེ་བཟོ་ཚར་མི་འདི་བྱིན་དགོ་ བྱིན་ཐབས་མེད་པར་མ་བྱིན་ ག་ཅི་སྨོ་ཟེར་བ་ཅིན་ སྤྲོ་བ་གི་ཐོག་ལས་གྲོགས་རམ་འབད་མིའི་མི་དེ་ ག་ར་ཨིན་རུང་ དཀོན་མཆོག་གིས་ཁོ་ལུ་ཐུགས་དགྱེསཔ་ཨིན།

⁸ དེ་ལས་དཀོན་མཆོག་གིས་ ཁྱེད་ལུ་དགོ་མི་ཚུ་ག་ར་ ཁྱེད་རང་གིས་མནོ་མི་ལས་ཡང་ལྷགཔ་སྦེ་ འབོར་ཆེ་ཏོག་ཏོ་སྦེ་གྲ་སྒྲིག་མཛད་གནང་འོང་ དེ་ལས་ཁྱེད་རང་ལུ་ ལངམ་སྦེ་བཞག་པའི་ཁ་ལས་ གཞན་ལུ་ཡང་ ག་དགོཔ་སྦེ་བྱིན་ཚུགསཔ་ཨིན།

⁹ གསུང་རབ་ནང་ལས། ཁོ་གིས་མི་སྤྱང་ཀ་ལུ་བགོ་བཤའ་བརྐྱབ་ སྟོང་པ་སྦེ་བྱིན་ནི་ ཁོ་རའི་དྲང་སེམས་འདི་ དུས་རྒྱུན་དུ་གནས་འོང་ཟེར་ བྲིས་ཏེ་འདུག

¹⁰ དེ་ལས་སོ་ནམ་པ་ཚུ་ལུ་ སོན་གནང་མི་དང་ ཟ་ནི་གི་བཞེས་སྒོ་གནང་མི་དཀོན་མཆོག་གིས་ ཁྱེད་ལུ་ཐོན་ཁུངས་གནང་སྟེ་ ཕངས་སེམས་མེད་པར་བྱིན་ནི་གི་ཐོན་སྐྱེད་དེ་ཚུ་ གནམ་མེད་ས་མེད་ཡར་འཕེལ་གཏང་གནང་འོང་།

¹¹ དཀོན་མཆོག་གིས་ཁྱེད་ཕུན་ཚོགས་ཏོག་ཏོ་ མཛད་གནང་ནི་དེ་གིས་ ཁྱེད་ཀྱིས་ཕངས་སེམས་མེད་པར་ འཕྲོ་མཐུད་དེ་རང་ གྲོགས་རམ་འབད་ཚུགས་ དེ་ལས་ ཁྱེད་ཀྱིས་བྱིན་མིའི་གྲོགས་རམ་ ང་བཅས་ཀྱིས་སྐྱེལ་བ་འགྱོཝ་ད་ ཁོང་དདཔ་ཅན་སྤུན་ཆ་ཚུ་གིས་ དཀོན་མཆོག་ལུ་བཀྲིན་ཆེ་ཟེར་ཞུ་ནི་ཨིན།

¹² ཨ་ནི་གྲོགས་རམ་འབད་ནིའི་ཞབས་ཏོག་དེ་ལས་བརྟེན་ཏེ་ དཀོན་མཆོག་གི་དམ་པའི་མི་ཚུ་གི་དགོ་འདོད་དེ་ཚུ་སྒྲུབ་ནི་ཨིནམ་མ་ཚད་ ཁོང་གིས་དཀོན་མཆོག་ལུ་ སྤྲོ་བ་སྦོམ་གྱི་ཐོག་ལས་ བསྟོད་པ་གཏང་རག་ཕུལ་འོང་།

¹³ ག་ཅི་སྨོ་ཟེར་བ་ཅིན་ ཁྱེད་ཀྱིས་ཕངས་སེམས་མེད་པར་གྲོགས་རམ་འབདཝ་ལས་བརྟེན་ཏེ་ དཀོན་མཆོག་གི་མཚན་ ད་རུང་ཡང་སྙན་གྲགས་ཅན་འགྱུར་ནི་ཨིན་ དེ་མ་ཚད་ དེ་སྦེ་ཞབས་ཏོག་ཞུཝ་ལས་ ཁྱེད་ཆ་ཁྱབ་ཀྱིས་ ཁིརཱིས་ཀྱི་གཏམ་བཟང་འདི་ལུ་དད་པ་བསྐྱེད་དེ་ ཉན་ཁུག་བཏབ་ཨིན་པས་ཟེར་ བདེན་ཁུངས་བསྐྱེལཝ་ཨིན།

¹⁴ དེ་ལས་ཁྱེད་ལུ་ དཀོན་མཆོག་གིས་ཐུགས་རྗེ་ཚད་མེདཔ་གནང་ནི་དེ་གིས་ ཁོང་གིས་ཁྱེད་ཀྱི་དོན་ལུ་ བྱམས་བརྩེ་བསྐྱེད་དེ་ སྨོན་ལམ་ཞུ་འོང་།

¹⁵ ཁ་ལས་ཚིག་འཐོན་ཏེ་སླབ་མ་ཚུགས་པའི་ དཀོན་མཆོག་གི་ཧ་ལས་པའི་གསོལ་རས་ གནང་མི་དེ་ལུ་ བཀྲིན་ཆེ་ཟེར་ཞུ་དགོ།།