ཐེ་ས་ལོ་ནི་ཀ་དང་པ་ལེའུ་ 4 - རྫོང་ཁ་

དཀོན་མཆོག་གི་ཐུགས་དགྱེས་བའི་ལཱ་གི་སྐོར།

¹ དབའེ་སྤུན་ཆ་ཚུ་ མཐའན་མཇུག་ལུ་དོན་དག་མདོར་བསྡུས་ཏེ་ཞུ་བ་ཅིན་ ང་བཅས་ཀྱིས་ཁྱེད་ལུ་སྟོན་དོ་བཟུམ་སྦེ་ ཁྱེད་ཀྱིས་ དཀོན་མཆོག་གི་ཐུགས་དགྱེས་པའི་ལཱ་དང་ སྤྱོད་ལམ་ལེགས་ཤོམ་ཚུ་འབད་དེ་རང་སྡོད་ནུག་ ད་རུང་འདི་ལས་ལྷགཔ་སྦེ་ སྤྱོད་ལམ་ལེགས་ཤོམ་འབད་དེ་སྡོད་ཟེར་ ང་བཅས་ཀྱིས་གཙོ་བོ་ཡེ་ཤུ་གི་མཚན་ནང་ ཁྱེད་ལུ་ཞུ་བ་ཕུལ་དོ།

² ག་ཅི་སྨོ་ཟེར་བ་ཅིན་ གཙོ་བོ་ཡེ་ཤུ་གིས་ང་བཅས་ལུ་གནང་མི་དབང་ཚད་ཀྱི་ཐོག་ལས་སྦེ་ ང་བཅས་ཀྱིས་ཁྱེད་ལུ་སྟོན་བྱིན་མི་བཀོད་རྒྱ་དེ་ཚུ་ ཁྱེད་ཀྱིས་ཤེས།

³ ཁྱེད་ འདོད་ཆགས་དང་ སྤྱོད་པ་ངན་པའི་དབང་དུ་མ་གཏང་བར་ ལུས་གཙང་ཏོག་ཏོ་སྦེ་སྡོད་དགོཔ་དེ་ དཀོན་མཆོག་གིས་ཐུགས་དགྱེས་མི་ལཱ་དེ་ ཨ་ནི་ཨིན།

⁴ ད་ག་གིས་རང་འབད་རུང་ གུས་ཞབས་དང་ལྡན་ནི་དང་ ལུས་གཙང་ཏོག་ཏོ་སྦེ་སྡོད་དགོ་པ་ཅིན་ རང་གི་ལུས་ལུ་འདོད་ཆགས་ཀྱི་བཀག་ཐབས་ ག་དེ་སྦེ་འབད་ནི་ཨིན་ན་ ཁྱེད་ཀྱིས་ལྷབ་དགོ།

⁵ དཀོན་མཆོག་དང་གཞན་འབྲེལ་མེད་མི་ ཕྱིའི་མི་རིགས་དེ་ཚུ་བཟུམ་སྦེ་ ཁྱེད་རང་གིས་འདོད་པ་ལུ་ཆགས་ཏེ་སྡོད་ནི་མི་འོང་།

⁶ ཨ་ནི་བློ་འདི་གི་སྐོར་ལས་ ག་ར་འབད་རུང་ ཁྱེད་རང་ཡེ་ཤུ་པ་སྤུན་ཆ་གི་སྦུག་ལུ་ ཆ་རོགས་བཟོ་ཞིནམ་ད་ འདོད་ཆགས་ཀྱིས་དབང་དུ་གཏང་སྟེ་ ལཱ་ངན་པ་འབད་ནི་མི་འོང་ ཨ་ནི་ལོ་རྒྱུས་འདི་ཚུ་ང་བཅས་ཀྱིས་ཁྱེད་ལུ་ཧེ་མ་ལས་བརྡ་ཞུ་དོ་ ག་ཅི་སྨོ་ཟེར་བ་ཅིན་ གཙོ་བོ་གིས་ འདི་ཚུ་ག་ར་མཁྱེན་ཏེ་ཁྲིམས་བཀལ་འོང་།།

དྲིན་བཀལ་ཏེ་དདཔ་ཅན་ལས་ཆ་རོགས་འཚོལ་ནི་མེད་པའི་སྐོར།

⁷ ང་བཅས་འདོད་ཆགས་ལུ་བརྟེན་ཏེ་ བཙོག་པ་སྦེ་སྡོད་ནི་མེན་པར་ དཀོན་མཆོག་གིས་ང་བཅས་ལུ་གཙང་ཏོག་ཏོ་སྦེ་སྡོད་ནི་དོན་ལུ་ འབོ་འབོཔ་ཨིན།

⁸ དེ་འབདཝ་ལས་བརྟེན་ཏེ་ ང་བཅས་ཀྱིས་སྟོན་མི་བཀོད་རྒྱ་འདི་ལུ་ཆ་མ་བཞག་མི་དེ་ མི་ལུ་ཆ་མ་བཞགཔ་མེན་པར་ དམ་པའི་ཐུགས་ཉིད་གནང་མི་དཀོན་མཆོག་ལུ་ ཆ་མ་བཞགཔ་ཨིན།

⁹ ད་ང་བཅས་ཀྱིས་ཁྱེད་དདཔ་ཅན་སྤུན་ཆ་ཚུ་ལུ་ གཅིག་གིས་གཅིག་ལུ་ བྱམས་པ་ག་དེ་སྦེ་འབད་དགོ་ག་ཟེར་ ད་རུང་འབྲི་མི་དགོ་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཁྱེད་ལུ་ འདི་གི་སྐོར་ལས་སྟོན་གནང་ཚར་ཡི།

¹⁰ དོན་ལས་རང་ཁྱེད་ཀྱིས་ མ་ཀེ་དོ་ནི་ཡ་ལུང་ཕྱོགས་ཀྱི་དདཔ་ཅན་སྤུན་ཆ་ག་ར་ལུ་ བྱམས་པ་འབདཝ་ཨིན་མས་ འདི་རང་ཨིན་རུང་ འདི་ལས་ཡང་ལྷགཔ་སྦེ་ འཕྲོ་མཐུད་དེ་རང་འབད་ཟེར་ ང་བཅས་ཀྱིས་ཁྱེད་ལུ་དྲན་བསྐུལ་ཞུ་དོ།

¹¹ ག་གིས་རང་འབད་རུང་ ཞི་བདེ་ལུ་དགའ་ནི་དང་ གཞན་གྱི་བར་ན་དཀྲོགས་ཁ་མ་རྐྱབ་ནི་ རང་གི་ལཱ་དེ་ རང་གི་ལག་པ་གིས་འབད་ནི་གི་རེ་འདོད་བསྐྱེད་དགོ།

¹² ཨ་རྟག་ར་ཁྱེད་ཀྱི་མི་ཚེ་ནང་འདི་བཟུམ་སྦེ་འབད་བ་ཅིན་ རང་ལུ་དགོ་མི་གཞན་ལས་རེ་མི་དགོཔ་མ་ཚད་ དད་པ་མ་བསྐྱེད་མི་དེ་ཚུ་གིས་ཡང་ ཁྱེད་ཀྱི་སྤྱོད་ལམ་ལུ་བལྟ་སྟེ་ ཁྱེད་ལུ་ཞེ་ས་འབད་འོང་།།

གཙོ་བོ་ལོག་འབྱོན་ནི་གི་རེ་བ་བསྐྱེད་པའི་སྐོར།

¹³ མི་གཅིག་གྱོངསམ་ད་ ག་ནི་ཡང་མ་ཤེས་མི་ རེ་བ་མེད་མིའི་མི་ཚུ་བཟུམ་སྦེ་ ཁྱེད་དདཔ་ཅན་སྤུན་ཆ་ཚུ་ སེམས་ཤི་སྟེ་མ་སྡོད་ ང་བཅས་ཡེ་ཤུ་པ་ཚུ་གྱོངསམ་ད་ ག་ཅི་འབྱུང་ནི་ཨིན་ན་ དེ་ཁྱེད་ལུ་སླབ་དོ།

¹⁴ ག་ཅི་སྨོ་ཟེར་བ་ཅིན་ ཡེ་ཤུ་གཤགས་ས་ལས་ སྐུ་གསོན་པོ་སྦེ་བཞེངསམ་ལས་བརྟེན་ཏེ་ ད་རུང་ཡེ་ཤུ་ལོག་འབྱོནམ་ད་ ཁོ་ལུ་དད་པ་བསྐྱེད་དེ་གྱོངས་སོང་མི་འདི་ཚུ་ལུ་ཡང་ དཀོན་མཆོག་གིས་ཤི་ས་ལས་ཡར་ལྷོང་གནང་སྟེ་ ཡེ་ཤུ་དང་མཉམ་གཅིག་སྡོད་བཅུག་ནི་ཨིན་ཟེར་ ང་བཅས་ཀྱིས་དད་པ་བསྐྱེདཔ་ཨིན།

¹⁵ གཙོ་བོ་ཡེ་ཤུ་གིས་གསུངས་མི་དེ་དང་འཁྲིལ་ཏེ་ ང་བཅས་ཀྱིས་ཁྱེད་ལུ་སླབ་ཨིན་ ཡེ་ཤུ་ལོག་འབྱོན་པའི་དུས་ལུ་ གསོན་པོ་སྦེ་སྡོད་ཡོད་མི་ཚུ་ ཡེ་ཤུ་དང་གཅིག་ཁར་ ཐད་རི་བ་རི་ ཁོང་གྱོངས་སོང་མི་དེ་ཚུ་གི་ཧེ་མ་མི་འགྱོ།

¹⁶ ག་ཅི་སྨོ་ཟེར་བ་ཅིན་ བཀའ་གནང་ཞིནམ་ད་ ཕོ་ཉ་སྦོམ་ཤོས་གཅིག་གིས་སྐད་རྐྱབ་ དཀོན་མཆོག་གི་དུང་ཕུ་སྟེ་ གཙོ་བོ་ཁོ་རང་གནམ་ཁ་ལས་མར་བྱོན་ཏེ་ དང་པ་ ཁིརཱིས་ལུ་དད་པ་བསྐྱེད་དེ་གྱོངས་སོང་མི་དེ་ཚུ་ ག་ར་གསོན་པོ་སྦེ་ལོང་ནི་ཨིན།

¹⁷ དེ་ལས་ང་བཅས་གསོན་པོ་སྦེ་སྡོད་མི་འདི་ཚུ་ ཁོང་གྱོངས་སོང་མིའི་མི་ཚུ་གསོན་པོ་སྦེ་ལོང་མི་དང་གཅིག་ཁར་ གཙོ་བོ་དང་མཇལ་བ་ ཡར་ས་སྨུག་ནང་ལུ་འཁྱིད་དེ་འགྱོ་འོང་ དེ་ལས་ང་བཅས་དུས་རྒྱུན་དུ་རང་ གཙོ་བོ་དང་མཉམ་གཅིག་སྡོད་འོང་།

¹⁸ དེ་ལས་ཕར་ ཨ་ནི་ལོ་རྒྱུས་འདི་ཚུ་གིས་ གཅིག་གིས་གཅིག་ལུ་སེམས་གསོ་འབད་དེ་ དགའ་ཚོར་འགྱུར།།