ཏི་མོ་ཐི་དང་པ་ལེའུ་ 5 - རྫོང་ཁ་

གཞན་ལུ་ཞེ་ས་འབད་དགོ་པའི་སྐོར།

¹ མི་རྒན་རྒས་ཚུ་ལུ་ཚིག་རྩུབ་དྲགས་མ་སླབ་པར་ རང་གི་ཨ་པ་བཟུམ་སྦེ་དྲན་བསྐུལ་ཞུ་ དེ་ལས་རང་ལས་ཆུང་མི་གཞོནམ་ཚུ་ལུ་ ནུ་གཅུང་བཟུམ་སྦེ་བརྩི་དགོ།

² ཨམ་རྒན་རྒས་ཚུ་ལུ་རང་གི་ཨའི་བཟུམ་སྦེ་བརྩི་ དེ་ལས་བུམོ་གཞོནམ་ཚུ་ལུ་ དམ་ཚིག་གཙང་མའི་ཐོག་ལས་སྦེ་ རང་གི་སྲིངམོ་བཟུམ་བརྩི་དགོ།།

ཨམ་སྲུ་ཡུགས་ས་མོ་ངོ་མ་ལུ་བདག་འཛིན་འཐབ་དགོ་པའི་སྐོར།

³ ཡུགས་ས་མོ་ངོ་མ་ རོགས་རམ་འབད་མི་ག་ཡང་མེད་མི་ཚུ་ལུ་ གུས་ཞབས་འབད་དགོ།

⁴ ཡུགས་ས་མོ་ལུ་བུ་བུམོ་དང་ཚོབོ་ཚམོ་ཡོད་པ་ཅིན་ དང་པ་རང་ འདི་ཚུ་གིས་ རང་གི་བཟའ་ཚན་གྱི་དོན་ལུ་ ཆོས་སེམས་ཀྱི་ལཱ་ལག་ལེན་འཐབ་ནི་གི་སྦྱང་བ་འབད་དགོ་ དེ་གིས་འབད་ ཨ་རྒས་ཨང་རྒས་དང་ཕམ་ཚུ་ལུ་དྲིན་ལན་འཇལ་ནི་ཨིན་ ག་ཅི་སྨོ་ཟེར་བ་ཅིན་ དཀོན་མཆོག་གིས་འདི་ལུ་ཐུགས་དགྱེསཔ་ཨིན།

⁵ ཨམ་སྲུ་ཡུགས་ས་མོ་ངོ་མ་འདི་ མོ་ལུ་བདག་འཛིན་འཐབ་མི་ག་ཡང་མེད་མི་དང་ དཀོན་མཆོག་ལུ་བློ་གཏད་མི་ དེ་ལས་དྲོ་པ་ཕྱི་རུ་ཨ་རྟག་རང་ དཀོན་མཆོག་ལུ་སྨོན་ལམ་བཏབ་སྟེ་རོགས་རམ་ཞུ་མི་འདི་ཨིན།

⁶ དེ་འབདཝ་ད་ མོ་གིས་སྤྲོ་སྟོན་ནི་རྐྱངམ་གཅིག་འཚོལ་སྡོད་པ་ཅིན་ མོ་རང་གསོན་པོ་སྦེ་སྡོད་རུང་ ཤི་སོངམ་དང་འདྲ།

⁷ ཡུགས་ས་མོ་དང་མོ་གི་བཟའ་ཚང་ལུ་ འདི་བཟུམ་གྱི་བཀའ་རྒྱ་བྱིན་ དེ་སྦེ་འབད་བ་ཅིན་ ཁོང་ལུ་སྐྱོན་བཏགས་མི་ག་ཡང་མི་འོང་།

⁸ མི་ག་ར་འབད་རུང་ རང་གི་གཉེན་ཉེཝ་དང་ཁག་ཆེ་ཤོས་ རང་གི་བཟའ་ཚང་ལུ་བདག་འཛིན་མ་འཐབ་པ་ཅིན་ མི་དེ་གིས་ཁོ་རང་གི་དད་པ་ཡ་མེད་སྦེ་བཞག་དོཝ་བཟུམ་ཨིནམ་མ་ཚད་ དད་པ་མ་བསྐྱེད་མི་ཚུ་ལས་ཡང་སྐྱོ་ཤོས་སྦེ་བརྩི་ནི་ཨིན།

⁹ ལོ་དྲུག་བཅུ་ལས་ལྷག་མི་དང་ རྨགཔ་གཅིག་གི་ཨམ་སྲུ་འབད་མི་ལུ་རྐྱངམ་གཅིག་ ཨམ་སྲུ་ཡུགས་ས་མོ་ངོ་མ་གི་ཐོ་ཡིག་ནང་བཙུགས་བཅུག

¹⁰ དེ་ལས་མི་གཞན་ཚུ་གིས་ མོ་ཨ་རྟག་རང་ལཱ་ལེགས་ཤོམ་འབད་སྡོད་སྡོདཔ་ཨིནམ་ཤེས་དགོ་ དཔེར་ན་མོ་རའི་བུ་དང་བུམོ་ལུ་ལེགས་ཤོམ་སྦེ་གསོ་གསོཝ་ཡོད་ག་ ཁྱིམ་ནང་འོང་མི་མགྱོནམ་ལུ་མཐོང་བསྐྱེད་དེ་ དཀོན་མཆོག་ཁོ་རའི་མི་དམ་པ་ཚུ་གི་རྐངམ་ཆུ་འཁྱུ་སྟེ་ མོ་རང་གཡོགམོ་ཅིག་བཟུམ་སྦེ་ཕྱག་ཞུ་ཡི་ག་ སྡུག་བསྔལ་ནང་ཡོད་མི་ཚུ་ལུ་གྲོགས་རམ་འབད་ ཕན་བཏགས་བྱིན་ཡི་ག་ དེ་ལས་མོ་འདི་བཟུམ་གྱི་ལཱ་བཟང་པོ་ཚུ་ལུ་གཙོ་བོ་བསྟེན་ཏེ་སྡོད་མི་ཅིག་དགོ།

¹¹ དེ་འབདཝ་ད་ ཡུགས་ས་མོ་ལོ་ན་ཆུང་ཀུ་ཚུ་ ཨམ་སྲུ་ཡུགས་ས་མོ་ངོ་མ་གི་ཐོ་ཡིག་ནང་བཙུགས་མ་བཅུག་ ག་ཅི་སྨོ་ཟེར་བ་ཅིན་ ཁོང་གི་སེམས་འདི་འདོད་ཆགས་ཀྱིས་འབད་ གཉེན་རྐྱབ་དགོ་མནོཝ་ད་ ཁིརཱིས་ཀྱི་ཞབས་ཕྱི་ཞུ་ནི་ནང་ལས་རྒྱབ་ལོག་འགྱོ་འོང་།

¹² དེ་གིས་འབད་ ཧེ་མ་ཁོང་གིས་ ཡུགས་ས་མོ་སྦེ་སྡོད་དེ་ གཙོ་བོ་གི་ཞབས་ཕྱི་ཞུ་ནི་གི་ ཁས་བླངས་དམ་བཅའ་ལས་འགལ་འགྱོཝ་ད་ ཁོང་ལུ་དཀོན་མཆོག་གི་ཆདཔ་ཕོག་འོང་།

¹³ འདི་གིས་མ་ཚད་ ཁོང་སྒྱིད་ངན་འགྱུར་ཏེ་ རོགས་ཀྱི་ཁྱིམ་བཤལ་འགྱོ་ནི་ལང་ཤོར་ཚུད་འོང་ དེ་ལས་སྒྱིད་ངན་འགྱུར་ནི་རྐྱངམ་གཅིག་མེན་པར་ ཁོང་གིས་ཡར་གྱི་བློ་མར་སླབ་ནི་དང་ རོགས་ཀྱི་ལཱ་ནང་དཀྲོགས་ཁ་རྐྱབ་ནི་དང་ སླབ་མ་བཏུབ་དང་ འབད་མ་བཏུབ་པའི་བྱ་སྤྱོད་ངན་པའི་ལཱ་ཚུ་འབད་ནི་ལྷབ་སྡོད་འོང་།

¹⁴ ངེ་གི་ཁ་བཀོད་ལྟར་དུ་འབད་དགོཔ་དེ་ ལོ་ན་ཆུང་མིའི་ཡུགས་ས་མོ་ཚུ་གཉེན་བརྐྱབ་ བུ་གཞི་སྐྱེས་ཏེ་ རང་གི་ཁྱིམ་བདག་འཛིན་འཐབ་སྡོད་བཅུག་ དེ་བཟུམ་སྦེ་འབད་བ་ཅིན་ ང་བཅས་ཀྱི་བྱང་ཕྱད་ཚུ་གིས་ སྐྱོན་བཏགས་ནི་གི་གོ་སྐབས་མི་ཐོབ།

¹⁵ དེ་འབདཝ་ད་ ཁོང་ཡུགས་ས་མོ་གཞོནམ་ལ་ལུ་ཅིག་ བདུད་ སེ་ཏཱན་གྱི་ཁ་ལུ་ཉན་ཏེ་ཡར་སོང་ཡི།

¹⁶ དདཔ་ཅན་ཨམ་སྲུ་ ག་གིས་རང་འབད་རུང་ རང་གི་ཁྱིམ་ནང་ཡུགས་ས་མོ་གཅིག་ཡོད་པ་ཅིན་ ཆོས་ཚོགས་ལུ་འགན་ཁག་མ་བཀལ་བར་ མོ་གིས་འདི་ལུ་ཆ་རོགས་འབད་དགོ་ དེ་སྦེ་འབདཝ་ལས་ ཆོས་ཚོགས་ཀྱིས་ཡུགས་ས་མོ་ངོ་མ་ རོགས་རམ་འབད་མི་ག་ཡང་མེད་མི་ཚུ་ལུ་ ཆ་རོགས་འབད་ཚུགས།།

འགོ་འདྲེན་པ་ཚུ་ལུ་འབད་དགོ་པའི་སྐོར།

¹⁷ ཆོས་ཚོགས་ལུ་བདག་འཛིན་འཐབ་མིའི་འགོ་འདྲེན་པ་ཚུ་ ཁག་ཆེ་བ་རང་ ཆོས་བཤད་ནི་དང་ཆོས་སྟོན་ནི་ནང་ལུ་ ལཱ་རྩ་འགེངས་ཏེ་འབད་མི་ཚུ་གིས་ ཞེ་ས་དང་གླ་ཆ་མ་བཏུབ་བཏུབ་སྦེ་ཐོབ་པའི་འོས་འབབ་ཡོད།

¹⁸ ག་ཅི་སྨོ་ཟེར་བ་ཅིན་ ལོ་ཐོག་བསྡུཝ་ད་ གླང་གི་ཁ་ལུ་ཀུ་ཏོ་མ་བཙུགས་ ལཱ་འབད་མི་གིས་གླ་ཆ་ཐོབ་དགོ་ཟེར་ གསུང་རབ་ནང་དེ་སྦེ་བྲིས་ཏེ་ཡོད།

¹⁹ འགོ་འདྲེན་པ་ཚུ་གི་སྐོར་ལས་ ཞུ་ལོག་བཀལ་མི་འོང་པ་ཅིན་ ཁོང་ལུ་སྐྱོན་བཏོན་མི་འཛོམ་དཔང་ གཉིས་ཡང་ན་གསུམ་ལས་ལྷགཔ་མེད་པ་ཅིན་ ཞུ་ལོག་བཀལ་མི་ལུ་མ་ཉན།

²⁰ སྡིག་པ་འབད་སྡོད་མི་འགོ་འདྲེན་པ་ཚུ་ལུ་ ག་ར་འཛོམས་སར་ལུ་སྐྱོན་བཏོན་ཏེ་དྲན་བསྐུལ་འབད་ དེ་ལས་མི་གཞན་གྱིས་ཡང་འདི་མཐོངམ་ད་ དཀོན་མཆོག་ལུ་འདྲོགས་ཏེ་སྡོད་འོང་།

²¹ དཀོན་མཆོག་དང་ཁིརཱིས་ཡེ་ཤུ་དང་ བཙག་འཐུ་མཛད་མི་ཕོ་ཉ་ཚུ་ལུ་འཛོམ་དཔང་སྦེ་བཙུགས་ཏེ་ ང་གིས་ཁྱོད་ལུ་སླབ་དོ་ ཨ་ནི་བཀོད་རྒྱ་ཚུ་ལུ་ཉན་ཏེ་ ཁྱོད་ཀྱིས་ འགོ་འདྲེན་པ་ག་ལུ་འབད་རུང་ ག་ཅི་གི་ཐོག་ལས་འབད་རུང་ ཆགས་སྡང་ཕྱོགས་རིས་མ་ཕྱེ་བར་འབད་དགོ།

²² མི་གཞན་གྱི་གུ་ལགཔ་བཀལ་ཏེ་ འགོ་འདྲེན་པ་སྦེ་བཙག་འཐུ་འབད་ནི་ལུ་མ་ཚབ་ དེ་འབདཝ་ལས་ ཁྱོད་ཁོང་གི་སྡིག་པའི་གྲལ་ཁར་མི་ཚུད་ ཁྱོད་རང་འདི་བཟུམ་གྱི་ལཱ་ཚུ་ལས་གཙངམ་སྦེ་སྡོད།

བཀོད་རྒྱ་གཞན་ཚུ་གི་སྐོར།

²³ ཁྱོད་ཕོཝ་ན་སྟེ་རང་སྡོད་པ་ཅིན་ ཆུ་རྐྱངམ་གཅིག་མ་འཐུང་པར་ རྒུན་འབྲུམ་གྱི་ཆང་སྨན་སྦེ་ཨ་ཙི་རེ་འཐུང་།

²⁴ མི་ལ་ལུ་ཅིག་གིས་འབད་མི་སྡིག་པ་དེ་ ག་ར་གིས་དྭངས་འཕྲོས་འཕྲོས་སྦེ་མཐོང་སྟེ་ ཁོང་ཁྲིམས་ཁང་ནང་མ་ལྷོདཔ་ལས་གཞན་གྱིས་ཤེས་འོང་ དེ་འབདཝ་ད་ མི་ལ་ལུ་ཅིག་གིས་འབད་མི་སྡིག་པ་དེ་ དེ་འཕྲོ་ལས་མ་མཐོང་པར་ ཤུལ་ལས་རྐྱངམ་གཅིག་ཤེས་འོང་།

²⁵ འདི་བཟུམ་སྦེ་རང་ མི་གཅིག་གིས་འབད་མི་ལཱ་བཟང་པོ་དེ་ཚུ་ གཞན་གྱིས་དྭངས་འཕྲོས་འཕྲོས་སྦེ་མཐོང་འོང་ དེ་ལས་མི་ལ་ལུ་ཅིག་གིས་འབད་མི་ལཱ་བཟང་པོ་དེ་ དེ་འཕྲོ་ལས་མ་མཐོང་སྟེ་འབད་རུང་ ནམ་ཅིག་གི་ཚེ་ག་ར་གིས་ཤེ་འོང་།།