ཏི་མོ་ཐི་དང་པ་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ ང་བཅས་ཀྱི་སྐྱབས་མགོན་དཀོན་མཆོག་དང་ ང་བཅས་རང་གི་རེ་བ་ ཁིརཱིས་ཡེ་ཤུ་གི་བཀའ་དང་བསྟུན་ཏེ་ ཁིརཱིས་ཡེ་ཤུ་གི་སྐུ་ཚབ་སྦེ་བཙག་འཐུ་མཛད་གནང་སྟེ་ཡོད་མི་ ང་ པའུལ་གྱིས།

² དད་པ་གཅིག་ནང་ངེ་གི་བུ་ངོ་མ་བཟུམ་རང་ཡོད་མི་ ཏི་མོ་ཐི་ ཁྱོད་ལུ་ ཡི་གུ་འདི་འབྲི་དོ་ ཡབ་དཀོན་མཆོག་དང་ ང་བཅས་ཀྱི་གཙོ་བོ་ ཁིརཱིས་ཡེ་ཤུ་གི་ཐུགས་རྗེ་དང་ སྙིང་རྗེ་དང་ཞི་བདེ་ ཁྱོད་ལུ་གནང་བཅུག།

ཆོས་རྫུས་མ་སྟོན་མི་ཚུ་ལུ་བཀག་དགོ་པའི་སྐོར།

³ ཧེ་མ་ང་ལུང་ཕྱོགས་ མ་ཀེ་དོ་ནི་ཡ་ལུ་འགྱོ་བའི་སྐབས་ལུ་ ང་གིས་ཁྱོད་ལུ་ཨུ་ཚུགས་རྐྱབ་དོཝ་བཟུམ་སྦེ་ ད་རུང་ཡང་ ཁྱོད་ཁྲོམ་ ཨི་ཕི་སི་ལུ་རང་སྡོད་དེ་ ཆོས་མ་འདྲཝ་གི་གཞི་སྟོན་མི་ཚུ་ལུ་ ད་དེ་ལས་ཕར་ཨ་ནི་བཟུམ་གྱི་ཆོས་མ་སྟོན་ཟེར་བཀའ་རྒྱ་བྱིན།

⁴ ཁུངས་མེད་པའི་འཇིག་རྟེན་གྱི་གཏམ་དང་ དང་ཕུགས་ཕ་བརྒྱུད་ཚུ་གི་མ་བདེན་མིའི་གཏམ་ འཚོལ་ནི་ལུ་བཀོག་བཞག་ཟེར་ཁ་བཀོད་རྐྱབས་ དེ་ཚུ་གིས་ ཉོགས་བཤད་འབྱུང་ནི་གི་རྒྱུ་རྐྱེན་གཅིག་མ་གཏོགས་ དད་པ་གི་རྒྱུད་ལས་སྒྲུབ་འོང་མི་ དཀོན་མཆོག་གི་ཕྱག་ལཱ་འདི་ འབད་མི་ཚུགས།

⁵ ང་གིས་ཁྱོད་ལུ་ཁ་བཀོད་བརྐྱབས་དགོ་པའི་དོན་དག་དེ་ དདཔ་ཅན་ཚུ་ལུ་བྱམས་པ་གིས་ཁྱབ་སྟེ་སྡོད་བཅུག་ནི་གི་དོན་ལུ་ཨིན་ བྱམས་པ་གི་ལམ་དེ་ སེམས་གཙངམ་དང་ དྲན་ཤེས་གསལ་ཏོག་ཏོ་དང་ དད་པ་ངོ་མ་ལས་བྱུངམ་ཨིན།

⁶ ཁོང་ལ་ལུ་ཅིག་གིས་ཨ་ནི་ལམ་ནང་ལས་ཐོན་ཏེ་ ལམ་འཛོལ་བ་ཁུངས་མེད་པའི་བློ་ཚུ་ལུ་ཉན་ཏེ་ཡར་སོང་ཡི།

⁷ ཁོང་རང་གིས་ག་ཅི་སླབ་ཨིན་ན་ ཡང་ཅིན་རོགས་ལུ་ཐེ་འཚོམ་མེད་པར་ཆོས་ག་ཅི་སྟོནམ་ཨིན་ན་ དེ་གི་དོན་དག་ ཁོང་རང་གིས་ཧ་མ་གོ་རུང་ དཀོན་མཆོག་གི་བཀའ་ཁྲིམས་ཀྱི་སློབ་དཔོན་འབད་ནི་གི་རེ་བ་བསྐྱེད་དེ་འདུག

⁸ ག་གིས་རང་འབད་རུང་ བཀའ་ཁྲིམས་དེ་ཀྲིག་ཀྲི་སྦེ་སྲུང་པ་ཅིན་ འདི་ལེགས་ཤོམ་ཨིན་ཟེར་ང་བཅས་ཀྱིས་ཤེས།

⁹ ང་བཅས་ཀྱིས་འདི་ཡང་ཤེས་ བཀའ་ཁྲིམས་དེ་ མི་ཕྲངམ་ཆོས་སེམས་ཆེ་ཏོག་ཏོ་ཚུ་གི་དོན་ལུ་ གནང་གནངམ་མེན་ དེ་འབདཝ་ད་ བཀའ་ཁྲིམས་ལུ་ཆ་མ་བཞག་པར་ ཁྲིམས་ལས་འགལ་འགྱོ་མི་དང་ བཀའ་ཁྲིམས་ལུ་མ་ཉན་མི་ཚུ་གི་དོན་ལུ་དང་ དཀོན་མཆོག་ལུ་མ་འདྲོག་མི་ཚུ་དང་ སྡིག་ཅན་ཚུ་གི་དོན་ལུ་དང་ མི་དམ་པ་མེན་མི་ཚུ་དང་ འཇིག་རྟེན་པ་ ཆོས་ལུ་གུས་ཞབས་མེད་མི་ཚུ་གི་དོན་ལུ་དང་ རང་གི་ཕམ་ལུ་བསད་མི་དང་ མི་བསད་མི་ཚུ་གི་དོན་ལུ་དང་།

¹⁰ གཉེན་ལས་འགལ་བའི་ལུས་འབྲེལ་འབད་མི་དང་ ཕོ་སྐྱེས་ཁོང་རང་ནང་འཁོད་ནང་ལུས་འབྲེལ་འབད་མི་དང་ མི་ལུ་བཟུང་སྟེ་ཁྱིད་བཙོང་མི་དང་ ཤོབ་བརྐྱབས་མི་དང་ ཤོབ་བརྐྱབས་ཏེ་མནའ་འབོ་མི་ དེ་ལས་གཞི་བདེན་པ་ལས་འགལ་མི་ ག་ཅི་རང་འབད་རུང་ འདི་ཚུ་གི་དོན་ལུ་ བཀའ་ཁྲིམས་དེ་གནང་གནངམ་ཨིན།

¹¹ གཞི་བདེན་པ་དེ་ བྱིན་རླབས་ཅན་དཀོན་མཆོག་གིས་གནང་མི་ གཟི་བརྗིད་དང་ལྡན་པའི་གཏམ་བཟང་དང་འཁྲིལ་ཏེ་ཨིན་ དེ་ཁྱབ་སྒྲགས་འབད་ཟེར་ང་ལུ་བཅོལ་གནང་ཡི།།

པའུལ་གྱིས་དཀོན་མཆོག་གི་སྙིང་རྗེ་དྲན་པའི་སྐོར།

¹² ང་ལུ་ལྕོགས་གྲུབ་གནང་མི་ ང་བཅས་ཀྱི་གཙོ་བོ་ ཁིརཱིས་ཡེ་ཤུ་ལུ་ ང་གིས་བཀའ་དྲིན་ཆེ་ཟེར་ཞུ་ནི་ཨིན་ ག་ཅི་སྨོ་ཟེར་བ་ཅིན་ ཁོ་གིས་ང་ལུ་དམ་ཚིག་ཅན་སྦེ་བརྩིས་གནང་སྟེ་ ཁོ་གི་ཕྱག་ཞུ་བའི་ལཱ་ང་ལུ་བཀོད་གནང་ཡི།

¹³ ཧེ་མ་ ང་གིས་ཁོ་ལུ་སྐུར་པ་བཏབ་སྟེ་ དདཔ་ཅན་ལུ་གནོད་པ་བཀལ་ཏེ་ ཉེས་སྤྱོད་ཅན་གཅིག་འབད་རུང་ ད་ལྟོ་ཁོ་གིས་ང་ལུ་སྙིང་རྗེ་གཟིགས་ཅི་ ག་ཅི་འབད་ཟེར་བ་ཅིན་ དེ་ཚུ་ག་ར་ང་གིས་ཁོ་ལུ་དད་པ་མ་བསྐྱེད་པར་ ང་རང་འབད་མི་ ང་རང་གིས་མ་ཤེས་པར་སྡོད་པའི་སྐབས་ལུ་ འབད་ནི་འདི་གིས་ཨིན།

¹⁴ དེ་འབདཝ་ད་ ང་བཅས་ཀྱི་གཙོ་བོ་གིས་འཕྲོ་མཐུད་དེ་རང་ ང་ལུ་རྫོགས་ནི་མེད་པའི་ཐུགས་རྗེ་དེ་གིས་ ཁོ་ལུ་དད་པ་བསྐྱེད་ནི་དང་ ཁིརཱིས་ཡེ་ཤུ་ནང་ རོགས་ལུ་བྱམས་པ་འབད་མི་སྦེ་ ཁོ་གིས་ང་ལུ་བཟོ་གནང་ཡི།

¹⁵ ཁིརཱིས་ཡེ་ཤུ་དེ་འཛམ་བུ་གླིང་ནང་ མི་སྡིག་ཅན་ལུ་སྐྱབས་མཛད་ནིའི་དོན་ལུ་ བྱོན་ཡི་ཟེར་ གཏམ་དེ་བདེན་པ་དང་ཆ་བཞག་ཚུགས་མི་ཅིག་ཨིན་ ད་ ག་ར་གི་གྲལ་ལས་ སྡིག་ཅན་གཙོ་བོ་འདི་ང་རང་ཨིན།

¹⁶ དེ་འབདཝ་ད་ཤུལ་ལས་ མི་སྡིག་ཅན་ཚུ་གིས་དད་པ་བསྐྱེད་དེ་ ཚེ་མཐའ་མེདཔ་ཐོབ་ནིའི་དོན་ལུ་ ང་མི་སྡིག་ཅན་སྐྱོ་ཤོས་ལུ་སྙིང་རྗེ་གཟིགས་ཏེ་ ཡེ་ཤུ་ཁིརཱིས་ཀྱིས་ཁོ་གི་བཟོད་པ་ཚད་མེདཔ་དེ་ ང་ལུ་གནང་སྟེ་ ངེ་གི་ཐོག་ལས་སྦེ་མི་ག་ར་གི་དོན་ལུ་ དཔེ་སྦེ་སྟོན་གནང་ཡི།

¹⁷ དུས་ཚོད་མཇུག་བསྡུ་ནི་མེད་པའི་རྒྱལཔོ་ ནམ་ཡང་གཤགས་ནི་མེདཔ་ ང་བཅས་ཀྱིས་མཐོང་ཡང་མ་ཚུགས་པའི་དཀོན་མཆོག་གཅིགཔ་དེ་ གཟི་བརྗིད་དང་གུས་ཞབས་ དུས་རྒྱུན་དུ་རང་ ཁོ་གི་ཨིན་ནོ་ ཨ་མཱེན།།

ཏི་མོ་ཐི་ལུ་ན་འཐན་ཏོག་ཏོ་སྦེ་སྡོད་དགོ་པའི་བཀོད་རྒྱ་གི་སྐོར།

¹⁸ ངེ་གི་བུ་ ཏི་མོ་ཐི་ ཧེ་མ་ཁྱོད་ཀྱི་སྐོར་ལས་ ལུང་བསྟན་བཤད་མི་ཚུ་ལེགས་ཤོམ་སྦེ་དྲན་དགོ་ཟེར་ང་གིས་ཁྱོད་ལུ་བཀོད་རྒྱ་བྱིན་དོ་ ལུང་བསྟན་འདི་ཚུ་དང་འཁྲིལ་ཏེ་ ཁྱོད་ཀྱིས་ བདེན་པའི་ཕྱད་མདའ་མ་འདྲོག་པར་ དམག་མི་ལེགས་ཤོམ་བཟུམ་སྦེ་བརྐྱབས་དགོཔ་ཨིནམ་མ་ཚད།

¹⁹ དད་པ་སྒྲིང་སྒྲིང་སྦེ་བསྐྱེད་དེ་ དྲན་ཤེས་གསལ་ཏོག་ཏོ་གི་ཐོག་ལས་སྡོད་དགོཔ་ཨིན་ མི་ལ་ལུ་ཅིག་གིས་ དྲན་ཤེས་གསལ་ཏོག་ཏོ་སྦེ་སྡོད་དགོ་མ་མནོ་བར་ ཁོང་རའི་དད་པ་ལུ་མེདཔ་གཏངམ་ཨིན་མས།

²⁰ དེ་ཚུ་གི་གྲལ་ལས་ ཧའི་མེ་ན་ཡཱེས་དང་ ཨ་ལེག་སཱན་ཌཱེར་ཟེར་མི་གཉིས་ཨིན་ ང་གིས་ཁོང་གཉིས་ལུ་བདུད་ སེ་ཏཱན་གྱི་ལག་པ་སྤྲོད་ཅི་ འདི་གི་དོན་དག་འདི་ ཁོང་མནོ་ལོག་བསྐྱེད་དེ་ དཀོན་མཆོག་ལུ་སྐུར་པ་མི་བཏབ་ནི་སྦེ་ཨིན།།