ཏི་མོ་ཐི་དང་པ་ལེའུ་ 6 - རྫོང་ཁ་

རྒྱོབོ་རྒྱམོ་ཚུ་གིས་རང་གི་སྦྱིན་བདག་ལུ་ཞེ་ས་འབད་དགོ་པའི་སྐོར།

¹ ཁྱེད་དདཔ་ཅན་ག་ར་འབད་རུང་ རྒྱོབོ་རྒྱམོ་སྦེ་སྡོད་ཡོད་པ་ཅིན་ དཀོན་མཆོག་གི་མཚན་དང་ ང་བཅས་ཀྱིས་སྟོན་མི་ཆོས་དེ་ལུ་ སྐྱོན་མ་བཏགས་ནིའི་དོན་ལུ་ རང་གི་སྦྱིན་བདག་ལུ་གུས་ཞབས་འབད་དགོ།

² རྒྱོབོ་རྒྱམོ་ཚུ་གི་སྦྱིན་བདག་དེ་ཚུ་དདཔ་ཅན་ཨིན་ཏེ་འབད་རུང་ ཁོང་ལུ་གུས་ཞབས་མ་འབདཝ་མ་སྡོད་ ག་ཅི་སྨོ་ཟེར་བ་ཅིན་ ཁོང་དད་པ་གཅིག་གི་སྤུན་ཆ་ཨིན་ དེ་འབདཝ་ད་ ཧེ་མ་ལས་ལྷགཔ་སྦེ་ ཁོང་གི་དོན་ལུ་འབད་བྱིན་དགོ་ ག་ཅི་སྨོ་ཟེར་བ་ཅིན་ ཁོང་གིས་ག་འབད་མི་ལཱ་ནང་ལས་ཁེ་སང་ཐོབ་མི་དེ་ གཅེས་པའི་དདཔ་ཅན་ཚུ་ལུ་ཕན་ཐོགས་ཡོད་ འདི་ཚུ་གི་སྐོར་ལས་ཁྱོད་ཀྱིས་མི་དེ་ཚུ་ལུ་བཤད་དེ་སྟོན་བྱིན།།

ཆོས་མ་འདྲཝ་ལས་དྲན་པ་བཏོན་དགོ་པའི་བཀའ་རྒྱ་གི་སྐོར།

³ མི་ག་གིས་རང་འབད་རུང་ ཆོས་མ་འདྲཝ་གི་གཞི་སྟོན་ཏེ་ གཙོ་བོ་ཡེ་ཤུ་ཁིརཱིས་ཀྱིས་སྟོན་མི་བདེན་པ་དང་ ཆོས་སེམས་བསྐྱེད་ནིའི་ཆོས་ཀྱི་གཞི་ལུ་ མ་མཐུནམ་སྦེ་བཟོ་བ་ཅིན།

⁴ ཁོ་རོ་རྔམ་གྱིས་གང་སྟེ་ག་ནི་ཡང་མི་ཤེས་ ཁོ་གི་མནོ་བསམ་འདི་མི་གཞན་ཚུ་དང་གཅིག་ཁར་ བློ་རེ་རེ་ལུ་ཚིག་བཤེད་དེ་ འཐབ་ནི་འཚོལ་སྡོད་འོང་ བློ་དེ་ཚུ་ནང་ལས་ ང་རྒྱལ་ལང་ནི་དང་ བར་ན་ཕུང་གཏང་སྟེ་ མ་འགྲིགཔ་བཟོ་ནི་དང་ དཀྲོགས་ཁ་བརྐྱབས་ནི་དང་ གཞན་ལུ་ཐབས་ཤེས་ཟོགཔོ་སྟོན་ཏེ་ དོགས་པ་ཆགས་བཅུག་ནི་དང་།

⁵ བདེན་པ་མ་ཤེས་མི་དང་ སེམས་ངན་པ་བསྐྱེད་ཡོད་མི་ཚུ་གི་བར་ན་ ཨ་རྟག་རང་རྩོད་པ་རྐྱབ་བཅུགཔ་ཨིན་ དེ་ལས་ཁོང་ཆ་ཁྱབ་ཀྱིས་ ཆོས་འབད་དེ་ མ་དངུལ་ཐོབ་ནི་གི་མནོ་བསམ་གཏངམ་ཨིན།།

ཕྱུགཔ་འགྱོ་དགོ་མནོ་མི་ཚུ་ལུ་བཀའ་རྒྱ་བྱིན་པའི་སྐོར།

⁶ ཐད་རི་བ་རི་ ཆོས་སེམས་བསྐྱེད་དེ་ རང་ལུ་ཡོད་མི་ལུ་མཚམས་ཚོད་འབད་ཤེས་པའི་བསྒང་ལས་ ཁེ་སང་ལེ་ཤ་ཡོད།

⁷ ག་ཅི་སྨོ་ཟེར་བ་ཅིན་ ང་བཅས་ཀྱིས་ཨ་ནི་འཛམ་བུ་གླིང་ནང་འོངམ་ད་ ག་ནི་ཡང་འབག་མ་འོང་ ད་རུང་ནཱ་ལས་ལོག་འགྱོཝ་ད་ཡང་ ག་ནི་ཡང་འབག་འགྱོ་མི་ཚུགས།

⁸ བཟའ་འཐུང་དང་གྱོན་ནི་གཅིག་ཡོད་པ་ཅིན་ འདི་གིས་ང་བཅས་ལུ་ལངམ་སྦེ་སྡོད་དགོ།

⁹ དེ་འབདཝ་ད་ ཕྱུགཔ་འགྱོ་དགོ་མནོ་མི་ཚུ་ བར་ཆད་ནང་ཚུདཔ་ཨིན་ དེ་ལས་ ཤེས་མཐོང་སྟེ་འབད་རུང་ འཛོལ་བ་འབད་ནི་གི་སེམས་དང་ གནོད་པ་བཀལ་ནིའི་འདོད་པ་གི་ཧིང་ནང་ཚུདཔ་ཨིན་ འདི་བཟུམ་གྱི་འདོད་པ་ཚུ་གིས་ མི་དེ་ལུ་ མེདཔ་ཐལ་ནི་དང་ཉེས་ཆད་ཕོག་ནི་ཚུ་ བྱུང་བཅུགཔ་ཨིན།

¹⁰ ཏི་རུ་ལུ་དགའ་ནི་འདི་ ངན་པ་ག་ར་གི་ར་ཏོ་ཨིན་ མི་ལ་ལུ་ཅིག་ཏི་རུ་གི་འདོད་པ་གིས་ དད་པའི་ལམ་ནང་ལས་འཐོན་འགྱོ་སྟེ་ ཁོ་ཁོ་རང་ སྡུག་བསྔལ་དང་ན་ཟུག་གིས་སྲོབ་བཅུགཔ་ཨིན།།

མཐའ་མེད་པའི་ཚེ་གི་གསོལ་རས་ལེན་ནི་གི་སྐོར།

¹¹ དེ་འབདཝ་ད་ དཀོན་མཆོག་གི་བུ་ཁྱོད་ཀྱིས་དེ་ཚུ་ག་ར་སྤངས་ཏེ་ དཀོན་མཆོག་གི་ཐུགས་དང་ལྡན་མིའི་ལཱ་ཕྲངམ་འབད་ནི་དང་ ཆོས་སེམས་བསྐྱེད་ནི་དང་ དད་པ་ཆེ་ཏོག་ཏོ་དང་ བྱམས་སེམས་དང་ བཟོད་པ་བསྒོམས་ཏེ་མཉམ་ཆུང་ཚུ་གི་ལམ་ནང་འགྱོ་དགོ།

¹² གསོལ་རས་ཐོབ་ནི་གི་དོན་ལུ་ དད་པ་ནང་འགྲན་བསྡུར་ལེགས་ཤོམ་འབད་ དེ་ལས་དཀོན་མཆོག་གིས་ཁྱོད་ལུ་འབོ་གནང་མི་དོན་དག་སྒྲུབ་ནི་སྦེ་ མཐའ་མེད་པའི་ཚེ་འདི་གསོལ་རས་སྦེ་ལེན་ འདི་གི་སྐོར་ལས་ཡང་ ཁྱོད་ཀྱིས་མི་ལེ་ཤ་གི་གདོང་ཁར་ དད་པ་གི་འཛོམ་དཔང་བཟང་པོ་འབད་ཡི།

¹³ ག་ར་ལུ་ཚེ་གནང་མི་དཀོན་མཆོག་གི་གཟིགས་སར་དང་ པཱོན་ཏི་ཨུས་ པི་ལ་ཏུས་ཀྱི་གདོང་ཁར་ བདེན་པ་ཕྲང་གསུངས་མི་ཁིརཱིས་ཡེ་ཤུ་ལུ་ འཛོམ་དཔང་སྦེ་བཞག་སྟེ་ ང་ཁྱོད་ལུ་དྲན་བསྐུལ་འབད་དོ།

¹⁴ ང་བཅས་ཀྱི་གཙོ་བོ་ཡེ་ཤུ་ཁིརཱིས་ལོག་མ་བྱོན་ཚུན་ཚོད་ ང་གིས་སྟོན་མི་ཆོས་འདི་ ཁྱོད་ཀྱིས་འཛོལ་བ་དང་སྐྱོན་ཞུགས་མ་བཅུག་པར་སྲུང་སྟེ་སྡོད་དགོ།

¹⁵ དཀོན་མཆོག་གིས་ཁོ་རང་གི་དུས་ཚོད་ཀྲིག་ཀྲི་ལུ་ ཁིརཱིས་ལུ་ལོག་གཏང་གནང་འོང་། དཀོན་མཆོག་དེ་ ཁོ་རང་རྐྱངམ་གཅིག་བྱིན་རླབས་ཅན་དང་ ཀུན་དབང་ཅན་ཨིན་ ཁོ་རྒྱལཔོ་ཚུ་གི་རྒྱལཔོ་དང་ གཙོ་བོ་ཚུ་གི་གཙོ་བོ།

¹⁶ ནམ་ཡང་མ་གཤགས་མི་ མཇལ་མ་ཚུགས་མི་འོད་ཟེར་ནང་བཞུགས་ཡོད་མི་ ད་ལྟོ་ཚུན་ཚོད་མི་ག་གིས་ཡང་མ་མཇལ་ མཇལ་ཡང་མ་ཆོག་མི་དཀོན་མཆོག་ཨིན་ དུས་རྒྱུན་དུ་རང་ གུས་ཞབས་དང་ མཐའ་མེད་པའི་དབང་ཤུགས་ ཁོ་གི་ཨིན་ནོ་ ཨ་མཱེན།།

ཕྱུགཔ་ཚུ་ལུ་བཀའ་རྒྱ་བྱིན་དགོ་པའི་སྐོར།

¹⁷ ཨ་ནི་འཛམ་བུ་གླིང་གི་མི་ཕྱུགཔ་ཚུ་ལུ་ བཀའ་རྒྱ་དམ་དམ་སྦེ་བྱིན་ རྔམ་སྟོན་ཏེ་ བརྟན་པ་མེད་པའི་རྒྱུ་ཕྱེད་ཀྲམ་ཚུ་ནང་བློ་མ་གཏད་པར་ ང་བཅས་སེམས་དགའ་ནིའི་དོན་ལུ་ ག་དགོཔ་ལས་ཡང་ཐེབ་སྦེ་གནང་མི་ དཀོན་མཆོག་ལུ་བློ་གཏད།

¹⁸ ཁོང་ལུ་ལཱ་ལེགས་ཤོམ་འབད་བཅུག་ དེ་ལས་ལཱ་བཟང་པོ་ག་དེ་མང་མང་འབད་ ཁག་ཆེཝ་ཡོད་མི་ཚུ་ལུ་ ལགཔ་དམ་དྲགས་མ་འབད་བར་ བྱིན་ནི་ལུ་དགའ་ཚོར་བསྐྱེད་བཅུག་ རྟག་བུ་རང་དཀོན་མཆོག་གིས་ཁོང་ལུ་ག་གནང་མི་དེ་ གཞན་དང་གཅིག་ཁར་བགོ་བཤའ་རྐྱབས་ཟེར་སྟོན་བྱིན།

¹⁹ ཁོང་དེ་སྦེ་འབད་བ་ཅིན་ ཁོང་རའི་དོན་ལུ་ དུས་ཤུལ་མ་ ཞིང་ཁམས་ལུ་ གཞི་སྒྲིང་སྒྲིང་བཙུགས་ཏེ་ རྒྱུ་ནོར་ལོངས་སྤྱོད་བསག་དོཝ་བཟུམ་ཨིན་ དེ་ལས་ཁོང་གིས་ཚེ་ངོ་མ་དེ་ལུ་བཤེད་བཞག་ཚུགསཔ་ཨིན།།

མཐའན་མཇུག་གི་བཀོད་རྒྱ་གི་སྐོར།

²⁰ དབའེ་ ཏི་མོ་ཐི་ ང་གིས་ཁྱོད་ལུ་བྱིན་མི་བཀོད་རྒྱ་དེ་ལུ་བདག་འཛིན་འཐབ་བཞག་ ཁུངས་མེད་པའི་ འཇིག་རྟེན་པའི་གཏམ་དེ་ཚུ་ ཡོན་ཏན་ཨིན་ཟེར་སྟོན་མི་ཆོས་རྫུས་མ་ཚུ་ལུ་མ་ཉན།

²¹ མི་ལ་ལུ་ཅིག་ཨ་ནི་ཡོན་ཏན་ ང་ལུ་ཡོད་ཟེར་སླབ་མི་ཆོས་རྫུས་མ་ལུ་ཉན་ཏེ་ དད་པའི་ལམ་ནང་ལས་འཐོན་ཏེ་ཡར་སོང་ནུག་ དཀོན་མཆོག་གི་ཐུགས་རྗེ་འདི་ ཁྱེད་ཆ་ཁྱབ་དང་གཅིག་ཁར་བཞུགས་བཅུག། །།