ཏི་མོ་ཐི་དང་པ་ལེའུ་ 2 - རྫོང་ཁ་

ཆོས་ཚོགས་ནང་སྨོན་ལམ་བཏབ་ཐངས་ཀྱི་སྐོར།

¹ དེ་འབདཝ་ལས་དང་པ་རང་ ང་གིས་ཁྱོད་དང་དདཔ་ཅན་གཞན་ཚུ་ལུ་དྲན་བསྐུལ་དེ་སྦེ་འབད་དོ་ ད་སྨོན་ལམ་ནང་ མི་ག་ར་གི་དོན་ལུ་ དཀོན་མཆོག་ལུ་ཞུ་བ་ཕུལ་ གསོལཝ་བཏབ་ དེ་ལས་དཀོན་མཆོག་གིས་མི་ག་ར་གི་དོན་ལུ་ མཛད་གནང་མི་གི་དོན་ལས་ བཀའ་དྲིན་དགའ་ཚོར་ཕུལ།

² རྒྱལཔོ་དང་གོངམ་ དབང་ཚད་ཡོད་མི་ག་ར་གི་དོན་ལུ་ གསོལཝ་བཏབ་ སྨོན་ལམ་ཞུ་ དེ་ལས་རང་གི་སྡོད་ཐངས་ཡང་ ཆོས་སེམས་ཆེ་ཏོག་ཏོ་དང་ ཚུལ་དང་མཐུནམ་སྦེ་ ཞི་བདེ་དང་ཞི་བདེ་སྒོ་ལས་ སྡོད་ནི་ཐོབ་འོང་།

³ འདི་བཟུམ་སྦེ་ སྨོན་ལམ་ཞུ་བ་ཅིན་ ལེགས་ཤོམ་ཨིནམ་མ་ཚད་ ང་བཅས་ཀྱི་སྐྱབས་མགོན་དཀོན་མཆོག་གིས་ཐུགས་དགྱེསཔ་ཨིན།

⁴ ཁོ་ལུ་ མི་ག་ར་སྐྱབས་མཛད་ནི་དང་ བདེན་པ་ལུ་ངོ་ཤེས་བཅུག་ནི་གི་ཐུགས་དགོངས་ཡོད།

⁵ ག་ཅི་སྨོ་ཟེར་བ་ཅིན་ དཀོན་མཆོག་གཅིག་ལས་བརྒལ་མེད་ ད་རུང་དཀོན་མཆོག་དང་མིའི་བར་ན་ བར་མི་ མི་གཅིག་མ་གཏོགས་གཞན་མེད་ ཨ་ནི་མི་འདི་ཁིརཱིས་ཡེ་ཤུ་ཨིན།

⁶ ཁོ་གིས་མི་ག་ར་ལུ་ སྡིག་པ་དང་ཤི་ས་ལས་ཐར་པ་གནང་བའི་དོན་ལུ་ ཁོ་རང་གི་སྐུ་ཚེ་དེ་ སྲོག་རིན་སྦེ་གནང་ཡི་ འདི་མི་ག་ར་ལུ་ཁ་འཐེན་བཟུམ་སྦེ་ དཀོན་མཆོག་གིས་དུས་ཚོད་ཀྲིག་ཀྲི་ལུ་མཛད་གནང་ནུག

⁷ ཁ་འཐེན་དེ་གི་དོན་ལས་ ང་ལུ་ཁྱབ་བསྒྲགས་འབད་མི་དང་ སྐུ་ཚབ་སྦེ་བཙག་འཐུ་མཛད་གནང་སྟེ་ ང་ ཕྱིའི་མི་རིགས་ཚུ་ལུ་ དད་པ་དང་བདེན་པའི་ཆོས་སྟོན་མི་སློབ་དཔོན་འབད་ནི་གི་དོན་ལུ་བཏང་གནང་ཡི་ ང་གིས་དེ་སྦེ་སླབ་མི་འདི་ ཤོབ་མེན་ ཕྲང་འདི་རང་སླབ་ཨིན།།

ཆོས་ཚོགས་ནང་སྒྲིག་དགོ་པའི་སྤྱོད་ལམ་གྱི་སྐོར།

⁸ དེ་འབདཝ་ལས་བརྟེན་ཏེ་ ཕོ་སྐྱེས་ཚུ་གིས་ ག་ཏེ་རང་འབད་རུང་ དཀོན་མཆོག་ལུ་གསོལཝ་བཏབ་ནི་སྦེ་འཛོམས་ད་ ཙིགཔ་ཟ་ནི་དང་ རོགས་དང་གཅིག་ཁར་འཐབ་འཛིང་འབད་ནི་ཚུ་སྤང་སྟེ་ སེམས་བཟང་པོའི་སྒོ་ལས་ ལགཔ་ཡར་སེང་སྟེ་ སྨོན་ལམ་བཏབ་འོང་ཟེར་ང་ལུ་འདོད་པ་ཡོད།

⁹ འདི་བཟུམ་སྦེ་རང་ ཨམ་སྲུ་ཆ་ཁྱབ་ཀྱིས་ཡང་ རིན་གོང་ཆེ་བའི་བགོ་ལ་གི་ཚབ་མ་ལུ་ ཚད་དང་ལྡན་པའི་བགོ་ལ་ཀྲིག་ཀྲི་སྦེ་གྱོན་ དེ་ལས་ གནམ་མེད་ས་མེད་སྐྱ་བཟོ་བཟོ་ནི་དང་ རྒྱན་ཆ་གསེར་དང་མུ་ཏིག་བཏག་ནི་མེན།

¹⁰ དེ་འབདཝ་ད་ཨམ་སྲུ་ དཀོན་མཆོག་ལུ་ཆོས་སེམས་ཡོད་ཟེར་མི་ཆ་ཁྱབ་ཀྱིས་ འབད་བཞག་བཅའ་བཞག་གི་ཐད་ཁ་ལུ་ བྱ་མཆིས་ཆི་སྦེ་སྟོན་དགོ།

¹¹ དཀོན་མཆོག་ལུ་གསོལཝ་བཏབ་སར་འཛོམས་ད་ ཨམ་སྲུ་དེ་ཚུ་ཁུ་སིམ་སི་སྦེ་ ག་སྟོན་མི་དེ་ཉན་ཏེ་ རང་གིས་ཡོན་ཏན་ལྷབ་དགོ།

¹² ང་གིས་འབད་བ་ཅིན་ ཨམ་སྲུ་གིས་ཕོ་སྐྱེས་ལུ་ཆོས་སྟོན་ནི་དང་ ཕོ་སྐྱེས་ཀྱི་ལྟག་ལས་དབང་ཚད་མི་ཐོབ་ ཨམ་སྲུ་ཚུ་ཁུ་སིམ་སི་སྦེ་སྡོད་དགོ།

¹³ ག་ཅི་སྨོ་ཟེར་བ་ཅིན་ འགོ་དང་པ་རང་ ཨ་དམ་ལུ་མཛད་དེ་ འདི་གི་ཤུལ་ལས་ ཨིབ་ལུ་མཛད་གནང་ནུག

¹⁴ ཧེ་མ་མགུ་བསྐོར་ནང་ཚུད་མི་ ཨ་དམ་མེན་ དེ་འབདཝ་ད་ མགུ་བསྐོར་ནང་ཚུད་དེ་སྡིག་པ་འབད་མི་དེ་ ཨིབ་ཨིན།

¹⁵ དེ་འབདཝ་ད་ ཨམ་སྲུ་ཚུ་ཚད་བཟུང་སྟེ་ དད་པ་དང་བྱམས་པ་ དེ་ལས་དམ་པ་ནང་འཕྲོ་མཐུད་དེ་རང་སྡོད་པ་ཅིན་ ཨ་ལོ་སྐྱེས་བའི་ཐོག་ལས་སྦེ་ འཛོལ་བ་ལས་སྐྱབས་འབད་འོང་།།