ཏི་མོ་ཐི་དང་པ་ལེའུ་ 3 - རྫོང་ཁ་

ཆོས་ཚོགས་ཀྱི་འགོ་འདྲེན་པ་གི་སྐོར།

¹ མི་ག་ར་འབད་རུང་ ཆོས་ཚོགས་ཀྱི་འགོ་འདྲེན་འཐབ་ནིའི་ལཱ་གི་མནོ་བསམ་ཡོད་པ་ཅིན་ འདི་གི་ལཱ་ཡ་རབས་ཨིན་ཟེར་སླབ་མི་གཏམ་དེ་ བདེན་པ་དང་ཆ་བཞག་ཚུགས་མི་ཅིག་ཨིན།

² འདི་གི་དོན་ལུ་ཆོས་ཚོགས་ཀྱི་འགོ་འདྲེན་འཐབ་མི་དེ་ མི་ག་གིས་ཡང་སྐྱོན་བཏག་རུང་ ཁུངས་བཀལ་མ་ཚུགས་མི་ཅིག་དང་ ཨམ་སྲུ་གཅིག་གི་རྨགཔ་དང་ ཚད་དང་ལྡན་མི་དང་ མཚམས་ཚོད་ཤེས་མི་དང་ སྤྱོད་ལམ་བཟང་པོ་དང་ མགྱོནམ་ལུ་མཐོང་ཡོད་མི་དང་ ཆོས་སྟོན་ཚུགས་མི་དང་།

³ ཆང་གིས་མ་འགྲངས་མི་དང་ སུ་ཐག་ཐུང་ཀུ་འབད་མི་མེན་པར་ རོགས་ལུ་མཉམ་ཆུང་འབད་མི་དང་ ཕུང་མ་འཚོལ་མི་ དེ་ལས་རྒྱུ་ཕྱེད་ཀྲམ་ལུ་ཕངས་སེམས་མ་བསྐྱེད་མིའི་ མི་གཅིག་དགོཔ་ཨིན།

⁴ རང་གི་བཟའ་ཚང་ལེགས་ཤོམ་སྦེ་བདག་འཛིན་འཐབ་པའི་ཐོག་ལས་སྦེ་ རང་གི་བུ་དང་བུམོ་གིས་ རང་ལུ་ཉན་བཏུབ་མི་དང་ ཞེ་ས་འབད་བཏུབ་མི་གཅིག་དགོཔ་ཨིན།

⁵ ག་ཅི་སྨོ་ཟེར་བ་ཅིན་ རང་གི་བཟའ་ཚང་ལུ་བདག་འཛིན་འཐབ་མ་ཚུགས་པ་ཅིན་ འདི་གིས་དཀོན་མཆོག་གི་ཆོས་ཚོགས་ལུ་ ག་དེ་སྦེ་བདག་འཛིན་འཐབ་ཚུགས་ནི་སྨོ།

⁶ ཆོས་ཚོགས་ཀྱི་འགོ་འདྲེན་འཐབ་མི་འདི་ དད་པ་ནང་དུས་ཡུན་རིངམ་སྦེ་སྡོད་སྡོདཔ་གཅིག་དགོཔ་ཨིན་ ག་ཅི་སྨོ་ཟེར་བ་ཅིན་ ཁོ་ཡང་བདུད་ སེ་ཏཱན་བཟུམ་སྦེ་ རྔམ་མདོག་བསྒྱུར་ཏེ་ ཆདཔ་ཕོག་ནིའི་ཉེན་ཁ་ཡོད།

⁷ ཆོས་ཚོགས་ཀྱི་འགོ་འདྲེན་འཐབ་མི་འདི་ལུ་ ཆོས་ཚོགས་ནང་མེན་མི་ཚུ་གིས་འབད་རུང་ ཁོ་གི་སྐོར་ལས་བློ་མ་ཧནམ་མ་སླབ་པར་ ཞེ་ས་འབད་མི་གཅིག་དགོཔ་ཨིན་ དེ་སྦེ་འབད་བ་ཅིན་ ཁོ་མི་གཞན་གྱི་གདོང་ཁར་བློ་མི་བཙོང་ དེ་མ་ཚད་ བདུད་ཀྱི་ཧིང་ནང་ཡང་མི་ཚུད།།

ཆོས་ཚོགས་ཀྱི་དྲང་བཞགཔ་གི་སྐོར།

⁸ འདི་བཟུམ་སྦེ་རང་ ཆོས་ཚོགས་ཀྱི་དྲང་བཞགཔ་ཚུ་ཡང་ མི་ཚུ་གིས་ཞེ་ས་འབད་མི་དང་ མི་ན་འཐན་ཏོག་ཏོ་དང་ ཆང་གིས་མ་འགྲངས་མི་ དེ་ལས་འབབ་ཁུངས་བཟོ་ནིའི་དོན་ལུ་ངན་ལྷད་ལུ་ཡ་མ་འབད་མི་དགོཔ་ཨིན།

⁹ དེ་འབདཝ་ད་ ང་བཅས་ཀྱི་ཆོས་ནང་ཡོད་མི་ དད་པ་གི་གསང་བ་གཏིང་ཟབ་དྲགས་དེ་ཚུ་ ཧེ་མ་ལས་གྲ་སྒྲིག་སྦེ་བཞག་མི་འདི་ ད་རེས་ཀྱི་དུས་ཚོད་ལུ་བཏོན་གནང་གནངམ་ཨིན་ ཨ་ནི་འདི་ཚུ་དྲན་ཤེས་གསལ་ཏོག་ཏོ་གི་ཐོག་ལས་སྦེ་ ཁོང་གིས་སེམས་ཁར་བཟུང་སྟེ་བཞག་དགོ།

¹⁰ ཆོས་ཚོགས་ཀྱིས་ཁོང་ལུ་དྲང་བཞགཔ་གི་འགན་ཁུར་མ་བཀལ་བའི་ཧེ་མ་ ཁོང་གི་འབད་བཞག་བཅའ་བཞག་ལེགས་ཤོམ་ཨིན་ན་མེན་ན་ བརྟག་དཔྱད་ལེགས་ཤོམ་སྦེ་འབད་དགོ་ དེ་ལས་འདི་ནང་སྐྱོན་ག་ནི་ཡང་མ་མཐོང་པ་ཅིན་ ཁོང་ལུ་དྲང་བཞགཔ་གི་འགན་ཁུར་བཀལ་ཚུགསཔ་ཨིན།

¹¹ ཁོང་ཨམ་སྲུ་ཚུ་ཡང་ འདི་བཟུམ་སྦེ་ མི་ཚུ་གིས་ཞེ་ས་འབད་མི་དང་ གཞན་གྱི་སྐོར་ལས་གཏམ་ངན་མ་སླབ་མི་དང་ ཨམ་སྲུ་ཚད་དང་ལྡན་མི་ དེ་ལས་ག་ཅི་ནང་ར་འབད་རུང་ ན་འཐན་ཏོག་ཏོ་འབད་མི་གཅིག་དགོ།

¹² དྲང་བཞགཔ་དེ་ཚུ་ ཨམ་སྲུ་གཅིག་གི་རྨགཔ་འབད་མི་ དེ་ལས་རང་གི་བུ་དང་བུམོ་དང་ རང་གི་བཟའ་ཚང་ལེགས་ཤོམ་སྦེ་ བདག་འཛིན་འཐབ་ཚུགས་མི་གཅིག་དགོ།

¹³ དྲང་བཞགཔ་ལཱ་ལེགས་ཤོམ་འབད་བ་ཅིན་ གཞན་གྱིས་ཁོང་ལུ་ཞེ་ས་འབདཝ་མ་ཚད་ ཁིརཱིས་ཡེ་ཤུ་གི་དད་པ་ནང་ཡང་ བློ་སྟོབས་ཆེ་དྲགས་སྦེ་ཐོན་འོང་།།

བདེན་པ་གཏིང་ཟབ་དྲགས་ཀྱི་སྐོར།

¹⁴ ང་ཁྱོད་སྡོད་ས་མགྱོགས་པར་འོང་ནི་གི་རེ་བ་ཡོད་ ཨིན་ཏེ་འབད་རུང་ ང་གིས་ཡི་གུ་འདི་ནང་བཀོད་རྒྱ་ ཁྱོད་ལུ་འབྲི་གཏང་དོ།

¹⁵ ང་ཁྱོད་སྡོད་ས་ག་དེམ་ཅིག་སྦེ་འོང་ནི་ཕྱི་སོང་རུང་ ང་གིས་བྲིས་མི་འདི་ལས་ དཀོན་མཆོག་གི་བཟའ་ཚན་ནང་ཡོད་མི་སྤྱོད་ལམ་ནང་ལུ་ ག་དེ་སྦེ་སྡོད་དགོཔ་ཨིན་ན་ ཁྱོད་ཀྱིས་ཤེས་ཚུགས་འོང་ དཀོན་མཆོག་གི་བཟའ་ཚན་དེ་ གསོན་པོའི་དཀོན་མཆོག་གི་ཆོས་ཚོགས་ཨིནམ་མ་ཚད་ ཆོས་ཚོགས་དེ་ བདེན་པ་གི་ཀཝ་དང་འགྱམ་ཡང་ཨིན།

¹⁶ ཐད་རི་བ་རི་རང་ ཡེ་ཤུ་གི་སྐོར་ལས་ ཆོས་སེམས་བསྐྱེད་བཅུག་མི་ བདེན་པའི་གསང་བ་གཏིང་ཟབ་དྲགས་དེ་ ཡ་མཚན་ཆེ་ཏོག་ཏོ་ཨིན་ཟེར་ ང་བཅས་ག་ར་གིས་འཛོམ་དཔང་འབདཝ་ཨིན་ འཛོམ་དཔང་དེ་ག་ཅི་སྨོ་ཟེར་བ་ཅིན། ཁོ་ མིའི་ལུས་ལུ་བྱོན་མི་ ཐུགས་ཉིད་ཀྱིས་ཁོ་བདེན་པ་ཟང་མཛད་མི་ ཕོ་ཉ་ཚུ་གིས་མཇལ་མི་ ཁོ་གི་སྐོར་ལས་མི་རིགས་ག་ར་ལུ་ཁྱབ་བསྒྲགས་སོང་མི་ འཛམ་བུ་གླིང་གི་མི་ཚུ་གིས་དད་པ་བསྐྱེད་མི་ཁོ་ གཟི་བརྗིད་ནང་ཡར་འཐུ་བསྣམས་ནུག།