ཀོ་རཱིན་ཐི་གཉིས་པ་ལེའུ་ 11 - རྫོང་ཁ་

པའུལ་དང་སྐུ་ཚབ་རྫུས་མ་ཚུ་གི་སྐོར།

¹ ད་ང་གིས་ རྩ་རྒས་བཟུམ་གྱི་བློ་སླབ་ད་ དེ་ལུ་ཁྱེད་ཀྱིས་བཟོད་པ་བསྒོམ་འོང་ཟེར་ ང་ལུ་རེ་བ་ཡོད་ ང་ལུ་ནཱ་གི་ཐུགས་ཀྱི་བཟོད་པ་བཞེས་གནང་ལགས།

² ང་ཁྱེད་བལྟ་སྟེ་ ངེ་གི་སེམས་ཀྱི་གཏིང་ལས་རང་ དཀོན་མཆོག་ལས་བྱུང་འོང་མི་བྱམས་བརྩེ་དེ་བསྐྱེད་དོ་ ག་ཅི་སྨོ་ཟེར་བ་ཅིན་ ང་གིས་ཁྱེད་ཆ་ཁྱབ་ ཁིརཱིས་ཀྱི་མནའམ་གཙང་ཏོག་ཏོ་གཅིག་སྦེ་ཕུལ་ནི་དང་ དེ་ལས་ ཁོ་ཁྱེད་ཀྱི་རྨགཔ་སྦེ་གཉེན་བརྐྱབ་ནི་གི་ཁས་བླངས་འབད་ཚར་ཡི།

³ ད་ཧེ་མ་ སྦུལ་མགུ་བདེ་དྲགས་དེ་གིས་ ཨིབ་ལུ་མགུ་བསྐོར་རྐྱབ་དོཝ་བཟུམ་སྦེ་ ཁྱེད་ཀྱིས་ ཁིརཱིས་ལུ་སེམས་ཉམ་ཆུང་དང་དྲང་སེམས་ཀྱི་ཐོག་ལས་དམ་ཚིག་བསྟེན་ནི་ལས་ ལམ་འཛོལ་བ་ནང་འཁྱིད་འགྱོ་འོང་ཟེར་ ང་ཚ་གྱང་ལང་དོ།

⁴ ག་ཅི་སྨོ་ཟེར་བ་ཅིན་ མི་གཞན་གཅིག་ ཁྱེད་སྡོད་སར་འོངས་ཏེ་ ང་བཅས་ཀྱིས་བཤད་མི་ཡེ་ཤུ་འདི་མེན་པར་ ཡེ་ཤུ་གཞན་གཅིག་གི་སྐོར་ལས་ཆོས་རེ་བཤད་ ཡང་ན་ ཁྱེད་ཀྱིས་ཐོབ་མིའི་ཐུགས་ཉིད་འདི་དང་ མ་འདྲ་བའི་ཐུགས་ཉིད་གཞན་གཅིག་གི་སྐོར་ལས་ ཆོས་རེ་བཤད་ ཡང་ན་ ཁྱེད་ཀྱིས་ཆ་བཞག་མི་གཏམ་བཟང་འདི་དང་ མ་འདྲ་བའི་གཏམ་བཟང་ གཞན་གཅིག་བཤད་པ་ཅིན་ ཁྱེད་ཀྱིས་འཇམ་ཏོག་ཏོ་སྦེ་ ཁ་བཟེད་དེ་ཆ་བཞགཔ་ཨིན་མས།

⁵ དེ་འབདཝ་ད་ ཁོང་ཨ་ནི་བཟུམ་གྱི་ཆོས་སྟོན་མིའི་སྐུ་ཚབ་ཁྱད་འཕགས་ཚུ་དང་འཕྱདཔ་ད་ ག་ཅི་ནང་ལས་རང་འབད་རུང་ ང་སྐྱོ་ཤོས་གཅིག་མེན།

⁶ མ་པ་ ང་ཆོས་བཤད་ནི་ལུ་མཁས་དྲགས་མེན་ཏེ་འབད་རུང་ དཀོན་མཆོག་གིས་ ཤེས་ཡོན་ང་ལུ་གནང་སྟེ་ཡོད་ ཨ་ནི་འདི་ཚུ་ང་བཅས་ཀྱིས་ག་དེ་དྲག་དྲག་ གསལ་ཏོག་ཏོ་སྦེ་ཁྱེད་ལུ་སྟོན་ཡི།

⁷ དེ་ལས་ང་གིས་ ཁྱེད་ལུ་ཞེ་ས་འབད་ནི་གི་དོན་ལུ་ ང་རང་ཉམ་ཆུང་སྦེ་བཟོ་སྟེ་ གླ་ཆ་ག་ནི་ཡང་མ་ལེན་པར་ དཀོན་མཆོག་གི་གཏམ་བཟང་བཤད་མི་འདི་ ང་ལུ་འཛོལ་བ་ཨིན་ཟེར་སླབ་ཨིན་ན།

⁸ ག་ཅི་སྨོ་ཟེར་བ་ཅིན་ ང་ལུ་དངུལ་ཕོགས་བྱིན་མི་དེ་ ཆོས་ཚོགས་གཞན་ཚུ་འབད་ དེ་འབདཝ་ད་ ང་གིས་ཁྱེད་ལུ་རིན་མེད་སྟོང་པར་སྦེ་ཞབས་ཏོག་ཞུཝ་ད་ ཆོས་ཚོགས་གཞན་ཚུ་ལུ་ ང་གིས་བཅོམ་དོཝ་བཟུམ་སྦེ་ཡར་སོང་ཡི།

⁹ དེ་ལས་ ང་ཁྱེད་དང་གཅིག་ཁར་སྡོད་པའི་སྐབས་ལུ་ ང་ལུ་དགོཔ་ཁག་ཆེཝ་ཐོནམ་ད་ ཁྱེད་ལས་ཆ་རོགས་ག་ནི་ཡང་མ་འཚོལ་ ག་ཅི་སྨོ་ཟེར་བ་ཅིན་ མ་ཀེ་དོ་ནི་ཡ་ལས་འོང་མི་ ང་རང་གི་ཆ་རོགས་ཚུ་གིས་ ང་ལུ་དགོཔ་ག་ར་འབག་འོང་ཡི་ འདི་བཟུམ་སྦེ་ ཤུལ་ལས་འབད་དེ་སྦེ་རུང་ ཁྱེད་ཀྱིས་ང་ལུ་ཆ་རོགས་འབད་གནང་ཟེར་ རྩ་ལས་རང་མི་སླབ།

¹⁰ དེ་མ་ཚད་ དོན་ལས་རང་ ངེ་གི་ནང་ན་ཡོད་མི་ ཁིརཱིས་ཀྱི་བདེན་པ་འདི་ འཛོམ་དཔང་སྦེ་བཙུགས་ཏེ་ ཨ་ཀེ་ཡ་ལུང་ཕྱོགས་ནང་གི་མི་ ག་གིས་ཡང་ ང་ལུ་འདི་གི་སྐོར་ལས་ བསྟོད་པ་བརྐྱབ་ནི་འདི་བཞག་ཟེར་ རྩ་ལས་རང་སླབ་མི་ཚུགས།

¹¹ ང་གིས་དེ་སྦེ་སླབ་ད་ ཁྱེད་ལུ་མ་དགའཝ་བཟུམ་ཨིན་ན་ དེ་སྦེ་མེན་ ང་གིས་ཁྱེད་ལུ་དགའ་མི་འདི་ དཀོན་མཆོག་གིས་མཁྱེན།

¹² ད་ལྟོ་ང་གིས་ ག་འབད་མི་འདི་ མི་གཞན་གྱིས་ཡང་ ང་བཅས་བཟུམ་སྦེ་རང་ འབདཝ་ཨིན་ཟེར་ བསྟོད་པ་བརྐྱབ་ནི་གི་གོ་སྐབས་ མ་བྱིན་ནི་གི་དོན་ལུ་ ང་གིས་ འཕྲོ་མཐུད་དེ་རང་ རིན་མེད་སྟོང་པ་སྦེ་ ཞབས་ཏོག་ཞུ་སྟེ་རང་སྡོད་ནི་ཨིན།

¹³ ག་ཅི་སྨོ་ཟེར་བ་ཅིན་ ཨ་ནི་མི་འདི་ཚུ་ སྐུ་ཚབ་རྫུས་མ་ མགུ་བསྐོར་བརྐྱབས་ཏེ་ ལཱ་འབད་མི་ དེ་ལས་ ཁིརཱིས་ཀྱི་སྐུ་ཚབ་བཟུམ་སྦེ་ འགྱུར་ནིའི་ཐབས་ཤེས་འགྱིར་མི་ཚུ་ཨིན།

¹⁴ ཨིན་རུང་ ང་འདི་ལུ་བལྟ་སྟེ་ རྣམ་རྟོག་ལངས་དགོཔ་རྩ་ལས་རང་མེད་ ག་ཅི་འབད་ཟེར་བ་ཅིན་ བདུད་ སེ་ཏཱན་འདི་གིས་ཡང་ འོད་ཀྱི་ཕོ་ཉ་ལུ་བསྒྱུརཝ་ཨིན།

¹⁵ འདི་འབདཝ་ལས་ བདུད་ སེ་ཏཱན་གྱི་གཡོགཔ་གིས་ཡང་ ཕྲངམ་གི་གཡོགཔ་བཟུམ་སྦེ་བཟོཝ་འདྲཝ་ཅིག་འབད་བ་ཅིན་ འདི་ལུ་རྣམ་རྟོག་ལངས་དགོཔ་རྩ་ལས་རང་མེད་ མཐའན་མཇུག་ལུ་ ཁོང་རང་གི་ག་འབད་མི་དང་འཁྲིལ་ཏེ་ ཁྲིམས་འབག་དགོ།།

པའུལ་གྱིས་ཁོ་རང་གི་དཀའ་ངལ་ལུ་རང་བསྟོད་རྐྱབ་པའི་སྐོར།

¹⁶ ད་རུང་ཡང་ ང་གིས་ཚར་གཅིག་སླབ་གེ་ ཁྱེད་ཀྱིས་ ང་ལུ་རྩ་རྒས་ཨིན་མས་ཟེར་ མནོ་བསམ་མ་གཏང་ དེ་འབདཝ་ད་ ཁྱེད་ཀྱིས་ང་ལུ་ རྩ་རྒས་སྦེ་བརྩིས་བ་ཅིན་ རྩ་རྒས་སྦེ་རང་ཆ་བཞག་ དེ་ལས་ང་རང་གི་སྐོར་ལས་ ཨ་ཙི་གཅིག་རང་བསྟོད་བརྐྱབས་ཏེ་ སླབ་ནི་ཨིན།

¹⁷ དེ་སྦེ་ ང་རང་གི་སྐོར་ལས་ རང་བསྟོད་བརྐྱབས་ཏེ་སླབ་མི་འདི་ ང་རང་རྩ་རྒས་བཟོ་སྟེ་སླབ་ཨིན་ འདི་གཙོ་བོ་ལས་མེན།

¹⁸ ད་ མི་ལེ་ཤ་གིས་ འཇིག་རྟེན་པའི་མནོ་བསམ་དང་འཁྲིལ་ཏེ་ ཁོང་རང་གི་སྐོར་ལས་ རང་བསྟོད་བརྐྱབས་ཏེ་སླབ་འདྲཝ་གཅིག་འབད་བ་ཅིན་ ང་ཡང་ ང་རང་གི་སྐོར་ལས་ རང་བསྟོད་བརྐྱབས་ཏེ་ སླབ་ནི་ཨིན།

¹⁹ ཁྱེད་གནམ་མེད་ས་མེད་ སེམས་གསལ་དྲགས་ཨིན་མས་ ཁྱེད་ཀྱིས་ སྤྲོ་བའི་ངང་ལས་ རྩ་རྒས་ཀྱི་མི་ལུ་ བཟོད་པ་བསྒོམ་ཚུགས་པས།

²⁰ ག་ཅི་སྨོ་ཟེར་བ་ཅིན་ མི་གཅིག་གིས་ཁྱེད་ལུ་ ཁོ་རང་གི་ གཡོགཔ་སྦེ་ལཱ་བཀོལ་རུང་ ཁྱེད་ལུ་ མགུ་བསྐོར་རྐྱབ་རུང་ ཧིང་ནང་བཙུགས་རུང་ རང་མཐོང་ཅན་བཟོ་རུང་ དེ་ལས་ ཟ་ལྟབ་གུ་ལྡན་ལྕག་དྲངས་རུང་ ཁྱེད་ཀྱིས་བཟོད་པ་སྒོམ་ཨིན་པས།

²¹ དབའི་ ང་བཅས་ཞན་འཁོགས་འབད་ནི་དེ་གིས་ ཁོང་གིས་འབད་མི་འདི་ ང་བཅས་ཀྱིས་འབད་མ་ཚུགས་ ཐད་རི་བ་རི་ ང་ངོ་ཚ་བས། ཨིན་རུང་ ཁོང་རང་གི་སྐོར་ལས་ རང་བསྟོད་བརྐྱབ་ཚུགས་པ་ཅིན་ ང་གིས་ཡང་ ང་རང་གི་སྐོར་ལས་ རང་བསྟོད་རྐྱབས་ཚུགས་ མ་གཞི་འདི་རྩ་རྒས་ཀྱི་བློ་ཨིནམ་ ང་རང་གིས་ཤེས།

²² དེ་ལས་ཁོང་ཆ་ཁྱབ་ཀྱིས་ ཧིབ་རུ་པ་ཨིན་ཟེར་བ་ཅིན་ ང་ཡང་ཨིན་ ཁོང་གིས་ ཨཱིས་ར་ཨཱེལ་པ་ཨིན་ཟེར་བ་ཅིན་ ང་ཡང་ཨིན་ ཁོང་གིས་ ཨབ་ར་ཧམ་གྱི་བུ་བརྒྱུད་ལས་ཨིན་ཟེར་བ་ཅིན་ ང་ཡང་ཨིན།

²³ ཁོང་གིས་ ཁིརཱིས་ཀྱི་ཞབས་ཕྱིཔ་ཨིན་ཟེར་བ་ཅིན་ མ་པ་ ང་གིས་དེ་སྦེ་སླབ་ད་ ང་འཆོལ་ལོང་བཟུམ་སྦེ་མཐོང་འོང་ ཨིན་རུང་ ད་ལྟོ་ཚུན་ཚོད་ཀྱི་བར་ན་ ཁོང་ལས་ལྷགཔ་སྦེ་ ང་ཡང་ཞབས་ཕྱིཔ་ཨིན་ བཙོན་ཁང་ནང་ ཁོང་ལས་ཚར་ལེ་ཤ་ང་འཛུལ་ཡི་ མི་གིས་ཡང་གྱངས་ཁ་མ་ཆོདཔ་ ང་ལུ་བརྡུང་རྫོབ་འབད་ དེ་ལས་ ལོག་ཅི་ལོག་ཅི་འདྲང་སྟེ་ ཤི་ནི་བཟུམ་ལུ་ ཐེངས་མང་རབས་ཅིག་ཐུག་ཅི།

²⁴ ཡ་ཧུ་ད་པ་ཚུ་གིས་ རྟས་ལྕག་གིས་གྱངས་ཁ་ སུམ་བཅུ་སོ་དགུ་འབད་མི་ ཚར་ལྔ་དྲངས་ཡི།

²⁵ ཚར་གསུམ་ འཁརཝ་གིས་དྲངས་ཡི་ རྡོ་གིས་ཚར་གཅིག་བརྡུང་ཡི་ རྒྱ་མཚོ་ནང་ཚར་གསུམ་གྲུ་ཞིག་འགྱོ་ཡི་ ཞག་གཅིག་ རྒྱ་མཚོའི་ཁ་ལས་ཕར་ལྡིང་སྟེ་སྡོད་ཅི།

²⁶ དེ་ལས་ལམ་འགྲུལ་འབདཝ་ད་ ཚར་ལེ་ཤ་རང་ གཙང་ཆུ་ནང་ལས་ཕར་ ཆུ་གི་འབག་པའི་ཉེན་ཁ་དང་ ཨརཝ་དང་འཕྲོག་བཅོམ་གྱི་ཉེན་ཁ་ རང་གི་རྒྱལ་ཁབ་ཀྱི་མི་ཚུ་གི་ཉེན་ཁ་ ཕྱིའི་མི་རིགས་ཚུ་གི་ཉེན་ཁ་ ཁྲོམ་ཚོགས་ནང་གི་ཉེན་ཁ་ རི་སྟོང་གི་ ཉེན་ཁ་ རྒྱ་མཚོའི་ཉེན་ཁ་ དེ་ལས་དདཔ་ཅན་རྫུས་མ་ཚུ་གི་ཉེན་ཁ་ འདི་ཚུ་ག་ར་ང་ལུ་བྱུང་ཡི།

²⁷ དེ་ལས་ འུ་སྡུག་ཐང་ཆད་དེ་ དཀའཝ་སྤྱད་སྡོད་ཅི་ ནུབ་མོ་གཉིད་ཡང་ལོག་ནི་མེད་པར་ མང་རབས་ཅིག་སྡོད་ཅི་ དེ་ལས་ཁ་སྐོམ་ལྟོཝ་བཀྱེས་ཏེ་ ཡང་ན་ བཞེས་སྒོ་མ་ཐོབ་པར་ དཀའ་ངལ་མང་རབས་ཅིག་མྱོང་ཡི་ གནམ་གྱངམ་ད་ བགོ་ལ་མེད་པའི་དཀའ་ངལ་ཡང་ ཐེངས་མང་རབས་ཅིག་བྱུང་ཡི།

²⁸ ད་རུང་དེ་དང་གཅིག་ཁར་ ཨ་རྟག་རང་ ཆོས་ཚོགས་ཀྱི་ཚ་གྱང་དང་སྡུག་བསྔལ་ཡང་འབག་སྟེ་སྡོད་ཅི།

²⁹ ད་ ཆོས་ཚོགས་ཀྱི་གྲལ་ཁ་ལུ་ མི་ཞན་འཁོགས་ཡོད་པ་ཅིན་ ང་ཡང་ཁོ་བཟུམ་སྦེ་ ཞན་འཁོགས་ཚོར་ནི་ཨིན་ དེ་ལས་མི་གཞན་ལུ་འཛོལ་བ་འབད་བཅུགཔ་ད་ འདི་ལུ་བལྟ་སྟེ་ ང་གིས་ཙིགཔ་མ་ཟ་བར་ག་དེ་སྦེ་ སྡོད་ཚུགས་ནི་སྨོ།

³⁰ ང་གིས་ རང་བསྟོད་རྐྱབ་དགོ་པ་ཅིན་ ང་རང་ག་དེམ་ཅིག་ ཞན་འཁོགས་ཡོདཔ་ཨིན་ན་ འདི་གི་སྐོར་ལས་ རང་བསྟོད་བརྐྱབ་ནི་ཨིན།

³¹ ང་གིས་བདེན་པ་སླབ་མས་ཟེར་ གཙོ་བོ་ཡེ་ཤུ་གི་ ཡབ་དཀོན་མཆོག་གིས་མཁྱེན་ བསྟོད་པ་ག་ར་དུས་ཨ་རྟག་རང་ཁོ་གི་ཨིན་ནོ།

³² ཁྲོམ་ ད་མཱས་ཀཱོས་ལུ་ རྒྱལཔོ་ ཨ་རེ་ཏཱས་ཀྱི་འོག་ལུ་ཡོད་མི་ རོམ་གྱི་གཞུང་ཚབ་ཀྱིས་ ང་ལུ་བཟུང་ནི་སྦེ་ ད་མཱས་ཀཱོས་ཀྱི་ལམ་ག་ར་ནང་སྲུང་རྒྱབ་བཙུགསཔ་ད།

³³ ང་ཙེའུ་ནང་བཙུགས་ཏེ་ ལྕགས་རི་གི་གྱང་གི་སྒོ་ཅུང་ནང་ལས་མར་ཕབ་གཏང་སྟེ་ ང་བྱོག་ཐལ་ཡི།།