ཀོ་རཱིན་ཐི་གཉིས་པ་ལེའུ་ 2 - རྫོང་ཁ་

པའུལ་ལོག་སྟེ་ ཀོ་རཱིན་ཐི་ལུ་མི་འོང་ཟེར་བའི་སྐོར།

¹ ད་ ང་རང་གི་མནོ་བསམ་ལུ་ ང་ལོག་སྟེ་ཁྱེད་སྡོད་སར་ མི་འོང་ནི་སྦེ་ཐག་བཅད་ཅི་ ག་ཅི་སྨོ་ཟེར་བ་ཅིན་ དེ་གིས་ཁྱེད་ལུ་ སེམས་སྐྱོ་བའི་གཞི་གཅིག་རང་འོང་ནི་མས།

² ང་གིས་ཁྱེད་ལུ་སེམས་སྐྱོ་བཅུག་པ་ཅིན་ ལོག་སྟེ་ང་ལུ་ སེམས་དགའ་བཅུག་མིའི་མི་ ག་འོང་ནི་སྨོ།

³ དེ་འབདཝ་ལས་ ང་ལུ་དགའ་སྤྲོ་བྱུང་བཅུག་མི་ཚུ་གི་ཚབ་མ་ལུ་ སེམས་སྐྱོ་བའི་གཞི་གཅིག་རང་འོང་ནི་ཨིན་པ་ཅིན་ ང་ཁྱེད་སྡོད་སར་མི་འོང་ཟེར་ ཧེ་མ་གི་ཡི་གུ་འདི་ནང་ བྲིས་བྲིསཝ་ཨིན་ དོན་ལས་རང་ ང་གིས་ཁྱེད་ལུ་བློ་གཏད་དེ་སྡོད་ཅི་ ང་ལུ་དགའ་སྤྲོ་བྱུང་བཅུག་མི་རྒྱུ་མཚན་དེ་ ཁྱེད་ཀྱི་དགའ་སྤྲོ་ཡང་ཨིན་ཟེར་ ཁྱེད་ཀྱིས་ཤེས་འོང་།

⁴ ག་ཅི་སྨོ་ཟེར་བ་ཅིན་ ཧེ་མ་གི་ཡི་གུ་འདི་བྲིསཝ་ད་ ངེ་གི་སེམས་ཁར་ན་ཟུག་བརྐྱབས་ཏེ་ མིག་ཏོ་ལས་གནམ་མེད་ས་མེད་ མིག་ཆུ་འཛགས་ཅི་ དེ་སྦེ་འབད་མི་འདི་ ཁྱེད་ལུ་སེམས་སྐྱོ་བཅུག་ནི་སྦེ་བྲིས་བྲིསཝ་མེན་ དེ་འབདཝ་ད་ ངེ་གི་སེམས་ཀྱི་གཏིང་ལས་རང་ ཁྱེད་ལུ་བྱམས་པ་འབད་བའི་དོན་དག་ཨིན།།

སྡིག་ཅན་ལུ་དགོངས་ཡངས་གཏང་དགོ་པའི་སྐོར།

⁵ ཁྱེད་ཀྱི་སྦུག་ལུ་ མི་གཅིག་གིས་ལྟས་ངན་འབདཝ་ད་ ང་ལས་ཡང་ལྷགཔ་སྦེ་ ཁྱེད་ག་ར་སེམས་ཤི་དགོཔ་ཐལ་སོང་ཡི་ འདི་ང་གིས་བློ་ཐེབས་བཏགས་ཏེ་སླབ་མེན།

⁶ ཨ་ནི་མི་དེ་གིས་འབད་མིའི་ཉེས་པ་འདི་ལུ་ ཁྱེད་ལེ་ཤ་ཅིག་གིས་ཁྲིམས་བཀལ་ཚར་ཡི་ དེ་ཅིག་གིས་བཏུབ་སྦེ་བཞག་དག

⁷ ད་ལྟོ་ཁོ་ལུ་ དགོངས་ཡངས་གཏང་སྟེ་ སེམས་གསོ་འབད་དགོཔ་ཐལ་ཡི་ དེ་སྦེ་མ་འབད་བ་ཅིན་ ཁོ་བློ་ཕམ་སྟེ་ བཟོད་མ་ཚུགས་པའི་ཚོར་བ་བྱུང་སྟེ་ དད་པ་ཉམས་འགྱོ་འོང་།

⁸ ད་ང་གིས་ཁྱེད་ལུ་སླབ་དོ་ ཁྱེད་ཀྱིས་ཁོ་ལུ་འབད་མིའི་བྱམས་པ་འདི་ ཡང་བསྐྱར་འབད་བྱིན་དགོ།

⁹ དོན་དག་གཅིག་འདི་ ག་ཅི་སྨོ་ཟེར་བ་ཅིན་ ང་གིས་ཁྱེད་ལུ་བྲིས་མིའི་ཡི་གུ་འདི་ ཁྱེད་ལུ་ཚོད་བལྟ་ནིའི་དོན་ལུ་དང་ ང་གིས་སླབ་མི་འདི་ཚུ་ག་ར་ཉན་འོང་ག་ མི་ཉན་ག་ བལྟ་ནི་སྦེ་བྲིས་བྲིསཝ་ཨིན།

¹⁰ ཁྱེད་ཀྱིས་ག་ལུ་འབད་རུང་ དགོངས་ཡངས་གཏང་པ་ཅིན་ ང་གིས་ཡང་མི་འདི་ལུ་ དགོངས་ཡངས་གཏངམ་ཨིན་ ང་གིས་དགོངས་ཡངས་གཏང་དགོཔ་སྦེ་ཐལ་ཏེ་ཡོད་མི་དེ་ལུ་ དགོངས་ཡངས་གཏངམ་ད་ ཁིརཱིས་ཀྱི་སྐུ་མདུན་ལུ་ ཁྱེད་ཀྱི་ཁེ་ཕན་གྱི་དོན་ལུ་ཨིན།

¹¹ དེ་འབདཝ་ལས་ བདུད་ སེ་ཏཱན་ང་བཅས་ལས་དྲགཔ་སྦེ་ འཐོན་མ་བཅུག་གེ་མནོ་སྟེ་ ང་གིས་འདི་འབད་ཡི་ ག་ཅི་སྨོ་ཟེར་བ་ཅིན་ ཁོ་གིས་གྱོས་ངན་བརྩམས་མི་དེ་ ང་བཅས་ཀྱིས་ལེགས་ཤོམ་སྦེ་རང་ཤེས།།

གཏམ་བཟང་འདི་དྲི་བཟང་དྲིམ་ཞིམ་ཏོང་ཏོ་བཟུམ་ཨིན་པའི་སྐོར།

¹² ད་ང་ ཏོརོ་ཨཱས་ཀྱི་ཁྲོམ་ཁར་ལྷོདཔ་ད་ ཁིརཱིས་ཀྱི་གཏམ་བཟང་བཤད་ནི་གི་དོན་ལུ་ གཙོ་བོ་གིས་ང་ལུ་ གོ་སྐབས་བཟང་པོ་གཅིག་གནང་ཡི།

¹³ ཨིན་རུང་ ངེའི་སྤུན་ཆ་ ཏི་ཏུས་འདི་འཚོལ་མ་ཐོབ་ལས་བརྟེན་ཏེ་ ངེའི་སེམས་ཁར་ཚ་གྱང་ལང་སྟེ་སྡོད་ཅི་ དེ་ལས་ཁོང་ ཏོརོ་ཨཱས་ལུ་སྡོད་མིའི་ དདཔ་ཅན་ཚུ་ལུ་ སྡོད་སྨ་རེ་ཟེར་སླབ་སྦེ་ ང་ལུང་ཕྱོགས་ མ་ཀེ་དོ་ནི་ཡ་ལུ་སོང་ཡི།

¹⁴ དེ་འབདཝ་ད་ དཀོན་མཆོག་ལུ་བཀྲིན་ཆེ་ཟེར་ཞུ་ནི་ཨིན་ ག་ཅི་འབད་ཟེར་བ་ཅིན་ ཁིརཱིས་ཀྱི་རྒྱུད་ལས་སྦེ་ ཁོ་གིས་དམག་རྐྱབ་ས་ལས་ རྒྱལ་ཁ་ཐོབ་སྟེ་ལོག་བྱོན་དོཝ་བཟུམ་སྦེ་ ང་བཅས་ཁོ་རའི་བཙོན་པ་སྦེ་འཁྱིད་འབྱོནམ་ཨིན་ དེ་མ་ཚད་ ང་བཅས་ག་ཏེ་རང་འགྱོ་རུང་ ཁོ་གི་གཏམ་བཟང་འདི་ མི་གཞན་ག་ར་གིས་ ཚོར་བའི་དྲི་བཟང་གི་དྲིམ་ཞིམ་ཏོང་ཏོ་ ང་བཅས་ཀྱི་རྒྱུད་ལས་མནམ་བཅུགཔ་ཨིན།

^15-16 ག་ཅི་སྨོ་ཟེར་བ་ཅིན་ ང་བཅས་ཀྱི་མི་ཚེ་འདི་དཀོན་མཆོག་གི་དོན་ལུ་ ཁིརཱིས་ལས་བྱུང་འོང་མིའི་ དྲི་བཟང་ཞིམ་ཏོང་ཏོ་བཟུམ་སྦེ་ཨིན་ ཁོང་ཐར་པ་ཐོབ་མི་ཚུ་གི་དོན་ལུ་ ཨ་ནི་དྲི་བཟང་འདི་གིས་ ཁོང་ལུ་ལྷག་པར་དུ་ ཚེ་མཐའ་མེདཔ་ནང་འཁྱིད་འགྱོཝ་ཨིན་ དེ་འབདཝ་ད་ ཁོང་མེདཔ་ཐལ་འགྱོ་མི་ཆ་ཁྱབ་ཀྱི་དོན་ལུ་ འཆི་བའི་ལམ་ནང་འཁྱིད་མི་ སྡུག་ཁིག་ཁི་སྦེ་མནམ་མིའི་དྲིམ་བཟུམ་སྦེ་ཨིན་ དེ་སྦེ་འབད་ནི་འདི་གིས་ ཨ་ནི་བཟུམ་གྱི་ཧ་ལས་སི་སི་ལཱ་ ག་གིས་འབད་ཚུགསཔ་སྨོ།

¹⁷ དེ་ལས་ང་བཅས་མི་གཞན་བཟུམ་སྦེ་མེན་ ཁོང་ལེ་ཤ་ཅིག་གིས་ དཀོན་མཆོག་གི་གསུང་འདི་ ཏི་རུ་བཟོ་བའི་དོན་ལུ་ ཆོས་བཤདཔ་ཨིན་མས་ ང་བཅས་དེ་སྦེ་མེན་པར་ ཕྲང་སྟེ་འབད་མི་ཚུ་ཨིན་ དེ་མ་ཚད་ ཁིརཱིས་ཀྱི་དབང་ཚད་ནང་ ང་བཅས་དཀོན་མཆོག་གིས་བཏང་གནང་མི་ཚུ་ཨིན་ དེ་ལས་ང་བཅས་ཆོས་བཤད་དེས་ཟེར་ ཁོ་གིས་གཟིགས་ཏེ་བཞུགས་ཡོདཔ་ཨིན།།