ཐེ་ས་ལོ་ནི་ཀ་དང་པ་ལེའུ་ 3 - རྫོང་ཁ་

¹ ང་བཅས་ཁྱེད་དང་མཉམ་འཕྱད་དགོ་མནོ་སྟེ་མ་ཆགས་པར་ རྩ་འགེངས་རུང་ མཐའན་མཇུག་ལུ་ང་བཅས་རང་འོང་མ་ཚུགས་པར་ ང་བཅས་གཉིས་ཁྲོམ་ ཨ་ཐེན་ནང་སྡོད་དེ།

² ཏི་མོ་ཐི་ ཁྱེད་སྡོད་སར་བཏང་ཡི་ ཁོ་ཁིརཱིས་ཀྱི་གཏམ་བཟང་བཤད་ནི་ནང་ དཀོན་མཆོག་གི་ཕྱག་ལཱ་ནང་ ང་བཅས་ཀྱི་མཉམ་རོགསཔ་ཨིན་ ཁྱེད་ཀྱི་དད་པ་འདི་བརྟན་ཏོག་ཏོ་སྦེ་བཟོ་ནི་དང་ ཆ་རོགས་འབད་ནིའི་དོན་ལུ་ ང་བཅས་ཀྱིས་ ཏི་མོ་ཐི་བཏང་ཡི།

³ དེ་ སྡུག་བསྔལ་ཐོབ་པའི་སྐབས་ལུ་ ཁྱེད་ཀྱི་སྦུག་ལས་ མི་ག་ཡང་དཀོན་མཆོག་ལས་འཐུས་མ་ཤོར་བར་ དད་པ་ནང་སྒྲིང་སྒྲིང་སྦེ་སྡོད་ཚུགས་ནི་གི་དོན་ལུ་ཨིན་ ག་ཅི་སྨོ་ཟེར་བ་ཅིན་ དེ་སྦེ་བྱུང་མི་དེ་ དཀོན་མཆོག་གི་ཐུགས་དགོངས་ཨིན་ཟེར་ ཁྱེད་ཀྱིས་ཤེས།

⁴ ཧེ་མ་ང་བཅས་ཁྱེད་དང་གཅིག་ཁར་སྡོད་པའི་བསྒང་ ཨ་ནི་སྡུག་བསྔལ་འདི་འབྱུང་འོང་ཟེར་ང་བཅས་ཀྱིས་སླབ་ཅི་ འདི་བཟུམ་སྦེ་ར་སྡུག་བསྔལ་འབྱུངམ་ད་ ཁྱེད་ཀྱིས་ལེགས་ཤོམ་སྦེ་ཤེས་ཅི།

⁵ འདི་འབདཝ་ལས་བརྟེན་ཏེ་ བར་ཆད་ནང་ཚུད་བཅུག་མི་བདུད་དེ་གིས་ ཁྱེད་ལུ་བར་ཆད་བརྐྱབས་ཏེ་ ང་བཅས་ཀྱིས་འབད་མི་ལཱ་དེ་ཚུ་ དོན་དག་མེདཔ་འགྱོ་དོ་ཟེར་མནོ་སྟེ་ ང་གནམ་མེད་ས་མེད་ཚ་གྱང་ལངས་ཏེ་ ང་རང་གིས་ཁྱེད་ཀྱི་དད་པ་འདི་བལྟ་ནིའི་དོན་ལུ་ ཏི་མོ་ཐི་བཏང་ཡི།

⁶ ད་ལྟོ་ ཏི་མོ་ཐི་ ཁྱེད་སྡོད་ས་ལས་ལོག་འོངམ་ད་ ཁྱེད་ཆ་ཁྱབ་དཀོན་མཆོག་ལུ་དད་པ་བསྐྱེད་དེ་ གཅིག་གིས་གཅིག་ལུ་བྱམས་པ་འབད་དེ་སྡོདཔ་མས་ཟེར་ ཁྱེད་ཆ་ཁྱབ་ཀྱི་སྐོར་ལས་ཧན་ཏོང་ཏོ་སྦེ་སླབ་དེས་ འདི་མ་ཚད་ ཁྱེད་ཀྱིས་ང་བཅས་ཀྱི་སྐོར་ལས་ལེགས་ཤོམ་སྦེ་སླབ་མ་ཚད་ ང་བཅས་ཀྱིས་ཁྱེད་དང་མཉམ་གཅིག་འཕྱད་དགོ་མནོ་དོཝ་བཟུམ་སྦེ་ ཁྱེད་ཡང་ང་བཅས་དང་འཕྱད་དགོ་མནོ་སྟེ་ སེམས་ཁར་ལུ་དྲན་ཏེ་སྡོདཔ་མས་ཟེར་སླབ་དེས།

⁷ འདི་གི་དོན་ལུ་སྤུན་ཆ་ཚུ་ ང་བཅས་ཀྱིས་སྡུག་བསྔལ་དང་དཀའ་ངལ་འདི་ཚུ་མྱོང་སྟེ་སྡོདཔ་ད་ ཁྱེད་ཀྱི་དད་པ་ཤུགས་ཆེ་དྲགས་ཀྱི་སྐོར་ལས་གོ་སྟེ་ ང་བཅས་སེམས་གསོ་ཐོབ་ཅི།

⁸ ག་ཅི་སྨོ་ཟེར་བ་ཅིན་ ཁྱེད་ཀྱིས་གཙོ་བོ་དང་འཁྲིལ་ཏེ་ དད་པ་སྒྲིང་སྒྲིང་སྦེ་སྡོད་ནི་འདི་གིས་ ང་བཅས་ཀྱི་མི་ཚེ་འདི་དོན་དང་ལྡནམ་སོང་ཡི།

⁹ ཁྱེད་ཀྱི་སྐོར་ལས་གོཝ་ད་ དཀོན་མཆོག་གི་སྐུ་མདུན་ལུ་དགའ་སྤྲོ་བྱུང་སྟེ་ ང་བཅས་ཀྱིས་ཁྱེད་ཀྱི་དོན་ལས་ དཀོན་མཆོག་ལུ་ག་དེ་སྦེ་བཀའ་དྲིན་ཆེ་ཟེར་ཞུ་ནི་ཨིན་ན་ ཞུ་མི་ཚུགས་པས།

¹⁰ ང་བཅས་ཀྱིས་ཁྱེད་དང་ཁ་འཕྱད་ཚུགས་ནིའི་དོན་ལུ་དང་ ཁྱེད་ཀྱི་དད་པ་ནང་ལུ་ ག་དགོ་མི་འདི་ཐོབ་ཚུགས་ནི་གི་དོན་ལུ་ ཉིན་ནུབ་མེད་པར་སེམས་ཀྱི་གཏིང་ལས་རང་ སྨོན་ལམ་ཞུ་སྟེ་སྡོདཔ་ཨིན།

¹¹ ང་བཅས་ཀྱི་ཡབ་དཀོན་མཆོག་ཁོ་རང་དང་ གཙོ་བོ་ཡེ་ཤུ་གིས་ ང་བཅས་ཁྱེད་སྡོད་སར་འོང་ནི་གི་ལམ་འདི་སེལ་གནང་བཅུག

¹² ང་བཅས་ཀྱིས་ཁྱེད་ལུ་ག་དེ་སྦེ་བྱམས་པ་འབད་དོ་ག་ འདི་བཟུམ་སྦེ་ར་ ཁྱེད་རང་གཅིག་གིས་གཅིག་ལུ་དང་ མི་ག་ར་ལུ་ བྱམས་པ་འབད་ནི་གི་དོན་ལུ་ གཙོ་བོ་གིས་ཁྱེད་ཀྱི་སེམས་ཁར་ཡར་རྒྱས་མཛད་བཅུག

¹³ འདི་བཟུམ་སྦེ་རང་ གཙོ་བོ་ཡེ་ཤུ་ཁོ་རང་གི་མི་ཚུ་དང་མཉམ་འབྱོན་པའི་སྐབས་ལུ་ ང་བཅས་ཀྱི་ཡབ་དཀོན་མཆོག་གི་སྐུ་མདུན་ སྐྱོན་ག་ནི་ཡང་མེདཔ་དང་ མི་དམ་པ་སྦེ་སྡོད་ནི་གི་དོན་ལུ་ ཁྱེད་ཀྱི་སེམས་སྒྲིང་སྒྲིང་མཛད་གནང་བཅུག།