ཀོ་རཱིན་ཐི་གཉིས་པ་ལེའུ་ 4 - རྫོང་ཁ་

པའུལ་གྱི་འབད་མི་ལཱ་འདི་དཀོན་མཆོག་གིས་གནང་མིའི་འགན་ཁག་ཨིན་མིའི་སྐོར།

¹ དེ་འབདཝ་ལས་ དཀོན་མཆོག་གི་སྙིང་རྗེ་གི་སྒོ་ལས་ ང་བཅས་ལུ་ ཨ་ནི་ལཱ་འདི་གི་འགན་ཁག་གནང་སྟེ་ཡོདཔ་ལས་ ང་བཅས་རྒྱབ་བཤུད་མི་རྐྱབ།

² གསང་སྟེ་འབད་མི་ ལཱ་ངོ་ཚ་སི་སི་ང་བཅས་ཀྱིས་མི་འབད་ དེ་མ་ཚད་གཡོ་སྒྱུ་འབད་ནི་དང་ དཀོན་མཆོག་གི་གསུང་བསྒྱུར་གཏང་ནི་ཡང་ ང་བཅས་ཀྱིས་ཁས་མི་ལེན་ དེ་འབདཝ་ད་ བདེན་པ་ལུ་ཧིང་སངས་ས་སྦེ་ཕྱི་སྟོན་ཏེ་ དཀོན་མཆོག་གིས་གཟིགས་ས་དང་ མི་གི་མཐོང་ས་ ང་བཅས་ལུ་བློ་གཏད་ཚུགསཔ་སྦེ་ ལཱ་འབདཝ་ཨིན།

³ ག་དེམ་ཅིག་སྦེ་ ང་བཅས་ཀྱིས་བཤད་མིའི་གཏམ་བཟང་འདི་ གདོང་ཁེབས་ཀྱི་རྒྱབ་ལས་སྦ་སྟེ་ཡོད་པ་ཅིན་ ཁོང་མེདཔ་ཐལ་འགྱོ་མི་ཚུ་གི་དོན་ལུ་རྐྱངམ་གཅིག་ཨིན།

⁴ ག་ཅི་སྨོ་ཟེར་བ་ཅིན་ དཀོན་མཆོག་གི་སྐུ་བརྙན་ཨིན་མིའི་ཁིརཱིས་ ཁོ་རའི་གཟི་བརྗིད་ཅན་ཡོད་མི་ གཏམ་བཟང་གི་འོད་ མཐོང་མ་བཅུག་ནི་གི་དོན་ལུ་ ཨ་ནི་དུས་རབས་ཀྱི་ལྷ་ སེ་ཏཱན་གྱིས་ ཁོང་དད་པ་མ་བསྐྱེད་མི་ཚུ་གི་མིག་ཏོ་ ཞརཝ་བཟོཝ་ཨིན་མས།

⁵ ང་བཅས་ཀྱིས་ རང་གི་སྐོར་ལས་ཆོས་མི་བཤད་ དེ་འབདཝ་ད་ ཁིརཱིས་ཡེ་ཤུ་དེ་གཙོ་བོ་ཨིན་ཟེར་ ཆོས་བཤདཔ་ཨིན་ དེ་སྦེ་ཆོས་བཤད་མི་དེ་ ཡེ་ཤུ་གི་ཐོག་ལས་ ང་བཅས་ཁྱེད་ལུ་ཞབས་ཏོག་ཞུཝ་ཨིན།

⁶ གནག་དུང་ནང་འོད་ཟེར་ཤར་བཅུག་ཟེར་གསུངས་མིའི་དཀོན་མཆོག་གིས་ འོད་ཟེར་འདི་ ང་བཅས་ཀྱི་སེམས་ནང་ཡང་ཤར་བཅུག་ཞིནམ་ལས་ དེ་གིས་ང་བཅས་ལུ་ ཤེས་རབ་གནང་སྟེ་ ང་བཅས་ཀྱིས་དཀོན་མཆོག་གི་གཟི་བརྗིད་འདི་ ངོ་ཤེས་ཚུགསཔ་སྦེ་ མཛད་གནང་ཡི་ ཨ་ནི་གཟི་བརྗིད་འདི་ ཁིརཱིས་ཀྱི་ཞལ་གུ་མཇལ་ཚུགསཔ་ཨིན།།

མཇུག་གི་བློ་གཏད་ས་དཀོན་མཆོག་ཨིན་མིའི་སྐོར།

⁷ དེ་འབདཝ་ད་ ག་ར་ལས་ལྷག་པའི་དབང་ཤུགས་ ཚད་མེདཔ་འདི་ ང་བཅས་རང་ལས་མེན་པར་ དཀོན་མཆོག་ལས་ཨིན་ཟེར་ ཕྱི་ཁར་བཏོན་ནིའི་དོན་ལུ་ རྩ་ཆེན་གཏེར་འདི་ ང་བཅས་ཀྱི་ལུས་ སའི་རྫམ་བཟུམ་ནང་ཡོད།

⁸ ང་བཅས་ལུ་དཀའ་ངལ་གྱིས་ ཕྱོགས་ག་ར་ནང་ལས་མནན་ཏེ་ཡོད་རུང་ ང་བཅས་ལུ་དཀྲུམ་མ་ཚུགསཔ་ ང་བཅས་མགུ་འཐོམ་སྟེ་ཡོད་རུང་ རེ་ཐག་མ་རྫོགས།

⁹ མི་གིས་ང་བཅས་ལུ་ གནོད་པ་བཀལ་ཏེ་ ལཱ་ཁག་རྐྱབ་རུང་ དཀོན་མཆོག་གིས་ང་བཅས་ལུ་ སྤང་སྟེ་མ་བཞག་ ང་བཅས་ལུ་ དྲང་སྟེ་འགྱེལ་སོང་རུང་ འཆི་བ་ལུ་མ་ཐུག་པར་ ཡར་ལོང་སྟེ་འགྱོ་དོ།

¹⁰ ཨ་ནི་སྡུག་བསྔལ་ ང་བཅས་ཀྱིས་ལུས་གུ་འབག་སྟེ་ ཡེ་ཤུ་གཤགས་པའི་སྡུག་བསྔལ་ནང་ འཕྲོ་མཐུད་དེ་རང་ ང་བཅས་བཅའ་མར་གཏོགསཔ་ཨིན་ ག་ཅི་སྨོ་ཟེར་བ་ཅིན་ ཡེ་ཤུ་གི་སྐུ་ཚེ་འདི་ ང་བཅས་ཀྱི་ལུས་ནང་ མངོན་སུམ་དུ་མཐོང་ཚུགས་ནིའི་དོན་ལུ་ཨིན།

¹¹ ག་ཅི་སྨོ་ཟེར་བ་ཅིན་ ང་བཅས་གསོན་པོ་སྦེ་སྡོད་མི་ཆ་ཁྱབ་ ཨ་རྟག་རང་ ཡེ་ཤུ་གི་དོན་ལུ་ འཆི་བ་ནང་སྐྱེལ་ཡོདཔ་ཨིན་ འདི་གིས་འབད་དེ་ ང་བཅས་མི་རྟག་པའི་ལུས་ཀྱི་ནང་ན་ ཡེ་ཤུ་སྐུ་གསོན་པོ་བཞུགས་ཡོད་ཟེར་ སྟོན་ནིའི་དོན་ལུ་ཨིན།

¹² དེ་འབདཝ་ལས་འཆི་བ་གིས་ ང་བཅས་ཀྱི་ནང་ན་ལཱ་འབདཝ་ཨིན་ དེ་འབདཝ་ད་ ཁོ་གི་སྐུ་ཚེ་མཐའ་མེདཔ་འདི་གིས་ ཁྱེད་ནང་ལུ་ཕྱག་ལཱ་མཛདཔ་ཨིན།

¹³ གསུང་རབ་ནང་བྲིས་ཏེ་ཡོད་མི་དང་འཁྲིལ་ཏེ། ང་གིས་དད་པ་བསྐྱེད་ཅི་ དེ་འབདཝ་ལས་ ང་གིས་བློ་ཡང་སླབ་ཅི་ཟེར་ ང་བཅས་ལུ་ ཨ་ནི་བཟུམ་གྱི་སེམས་ཡོདཔ་ལས་བརྟེན་ཏེ་ ང་བཅས་ཀྱིས་ཡང་དད་པ་བསྐྱེད་དེ་ བློ་སླབ་ཨིན།

¹⁴ ག་ཅི་སྨོ་ཟེར་བ་ཅིན་ གཙོ་བོ་ཡེ་ཤུ་ལུ་གཤགས་ས་ལས་ གསོན་པོ་བཞེངས་གནང་མི་ དཀོན་མཆོག་གིས་ ང་བཅས་ལུ་ཡང་ ཡེ་ཤུ་དང་གཅིག་ཁར་ གསོན་པོ་ལྷོང་གནང་སྟེ་ ཁྱེད་དང་ང་བཅས་ ཁོ་རང་གི་སྐུ་མདུན་ལུ་ སྡོད་ནི་ཡོད་ཟེར་ང་བཅས་ཀྱིས་ཤེས།

¹⁵ འདི་ཚུ་ག་ར་ ཁྱེད་ལུ་ཕན་ཐོགས་ནི་གི་དོན་ལུ་ཨིན་ དེ་གིས་འབད་ དཀོན་མཆོག་གི་ཐུགས་རྗེ་དེ་ མི་རློབས་ལས་མི་རློབས་དར་ཁྱབ་འགྱོ་ནི་དང་ ལྷག་པར་དུ་ དཀོན་མཆོག་ལུ་བཀྲིན་ཆེ་ཟེར་ཞུ་སྟེ་ ཁོ་ལུ་གཟི་བརྗིད་དང་བསྟོད་པ་ཡར་འཕེལ་གཏང་ནི་ཨིན།

¹⁶ དེ་འབདཝ་ལས་ ང་བཅས་ནམ་ཡང་རྒྱབ་བཤུད་མི་རྐྱབ་ ང་བཅས་ཀྱི་ལུས་འདི་མར་ཉམས་ཏེ་ ཉག་ཕྲ་སི་སི་འགྱོ་སྟེ་འབད་རུང་ སེམས་འདི་ ཉིནམ་གཅིག་བ་ཉིནམ་གཅིག་ གསརཔ་སྦེ་ཡར་རྒྱས་འགྱོཝ་ཨིན།

¹⁷ ག་ཅི་སྨོ་ཟེར་བ་ཅིན་ ད་ལྟོ་ང་བཅས་ཀྱིས་ མྱོང་མིའི་དཀའ་ངལ་འདི་ ཆུང་ཀུ་དང་ དུས་ཡུན་ཐུང་ཀུ་ཅིག་གི་དོན་ལུ་ཨིན་ དེ་གིས་ང་བཅས་ལུ་ ཚད་འཇལ་མ་ཚུགས་པའི་ གཟི་བརྗིད་སྦོམ་ དུས་ཨ་རྟག་རང་བརྟན་ཏོག་ཏོ་སྦེ་སྡོད་ནི་གི་ གྲུབ་འབྲས་ཐོན་ཚུགས་པའི་དོན་ལུ་ གྲ་སྒྲིག་རྐྱབ་དོ།

¹⁸ དེ་འབདཝ་ལས་ མཐོང་ཚུགས་མི་སྙིང་པོ་ཚུ་ལུ་མ་བལྟ་བར་ མིག་གིས་མ་མཐོང་མི་སྙིང་པོ་ཚུ་ལུ་བལྟཝ་ཨིན་ ག་ཅི་སྨོ་ཟེར་བ་ཅིན་ མིག་གིས་མཐོང་ཚུགས་མི་སྙིང་པོ་འདི་ཚུ་ གནས་སྐབས་གཅིག་གི་དོན་ལུ་རྐྱངམ་གཅིག་ཨིན་ དེ་འབདཝ་ད་ མིག་གིས་མ་མཐོང་མི་ སྙིང་པོ་འདི་དུས་རྟག་བུ་རང་སྡོད་འོང་།།