ཀོ་རཱིན་ཐི་གཉིས་པ་ལེའུ་ 3 - རྫོང་ཁ་

ཞལ་འཆེས་གསརཔ་གི་ཞབས་ཕྱིཔ།

¹ ད་ང་བཅས་ཀྱིས་ད་རུང་ཡང་ རང་བསྟོད་བརྐྱབ་ནི་འགོ་བཙུགསཔ་ཨིན་ན་ མི་གཞན་བཟུམ་སྦེ་ ང་བཅས་ཁྱེད་སྡོད་སར་འོངམ་ད་ རྒྱབ་སྐྱོར་ཡི་གུ་གཅིག་ འབག་འོང་དགོཔ་ཨིན་ན་ ཡང་ན་ ང་བཅས་ཀྱི་དོན་ལུ་ཁྱེད་ཀྱིས་ རྒྱབ་སྐྱོར་ཡི་གུ་གཅིག་བྲིས་ཏེ་ གཏང་དགོཔ་ཨིན་ན།

² དེ་སྦེ་མེན་ ང་བཅས་ལུ་དགོ་པའི་རྒྱབ་སྐྱོར་ཡི་གུ་འདི་ ཁྱེད་ཆ་ཁྱབ་ཨིན་ ང་བཅས་ཀྱི་ལཱ་བཟང་པོ་ ཁྱེད་ཀྱི་སྦུག་ལུ་འབད་དེ་ཡོད་མི་ མི་ག་ར་གིས་ལྷག་སྟེ་ ཤེས་ཚུགས་མི་ ཁྱེད་ཀྱི་མི་ཚེ་གསརཔ་དེ་ ང་བཅས་ཀྱི་སེམས་ཁར་བྲིས་ཏེ་རང་ཡོད།

³ ཁྱེད་ཆ་ཁྱབ་ ང་བཅས་ཀྱི་ལཱ་གི་འབྲས་བུ་ ཕྱི་ཁར་གསལ་ཏོག་ཏོ་མཐོང་ཚུགས་མི་ ཡེ་ཤུ་ཁིརཱིས་ཀྱི་ཕྱག་ཡིག་ཨིན་ འདི་སྣག་རྩི་གིས་ བྲིས་བྲིསཝ་མེན་པར་ གསོན་པོ་བཞུགས་ཡོད་མིའི་ དཀོན་མཆོག་གི་ཐུགས་ཉིད་ཀྱིས་ བྲིས་བྲིསཝ་དང་ རྡོ་ལེབ་གུ་བྲིས་ཏེ་ཡོད་མིའི་རི་མོ་བཟུམ་སྦེ་མེན་པར་ མིའི་སེམས་ཁར་བྲིས་ཏེ་ཡོད་མིའི་ ཡི་གུ་དེ་ཨིན།

⁴ དེ་སྦེ་བློ་གཏད་ཚུགས་མི་འདི་ཡང་ དཀོན་མཆོག་གི་སྐུ་མདུན་ལུ་བཞུགས་ཡོད་མིའི་ ཡེ་ཤུ་ཁིརཱིས་ལས་བརྟེན་ཏེ་ཨིན།

⁵ དེ་ལས་ ང་བཅས་རང་གི་ལྕོགས་གྲུབ་ཀྱིས་ འདི་ཚུ་ག་ར་འབད་ཚུགསཔ་ཨིན་ཟེར་ ང་བཅས་ཀྱིས་མནོ་བསམ་རྩ་ལས་རང་མ་གཏང་ དེ་འབདཝ་ད་ འདི་ཚུ་ག་ར་དཀོན་མཆོག་གི་དབང་ཤུགས་ཀྱིས་ འབད་ཚུགསཔ་ཨིན།

⁶ དེ་ལས་ཁོ་གིས་ ང་བཅས་ཞལ་འཆེས་གསརཔ་གི་ཞབས་ཏོག་གི་ ལཱ་འབད་མིའི་ ལྕོགས་གྲུབ་ཅན་གཅིག་སྦེ་མཛད་གནང་ཡི་ ཞལ་འཆེས་གསརཔ་འདི་ ཧེ་མ་གི་བཀའ་ཁྲིམས་དང་འཁྲིལ་ཏེ་མེན་པར་ ཐུགས་ཉིད་ལས་བརྟེན་ཏེ་ཨིན་ ག་ཅི་སྨོ་ཟེར་བ་ཅིན་ བཀའ་ཁྲིམས་དང་འཁྲིལ་ཏེ་བྲིས་བཞག་མི་འདི་གིས་ བསད་བཅུགཔ་ཨིན་མས་ དེ་འབདཝ་ད་ དམ་པའི་ཐུགས་ཉིད་ཀྱིས་ ང་བཅས་ལུ་གསོན་པོ་སྦེ་ སྡོད་ནིའི་དོན་ལུ་ཚེ་གནངམ་ཨིན།།

ཞལ་འཆེས་གསརཔ་གི་གཟི་བརྗིད་ཀྱི་སྐོར།

⁷ ད་ རྡོ་ལེབ་གུ་པ་ཏྲ་བརྐོ་སྟེ་ མོ་སཱེས་ལུ་གནང་མིའི་བཀའ་ཁྲིམས་དེ་ འཆི་བ་ནང་འཁྱིད་སྐྱེལ་མི་གཅིག་ཨིན་རུང་ འདི་གཟི་བརྗིད་ཅན་སྦེ་བྱུང་ནུག་ ཨ་ནི་གཟི་བརྗིད་ཀྱི་འོད་དེ་ མོ་སཱེས་ཀྱི་གདོང་ལུ་ཤར་ནུག་ མ་གཞི་ འོད་འདི་ དེ་བསྒང་ལས་རང་ ཡལ་ནི་འགོ་བཙུགས་ཏེ་འབད་རུང་ ཨཱིས་ར་ཨཱེལ་གྱི་མི་དེ་ཚུ་གིས་ ཁོ་ལུ་བལྟ་མ་ཚུགས་པས།

⁸ དེ་འབདཝ་ལས་ དམ་པའི་ཐུགས་ཉིད་ཀྱིས་སྐྱོང་མི་འདི་གིས་ འདི་བ་ལྷག་པའི་ གཟི་བརྗིད་སྦོམ་སྦེ་མི་འབྱུང་ག།

⁹ ཉེས་ཆད་བཀལ་ཏེ་སྐྱོང་མི་བཀའ་ཁྲིམས་འདི་ལུ་ གཟི་བརྗིད་སྦོམ་ཡོད་པ་ཅིན་ དཀོན་མཆོག་གི་ཐུགས་དང་ལྡན་པའི་ཕྲངམ་གིས་ སྐྱོང་མི་འདི་ལུ་ གཟི་བརྗིད་ག་དེམ་ཅིག་ སྦོམ་མི་འོང་ནི་སྨོ།

¹⁰ ག་ཅི་སྨོ་ཟེར་བ་ཅིན་ ད་ལྟོ་གི་ཞལ་འཆེས་གསརཔ་གི་གཟི་བརྗིད་འདི་ འགོ་དང་པ་བཀའ་ཁྲིམས་ཀྱི་གཟི་བརྗིད་ ཡལ་འགྱོ་མི་དང་འཕྱདཔ་ད་ གནམ་མེད་ས་མེད་ ཧ་ལས་སི་སི་ཨིན།

¹¹ དེ་ལས་ ད་ལྟོ་ཡལ་སོང་མི་དེ་ འགོ་དང་པ་གཟི་བརྗིད་ཅན་སྦེ་བྱུང་བྱུངམ་ཨིན་པ་ཅིན་ འགྱུར་བ་མེད་པར་སྡོད་མིའི་ ཞལ་འཆེས་གསརཔ་གི་གཟི་བརྗིད་འདི་ ག་དེམ་ཅིག་སྦོམ་འོང་ནི་སྨོ།

¹² དེ་འབདཝ་ལས་ ཞལ་འཆེས་གསརཔ་གི་རྒྱུད་ལས་ རེ་བ་སྦོམ་ང་བཅས་ལུ་གནང་ཡོདཔ་ལས་ ང་བཅས་ཀྱིས་ བློ་ཁོག་སྦོམ་སྦེ་སླབ་ཚུགས།

¹³ ཨཱིས་ར་ཨཱེལ་པ་ཚུ་གིས་ མོ་སཱེས་ཀྱི་གདོང་ཁར་ལས་ ཡལ་འགྱོ་ནི་ཨིན་མིའི་འོད་ཟེར་དེ་ལུ་ མཐོང་མ་བཅུག་ནི་སྦེ་ ཁོ་རང་གི་གདོང་ཁར་ གདོང་ཁེབས་བཀབ་སྟེ་སྡོད་མི་བཟུམ་ ང་བཅས་མེན།

¹⁴ དེ་སྦེ་འབད་མི་འདི་ ཁོང་མི་སེམས་སྲ་ཀྲག་འབདཝ་ལས་བརྟེན་ཏེ་ཨིན་མས་ ད་ལྟོ་གི་བར་ན་ཡང་ ཁོང་གིས་ཞལ་འཆེས་རྙིངམ་ལྷགཔ་ད་ ཨ་ནི་གདོང་ཁེབས་ ཁོང་གི་སེམས་ཁར་བཀབ་སྡོད་དེ་ བདེན་པ་རྩ་ལས་ཧ་གོ་མ་ཚུགས་པར་སྡོདཔ་ཨིན་ ཁིརཱིས་ལུ་དད་པ་བསྐྱེདཔ་ཙམ་གྱིས་ གདོང་ཁེབས་དེ་བཤུབ་གཏང་ཚུགས།

¹⁵ དོན་ལས་རང་ཨིན་ ད་ལྟོ་གི་བར་ན་ཡང་ མོ་སཱེས་ཀྱི་བཀའ་ཁྲིམས་ཚུ་ ཁོང་གི་ལྷགཔ་ད་ ཁོང་གི་སེམས་ཁར་ གདོང་ཁེབས་བཀབ་སྟེ་ ཧ་མ་གོ་བར་སྡོདཔ་ཨིན།

¹⁶ དེ་འབདཝ་ད་ མི་ག་ར་ཨིན་རུང་ གཙོ་བོ་གི་སྐུ་མདུན་ལུ་ལོག་འོང་པ་ཅིན་ ཨ་ནི་གདོང་ཁེབས་འདི་བཤུབ་བཀོཝ་ཨིན།

¹⁷ ད་གཙོ་བོ་འདི་ཐུགས་ཉིད་ཨིན་ དེ་ལས་གཙོ་བོ་གི་ཐུགས་ཉིད་ ག་བཞུགས་སར་ རང་དབང་ཡོདཔ་ཨིན།

¹⁸ ང་བཅས་ག་ར་གིས་ གདོང་ཁེབས་འདི་འཕུད་བཀོ་སྟེ་ གཙོ་བོ་གི་གཟི་བརྗིད་དེ་དང་མཇལཝ་ཨིན་ དེ་གིས་འབད་ ང་བཅས་ལུ་ཡང་ ཁོ་གི་སྐུ་བརྙན་བཟུམ་སྦེ་རང་ གཟི་བརྗིད་ལས་ གཟི་བརྗིད་ཅན་སྦེ་འགྱུར་གནང་ནི་ཨིན་ དེ་ག་ར་གཙོ་བོ་གི་ཐུགས་ཉིད་ལས་སྦེ་བྱུངམ་ཨིན།།