ཀོ་རཱིན་ཐི་གཉིས་པ་ལེའུ་ 7 - རྫོང་ཁ་

¹ ངེ་གི་བྱམས་པའི་ཆ་རོགས་ཚུ་ ད་ང་བཅས་ལུ་ཨ་ནི་ཁས་བླངས་ཡོད་ནི་དེ་གིས་ ང་བཅས་ཀྱིས་ལུས་དང་སེམས་གཉིས་ལུ་ མ་གཙངམ་བཟོ་མི་དེ་ཚུ་ག་ར་སྤང་སྟེ་ གཙང་ཏོག་ཏོ་བཟོ་གེ་ དེ་ལས་དཀོན་མཆོག་ལུ་འདྲོགས་ཏེ་ དམ་པ་འགྱུར་ནི་གི་ལཱ་དེ་ཚུ་ག་ར་ ཡོངས་སུ་རྫོགསཔ་སྦེ་འབད་གེ།

པའུལ་དགའ་སྤྲོ་བྱུང་བའི་སྐོར།

² ཁྱེད་ཀྱི་སེམས་ཀྱི་སྒོ་འདི་ ང་བཅས་ཀྱི་དོན་ལུ་ཕྱེ་གནང་ ང་བཅས་ཀྱིས་ག་ལུ་ཡང་ཟོགཔ་མ་འབད་ ག་ལུ་ཡང་འཛོལ་བའི་ལམ་ནང་མ་འཁྱིད་ རང་གི་ཁེ་ཕན་གྱི་དོན་ལུ་ག་ལུ་ཡང་མགུ་བསྐོར་ནང་མ་བཙུགས།

³ དེ་སྦེ་སླབ་ད་ ང་གིས་ཁྱེད་ལུ་ ཉེས་ཆད་བཀལ་ནི་གི་དོན་ལུ་སླབ་མེན་ ག་ཅི་སྨོ་ཟེར་བ་ཅིན་ ང་བཅས་ཀྱི་སེམས་ཁར་ ཁྱེད་ཡོདཔ་མ་ཚད་ ང་བཅས་ཤི་རུང་ གསོན་པོ་སྦེ་སྡོད་རུང་ ཁྱེད་དང་གཅིག་ཁར་སྡོད་འོང་ཟེར་ ང་གིས་ཧེ་མ་ལས་རང་སླབ་ཅི།

⁴ དེ་ལས་ང་གིས་ ཁྱེད་ལུ་གནམ་མེད་ས་མེད་བློ་གཏདཔ་ཨིན་ ང་ཁྱེད་ལུ་བལྟ་སྟེ་ངལ་རངསམ་མ་ཚད་ ང་བཅས་དཀའ་ངལ་དང་སྡུག་བསྔལ་མྱོངམ་ད་ ཁྱེད་ངེ་གི་སེམས་གསོ་འབད་མི་དང་ དགའ་སྤྲོ་བྱིན་མི་ཚུ་ཨིན།

⁵ ག་ཅི་སྨོ་ཟེར་བ་ཅིན་ ང་བཅས་ མ་ཀེ་དོ་ནི་ཡ་གི་ལུང་ཕྱོགས་ལུ་ལྷོདཔ་ད་ ཨ་ནི་གཟུགས་འདི་གིས་ངལ་འཚོ་ རྩ་ལས་རང་མ་ཐོབ་ ཕྱོགས་ག་ར་ལས་ དཀའ་ངལ་དང་སྡུག་བསྔལ་བྱུང་སྟེ་ ཕྱི་ཁར་འཐབ་འཛིང་བྱུང་ སེམས་ཀྱི་ནང་ན་འདྲོགས་ཏེ་སྡོད་ཅི།

⁶ དེ་འབདཝ་ད་ སེམས་ཤི་མི་ལུ་སེམས་གསོ་མཛད་མི་ དཀོན་མཆོག་གིས་ ཏི་ཏུས་ ང་བཅས་སྡོད་སར་ བཏང་གནང་ནི་དེ་གིས་ སེམས་གསོ་ཐོབ་ཅི།

⁷ དེ་ལས་ཁོ་འོངས་ཏེ་རྐྱངམ་གཅིག་མེན་པར་ ཁོ་གིས་ཁྱེད་ལས་ཐོབ་མི་སེམས་གསོ་གི་སྐོར་ལས་ ང་བཅས་ལུ་གནས་ཚུལ་བཤད་ཅི་ ཁྱེད་ཀྱིས་ ང་ལུ་བལྟ་དགོ་མནོ་བའི་སྐོར་ལས་སླབ་མི་དང་ ང་ལུ་ དེ་བཟུམ་བྱུང་མི་ལུ་ བློ་ཕམ་ཡི་ཟེར་སླབ་ས་གོཝ་ད་ ཁྱེད་ཀྱི་སེམས་ཁར་ ང་ལུ་བརྩེ་བ་བསྐྱེད་བའི་སྐོར་ལས་ཤེས་ནི་དེ་གིས་ ང་ཧེང་སྐལ་རང་ གནམ་མེད་ས་མེད་སེམས་དགའ་ཡི།

⁸ ད་ང་གིས་ཧེ་མ་བྲིས་མིའི་ཡི་གུ་འདི་གིས་ ཁྱེད་ལུ་ཡུདཔ་ཐེངས་ཅིག་གི་དོན་ལུ་སེམས་སྐྱོ་བཅུག་ཅི་ཟེར་ཤེསཔ་ད་ ཨ་ཙི་ཅིག་ང་འགྱོད་སེམས་བསྐྱེད་ཅི་ དེ་འབདཝ་ད་ ད་ལྟོ་འབད་བ་ཅིན་ ང་འགྱོད་སེམས་མི་བསྐྱེད།

⁹ ད་ ང་གནམ་མེད་ས་མེད་སེམས་དགའ་སྟེ་ཡོད་ འདི་ག་ཅི་འབད་ཟེར་བ་ཅིན་ ང་གིས་ཡི་གུ་བྲིས་བཏང་སྟེ་ ཁྱེད་ཀྱི་སེམས་ཁར་ཕོག་ཅི་ཟེར་རྩ་ལས་མེན་པར་ དེ་འབདཝ་ད་ ཁྱེད་སྡིག་པ་ལས་ དཀོན་མཆོག་ཁ་ཐུག་ སེམས་འགྱུར་ཏེ་ལོག་འོང་ཚུགས་ཅི་ཟེར་ཨིན་ མི་འདི་ཚུ་ལུ་ཨ་ནི་བཟུམ་སྦེ་ སེམས་སྐྱོ་སྟེ་ ཁོ་རང་ཁ་ཐུག་ལོག་འོང་བཅུག་ཟེར་ དཀོན་མཆོག་ཁོ་རང་ཡང་ ཐུགས་བསམ་བཞེས་ཏེ་བཞུགསཔ་ཨིན་ ཨིན་རུང་ ང་བཅས་ཁ་ཐུག་ལས་ ཁྱེད་ལུ་གནོདཔ་ག་ནི་ཡང་མ་བཀལ།

¹⁰ འདི་ག་དེ་སྦེ་ཨིན་ན་ཟེར་བ་ཅིན་ དཀོན་མཆོག་གིས་ ཨ་ནི་བཟུམ་སྦེ་སེམས་སྐྱོ་བཅུག་པའི་ཐོག་ལས་ ཕྱག་ལཱ་མཛད་དེ་ སྡིག་པ་ལས་སེམས་འགྱུར་ཏེ་ ཐར་པ་ཐོབ་བཅུགཔ་ཨིན་མས་ དེ་གིས་འགྱོད་སེམས་བསྐྱེད་མི་བཅུག་ དེ་འབདཝ་ད་ འཇིག་རྟེན་པའི་མྱ་ངན་ཚུ་གིས་ འཆི་བ་ལུ་འཁྱིདཔ་ཨིན།

¹¹ ཁྱེད་རང་ལུ་བལྟ་ཤིག་ དཀོན་མཆོག་གིས་ ཨ་ནི་མྱ་ངན་འདི་གིས་ ཕྱག་ལཱ་ག་ཅི་དེས་ཅིག་མཛད་ཅི་ རྫུན་ཁུངས་བསལ་ནི་ འཛོལ་བ་འབད་མི་ལུ་བལྟ་སྟེ་ཙིགཔ་ཟ་ནི་ དཀོན་མཆོག་ལུ་འདྲོག་ནི་ ང་ལུ་བལྟ་དགོ་མནོ་ནི་ བརྩོན་འགྲུས་བསྐྱེད་ནི་ འཛོལ་བ་འབད་མི་ལུ་ ཁྲིམས་ཕྲང་སྟེ་ཕྱེ་ནི་ དེ་ཚུ་གི་འབྲས་བུ་ཁྱེད་ཀྱི་ནང་ན་ལས་རང་ ག་ཅི་དེས་ཅིག་ལེགས་ཤོམ་བྱུང་ཡི་ ད་ ཁྱེད་ཀྱི་ནང་ན་ འཛོལ་བ་དེ་ཚུ་ ག་ར་བཅོ་ཁ་རྐྱབ་ནི་དེ་གིས་ ཁྱེད་སྐྱོན་མེདཔ་སྦེ་ཨིན་ཟེར་ཁྱེད་རང་གིས་སྟོན་ཡི།

¹² དེ་ལས་ང་གིས་ཁྱེད་ལུ་ ཡི་གུ་བྲིས་མིའི་དོན་དག་འདི་ ག་གིས་འཛོལ་བ་འབད་ཡི་ག་ ཁོང་གི་དོན་ལུ་མེན་ ཡང་ན་ ག་གི་སེམས་ཁར་ཕོག་ཅི་ག་ ཁོང་གི་དོན་ལུ་ཡང་མེན་ དེ་འབདཝ་ད་ ཁྱེད་ཀྱིས་ག་དེམ་ཅིག་ ང་བཅས་ལུ་ཤ་ཚ་སྟེ་འབད་མི་དེ་ དཀོན་མཆོག་གི་གཟིགས་སར་ ཁྱེད་རང་གིས་མཐོང་ཚུགས་ནིའི་དོན་ལུ་ཨིན།

¹³ དེ་ལས་ འདི་ཚུ་ག་ར་ལས་ ང་བཅས་ཀྱིས་སེམས་གསོ་ཐོབ་ཅི། ལྷག་པར་དུ་ ཏི་ཏུས་ཀྱིས་ ཁྱེད་ལས་སྦེ་ སེམས་གསོ་ཐོབ་སྟེ་ ཁོ་སེམས་དགའ་བཅུག་མི་འདི་ལུ་ ང་བཅས་སེམས་དགའ་ཡི།

¹⁴ ང་ཁྱེད་ལུ་བལྟ་སྟེ་ངལ་རངས་ཡི་ཟེར་ ཁོ་ལུ་སླབ་ཅི་ དོན་ལས་རང་ ཁྱེད་ཀྱིས་ང་ལུ་ངོ་ཚ་མ་བཅུག་ ག་ཅི་སྨོ་ཟེར་བ་ཅིན་ ང་བཅས་ཀྱིས་ཁྱེད་ལུ་ཨ་རྟག་རང་ བདེན་པ་སླབ་དོཝ་བཟུམ་སྦེ་ ང་གིས་ཁྱེད་ཀྱི་སྐོར་ལས་ ཏི་ཏུས་ལུ་སླབ་མི་འདི་ བདེན་པ་སྦེ་འཐོན་ཡི།

¹⁵ ད་ཁོ་གིས་སླབ་མི་ལུ་ ཁྱེད་ཆ་ཁྱབ་ཀྱིས་ཉནམ་མ་ཚད་ ཁྱེད་ཀྱིས་ ཁོ་ལུ་ཞེ་ས་འབད་དེ་ བྱོན་པ་ལེགས་སོ་ཞུ་མི་ཚུ་ ཁོ་གི་སེམས་ཁར་དྲནམ་ད་ ཁྱེད་ཀྱི་དོན་ལུ་ ཁོ་གི་བྱམས་བརྩེ་ འདི་བ་ལྷགཔ་སྦོམ་འགྱོཝ་ཨིན་མས།

¹⁶ དེ་ལས་ང་རང་ཡང་ ཁྱེད་ལུ་བློ་གཏད་ཚུགས་ནི་འདི་གིས་ ང་གནམ་མེད་ས་མེད་སེམས་དགའ་ཡི།།