ཏི་མོ་ཐི་དང་པ་ལེའུ་ 4 - རྫོང་ཁ་

ཆོས་རྫུས་མ་སྟོན་མི་ལས་དྲན་པ་བཏོན་དགོ་པའི་སྐོར།

¹ དཀོན་མཆོག་གི་ཐུགས་ཉིད་ཀྱིས་གསལ་ཏོག་ཏོ་སྦེ་ དེ་སྦེ་གསུངསམ་ཨིན་མས་ ཤུལ་མའི་དུས་ལུ་དདཔ་ཅན་ལ་ལུ་ཅིག་གིས་ ཡེ་ཤུ་གི་བདེན་པའི་ཆོས་ལུ་སྤང་སྟེ་ མགུ་བསྐོར་མི་འདྲེ་གདོན་གྱི་རྟིང་བདའ་སྟེ་ འདྲེ་གདོན་གྱི་ཆོས་རྫུས་མ་ལུ་ཉན་ཏེ་འགྱོ་འོང་།

² འདྲེ་གདོན་ཚུ་གི་ཆོས་རྫུས་མ་ཚུ་ ཁ་ཆོས་འབད་མི་ཚུ་གི་ཐོག་ལས་སྦེ་འོངམ་ཨིན་ ཁོང་གི་མནོ་བསམ་དེ་དཔེར་ན་ ལྕགས་ཚ་ཏོམ་གྱིས་ཤ་འཚིག་འགྱོ་དོཝ་བཟུམ་སྦེ་ ཁོང་གི་དྲན་ཤེས་ལེགས་ཤོམ་དེ་འཚིག་འགྱོ་སྟེ་ ཟོགཔོ་འབད་མི་ལུ་འགྱོད་སེམས་མི་བསྐྱེད།

³ ཁ་ཆོས་འབད་མི་སློབ་དཔོན་འདི་ཚུ་གིས་ གཉེན་རྐྱབ་ནི་དང་བཞེས་སྒོ་ལ་ལུ་ཅིག་ཟ་ནི་མེད་ཟེར་སྟོནམ་ཨིན་མས་ དེ་འབདཝ་ད་བཞེས་སྒོ་ག་ར་ དད་པ་བསྐྱེད་མི་ཚུ་དང་ བདེན་པ་ཤེས་མི་ཚུ་གིས་ བཀའ་དྲིན་ཆེ་ཟེར་ཞུ་སྟེ་ཟ་གེ་ཟེར་ དཀོན་མཆོག་གིས་མཛད་གནང་གནངམ་ཨིན།

⁴ དཀོན་མཆོག་གིས་མཛད་མི་ག་ར་ལེགས་ཤོམ་ཨིན་ དེ་འབདཝ་ལས་བཀའ་དྲིན་ཆེ་ཟེར་ཞུ་སྟེ་ཟ་བ་ཅིན་ ཟ་མ་བཏུབ་དང་ འཐུང་མ་བཏུབ་ག་ནི་ཡང་མེད།

⁵ ག་ཅི་སྨོ་ཟེར་བ་ཅིན་ དཀོན་མཆོག་གི་གསུང་དང་ སྨོན་ལམ་གྱིས་ བཞེས་སྒོ་ག་ར་གཙངམ་མཛད་གནངམ་ཨིན།།

ཡེ་ཤུ་ཁིརཱིས་ཀྱི་ཕྱག་ཞུ་མི་བཟང་པོ་གི་སྐོར།

⁶ ང་གིས་ཁྱོད་ལུ་སྟོན་མི་བཀོད་རྒྱ་འདི་ཚུ་ ཁྱོད་ཀྱིས་སྤུན་ཆ་ཚུ་ལུ་སྟོན་བྱིན་སྦེ་ ཁྱོད་རང་གིས་འབད་འོང་མིའི་ཆོས་དང་ གཞི་བརྟན་ཏོག་ཏོ་ཚུ་ ཟས་བཅུད་ཅན་མ་ཆད་པར་ཟ་དོཝ་བཟུམ་སྦེ་ སེམས་ཁར་དྲན་སྡོད་པ་ཅིན་ ཁྱོད་ཁིརཱིས་ཡེ་ཤུ་གི་ཕྱག་ཞུ་མི་ལེགས་ཤོམ་ཅིག་སྦེ་འཐོན་འོང་།

⁷ འཇིག་རྟེན་པའི་གཏམ་དང་ ཁུངས་མེད་མི་བློ་ཚུ་གི་གྲལ་ཁར་མ་འཛུལ་བར་ ཆོས་སེམས་བསྐྱེད་ནི་གི་དོན་ལས་སྦྱོང་བརྡར་འབད།

⁸ ཁྱོད་ལུས་ཀྱི་རྩལ་སྦྱོང་འབད་བ་ཅིན་ ཕན་ཐོགས་དུམ་གྲ་ཅིག་ཐོབ་འོང་ དེ་འབདཝ་ད་ཁྱོད་རང་གིས་ ཆོས་སེམས་བསྐྱེད་ནི་གི་སྦྱོང་བརྡར་འབད་བ་ཅིན་ ག་ཅི་ནང་རང་འབད་རུང་ ཕན་ཐོགས་སྦོམ་ཡོད་ ག་ཅི་འབད་ཟེར་བ་ཅིན་ དེ་སྦེ་སྡོདཔ་ད་ལུ་ དཀོན་མཆོག་གིས་ཁས་བླངས་བཞེས་མིའི་མི་ཚེ་འདི་ ཁྱོད་ཀྱིས་ད་ལྟོ་ཐོབ་ནི་ཨིནམ་མ་ཚད་ ཤུལ་ལས་ཡང་ཐོབ་འོང་།

⁹ ང་གིས་འབྲི་མི་དེ་ བདེན་པ་དང་ཆ་བཞག་ཚུགས་མི་ཅིག་ཨིན།

¹⁰ འདི་གིས་འབད་ ཆོས་སེམས་བསྐྱེད་ནི་གི་དོན་ལུ་ ང་བཅས་ཀྱིས་དཀའཝ་སྤྱད་དེ་ སྦྱོང་བརྡར་འབདཝ་ཨིན་ ག་ཅི་སྨོ་ཟེར་བ་ཅིན་ ང་བཅས་ཀྱིས་ གསོན་པོའི་དཀོན་མཆོག་ལུ་བློ་གཏདཔ་ཨིན་ ཁོ་མི་ག་ར་གི་སྐྱབས་མགོན་ཨིན་ཏེ་འབད་རུང་ གཙོ་བོ་རང་ཁོ་དདཔ་ཅན་ཚུ་གི་སྐྱབས་མགོན་ཨིན།

¹¹ འདི་ཚུ་གི་སྐོར་ལས་ ཁྱོད་ཀྱིས་བཀའ་རྒྱ་བྱིན་སྦེ་ སྟོན་བྱིན་དགོ།

¹² ཁྱོད་ལོ་ན་གཞོནམ་ཨིན་ཏེ་འབད་རུང་ མི་ག་གིས་ཡང་ཁུངས་མེདཔ་སྦེ་བརྩིས་མ་བཅུག་ དེ་འབདཝ་ད་ ཁྱོད་དདཔ་ཅན་ཚུ་གི་གདོང་ཁར་ལུ་ བློ་སླབ་ཐངས་དང་ བྱ་བ་སྤྱོད་ལམ་དང་ མི་ཚུ་ལུ་བྱམས་པ་འབད་ནི་དང་ ཁིརཱིས་ལུ་དད་པ་བསྐྱེད་ནི་ དེ་ལས་ག་ཅི་ན་རང་འབད་རུང་ ཟོགཔོ་དང་སླ་མ་བསྲེས་པར་དཔེ་སྦེ་སྡོད།

¹³ ང་མ་ལྷོད་ཚུན་ཚོད་ཁྱོད་ཀྱིས་ དུས་ཚོད་བཏོན་ཏེ་ ཆོས་ཚོགས་འཛོམས་སར་གསུང་རབ་ལྷབ་ནི་དང་ འགྲེལ་བཤད་བརྐྱབ་ནི་ དེ་ལས་ཆོས་སྟོན་ནི་ཚུ་མ་ཆད་པར་འབད།

¹⁴ འགོ་འདྲེན་པ་ཚུ་གིས་ ཁྱོད་ཀྱི་གུ་ལགཔ་བཀལ་ཏེ་ ལུང་བསྟན་བཤད་པའི་ཐོག་ལས་སྦེ་ ཁྱོད་ཀྱིས་ཐོབ་མི་དམ་པའི་ཐུགས་ཉིད་ཀྱི་གསོལ་རས་དེ་ལུ་ བར་སྟོར་མ་གཏང་པར་ ལག་ལེན་འཐབ་སྟེ་སྡོད།

¹⁵ ང་གིས་སླབ་མི་ཚུ་ལག་ལེན་འཐབ་སྟེ་ ན་འཐན་ཏོག་ཏོ་སྦེ་འབད་དགོ་ དེ་སྦེ་འབད་བ་ཅིན་ མི་ག་ར་གིས་ ཁྱོད་ཀྱི་བྱ་བ་སྤྱོད་ལམ་ཚུ་ཡར་རྒྱས་འགྱོ་ས་མཐོང་འོང་།

¹⁶ ཁྱོད་རང་དང་ཁྱོད་ཀྱིས་སྟོན་མི་ཆོས་ཚུ་ལུ་ བརྟག་ཞིབ་དཔྱད་དེ་བལྟ་ བདེན་པ་དེ་ལུ་དྲན་པ་བཏོན་ཏེ་ སྙིང་རུས་བསྐྱེད་དེ་སྡོད་པ་ཅིན་ ཁྱོད་རང་དང་ཁྱོད་ལས་ཆོས་ཉན་མི་ཚུ་གིས་ ཐར་པ་ཐོབ་ནི་ཨིན།།