ཀོ་རཱིན་ཐི་གཉིས་པ་ལེའུ་ 5 - རྫོང་ཁ་

མིའི་ལུས་འདི་བརྟན་པ་མེད་པའི་གུར་བཟུམ་ཨིན་པའི་སྐོར།

¹ ད་འཛམ་བུ་གླིང་འདི་ནང་ སྡོད་པའི་སྐབས་ཀྱི་ལུས་འདི་ གུར་བཟུམ་སྦེ་ཨིན་ གུར་འདི་མར་བཤུབ་སྟེ་མེདཔ་ཐལ་འགྱོ་འོང་ དེ་འབདཝ་ད་ དེ་གི་ཚབ་ལུ་ ཞིང་ཁམས་ཀྱི་ཁྱིམ་ ང་བཅས་ཀྱི་ལུས་བརྟན་ཏོག་ཏོ་ཤི་ནི་མེདཔ་འདི་ ཐོབ་ནི་ཨིན་ ཨ་ནི་འདི་མི་གིས་བཟོཝ་མེན་པར་ དཀོན་མཆོག་ཁོ་རང་གི་ཕྱག་གིས་ ང་བཅས་ཀྱི་དོན་ལུ་མཛད་གནང་གནངམ་ཨིན་ཟེར་ཤེས།

² ང་བཅས་ ད་ལྟོ་གི་ལུས་འདི་ནང་ དཀའ་ངལ་གྱིས་དྲེགས་མ་ཚུགས་པར་འཁུན་ཏེ་ ལུས་གསརཔ་ ཞིང་ཁམས་ཀྱི་ཁྱིམ་བཟུམ་འབད་མི་ དེ་ནང་སྡོད་དགོ་མནོ་སྟེ་ སྒུག་སྡོདཔ་ཨིན།

³ ག་ཅི་སྨོ་ཟེར་བ་ཅིན་ ཞིང་ཁམས་ཀྱི་ལུས་ ཁྱིམ་སྦེ་ཐོབ་ད་ ང་བཅས་སྡོད་སའི་མེདཔ་སྦེ་མི་ལུས།

⁴ ད་ལྟོ་ཤི་ནི་གི་ལུས་དེ་ནང་སྡོད་ནི་དེ་གིས་ ང་བཅས་སྡུག་བསྔལ་གྱི་འོག་ལུ་མནན་ཏེ་འཁུནམ་ཨིན་ ད་ལྟོ་གི་ལུས་དེ་བཀོ་བཞག་སྟེ་ ཤི་དགོ་མ་མནོ་རུང་ ཤི་འགྱོ་མི་ལུས་དེ་ མཐའ་མེད་པའི་གསོན་པོའི་ལུས་ལུ་ འགྱུར་བཅུག་ནི་གི་དོན་ལུ་ ང་བཅས་ཞིང་ཁམས་ཀྱི་ལུས་གསརཔ་འདི་ དགོཔ་ཨིན།

⁵ དེ་ལས་ དེ་སྦེ་འགྱུར་ནི་གི་དོན་ལུ་ དཀོན་མཆོག་གིས་གྲ་སྒྲིག་མཛད་གནངམ་མ་ཚད་ དམ་པའི་ཐུགས་ཉིད་དེ་ ང་བཅས་ཀྱི་རྒྱབ་མི་སྦེ་གནང་ཡི།

⁶ དེ་འབདཝ་ལས་ ང་བཅས་ཀྱིས་ཏན་ཏན་ཤེས་ ང་བཅས་ཨ་ནི་ལུས་ཀྱི་ཁྱིམ་ནང་སྡོད་པའི་རིང་ལུ་ ང་བཅས་ལུ་གཙོ་བོ་གིས་གནང་ནི་འབད་མི་ཁྱིམ་ནང་སྡོད་མི་ཚུགས།

⁷ དེ་འབདཝ་ལས་ ཕྱི་མིག་གིས་བལྟ་མི་མེན་པར་ ང་བཅས་དད་པ་བསྐྱེད་དེ་སྡོདཔ་ཨིན།

⁸ ང་བཅས་ཀྱིས་ཐད་རི་བ་རི་སླབ་ཨིན་ ང་བཅས་ཀྱི་ལུས་དང་ཁ་འབྱལ་ཏེ་ གཙོ་བོ་དང་གཅིག་ཁར་སྡོད་ནི་འདི་ ང་བཅས་ཀྱིས་གདམ་ཁ་རྐྱབ་ཨིན།

⁹ དེ་འབདཝ་ལས་ ལུས་ཀྱི་ཁྱིམ་ནང་སྡོད་རུང་ ཡང་ན་འདི་ལས་ སོ་སོ་སྦེ་ཁ་འབྱལ་ཏེ་འགྱོ་རུང་ ང་བཅས་ཀྱི་དམིགས་ཡུལ་འདི་ གཙོ་བོ་ལུ་ཐུགས་དགྱེསཔ་བཟོ་ནི་དེ་ཨིན།

¹⁰ ག་ཅི་སྨོ་ཟེར་བ་ཅིན་ ལུས་ནང་སྡོད་པའི་རིང་ལུ་ ཡང་ན་ལེགས་ཤོམ་འབད་རུང་འདྲ་ ཡང་ན་ཟོགཔ་འབད་རུང་འདྲ་ འདི་གི་འབྲས་བུ་ཐོབ་ནི་སྦེ་ ཨིན་ཅི་མིན་ཅི་ ཁྲིམས་ཕྱེ་སྟེ་གནང་མི་ཁིརཱིས་ཀྱི་སྐུ་མདུན་ལུ་ ང་བཅས་རེ་རེ་བཞིན་དུ་བཅར་དགོ།།

ང་བཅས་དཀོན་མཆོག་གི་སྐུ་ཚབ་ཨིན་མིའི་སྐོར།

¹¹ ང་བཅས་ཀྱིས་དཀོན་མཆོག་ལུ་བལྟ་སྟེ་ ག་དེ་སྦེ་འདྲོག་སྡོད་དགོཔ་ཨིན་ན་ དེ་ཚུ་ང་བཅས་ཀྱིས་ཤེས་ དེ་འབདཝ་ལས་ མི་ཚུ་གིས་ཁིརཱིས་ལུ་དད་པ་བསྐྱེད་གེ་ཟེར་ ང་བཅས་ལཱ་ཁག་རྐྱབ་རུང་ རྩ་འགེངསམ་ཨིན་ མ་གཞི་ ང་བཅས་ཀྱི་སེམས་ དཀོན་མཆོག་གིས་མཁྱེན་ དེ་མ་ཚད་ ཁྱེད་ཀྱིས་ཡང་ང་བཅས་ མི་ག་དེ་སྦེ་ཨིན་ན་ ལེགས་ཤོམ་སྦེ་ ངོ་ཤེས་འོང་ཟེར་ང་ལུ་རེ་བ་ཡོད།

¹² དེ་ལས་ང་བཅས་ཀྱིས་ ལོག་ཅི་ལོག་ཅི་ རང་བསྟོད་རྐྱབ་རྩ་ལས་མེན་ དེ་འབདཝ་ད་ ཁྱེད་ཀྱིས་ང་བཅས་ལུ་བལྟ་སྟེ་ ངལ་རངས་ནི་གི་གོ་སྐབས་ཐོབ་ནིའི་དོན་ལུ་ཨིན་ དེ་ལས་མི་གཞན་གྱིས་ཁྱེད་དང་གཅིག་ཁར་ ཁོང་རང་གི་སྐོར་ལས་ ཕྲང་ཏང་ཏ་མེད་པའི་སེམས་ཀྱི་ཐོག་ལས་ ལྷག་བསམ་རྣམ་དག་མེད་པའི་ རང་བསྟོད་རྐྱབ་སྟེ་སླབ་ད་ དེ་གི་ལན་ཡང་སླབ་ཚུགས་འོང་།

¹³ ང་བཅས་ཀྱིས་འབད་དེ་ཡོད་མི་ཚུ་ལུ་ ཁྱེད་ཀྱིས་བལྟཝ་ད་ ང་བཅས་འཆོལ་ལོང་བཟུམ་སྦེ་མཐོང་རུང་ དེ་དཀོན་མཆོག་གི་དོན་ལུ་ཨིན་ ཡང་ན་ དྲན་པ་གསལ་ཏོག་ཏོ་སྦེ་མཐོང་སྟེ་འབད་རུང་ དེ་ཁྱེད་ཀྱི་དོན་ལུ་འབདཝ་ཨིན།

^14-15 ད་ ཁིརཱིས་མི་ག་ར་གི་དོན་ལུ་གཤགས་ཏེ་ མི་ག་ར་ཁོང་ ཁོང་རང་ཤི་སོངམ་བཟུམ་སྦེ་རང་ཨིན་ ཁོ་མི་ག་ར་གི་དོན་ལུ་གཤགས་དགོ་པའི་དོན་དག་དེ་ ང་བཅས་མི་ཚེ་གསརཔ་ཐོབ་ཞིནམ་ལས་ རང་གི་དོན་ལུ་སྡོད་ནི་མེན་པར་ ཁིརཱིས་ཀྱི་དོན་ལུ་སྡོད་ནི་སྦེ་ཨིན་ ག་ཅི་སྨོ་ཟེར་བ་ཅིན་ ཁིརཱིས་ཁྲམ་ཤིང་གུ་གཤགས་ཏེ་ ལོག་སྐུ་གསོན་པོ་བཞེངས་གནང་དགོ་མི་འདི་ཡང་ ང་བཅས་ཀྱི་དོན་ལུ་ཨིན་ རྒྱུ་མཚན་དེ་ལུ་བརྟེན་ཏེ་ ཁོ་གི་བྱམས་པ་དེ་གིས་ གཞན་གྱི་དོན་ལས་སྡོད་ནི་ལུ་ བྱ་ཐབས་མེདཔ་སྦེ་ འབད་བཅུགཔ་ཨིན།

¹⁶ དེ་འབདཝ་ལས་ ཁིརཱིས་ཀྱི་བྱམས་པ་ཧ་གོ་ནིའི་དུས་ལས་འགོ་བཙུགས་ཏེ་ ང་བཅས་མི་གི་རང་བཞིན་གྱིས་ མནོ་བསམ་གཏང་ཐངས་དང་འཁྲིལ་ཏེ་ གཞན་ལུ་དབྱེ་ཞིབ་དཔྱད་ནི་སྤང་བཞགཔ་ཨིན་ ག་ཅི་སྨོ་ཟེར་བ་ཅིན་ ཧེ་མ་ཚར་གཅིག་ ང་བཅས་ཀྱིས་ཡང་ ཁིརཱིས་འདི་མི་རྐྱངམ་གཅིག་ཨིན་ཟེར་ མནོ་བསམ་བཏང་སྡོད་ཅི་ ད་ང་བཅས་ཁོ་ལུ་དེ་སྦེ་མི་མནོ།

¹⁷ ག་ཅི་སྨོ་ཟེར་བ་ཅིན་ མི་ག་ར་འབད་རུང་ ཡེ་ཤུ་ཁིརཱིས་ཀྱི་ཨིན་པ་ཅིན་ ཁོ་མི་གསརཔ་ལུ་འགྱུརཝ་ཨིན་ ཁོ་གི་ཧེ་མ་གི་རང་བཞིན་རྙིངམ་འདི་ཡལ་འགྱོ་སྟེ་ མི་གསརཔ་ལུ་འགྱུརཝ་ཨིན།

¹⁸ དེ་ལས་གསརཔ་ཡོད་མི་འདི་ཚུ་ག་ར་ དཀོན་མཆོག་གིས་མཛད་གནང་གནངམ་ཨིན་ ཁོ་གིས་ང་བཅས་ཆ་ཁྱབ་ལུ་ ཁིརཱིས་ཀྱི་རྒྱུད་ལས་སྦེ་ ཁོ་རང་དང་མཐུན་ལམ་ཡོདཔ་ མཛད་གནངམ་མ་ཚད་ མཐུན་ལམ་བཟོ་ནི་གི་ལཱ་འདི་ ང་བཅས་ལུ་གནང་ཡི།

¹⁹ ག་ཅི་སྨོ་ཟེར་བ་ཅིན་ དཀོན་མཆོག་ཁོ་རང་ ཁིརཱིས་ཀྱི་རྒྱུད་ལས་སྦེ་ འཛམ་གླིང་གི་མི་དང་མཐུན་ལམ་མཛད་གནང་སྟེ་ མི་ཚུ་གིས་འབད་མིའི་སྡིག་པ་ ཐུགས་ཁར་མ་བསྣམས་པར་ ཁོ་རང་དང་མིའི་བར་ན་ འཆམ་ཁ་བཟོ་ནི་གི་གཏམ་བཟང་འདི་ ང་བཅས་ལུ་གནང་ཡི།

²⁰ དེ་འབདཝ་ལས་ ང་བཅས་ག་ར་ཁིརཱིས་ཀྱི་སྐུ་ཚབ་ཨིན་ དེ་ལས་དཀོན་མཆོག་གིས་ང་བཅས་ལས་རྒྱུད་དེ་ བསླབ་བྱ་གནང་མི་དེ་ ང་བཅས་ཀྱིས་ ཁིརཱིས་ཀྱི་ཁ་ཐུག་ལས་སྦེ་ ཁྱེད་ལུ་གསོལཝ་བཏབ་སྟེ་ ཁྱེད་དཀོན་མཆོག་དང་གཅིག་ཁར་ མཐུན་ལམ་བཟོ་དགོ་ཟེར་ཞུཝ་ཨིན།

²¹ ང་བཅས་ཀྱི་དོན་ལུ་ དཀོན་མཆོག་གིས་ སྡིག་པ་རྩ་ལས་རང་མ་འབད་མི་ཁིརཱིས་འདི་ལུ་ སྡིག་པ་ཡོདཔ་བཟུམ་མཛད་དེ་ ང་བཅས་ ཁོ་གི་རྒྱུད་ལས་སྦེ་ དཀོན་མཆོག་གི་གཟིགས་སར་ ཐུགས་དང་ལྡན་པའི་ཕྲངམ་བཟོ་གནང་ཡི།