ཀོ་རཱིན་ཐི་གཉིས་པ་ལེའུ་ 12 - རྫོང་ཁ་

པའུལ་གྱི་མཐོང་སྣང་མཐོང་མིའི་སྐོར།

¹ རང་བསྟོད་བརྐྱབས་ཏེ་ རྩ་རྒས་ཀྱི་བློ་སླབ་ནི་འདི་ ཕན་ཐོགས་མེད་ དེ་འབདཝ་ད་ འཕྲོ་མཐུད་དེ་རང་ གཙོ་བོ་གིས་གནང་མི་མཐོང་སྣང་དང་ དངོས་སུ་སྦེ་སྟོན་གནང་མི་སྐོར་ལས་བཤད་ནི་ཨིན།

² ལོ་བཅུ་བཞི་གི་ཧེ་མ་ ཁིརཱིས་ནང་ཨིན་མི་ ང་གིས་ངོ་ཤེས་མི་གཅིག་ ཞིང་ཁམས་གསུམ་པ་ཚུན་ཚོད་བསྣམས་ནུག་ མི་འདི་ ལུས་དང་གཅིག་ཁར་ཨིན་ན་ ལུས་མེད་པར་ཨིན་ན་ ང་གིས་མི་ཤེས་པས་ དཀོན་མཆོག་གིས་མཁྱེན།

³ ད་རུང་ཨ་ནི་མི་འདི་ ལུས་དང་གཅིག་ཁར་ཨིན་ན་ ལུས་མེད་པར་ཨིན་ན་ འདི་ང་གིས་མི་ཤེས་ དཀོན་མཆོག་གིས་མཁྱེན།

⁴ ཨིན་རུང་ མི་འདི་ཞིང་ཁམས་གསུམ་པ་ལུ་ལྷོདཔ་ད་ མི་གིས་སླབ་མ་བཏུབ་མི་ ལོ་རྒྱུས་ག་ཅི་དེས་ཅིག་རྩ་ཅན་ཡོད་མི་དེ་ཚུ་ ཁོ་གིས་གོ་ནུག

⁵ ཨ་ནི་བཟུམ་གྱི་མི་ལུ་འབད་བ་ཅིན་ ང་གིས་བསྟོད་པ་རྐྱབ་ནི་ཨིན་ དེ་འབདཝ་ད་ ངེ་གི་སྐོར་ལས་ རང་བསྟོད་མི་རྐྱབ་ བསྟོད་པ་རྐྱབ་དགོ་པ་ཅིན་ ང་རང་གི་ཞན་འཁོགས་ཀྱི་སྐོར་ལས་རྐྱབ་ནི་ཨིན།

⁶ ང་གིས་ ང་རང་ལུ་ རང་བསྟོད་རྐྱབ་དགོ་མནོ་སྟེ་ ང་གིས་ཨ་ནི་བཟུམ་སྦེ་འབད་ཡི་ཟེར་ སླབ་པ་ཅིན་ ང་རང་རྩ་རྒས་སྦེ་མི་བརྩི་ ག་ཅི་སྨོ་ཟེར་བ་ཅིན་ ང་གིས་བདེན་པ་དེ་སླབ་སྡོད་འོང་ ཨིན་རུང་ ང་གིས་དེ་སྦེ་ རང་བསྟོད་མི་རྐྱབ་ ད་ མི་ག་གིས་རང་འབད་རུང་ ངེ་གི་སྐོར་ལས་ བསྟོད་པ་བརྐྱབས་ཏེ་འབད་བ་ཅིན་ ཁོང་གིས་ ངེ་གི་མི་ཚེ་ནང་ལུ་ མཐོང་མི་དང་ རྣ་བ་གོ་མི་རྐྱངམ་གཅིག་ལས་བརྒལ་ཏེ་ མནོ་བསམ་མ་གཏང་གེ་ཟེར་མནོ་སྟེ་ཨིན།

⁷ དེ་ལས་ ཧ་ལས་པའི་ཕྱག་ལཱ་དེ་ ང་ལུ་དངོས་སུ་སྦེ་སྟོན་གནང་ནི་དེ་གིས་ ང་ ང་རང་ ཁམས་ཆེ་དྲགས་སྦེ་མི་འགྱུར་ནི་གི་དོན་ལུ་ བདུད་ སེ་ཏཱན་གྱིས་ བར་ཆད་བརྐྱབས་ཏེ་ ངེ་གི་གཟུགས་ཁར་ རྩང་གིས་སོབ་དོཝ་བཟུམ་གྱི་ དཀའ་ངལ་མྱོང་བཅུག་ཅི།

⁸ ང་གིས་ཚར་གསུམ་ གཙོ་བོ་ལུ་ ཨ་ནི་དཀའ་ངལ་འདི་ ང་ལས་བཞེས་གནང་ཟེར་ཞུ་ཡི།

⁹ དེ་འབདཝ་ད་ དེ་གི་ལན་ལུ་ཁོ་གིས་ ངེ་གི་ཐུགས་རྗེ་འདི་ ཁྱོད་ལུ་ལངམ་སྦེ་ཡོད་ ག་ཅི་སྨོ་ཟེར་བ་ཅིན་ ཁྱོད་ལུ་སྟོབས་ཤུགས་མེད་ འབད་མ་ཚུགས་པར་སྡོདཔ་ད་ ངེ་གི་དབང་ཤུགས་དེ་ དོན་ལས་རང་མཐོང་དོ་ཟེར་གསུངས་དེས་ དེ་འབདཝ་ལས་ ང་ལུ་ཤུགས་མེད་པར་སྡོད་པའི་སྐབས་ ཁིརཱིས་ཀྱི་དབང་ཤུགས་དེ་ ངེ་གི་ནང་བཞུགས་ཡོདཔ་མཐོང་བཅུག་ནི་སྦེ་ སྤྲོ་བའི་ངང་ལས་ ང་ཤུགས་མེད་མི་འདི་ལུ་ རང་བསྟོད་རྐྱབས་ནི་ཨིན།

¹⁰ དེ་འབདཝ་ལས་ ང་ཞན་འཁོགས་འབདཝ་ད་ ང་ལུ་ཚིག་རྩུབ་སླབ་ད་ སྡུག་བསྔལ་ཕོགཔ་ད་ མི་གཞན་གྱིས་ང་ལུ་ གནོད་འཚེ་བཀལཝ་ད་ རྐྱེན་ངན་ཚུ་བྱུང་འོངམ་ད་ དེ་ཚུ་ག་ར་ ཁིརཱིས་ཀྱི་དོན་ལུ་ཨིན་ཟེར་ ང་གིས་མནོ་བསམ་གཏང་སྟེ་ ངལ་རངསམ་ཨིན་ ག་ཅི་སྨོ་ཟེར་བ་ཅིན་ ང་ཤུགས་མེད་པའི་དུས་ལུ་ ང་སྟོབས་ཤུགས་ཅན་ཨིན།།

པའུལ་གྱིས་ ཀོ་རཱིན་ཐི་པ་ཚུ་གི་སྐོར་ལས་ཚ་གྱང་ལང་པའི་སྐོར།

¹¹ དེ་ལས་ ང་རང་གིས་རང་ལུ་ རྩ་རྒས་བཟུམ་གྱི་འབད་བཞག་བཟོ་སྟེ་སྡོདཔ་ཨིན་ དེ་འབདཝ་ད་ དེ་བཟུམ་བཟོ་བཅུག་མི་འདི་ ཁྱེད་ཆ་ཁྱབ་ཨིན་ མ་པ་ཁྱེད་ཀྱིས་ ངེ་གི་སྐོར་ལས་ རྒྱབ་སྐྱོར་འབད་ཚུགས་དགོ་ ག་ཅི་སྨོ་ཟེར་བ་ཅིན་ ང་ག་ནི་ཡང་མེནམ་བཟུམ་ཨིན་རུང་ ཁྱེད་ཀྱི་སྐུ་ཚབ་རྫུས་མ་ ཁག་ཆེ་ཤོས་ཚུ་ལས་ ང་དྲག

¹² ང་ཧེ་མ་ ཁྱེད་དང་གཅིག་ཁར་སྡོདཔ་ད་ བཟོད་པ་བསྒོམས་ཏེ་ རྟགས་མཚན་དང་ ཧ་ལས་སི་སི་གི་ལཱ་དང་ རྫུ་འཕྲུལ་འདི་ཚུ་འབད་དེ་ སྐུ་ཚབ་ངོ་མ་སྦེ་ཁུངས་བཀལ་ཡི།

¹³ དེ་ལས་ ང་གིས་ཆོས་ཚོགས་གཞན་ཚུ་ལུ་ འབད་དོཝ་བཟུམ་སྦེ་ཁྱེད་ལུ་ ག་ཅི་མ་འབདཝ་སྨོ་ཟེར་བ་ཅིན་ ཁྱེད་ལས་ང་གིས་ཆ་རོགས་མ་འཚོལ་ དེ་སྦེ་འཛོལ་བ་འབད་མི་འདི་ལུ་ བཤགས་པ་བཞེས་གནང་།

¹⁴ ད་ ང་ཐེངས་གསུམ་པ་ ཁྱེད་སྡོད་སར་བལྟ་བ་འོང་ནི་སྦེ་ གྲ་སྒྲིག་ཡོད་ འདི་བསྒང་ ཁྱེད་ལུ་དཀའ་ངལ་ག་ནི་ཡང་མི་བྱིན་ དེ་མ་ཚད་ ང་ཁྱེད་ལས་ག་ནི་ཡང་མི་འཚོལ་ ང་ལུ་དགོ་མི་འདི་ ཁྱེད་རང་ཨིན་ དེ་ལས་ཁྱེད་ ང་རང་གི་ཨ་ལོ་བཟུམ་སྦེ་ བལྟ་བ་འོང་ནི་ཨིན་ ཨ་ལོ་གིས་ཕམ་གྱི་དོན་ལུ་ག་ནི་ཡང་ གྲ་སྒྲིག་རྐྱབ་མི་དགོ་ དེ་འབདཝ་ད་ ཕམ་གྱིས་ཁོང་རང་གི་ ཨ་ལོ་གི་དོན་ལུ་གྲ་སྒྲིག་རྐྱབ་ཨིན།

¹⁵ ད་ ང་ཁྱེད་སྡོད་སར་འོངས་ཏེ་ ངེའི་ནང་ཡོད་མི་ག་ར་ ང་རང་གི་ཚེ་ཡང་ ཁྱེད་ཀྱི་དོན་ལུ་བྱིན་ནི་དེ་ ངེ་གི་སྤྲོ་བ་ཨིན་ ག་ཅི་སྨོ་ཟེར་བ་ཅིན་ ང་ཁྱེད་ལུ་གནམ་མེད་ས་མེད་དགའཝ་ཨིན་ དེ་འབདཝ་ད་ ཁྱེད་ང་ལུ་ཨ་ཙི་ཅིག་ལས་བརྒལ་མི་དགའ་བས།

¹⁶ ཁྱེད་ལ་ལུ་གིས་སླབ་དོཝ་མས་ ང་གིས་ཁྱེད་ལུ་དཀའ་ངལ་མ་བྱིན་ཟེར་ཨིན་རུང་ ལ་ལུ་གིས་ ང་ མི་མགུ་བདེ་དྲགས་དང་ ཁྱེད་ལུ་ཧིང་ནང་བཙུགས་མི་ཨིན་མས་ཟེར་མནོ་བསམ་གཏངམ་ཨིན་པས།

¹⁷ འདི་ག་དེ་སྦེ་སྨོ་ ང་གིས་མི་བང་ཆེན་གཏང་སྟེ་ རང་གི་ཁེ་ཕན་གྱི་དོན་ལུ་ཁྱེད་མགུ་བསྐོར་ནང་བཙུགས་ཅི་ག།

¹⁸ ང་གིས་ ཏི་ཏུས་ལུ་ ཁྱེད་སྡོད་སར་སོང་ཟེར་གསོལཝ་བཏབ་སྟེ་ དདཔ་ཅན་སྤུན་ཆ་གཅིག་ ཁོ་དང་གཅིག་ཁར་བཏངམ་ད་ ཏི་ཏུས་ཀྱིས་ རང་གི་ཁེ་ཕན་གྱི་དོན་ལུ་ཁྱེད་མགུ་བསྐོར་ནང་བཙུགས་ཅི་ག་ དེ་སྦེ་རྩ་ལས་རང་མེན་ ག་ཅི་སྨོ་ཟེར་བ་ཅིན་ ཁོ་དང་ངེ་གི་སེམས་གཅིག་ཨིན་ ཁོ་དང་ང་ལམ་གཅིག་ནང་འགྱོཝ་ཨིན་ སེམས་དང་མནོ་བསམ་གཅིག་སྦེ་བཏང་སྟེ་ ལཱ་འབདཝ་ཨིན།

¹⁹ གཅིག་ལས་འབདན་ ང་བཅས་ཀྱིས་ རང་ལུ་རྒྱབ་སྣོན་སྦེ་བདེན་ཁུངས་བཀལ་ནིའི་དོན་ལུ་ འབདཝ་མས་ཟེར་མནོཝ་མས་ དེ་སྦེ་མེན་ ང་བཅས་ཁིརཱིས་ནང་ན་གནས་ཏེ་ དེ་ཚུ་སླབ་ཨིན་ དེ་ལས་ འདི་ག་ར་དཀོན་མཆོག་གིས་མཁྱེན་ དེ་མ་ཚད་ ང་བཅས་ཀྱིས་འབད་མི་འདི་ ཁྱེད་བྱམས་པའི་ཆ་རོགས་ཚུ་ལུ་སྒྲིང་སྒྲིང་བཟོ་ནིའི་དོན་ལུ་ཨིན།

²⁰ ད་ ང་འདྲོག་དོ་ ག་ཅི་སྨོ་ཟེར་བ་ཅིན་ ང་ཁྱེད་སྡོད་སར་འོངམ་ད་ ངེ་གི་འདོད་པ་བཞིན་དུ་ ཁྱེད་ཀྱིས་མ་འབད་བར་སྡོད་འོང་ དེ་བཟུམ་སྦེ་ ཁྱེད་ཀྱིས་མནོ་བསམ་གཏང་དོཝ་བཟུམ་སྦེ་ ང་གིས་འབད་མི་ཚུགས་འོང་ ཁྱེད་ཀྱི་སྦུག་ལུ་ ཁ་ཤགས་བརྐྱབ་ནི་ གཅིག་གིས་གཅིག་ལུ་ མིག་ཏོ་ཚ་ནི་དང་ ཙིགཔ་ཟ་སྟེ་ ཕྱོགས་སོ་སོ་སྦེ་ གྱེས་འགྱོ་ནི་ ཁ་གཏང་ནི་ ཡར་ཁ་མར་ཁ་བཀལ་ནི་ ཁམས་བཙོང་ནི་ གཅིག་གིས་གཅིག་ལུ་ གུས་ཞབས་མ་འབད་ནི་ ནང་འཁྲུག་ལང་ནི་ འདི་ཚུ་ག་ར་ཁྱེད་ཀྱི་ནང་ན་བྱུང་མ་བཅུག་ཟེར་མནོ་ཡི།

²¹ ང་ཁྱེད་འབད་སར་ལོག་འོངམ་ད་ ངེ་གི་དཀོན་མཆོག་གིས་ ཁྱེད་ཀྱི་ཐོག་ལས་ ངེ་གི་ཁམས་འདི་ མར་ཕབ་སྟེ་ཉམ་ཆུང་སྦེ་ མཛད་གནང་འོང་ ག་ཅི་སྨོ་ཟེར་བ་ཅིན་ ཁྱེད་ཀྱི་གྲལ་ལས་ ལེ་ཤ་གིས་ སྡིག་པའི་ལཱ་དང་ མ་གཙངམ་དང་ འདོད་ཆགས་ཀྱི་ལུས་འབྲེལ་འབད་ནི་ སྤྱོད་ངན་པ་མ་འདྲཝ་དེ་ཚུ་འབད་དེ་ སེམས་མ་འགྱུར་མི་ལུ་ ང་སེམས་སྐྱོ་སྟེ་ མིག་ཆུ་འཛགས་འོང་ཟེར་ ང་འདྲོག་དོ།།