ཀོ་རཱིན་ཐི་གཉིས་པ་ལེའུ་ 6 - རྫོང་ཁ་

¹ ང་བཅས་དཀོན་མཆོག་གི་ཞབས་ཕྱིཔ་ཨིནམ་ལས་ ཁྱེད་ཆ་ཁྱབ་ལུ་ དཀོན་མཆོག་གི་ཐུགས་རྗེ་འདི་ དོན་དག་མེདཔ་བཟོ་སྟེ་ ཆུད་ཟོས་མ་གཏང་ཟེར་གསོལཝ་བཏབ་དོ།

² ག་ཅི་སྨོ་ཟེར་བ་ཅིན་ གསུང་རབ་ནང་། དུས་ཚོད་ཀྲིག་ཀྲི་ལུ་ ང་གིས་ཁྱེད་ཀྱི་སྐད་གོ་ཡི་ དེ་ལས་ཐར་པའི་ཉིནམ་ལུ་ ཁྱེད་ཀྱི་ཆ་རོགས་འབད་ཡི་ཟེར་ དཀོན་མཆོག་གིས་གསུངས་ནུག་ དོན་ལས་རང་ དུས་ཚོད་ཀྲིག་ཀྲི་འདི་ད་ལྟོ་རང་ཨིན་ ཐར་པའི་ཉིནམ་འདི་ཡང་ ད་རེས་ཨིན་ཟེར་ང་གིས་སླབ་དོ།།

སྐུ་ཚབ་ངོ་མ་ཚུ་གི་དཀའ་སྡུག་གི་སྐོར།

³ མི་ག་རང་ཨིན་རུང་ ང་བཅས་ཀྱི་ལཱ་ལུ་བལྟ་སྟེ་ སྐྱོན་བཏགས་ནི་གི་གོ་སྐབས་མ་བྱིན་ནི་གི་དོན་ལུ་ རོགས་ཀྱི་སེམས་ཁར་ཕོག་པའི་ལཱ་ཡང་ ང་བཅས་ཀྱིས་མ་འབད།

⁴ ང་བཅས་ཀྱིས་ལཱ་ག་ཅི་ནང་རང་ཨིན་རུང་ དཀོན་མཆོག་གི་ཞབས་ཕྱིཔ་བདེན་པ་ཨིན་ཟེར་ ཁུངས་བཀལ་ནི་གི་དོན་ལུ་ དཀའ་ངལ་སྡུག་བསྔལ་དང་ ལཱ་ཁག་མ་འདྲཝ་ དེ་ལས་ག་ཅི་བཟུམ་ཅིག་གི་རྐྱེན་ངན་ཚུ་བྱུང་སྟེ་འོང་རུང་ ང་བཅས་དེ་ལུ་བཟོད་པ་བསྒོམས་ཏེ་སྡོདཔ་ཨིན།

⁵ ང་བཅས་ལུ་རོགས་ཀྱིས་ དྲང་བརྡུང་ བཙོན་ཁང་ནང་ཡང་བཙུགས་ཅི་ ཟིང་འཁྲུག་སློང་འོངམ་ད་ གནོད་སྐྱོན་ཡང་བྱུང་ཡི་ འུ་སྡུག་ཐང་ཆད་དེ་ལཱ་འབད་ཡི་ ཕྱི་རུ་ལེགས་ཤོམ་སྦེ་གཉིད་ལོག་ནི་ཕར་རང་བཞག་ ཕོཝ་སྟོངམ་སྦེ་ལེ་ཤ་སྡོད་དགོཔ་ཐལ་ཡི།

⁶ ཨིན་རུང་ ང་བཅས་གཙང་ཏོག་ཏོ་དང་ ཤེས་རབ་ཅན་ བཟོད་སྲན་ བསམ་པ་བཟང་པོ་དང་ དམ་པའི་ཐུགས་ཉིད་ཀྱི་དབང་ཤུགས་ནང་ ལྷག་བསམ་རྣམ་དག་གི་བྱམས་པ་སྟོན་སྡོད་ཅི།

⁷ ང་བཅས་ཀྱིས་བདེན་པ་འདི་ ཕྲང་སྟེ་བཤད་བྱིན་ནི་དེ་གིས་ དཀོན་མཆོག་གི་དབང་ཤུགས་ ང་བཅས་ཀྱི་ནང་ན་བཞུགས་ཏེ་ ཆོས་སེམས་ཅན་གྱི་མཚོན་ཆ་འདི་ ལགཔ་གཡས་པ་བཤེད་དེ་ དགྲ་ལུ་རྒོལ་ ལགཔ་གཡོནམ་གིས་རང་ལུ་སྲུང་སྐྱོབས་འབདཝ་ཨིན།

⁸ དེ་ལས་ང་བཅས་ལུ་ མི་གིས་ཞེ་ས་འབད་རུང་ ཡང་ན་སྨད་པ་རྐྱབ་རུང་ ང་བཅས་ལུ་མི་གིས་ཁ་བཏང་རུང་ ཡང་ན་བསྟོད་པ་རྐྱབ་རུང་ ང་བཅས་ཀྱིས་དཀོན་མཆོག་གི་ཕྱག་ཞུཝ་ཨིན་ དེ་འབདཝ་ད་ ཁོང་གིས་ང་བཅས་ལུ་ སྐུ་ཚབ་ཤོབ་རྐྱབ་མི་ཨིན་མས་ཟེར་སླབ་རུང་ ང་བཅས་ཕྲང་སྟེ་བདེན་པ་སླབ་ཨིན།

⁹ ཁོང་མི་གཞན་ཚུ་གིས་ སྣང་བདག་མ་བསྐྱེད་པར་བཞག་རུང་ ང་བཅས་ཁྱེད་ཀྱིས་སྦུག་ལུ་ཡོངས་གྲགས་ཅན་ཨིན་ ང་བཅས་ཤི་བའི་དུམ་ཁ་དཔག་སྟེ་ཡོད་རུང་ ད་ལྟོ་ཡང་ང་བཅས་གསོན་པོ་སྦེ་ཡོད་ ཁོང་གིས་ང་བཅས་ལུ་ ཁྲིམས་བཏང་རུང་ ང་བཅས་ལུ་གསད་མ་ཚུགས།

¹⁰ ང་བཅས་མྱ་ངན་ཕོག་སྟེ་འབད་རུང་ ང་བཅས་ལུ་རྟག་བུ་རང་ དགའ་སྤྲོ་བྱུངམ་ཨིན་ ང་བཅས་སྤྱང་ཀ་ཨིན་རུང་ མི་ལེ་ཤ་ལུ་བྱིན་རླབས་ཀྱིས་ཕྱུགཔ་བཟོ་བྱིན་ཡི་ དེ་ལས་ང་བཅས་ལུ་ ག་ནི་ཡང་མེད་རུང་ ག་ར་ལངམ་སྦེ་སྡོདཔ་ཨིན།

¹¹ ངེ་གི་བྱམས་པའི་ཆ་རོགས་ ཀོ་རཱིན་ཐི་པ་ཚུ་ ང་གིས་ཁྱེད་ལུ་ཕྲང་སྟེ་རང་སླབ་གེ་ ང་བཅས་ཀྱི་སེམས་རྒྱ་ཆེ་དྲགས་སྦེ་ ཁྱེད་ལུ་སྒོ་ཕྱེཝ་ཨིན།

¹² ང་བཅས་ཀྱི་སེམས་ཀྱི་སྒོ་ མ་བསྡམས་པར་བཞག་རུང་ ཁྱེད་ཀྱི་སེམས་ཀྱི་སྒོ་འདི་ བསྡམས་བཞག་བཞགཔ་ཨིན་པས།

¹³ ད་ང་གིས་ཁྱེད་ལུ་ ང་རང་གི་ཨ་ལོ་བཟུམ་སྦེ་མནོ་སྟེ་ ཁྱེད་ཀྱི་སེམས་འདི་ རྒྱ་ཆེ་དྲགས་སྦེ་ལོག་སྟེ་ ང་བཅས་ལུ་སྒོ་ཕྱེ་གནང་ཟེར་སླབ་ནི་ཨིན།།

གསོན་པོའི་དཀོན་མཆོག་གི་བཞུགས་ཁང་གི་སྐོར།

¹⁴ དད་པ་མ་བསྐྱེད་མི་དང་མཉམ་གཉའ་ཤིང་གཅིག་ནང་མ་བསྡོམ་ དྲང་སེམས་དང་ངན་སེམས་གཉིས་ཀུ་ ག་དེ་སྦེ་གཅིག་ཁར་མཐུན་ཚུགས་ནི་སྨོ་ འོད་དང་གནག་དུང་གཉིས་ ག་དེ་སྦེ་གཅིག་ཁར་སྡོད་ཚུགས་ནི་སྨོ།

¹⁵ ཁིརཱིས་དང་བདུད་ ག་དེ་སྦེ་གཅིག་ཁར་མཐུན་ནི་སྨོ་ དདཔ་ཅན་ཚུ་ག་དེ་སྦེ་དད་པ་ མ་བསྐྱེད་མི་ཚུ་དང་གཅིག་ཁར་ མཐུན་ཚུགས་ནི་སྨོ།

¹⁶ དཀོན་མཆོག་གི་བཞུགས་ཁང་དང་ སྐུ་དེ་ཚུ་གི་བར་ན་ འབྲེལ་བ་ག་ཅི་ཡོདཔ་སྨོ་ མ་གཞི་ ང་བཅས་ གསོན་པོའི་དཀོན་མཆོག་གི་བཞུགས་ཁང་ཨིནམ་ལས་ དཀོན་མཆོག་གིས། ང་ ཁོང་གི་སྦུག་ལུ་སྡོད་ནི་དང་ ཁོང་དང་གཅིག་ཁར་ལམ་འགྱོ་ནི་ཨིན་ དེ་ལས་ ང་ཁོང་གི་དཀོན་མཆོག་དང་ ཁོང་ངེ་གི་མི་སེར་ལུ་འགྱུར་ནི་ཨིན་ཟེར་གསུངས་ནུག

¹⁷ དེ་འབདཝ་ལས་ གཙོ་བོ་གིས་གསུངས་དེས་ ཁྱེད་ཁོང་གི་གྲལ་ཁཪ་ལས་ཐོན་ཏེ་ སོ་སོ་སྦེ་སྡོད་ མ་གཙངམ་མིའི་རིགས་ཚུ་ལུ་ རེག་མ་བཅུག་ དེ་ལས་ང་གིས་ཁྱེད་ལུ་ བསུ་བ་འབད་ནི་ཨིན།

¹⁸ དེ་ལས་ ང་ཁྱེད་ཀྱི་ཡབ་དང་ ཁྱེད་ངེ་གི་བུ་དང་བུམོ་སྦེ་འགྱུར་ནི་ཨིན་ཟེར་ཀུན་དབང་དཀོན་མཆོག་གིས་གསུངས་ནུག།