ཀོ་རཱིན་ཐི་གཉིས་པ་ལེའུ་ 10 - རྫོང་ཁ་

སྐུ་ཚབ་ པའུལ་ལུ་དཀོན་མཆོག་ལས་བྱུང་མིའི་དབང་ཚད་ཡོད་པའི་སྐོར།

¹ ད་ཁྱེད་ཆ་ཁྱབ་ཀྱིས་འབད་བ་ཅིན་ ང་ཁྱེད་དང་གཅིག་ཁར་སྡོདཔ་ད་ རང་ལུ་དབང་ག་ནི་ཡང་མེདཔ་བཟུམ་ཅིག་འབད་མི་དང་ ཁྱེད་ལས་ཐག་རིང་སར་འབད་བ་ཅིན་ བློ་ཁོག་སྦོམ་སྦེ་ ཡི་གུ་འབྲི་གཏང་མི་གཅིག་ཨིན་ ཨིན་ཏེ་འབད་རུང་ ང་ པའུལ་གྱིས་ ཡེ་ཤུ་ཁིརཱིས་ཀྱི་ཐུགས་ཞི་བའི་ངང་ལུ་ བཞུགས་ཡོད་མིའི་ཐོག་ལས་ ཁྱེད་ལུ་བསྐུལ་མ་ཞུ་དོ།

² ང་བཅས་འཇིག་རྟེན་པའི་ལམ་ལུགས་སྲོལ་འབད་དེ་ སྡོདཔ་མས་ཟེར་དོགས་པ་ཟ་མི་ཚུ་ལུ་ ང་འོངས་ཏེ་ ཁོང་ལུ་སྲ་ཀྲག་ཀྲ་འབདཝ་ད་ ཁྱེད་ལུ་ཡང་དེ་བཟུམ་སྦེ་འབད་དགོཔ་ ཐལ་མ་བཅུག་ཟེར་ད་ལྟོ་ལས་གསོལཝ་བཏབ་དོ།

³ ག་ཅི་སྨོ་ཟེར་བ་ཅིན་ མིའི་ཤ་ལུས་ནང་སྡོད་རུང་ ང་བཅས་ཀྱིས་ མི་གིས་དམག་རྐྱབ་དོཝ་བཟུམ་སྦེ་མི་འབད།

⁴ དེ་ལས་མི་གིས་ལག་ལེན་འཐབ་མིའི་མཚོན་ཆ་འདི་ ང་བཅས་ཀྱིས་ལག་ལེན་འཐབ་སྟེ་ དམག་མི་རྐྱབ་ ང་བཅས་ཀྱིས་ དཀོན་མཆོག་གིས་གནང་མིའི་དབང་ཤུགས་འདི་ ལག་ལེན་འཐབ་པའི་ཐོག་ལས་ བདུད་ཀྱི་རྫོང་གཞི་ མེདཔ་གཏངམ་ཨིནམ་མ་ཚད།

⁵ དབང་ཤུགས་འདི་གིས་ བསླུ་འདྲིད་པའི་བསམ་འཆར་དང་ དཀོན་མཆོག་གི་སྐོར་ལས་རྩོད་པ་འཚོལ་ཏེ་ ཁོ་ལུ་རྒོལ་བཅུག་མི་མནོ་བསམ་ཚུ་ མར་བརྡལ་ཏེ་གཏངམ་ཨིན་ ངོ་རྒོལ་གྱི་མནོ་བསམ་དེ་ཚུ་བཟུང་སྟེ་ ཁིརཱིས་ཀྱི་བཀའ་ལུ་ ཉན་བཅུགཔ་ཨིན།

⁶ དེ་ལས་ཁྱེད་ག་ར་ ཉན་ཁུག་ཡོདཔ་འཐོན་ཚར་ཞིནམ་ལས་ ཁོང་ཉན་ཁུག་བཏབ་མ་བཏུབ་མི་ཚུ་ལུ་ ང་བཅས་ཁྲིམས་གཏང་ནི་ཨིན།

⁷ ཁྱེད་ཀྱིས་བལྟཝ་ད་ ཕྱི་ཁར་གྱི་རྐྱངམ་གཅིག་བལྟཝ་ཨིན་ དེ་ལས་ག་ར་འབད་རུང་ ཁོ་དོན་ལས་རང་ ཁིརཱིས་ཀྱི་ཨིན་ཟེར་མནོ་བ་ཅིན་ ཨ་ནི་མི་འདི་གིས་ང་བཅས་ཡང་ དོན་ལས་རང་ ཁིརཱིས་ཀྱི་ཨིན་ཟེར་ལོག་སྟེ་ མནོ་བསམ་གཏང་དགོ།

⁸ དེ་ལས་ ག་དེམ་ཅིག་སྦེ་ ང་གིས་ ང་བཅས་ལུ་ཡོད་མི་དབང་ཚད་ཀྱི་སྐོར་ལས་ ཨ་ཙི་ཅིག་ངོམ་སྟོན་ཏེ་འབད་རུང་ ང་ངོ་མི་ཚ་ ག་ཅི་འབད་ཟེར་བ་ཅིན་ དབང་ཚད་འདི་གིས་ ཁྱེད་ལུ་མེདཔ་ཐལ་བཅུག་ནི་གི་དོན་ལུ་མེན་པར་ ཡར་རྒྱས་གཏང་ནིའི་དོན་ལུ་ཨིན།

⁹ ང་གིས་ཁྱེད་ལུ་ ཡི་གུ་ཚུ་བྲིས་ཏེ་ འདྲོག་བཅུག་ནི་གི་སེམས་འདི་ ཡོད་རང་མེད།

¹⁰ དེ་ལས་མི་ལ་ལུ་ཅིག་གིས་ དེ་སྦེ་སླབ་དོཝ་ཨིན་པས་ པའུལ་གྱི་ཡི་གུ་འདི་ ལྗིད་ལྕི་དྲགས་དང་དབང་ཚད་ཅན་འདུག་ ཨིན་རུང་ ཁོ་རང་མི་ངོ་མ་སྦེ་ ང་བཅས་དང་གཅིག་ཁར་སྡོདཔ་ད་ལུ་ ཁོ་ལུ་དབང་ག་ནི་ཡང་མེད་མི་དང་ ཁོ་གི་སླབ་མིའི་ཚིག་ལུ་ དབང་ཤུགས་ག་ནི་ཡང་མེད་ཟེར་ཨིན་པས།

¹¹ དེ་སྦེ་སླབ་མི་འདི་གིས་ ཨ་ནི་ཤེས་དགོ་ ཡི་གུ་ནང་བཟུམ་སྦེ་ ང་བཅས་མི་ངོ་མ་འོངམ་ད་ཡང་ རྣམ་འགྱུར་དེ་སྦེ་རང་སྟོན་ནི་ཨིན།

¹² དེ་ལས་ང་བཅས་ཀྱིས་ ཁོང་ར་རང་ ལེགས་ཤོམ་ཨིན་ཟེར་ མནོ་བསམ་གཏང་མི་ཚུ་དང་གཅིག་ཁར་ ག་བསྡུར་རྐྱབ་མི་ཚུགས་ ཁོང་ཁོང་རང་གི་འབད་གཞག་འདི་ལུ་ ག་བསྡུར་རྐྱབ་ཨིན་མས་ ཁོང་རང་གི་འབད་གཞག་འདི་ལུ་ ག་བསྡུར་རྐྱབ་བལྟཝ་ད་ ཁོང་རང་དྲགཔ་སྦེ་ རྩིཝ་ཨིན་མས་ དེ་སྦེ་འབད་མི་ཚུ་ སེམས་གསལ་ཏོག་ཏོ་མེན་པའི་རྟགས་ཨིན།

¹³ ཨིན་ཏེ་འབད་རུང་ ང་བཅས་ཀྱིས་ཚད་ལས་བརྒལ་ཏེ་ངོམ་མི་སྟོན་ དེ་འབདཝ་ད་ དཀོན་མཆོག་གིས་ ཁྱེད་ཀྱི་སྦུག་ལུ་ལཱ་ འབད་ནི་གི་ཚད་མཛད་གནང་མི་འདི་ལུ་རྐྱངམ་གཅིག་ ང་བཅས་ཀྱིས་ངོམ་སྟོན་ནི་ཨིན།

¹⁴ ད་ དཀོན་མཆོག་གིས་ ཁྱེད་ཀྱི་སྦུག་ལུ་ལཱ་འབད་ནི་གི་ཚད་ ང་བཅས་ལུ་གནང་མི་ལས་ ང་བཅས་ཀྱིས་མ་བརྒལ་ ག་ཅི་སྨོ་ཟེར་བ་ཅིན་ འགོ་དང་པ་ཁྱེད་སྡོད་སར་གཏམ་བཟང་འབག་སྟེ་འོང་མི་ང་བཅས་ཨིན།

¹⁵ ང་བཅས་ཀྱིས་ རོགས་གཞན་གྱི་ལཱ་འབད་མི་དེ་ལུ་ ང་བཅས་ཀྱིས་འབད་ཡི་ཟེར་ རང་གི་ཚད་ལས་བརྒལ་ཏེ་ ངོམ་སྟོན་ཏེ་སླབ་མེན་ དེ་འབདཝ་ད་ ཁྱེད་ཀྱི་དད་པ་འདི་ཡར་རྒྱས་འགྱོ་བཅུག་སྟེ་ ཁྱེད་ཀྱི་སྦུག་ལུ་ ལཱ་གི་རྒྱ་སྐྱེད་སྦོམ་སྦེ་གཏང་ནི་གི་རེ་བ་ ང་བཅས་ཀྱིས་བསྐྱེདཔ་ཨིན།

¹⁶ དེ་ལས་ ཁྱེད་ཀྱི་ས་གནས་ལུ་མེན་པར་ ས་གནས་སོ་སོ་དང་ མི་གཞན་ག་གི་ཡང་ལཱ་འགོ་མ་བཙུགས་སར་ ང་བཅས་ཀྱི་གཏམ་བཟང་བཤད་དགོ་མནོ་ཡི་ དེ་སྦེ་འབད་བ་ཅིན་ མི་གཞན་གྱི་ས་སྒོ་ནང་འབད་མི་ལཱ་ རང་གི་ལཱ་ཨིན་ཟེར་སླབ་སྟེ་ རང་བསྟོད་རྐྱབ་མི་དགོ།

¹⁷ གསུང་རབ་ནང་། རང་བསྟོད་རྐྱབ་པ་ཅིན་ གཙོ་བོ་གི་ནང་ རང་བསྟོད་རྐྱབས་ཟེར་ བྲིས་ཏེ་འདུག

¹⁸ མི་ག་ར་ཨིན་རུང་ རང་གི་སྐོར་ལས་ ངོམ་སྟོན་ཏེ་སླབ་པ་ཅིན་ བསྟོད་པ་འདི་ རང་ལུ་རྐྱངམ་གཅིག་ཐོབ་ཨིན་ དེ་འབདཝ་ད་ ཁོ་གི་སྐོར་ལས་ གཙོ་བོ་གིས་བསྟོད་པ་གནང་པ་ཅིན་ དོན་ལས་རང་ ཁོ་ངོས་ལེན་ཐོབ་མི་ཨིན།།