ཀོ་རཱིན་ཐི་གཉིས་པ་ལེའུ་ 8 - རྫོང་ཁ་

ཀོ་རཱིན་ཐི་པའི་ཆོས་ཚོགས་ཀྱིས་གྲོགས་རམ་འབད་དགོ་པའི་སྐོར།

¹ ད་ ངེ་གི་བྱམས་པའི་སྤུན་ཆ་ཚུ་ མ་ཀེ་དོ་ནི་ཡ་གི་ཆོས་ཚོགས་ལུ་ དཀོན་མཆོག་གིས་ ག་དེམ་ཅིག་ཐུགས་རྗེ་གཟིགས་ཅི་ག་ དེ་གི་སྐོར་ལས་ ང་བཅས་ཀྱིས་ཁྱེད་ལུ་ ཤེས་བཅུག་དགོ་མནོ་ཡི།

² འདི་ག་དེ་སྦེ་ཨིན་ན་ཟེར་བ་ཅིན་ ཁོང་དཀའ་ངལ་གནམ་མེད་ས་མེད་མྱོང་སྟེ་ ཁོང་རང་སྤྱང་ཀ་འགྱོ་རུང་ སེམས་ཀྱི་གཏིང་ལས་རང་དགའ་སྤྲོ་བསྐྱེད་དེ་ ཕངས་སེམས་མེད་པར་ གྲོགས་རམ་འབདཝ་ཨིན་མས།

³ ག་ཅི་སྨོ་ཟེར་བ་ཅིན་ ཁོང་གིས་ག་དེམ་ཅིག་བྱིན་ཚུགས་ཚུགསཔ་ བྱིནམ་མ་ཚད་ དེ་ལས་ཡང་ལྷགཔ་སྦེ་ཁོང་རང་གི་འདོད་པ་བཞིན་དུ་བྱིན་མི་འདི་ ང་གིས་འཛོམ་དཔང་འབད་དེ་སླབ་ཚུགས།

⁴ ཁོང་གིས་ གོ་སྐབས་སྦོམ་ཐོབ་པའི་སྐབས་ལུ་ དགའ་སྤྲོ་གི་ཐོག་ལས་ དཀོན་མཆོག་ཁོ་རའི་དམ་པའི་མི་ཚུ་ལུ་ ཆ་རོགས་འབད་ཚུགས་ཚུགསཔ་འབད་ནི་ཟེར་ ཁོང་རང་གི་སེམས་ཀྱི་གཏིང་ལས་རང་ ལོག་ཅི་ལོག་ཅི་ ང་བཅས་ལུ་འདྲིཝ་ཨིན་མས།

⁵ དེ་ལས་ང་བཅས་ཀྱིས་ ཁོང་ལས་རེ་བ་བསྐྱེད་མི་ལས་ལྷགཔ་སྦེ་ ཁོང་གིས་འབད་ཡི་ ག་དེ་སྦེ་ཟེར་བ་ཅིན་ ཁོང་གིས་ དང་པ་ཁོང་རང་ གཙོ་བོ་ལུ་ཕུལ་ཡི་ དེ་ལས་དཀོན་མཆོག་གི་ཐུགས་དགོངས་བཞིན་དུ་ ཁོང་གིས་ང་བཅས་ལུ་ཆ་རོགས་འབད་ཡི།

⁶ དེ་ལས་ ཁྱེད་ཀྱི་སྦུག་ལུ་ ཨ་ནི་ལཱ་འདི་དགའ་སྤྲོ་གི་ཐོག་ལས་འགོ་བཙུགས་མི་འདི་ ཏི་ཏུས་ཨིནམ་ལས་ ང་བཅས་ཀྱིས་ཁོ་ལུ་ ད་ལྟོ་ཚུན་ཚོད་ཀྱི་བར་ན་ འཕྲོ་མཐུད་དེ་འབད་མི་ལཱ་འདི་ མཐར་འཁྱོལ་དགོ་ཟེར་ ང་བཅས་ཀྱིས་དྲན་བསྐུལ་འབད་ཡི།

⁷ ད་ཁྱེད་ཀྱི་དད་པ་ ཁ་ལས་སླབ་མི་བློ་ ཁྱེད་ཀྱི་ཡོན་ཏན་དང་ བརྩོན་འགྲུས་ དེ་ལས་ང་བཅས་ལས་ཐོབ་མིའི་བྱམས་པ་ཚུ་ ཧེ་མ་ལས་ཡང་ལྷགཔ་སྦེ་ ཡར་རྒྱས་འགྱོ་དོཝ་བཟུམ་སྦེ་ དགའ་སྤྲོ་གི་ཐོག་ལས་གྲོགས་རམ་འབད་ནི་ལུ་ཡང་ ཁྱེད་ག་ར་ཡར་རྒྱས་འགྱོ་བཅུག

⁸ དེ་ལས་ང་གིས་ཁྱེད་ལུ་ ཨིན་ཅི་མིན་ཅི་འབད་དགོ་ཟེར་ བཀའ་རྒྱ་བྱིནམ་མེན་ དེ་འབདཝ་ད་ ཁྱེད་དང་ཆོས་ཚོགས་གཞན་གྱི་བྱམས་པ་ ག་བསྡུར་རྐྱབ་ད་ ཁྱེད་ཀྱི་བྱམས་པ་ཡང་ ངོ་མ་སྦེ་ཐོན་བཅུག་ནིའི་དོན་ལུ་ཨིན།

⁹ ག་ཅི་སྨོ་ཟེར་བ་ཅིན་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱིས་ ང་བཅས་ལུ་སྐྱིད་སྡུག་གཟིགས་མི་འདི་ ཁྱེད་ཀྱིས་ཤེས་ ཁོ་ཕྱུགཔ་ཨིན་ཏེ་འབད་རུང་ ཁྱེད་ཀྱི་དོན་ལུ་ ཁོ་རང་སྤྱང་ཀ་ལུ་འགྱུར་ཡི་ དེ་ལས་ དེ་གི་ཐོག་ལས་སྦེ་ ཁྱེད་ཕྱུགཔ་འགྱོ་ནིའི་དོན་ལུ་ཨིན།

¹⁰ ད་ཨ་ནི་གི་སྐོར་ལས་ ངེ་གི་བསམ་འཆར་འདི་སླབ་ནི་ཨིན་ དེ་ལས་ ཁྱེད་ལུ་ཕན་ཐོག་འབྱུང་འོང་ ག་ཅི་སྨོ་ཟེར་བ་ཅིན་ ལོ་གཅིག་གི་ཧེ་མ་ ཨ་ནི་ལཱ་འགོ་བཙུགསཔ་ད་ ཁྱེད་ཀྱིས་ དང་འདོད་ཀྱི་སྒོ་ལས་འགོ་བཙུགས་ཅི།

¹¹ ད་ཧེ་མ་ཁྱེད་རང་གི་སྤྲོ་བ་བསྐྱེད་དེ་ བྱིན་དགོ་མནོ་མི་དང་བསྟུན་ཏེ་ ཁྱེད་ལུ་ ག་ཡོད་མི་འདི་ནང་ལས་བྱིན་ཏེ་ རང་གི་དམིགས་ཡུལ་འདི་ མཐར་འཁྱོལ་སྦེ་འབད་ད།

¹² དོན་ལས་རང་ ཁྱེད་ཀྱིས་གྲོགས་རམ་འབད་ནི་གི་སྤྲོ་བ་དང་ སེམས་ཡོད་པ་ཅིན་ ཁྱེད་ཀྱིས་ མེད་མི་འདི་མ་འཚོལ་བར་ རང་ལུ་ག་ཡོད་མི་དང་འཁྲིལ་ཏེ་ གྲོགས་རམ་འབད་ནི་དེ་ དཀོན་མཆོག་གིས་ཐུགས་དགྱེསཔ་ཨིན།

¹³ མ་གཞི་ ང་བཅས་ཀྱི་འདོད་པ་འདི་ ཁྱེད་ལུ་ཡོད་མི་ཚུ་ག་ར་ རོགས་ལུ་བྱིན་ཏེ་ རང་དཀའ་ངལ་འབག་དགོ་ཟེར་ སླབ་མེན་ དེ་འབདཝ་ད་ གཅིག་གིས་གཅིག་ལུ་ ཕར་དང་ཚུར་ འདྲན་འདྲ་སྦེ་ ཆ་རོགས་འབད་ཟེར་ སླབ་ཨིན།

¹⁴ ད་ལྟོ་ ཁྱེད་ལུ་འབོལ་མཆིས་ཆི་སྦེ་ ཡོད་མི་ནང་ལས་ ཁོང་ཁག་ཆེ་མི་ཚུ་ལུ་བྱིན་ དེ་ལས་ཤུལ་ལས་ ཁོང་གིས་འབོལ་མཆིས་ཆི་སྦེ་ ཡོད་མི་ནང་ལས་ ཁྱེད་ལུ་ཁག་ཆེཝ་ད་བྱིན་ཏེ་ ཕར་དང་ཚུར་འདྲན་འདྲ་སྦེ་སྡོད་འོང་།

¹⁵ དེ་ལས། ལེ་ཤ་བསག་མི་ཚུ་ལུ་ ལྷག་མ་ག་ནི་ཡང་མ་ལུས་ ཨ་ཙི་ཅིག་བསག་མི་ཚུ་ལུ་ ལངམ་སྦེ་སྡོད་ཅི་ཟེར་ གསུང་རབ་ནང་གསུངས་དོཝ་བཟུམ་སྦེ་འབྱུང་ནི་ཨིན།།

ཏི་ཏུས་ ཀོ་རཱིན་ཐི་ལུ་གཏང་མིའི་སྐོར།

¹⁶ དེ་ལས་ང་རང་བཟུམ་སྦེ་ ཏི་ཏུས་ཀྱིས་ཡང་ཁྱེད་ལུ་དང་འདོད་བསྐྱེད་དེ་ཡོད་མི་དེ་ལུ་ དཀོན་མཆོག་ལུ་ ང་གིས་བཀའ་དྲིན་ཆེ་ཟེར་ཞུ་ནི་ཨིན་ ག་ཅི་སྨོ་ཟེར་བ་ཅིན་ འདི་ཁོ་གིས་མཛད་གནངམ་ཨིན།

¹⁷ ག་ཅི་སྨོ་ཟེར་བ་ཅིན་ ཏི་ཏུས་ ང་བཅས་ཀྱིས་ སླབ་ད་རྐྱངམ་གཅིག་ཉན་ཏེ་ ཁྱེད་སྡོད་སར་འོངམ་མེན་པར་ ཁོ་རང་གི་སེམས་ཁར་ལས་ སྤྲོ་བ་བསྐྱེད་དེ་ ཁྱེད་སྡོད་སར་འགྱོཝ་ཨིན་མས།

¹⁸ ད་ང་བཅས་ཀྱིས་ ཏི་ཏུས་དང་གཅིག་ཁར་ གཏམ་བཟང་བཤད་ནི་ལུ་ ཆོས་ཚོགས་ག་ར་གིས་ བསྟོད་པ་བརྐྱབས་མིའི་ནུ་གཅུང་གཅིག་གཏང་དོ།

¹⁹ ང་བཅས་ ཡེ་རུ་ཤ་ལེམ་ལུ་འགྱོཝ་ད་ ཆོས་ཚོགས་ཀྱིས་ཨ་ནི་ནུ་གཅུང་དེ་ལུ་ གདམ་ཁ་བརྐྱབས་ཏེ་ ང་བཅས་དང་གཅིག་ཁར་ ཕུལ་ཆ་བཀལ་བ་འགྱོ་མི་གཅིག་ཁོ་ཨིན་ ཕུལ་ཆ་བཀལ་ནིའི་ལཱ་དེ་ ང་བཅས་ར་གིས་རང་ ཆ་རོགས་འབད་བའི་དང་འདོད་ཡོད་ཟེར་སྟོནམ་ཨིནམ་མ་ཚད་ དཀོན་མཆོག་ལུ་བསྟོད་པ་ཡང་འབྱུང་ནི་ཨིན།

²⁰ དེ་ལས་ ཨ་ནི་གཏོང་ཕོད་ཆེན་པོའི་སྒོ་ལས་གནང་མིའི་གསོལ་རས་དེ་ལུ་ འབག་སྟེ་སྤྲོད་ལེན་འབདཝ་ད་ མི་གཞན་གྱིས་ཁ་གཏང་མ་བཅུག་ནི་སྦེ་ ནུ་གཅུང་དེ་ང་བཅས་དང་གཅིག་ཁར་སོང་ཡི།

²¹ དེ་སྦེ་འབད་དགོ་མི་འདི་ གཙོ་བོ་གིས་གཟིགས་སར་རྐྱངམ་གཅིག་ ཕྲང་སྟེ་འབད་ནི་མེན་པར་ མི་གིས་མཐོང་སར་ཡང་ ན་འཐན་ཏོག་ཏོ་སྦེ་ འབད་ནིའི་དོན་ལུ་ཨིན།

²² ད་རུང་ ང་བཅས་ཀྱི་བློ་གཏད་མི་ དདཔ་ཅན་སྤུན་ཆ་གཞན་ཡང་ ཁོང་དང་གཅིག་ཁར་གཏང་དོ་ ང་བཅས་ཀྱིས་ག་ཅི་གི་ཐོག་ལས་ཡང་ ཁོ་ལུ་ཚར་ལེ་ཤ་རང་ བརྟག་དཔྱད་འབད་དེ་བལྟ་རུང་ ན་འཐན་ཏོག་ཏོ་ཡོདཔ་སྦེ་མཐོང་ཅི་ ལྷག་པར་དུ་ ཁོ་རང་གིས་འབད་དེ་སྦེ་རུང་ ཁྱེད་ལུ་བློ་གཏདཔ་ལས་བརྟེན་ཏེ་ ཆ་རོགས་འབད་ནིའི་མནོ་བསམ་སྦོམ་འདུག

²³ ད་ ཏི་ཏུས་འདི་ ཁྱེད་ཀྱི་སྦུག་ལུ་ ངེ་གི་ཆ་རོགས་དང་མཉམ་རོགས་འབད་མི་ཨིན་ དེ་ལས་ཁོ་དང་གཅིག་ཁར་ཡོད་མི་སྤུན་ཆ་ཚུ་ ཆོས་ཚོགས་ཀྱིས་གཏང་སྟེ་ ཁོང་ལས་སྦེ་ ཁིརཱིས་ཀྱི་མཚན་སྙན་གྲགས་ཅན་སྦེ་འཐོན་ནི་ཨིན།

²⁴ དེ་འབདཝ་ལས་ ཨ་ནི་སྤུན་ཆ་ཚུ་ལུ་ ལེགས་ཤོམ་འབད་དེ་ ཁྱེད་ཀྱི་བྱམས་པ་དང་ ང་བཅས་ཀྱིས་ཆོས་ཚོགས་གཞན་ལུ་ ཁྱེད་ཀྱི་སྐོར་ལས་བསྟོད་པ་བརྐྱབས་ཏེ་ཡོད་མི་ཚུ་ག་ར་ ཏན་ཏན་ཨིན་ཟེར་བའི་བདེན་ཁུངས་བཀལ་བྱིན་དགོ།།